သာစည်မြို့နယ်သည် လယ်ယာထွက်ကုန်သီးနှံမျိုးစုံစိုက်ပျိုးလျက်ရှိရာမှ ဟင်းသီးဟင်းရွက် သစ်သီးဝလံတစ်မျိုးဖြစ်သည့် ခရမ်းချဉ်သီးကို စီးပွားဖြစ် စိုက်ပျိုးလာကြပါသည်။
သာစည်ဈေးကွက်အတွင်း ခရမ်းချဉ်သီးအမျိုးအစားများ ဖြစ်ကြသော ရှမ်းသီး(ခေါ်) အင်းသီး၊ ထိုင်ဝမ်သီး၊ဗမာသီးများ မျိုးစုံစွာ ဝင်ရောက်လျက်ရှိပါသည်။ ခရမ်းချဉ်သီး(အင်းသီး)နှင့် ထိုင်ဝမ် သီးတို့ကို ရှမ်းပြည်နယ်နှင့် ပြင်ဦးလွင်ဒေသတို့မှ ဝင်ရောက်လျက်ရှိပြီး ဈေးကွက်တွင် ဝယ်လိုအား ရှိသည့်အတွက် သာစည်မြို့နယ်တွင်လည်း ထိုင်ဝမ် ခရမ်းချဉ်သီးများကိုလည်း စီးပွားဖြစ် စိုက်ပျိုး လာကြပါသည်။ မိုးရာသီဖြစ်သည့် ဇွန်လတွင် စတင်စိုက်ပျိုးကြပြီး စိုက်ပျိုးပြီး(၃) လအကြာ တွင် စတင်ခူးဆွတ်နိုင်ကြောင်း၊ ခရမ်းချဉ်သီးစိုက်ပျိုးရာ တွင် မြေပြုပြင်ခြင်း၊ လုပ်သားခနှင့် သွင်းအားစု စုစုပေါင်း တစ်ဧကလျှင် (၁၀၀၀၀၀၀) ကျပ်ခန့် ကုန်ကျကြောင်း၊ ဈေးကွက်အနေဖြင့် ရွာအရောက်ပွဲစားများ လာရောက်ဝယ်ယူမှုရှိသည့်အပြင် တောင်သူများက ကိုယ်တိုင် မိတ္ထီလာမြို့သို့ တင်ပို့ရောင်းချကြကြောင်း၊ ယခုနှစ်မိုးရာသီတွင် မိုးအဆက်မပြတ် ရွာသွန်းမှုကြောင့် ခရမ်းချဉ်သီးပင် များ အောင်မြင်ဖြစ်ထွန်းလျက်ရှိရာ စက်တင်ဘာလဆန်းမှ စ၍ ခူးဆွတ်ကာ ဈေးကွက်သို့တင်ပို့နိုင်ပြီ ဖြစ်ကြောင်း၊ တစ်ပိဿာလက္ကားဈေး အနေဖြင့် (၁၀၀၀)ကျပ်ဈေးဖြင့် ရောင်းချရသဖြင့် တောင်သူများ အကျိုးအမြတ် ရရှိကြောင်း သိရသည်။
DOCA(မန္တလေး)