ပြည်တွင်းကုန်သွယ်မှုသတင်း

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မြို့မစည်ပင်သာယာဈေးတွင် ဘုရားပန်း အမျိုးမျိုးဖြစ်သော ဂန္ဓာမာပန်း၊ သစ္စာပန်း၊ စိန်လည်တုံ၊ နှင်းဆီ၊ မေမြို့ပန်း(အက်စတာ)၊ မြေမြို့ပန်း (ကြက်လည်ဆံ) သပြေပန်း(အောင်သပြေ)အငုတ်၊ အောင်သပြေ အခက်များနှင့် အာစီယံသပြေများကို  မိမိတို့ ဒေသထွက်နှင့် မန္တလေးမြို့၊ ပြင်ဦးလွင်မြို့တို့မှ မှာယူရောင်းချကြောင်းသိရှိရပါသည်။

          သစ္စာပန်းသည် တစ်ခိုင်လျှင်(၈)ပွင့်မှ(၁၀)ပွင့်အထိပါခြင်း၊ ဘုရားပန်းကပ်လှူပူဇော်ရာတွင်လည်း အနည်းဆုံးတစ်ပတ်အထိထားခံပြီး ပန်းခိုင်ဆုံးသည်အထိပွင့်သောကြောင့် သစ္စာပန်းသည် လူကြိုက်များ သော ပန်းတစ်မျိုးဖြစ်သည်။ သို့သော် မိမိတို့ဒေသတွင်း စိုက်ပျိုးကြသည်ကို ယခင်ကာလများတွင် အနည်းငယ်သာတွေ့ရှိရပြီး ယခုနောက်ပိုင်းတွင် သစ္စာပန်းကို စိုက်ပျိုးခြင်း မရှိသည့်အတွက် မန္တလေးမြို့ ၊ ရှမ်းပြည်နယ်နှင့်ပြင်ဦးလွင်မြို့တို့မှ သစ္စာပန်းကို မှာယူရောင်းချရကြောင်း ပန်းသည်ထံမှသိရှိရပါသည်။

          ၂၀၂၅ ခုနှစ်၊ ယခု ဖေဖော်ဝါရီလ(ဒုတိယပတ်)တွင် သစ္စာပန်း ဈေးနှုန်းဖြင့် သစ္စာပန်း(၅)ခက်ပါ တစ်စီးလျှင်(၁၅၀၀)ကျပ် ဈေးနှုန်းတို့ဖြင့် ရောင်းချလျက်ရှိကြောင်း ကန့်ဘလူမြို့ မြို့မစည်ပင်သာယာဈေးတွင် ဘုရားပန်းမျိုးစုံ ရောင်းချနေသော ပန်းသည်ထံမှ သိရှိရပါသည်။

DOCA(စစ်ကိုင်း)

           မကွေးတိုင်းဒေသကြီး၊ ဂန့်ဂေါခရိုင်၊ ထီးလင်းမြို့နယ်၌ ဒေသစီးပွားဖြစ်စိုက်ပျိုးရေးလုပ်ငန်းကို အဓိကထားလုပ်ကိုင်ပြီး စပါး၊ မြေပဲ၊ နှမ်း၊ ပဲပုတ်စသည့်ဆီထွက်သီးနှံများအပြင် ကြက်သွန်ဖြူ၊ စားတော် ပဲသီးနှံများကို နှစ်စဉ်ရာသီအလိုက်စိုက်ပျိုးကြကြောင်း၊ ပြည်တွင်းဈေးကွက်ခိုင်မာမှုရရှိနေသည့်ပဲယင်းနီ၊ ပဲယင်းဝါသီးနှံများကိုလည်း နှစ်စဉ်မပြတ်စိုက်ပျိုးကြကြောင်း သိရသည်။ ထီးလင်းမြို့နယ်အတွင်းရှိ ဝက်လက်၊ လုံးပေါင်၊ လက်ပံ၊ ဒေါသာ၊ သရပ်ခါ စသည့်ကျေးရွာများတွင် ပဲယင်းသီးနှံကို စိုက်ဧက (၅၀၀၀)ခန့် စိုက်ပျိုးကြောင်း၊ ၂၀၂၄ခုနှစ်၊ အောက်တိုဘာလတွင်စတင်စိုက်ပျိုးပြီး ၂၀၂၅ခုနှစ်၊ ဖေဖော်ဝါရီလတွင် သီးနှံရိတ်သိမ်းကြောင်း၊ မျိုးအနေဖြင့် ပဲယင်းဝါနှင့်ပဲယင်းနီနှစ်မျိုးစိုက်ပျိုးကြောင်း၊ (၁)ဧကလျှင် မျိုးစေ့(၂)ပြည်ခန့် ကုန်ကျပြီး အထွက်တင်းအနေဖြင့် ပျမ်းမျှ(၁၅-၂၀)တင်းခန့် ထွက်ရှိပြီး ကုန်ကျစရိတ်အနေဖြင့် ပဲယင်းသီးနှံစိုက်ပျိုးရာတွင် အလုပ်သမားငှားရမ်းမှုကုန်ကျစရိတ် နည်းခြင်း ကြောင့် ကျပ်(၂)သိန်းခန့် ကုန်ကျကြောင်းသိရသည်။

          ဈေးနှုန်းအနေဖြင့် သီးနှံပေါ်ချိန် ဒေသတွင်း ဈေးကွက်တွင် ပဲယင်းဝါ(၁)တင်းလျှင် ကျပ် (၆၂၅၀၀ -၇၀၀၀၀)၊ ပဲယင်းနီ(၁)တင်းလျှင် ကျပ်(၇၄၀၀၀-၇၆၀၀၀)ဈေးဖြင့် အရောင်းအဝယ်ဖြစ်ပြီး (၁)ဧက အကျိုးအမြတ်အနေဖြင့် ကျပ်(၈)သိန်းခန့် ရရှိကြောင်း၊ ဈေးကွက်အနေဖြင့် ထီးလင်းမြို့နယ်အတွင်း ထွက်ရှိသည့် ပဲယင်းသီးနှံများကို ပခုက္ကူပဲဈေးကွက်သို့တင်ပို့ရောင်းချကြောင်း၊ ထိုမှတစ်ဆင့် ရန်ကုန်၊ မန္တလေးဈေးကွက်သို့ တင်ပို့ကြောင်း သိရသည်။

          ပဲယင်းသီးနှံသည် ပရိုတင်းဓာတ်ပြည့်ဝစွာပါရှိခြင်းကြောင့် နှလုံးကျန်းမာရေးကို ကောင်မွန်စေပြီး အဟာရဓာတ်များစွာပါဝင်၍ ကျန်းမာရေးအထောက်အကူပြုသီးနှံတစ်မျိုးဖြစ်သည်။ အညာဒေသတွင် ပဲယင်းကိုပြုတ်၍ ထမင်းဆီဆမ်းဖြင့် စားသုံးကြခြင်းအပြင် မြန်မာမုန့်များတွင်လည်း ထည့်သွင်း၍ အသုံးပြုစားသုံးကြသည်။ တောင်သူများအနေဖြင့်လည်း စိုက်ပျိုးစရိတ်သက်သာပြီး မိသားစုစီးပွားဖြစ် ဝင်ငွေတိုးစေသောကြောင့် ပဲယင်းသီးနှံကို တိုးချဲ့စိုက်ပျိုးသင့်ကြောင်း ရေးသားတင်ပြလိုက်ရပါသည်။

DOCA(မကွေး)

တနင်္သာရီတိုင်းဒေသကြီး၊ ထားဝယ်မြို့တွင် ဒေသအတွင်းစိုက်ပျိုးထွက်ရှိသည့် သီးနှံ စျေးနှုန်းများ ရာသီပေါ်အစားအစာများ၏ စျေးနှုန်း၊စျေးကွက်အခြေအနေတို့အား ရေးသားတင်ပြ လျက်ရှိကြောင်း သိရပါသည်။ ထားဝယ်မြို့ ဒေသအစားအစာဖြစ်သည့် ခေါက်မုန့်လိပ် သည်အလွန်ပင်‌ရောင်း ကောင်း သောအစားအစာတစ်ခုဖြစ်သည်။ ထားဝယ်ဒေသထွက် အစားအစာဖြစ်သည့် ခေါက်မုန့်လိပ်ကို ထားဝယ် သို့လာရောက်လည်ပတ်ကြသည့် ဧည့်သည်များကလည်း အိမ်ပြန်လက်ဆောင်အနေဖြင့် ဝယ်ယူကြပါ သည်။ 

ယခုအခါ ထားဝယ်မြို့တွင် စျေးကြီးများနှင့်ကုန်စုံဆိုင်ကြီးများတွင် ခေါက်မုန့်လိပ်များကို တစ် ကြုပ်လျှင်(၂၅၀၀)ကျပ်ရှိ ကြောင်းသိရှိရပါသည်။

DOCA(တနင်္သာရီ)

          မုန့်လက်ဆောင်းသည် ပူပြင်းခြောက်သွေ့သည် ရာသီဥတုနှင့်အလိုက်ဖက်ဆုံး မုန့်တစ်မျိုး ဖြစ်သလို ‌သောက်လိုက်လျှင်လည်း ရင်ထဲကိုအေးမြသွားစေပါသည်။ မုန့်လက်ဆောင်းသည် မုန့်ဖတ်၊ ထန်းလျက်၊ဆား၊သကြား၊ အုန်းနို့တို့ဖြင့် ပြုလုပ်ရပါသည်။ ကုန်ကျစရိတ်များသဖြင့် မုန့်လက်ဆောင်း ရောင်းသူများအတွက်လည်း အဆင်ပြေလျက်ရှိကြောင်း သိရှိရပါသည်။

ယခုအခါ ထားဝယ်မြို့တွင် မုန့်လက်ဆောင်းကို စျေးကြီးများနှင့် လမ်းဘေးဆိုင်များတွင် လည်း ရောင်းချလျက်ရှိပြီး မုန့်လက်ဆောင်းတစ်ခွက်လျှင်(၁၀၀၀)ကျပ်ဖြင့် ရောင်းချလျက်ရှိကြောင်း သိရှိရပါ သည်။

DOCA(တနင်္သာရီ)

          မကွေးတိုင်းဒေသကြီး၊ ပခုက္ကူမြို့ပေါ်တွင် မန်ကျည်းသီးမှည့်အသစ်များ ဝင်ရောက်အရောင်း အဝယ်ဖြစ်လျက်ရှိပြီး အဓိကအားဖြင့် ယောနယ်ဒေသများနှင့် ကျောက်ပန်းတောင်းမြို့၊ ဆိပ်ဖြူမြို့၊ မြိုင်၊ ကမ္မနှင့် မြစ်ခြေမြို့များမှ ထွက်ရှိသော မန်ကျည်းသီးမှည့်သစ်များ နေ့စဉ် ဝင်ရောက်အရောင်းအဝယ် ဖြစ်လျက်ရှိပါသည်။

          ၂၀၂၅ခုနှစ်၊ ဖေဖော်ဝါရီလ(ပထမပတ်)တွင် မန်ကျည်းသီးအစေ့ပါများဝင်ရောက်မှုနည်းပါးပြီး အစေ့လွတ်မန်ကျည်းသားများကို မြို့ပေါ်ရှိ လှောင်လက်ပွဲစားများမှ ဒေသတွင်း နေရာအနှံ့အပြားသို့ ရောင်းချလျက်ရှိသည်။ ဈေးနှုန်းအနေဖြင့် ဖေဖော်ဝါရီလ(ပထမပတ်)တွင် မန်ကျည်းမှည့်အစေ့လွတ် တစ်ပိဿာလျှင် လက်ကားဈေး ကျပ်(၁၃၀၀၀-၁၅၀၀၀)၊ လက်လီဈေး ကျပ်(၁၈၀၀၀)ဈေးဖြင့် အရောင်း အဝယ်ဖြစ်ပြီး ယခင်ဇန်နဝါရီလ(ပထမပတ်)တွင် လက်ကားဈေးကျပ်(၁၀၀၀၀)၊ လက်လီဈေး ကျပ် (၁၃၀၀၀)ဖြင့် အရောင်းအဝယ်ဖြစ်ခဲ့ရာ ဈေးနှုန်းနှိုင်းယှဉ်ပါက တစ်လအတွင်း မန်ကျည်းအစေ့လွတ် တစ်ပိဿာလျှင် ကျပ်(၅၀၀၀)ခန့် ဈေးတက်ပြီး အရောင်းအဝယ်ဖြစ်ခဲ့ကြောင်း၊ ဈေးနှုန်းမြင့်တက်ရ ခြင်းမှာ ယခုအချိန်တွင် မန်ကျည်းသီးမှည့်အသစ်များ ဈေးကွက်သို့ ကုန်ဝင်ရောက်မှုများသော်လည်း သယ်ယူစရိတ်မြင့်တက်ခြင်းကြောင့်ဖြစ်ကြောင်း ဈေးကွက်မှ သိရသည်။

          မန်ကျည်းသားများကို ပခုက္ကူမြို့ပေါ်ရှိ လှောင်လက်သမားများမှ ဝယ်ယူထားရှိပြီး ပြန်လည် ရောင်းချကြကြောင်း၊ အကြော်ဆိုင်၊ အကင်ဆိုင်များမှ မန်ကျည်းသီးအချဉ်ရည်များ ပြုလုပ်ရန်အတွက် ဝယ်ယူခြင်း၊ မန်ကျည်းဖျော်ရည်လုပ်ငန်းများနှင့် မန်ကျည်းတော်ဖီလုပ်ငန်းရှင်များမှလည်း အများအပြားဝယ်ယူသည့်အပြင် ရန်ကုန်မြို့နှင့်မန္တလေး မြို့များသို့လည်း တင်ပို့လျက်ရှိကြောင်း သိရှိရပါသည်။

DOCA(မကွေး)