ပြည်တွင်းကုန်သွယ်မှုသတင်း

      ဖေဖော်ဝါရီလဒုတိယပတ်အတွင်းကုန်စိမ်းစျေးကွက်သို့မန္တလေးတိုင်းဒေသကြီး၊စစ်ကိုင်းတိုင်း ဒေသကြီးနှင့်ရှမ်းပြည်နယ်ဒေသထွက် ကုန်စိမ်းသီးနှံများ ဝင်ရောက်မှုများပြားကြောင်း သိရပါတယ်။ မန္တလေးမြို့ ၄၁ လမ်းစျေး (ကမ်းနားလမ်းစျေး)နှင့် သီရိမာလာဈေး(ပိုက်ကျုံးစျေး)တို့ မှာ ဟင်းသီး ဟင်းရွက်ကုန်စိမ်းများလက်လီ/လက္ကားရောင်းချသည့်စျေးများဖြစ်ပါတယ်။ ၄၁လမ်း စျေးမှာမန္တလေး တိုင်းဒေသကြီး၊ စစ်ကိုင်းတိုင်းဒေသကြီး နှင့် ရှမ်းပြည်နယ်ထွက်ကုန်စိမ်းများ   ဝင်ရောက်မှုများပြီး၊ သီရိမာလာစျေးမှာ   မန္တလေးတိုင်းဒေသကြီးနှင့် ရှမ်းပြည်နယ်ထွက်ကုန်စိမ်းများ   ဝင်ရောက်မှုများ ကြောင်း သိရပါတယ်။ ကင်းပုံသီးမှာ အချိုမျိုးနှင့်အခါးမျိုးနှစ်မျိုးရှိပြီး၊အချိုမျိုးသည် အသီးနှင့်အရွက် နှစ်မျိုးစလုံးစားသုံးနိုင်ကြောင်းသိရပါတယ်။ကင်းပုံသီးအခါးသီးမှာ ပို၍ဆေးဖက် ဝင်ကြောင်း   သိရ ပါတယ်။ ကင်းပုံသီးသည်(၁၂)လ  ရာသီနီးပါးထွက်ရှိသည့်  အစားအစာဖြစ်ပြီး၊ ကြော်စား၊ ချက်စား၊ နှပ်စား အမျိုးမျိုးစားသုံးကြပါတယ်။    ကင်းပုံသီးအရသာမှာ   ချိုခြင်း၊ အေးခြင်း၊ ဖန်ခြင်း၊ စိမ့်ခြင်း၊ ငန်ခြင်းနှင့်နှုတ်မြိတ်စေပြီး ၊ ကင်းပုံသီးစားသုံးခြင်းဖြင့်  ဝမ်းချုပ်ခြင်း၊လေနိုင်ခြင်း၊ ခေျာင်းဆိုးရောဂါ ကိုသက်သာစေခြင်း၊   သွေးတွင်းသကြားဓာတ်ကို ထိန်းညှိပေးခြင်း၊ နှလုံးနှင့် အာရုံကြောစနစ်ကို  ကောင်းမွန်စေခြင်း၊ အဝလွန်ခြင်းကိုထိန်းညှိပေးခြင်း၊သွေးအားနည်းခြင်းနှင့်မောပန်း ခြင်း တို့ကို သက်သာစေနိုင်ကြောင်း  သိရပါတယ်။   ၂၀၂၅ခုနှစ် ဖေဖော်ဝါရီလ   ဒုတိယပတ်အတွင်း  ကုန်စိမ်း သီးနှံကင်းပုံသီးမှာ ဝင်ရောက်မှုများပြားပြီး၊ ကင်းပုံသီးအချိုသီး (၂၅) လုံးလျှင် ၁၅၀၀ ကျပ် နှင့်၂၀၀၀ ကျပ်၊အခါးသီး (၂၅)လုံးလျှင် ၁၀၀၀ ကျပ်နှင့် ၁၃၀၀ ကျပ်၊ အခါးမျိုး(အလုံးသေး) စျေးမှာ တစ်ပိဿာ လျှင်၁၅၀၀ကျပ်နှင့် ၂၀၀၀ ကျပ်အသီးသီးဖြစ်ပေါ်လျက်ရှိပါတယ်။ ကင်းပုံသီးမှာ အလုံးအရွယ်အစား အလိုက် စျေးအနည်းငယ်ကွာခြားမှုရှိပြီး၊ အရောင်းသွက်လျက်ရှိသည့် ကုန်စိမ်းအမယ် ဖြစ်ကြောင်း သီးနှံပွဲရုံကုန်သည်တစ်ဦး၏ပြောပြချက်အရသိရပါတယ်။   မန္တလေးကုန်စိမ်း စျေးကွက်သို့  ၁၆ မိုင်၊ ထုံးဘိုဂိတ်မှတဆင့်  ၂၆.၁.၂၀၂၅ မှ၁၀.၂.၂၀၂၅ ရက်နေ့အထိ ကုန်စိမ်းတင်ယာဉ်ဝင်ရောက်မှု မှာ  ၁၂ ဘီးနှင့် ၆ ဘီးယာဉ် (၁၅၆)စီး  ဝင်ရောက်ကြောင်း သိရပါတယ်။

DOCA(မန္တလေး)

မန္တလေးဈေးကွက်အတွင်းသို့ ရှမ်းပြည်နယ်ဘက်မှလာသော ပန်းမုံလာ(ခေါ်) ပန်းဂေါ်ဖီများအပြင် ပြင်ဦးလွင်ဒေသထွက် ပန်းမုံလာ(ခေါ်)ပန်းဂေါ်ဖီများနှင့် ဒေသထွက် ပန်းမုံလာ(ခေါ်) ပန်းဂေါ်ဖီများ အများ အပြား လှိုင်လှိုင်ဝင်ရောက်လျှက်ရှိပါသည်။ ဆောင်းရာသီစာများဖြစ်သော မုံညင်း၊ ကိုက်လန်၊ ဆလပ်ရွက် တို့နှင့်အတူ ထွက်ပေါ်လာခြင်းဖြစ်ပါသည်။ ယခုအခါ ပန်းမုံလာ(ခေါ်) ပန်းဂေါ်ဖီများ အများအပြား ဝင်ရောက်ခဲ့ခြင်းကြောင့် ဈေးနှုန်းများ သိသိသာသာကျဆင်းသွားပါသည်။ ပေါ်ဦးပေါ်စ ဒီဇင်ဘာလဆန်းပိုင်း တွင်ပန်းမုံလာ(ခေါ်)ပန်းဂေါ်ဖီများအကြီးတစ်ပွင့်လျှင်(၁၅၀၀/၂၀၀၀)ကျပ်၊ အသေးတစ်ပွင့် လျှင်(၁၀၀၀/၁၅၀၀) ကျပ် ဈေးနှုန်းများဖြင့် အရောင်းအဝယ်ရှိခဲ့ရာမှ ယခု ဖေဖော်ဝါရီ ဒုတိယအပတ်တွင် ပန်းမုံလာ(ခေါ်) ပန်းဂေါ်ဖီအကြီးတစ်ပွင့်လျှင်(၁၀၀၀/၁၅၀၀)၊ အသေးတစ်ပွင့်လျှင်(၇၀၀/၈၀၀)ကျပ် ဈေးနှုန်းများဖြင့် ရောင်း ဝယ်လျှက်ရှိကြောင်း သိရှိရသည်။ စတင်ထွက်ပေါ်ချိန်နှင့် ယခုအချိန်နှိုင်းယှဉ်ကြည့်ပါက ပန်းမုံလာ(ခေါ်) ပန်းဂေါ်ဖီဈေးနှုန်းများ သိသိသာသာကျဆင်းသွားကြောင်း ဈေးကွက်အတွင်းမှ သိရှိရသည်။

DOCA(မန္တလေး)

        မန္တလေးဈေးကွက်အတွင်းသို့ ခရမ်းချဉ်သီး၊ ရှမ်းသီး၊ ထိုင်ဝမ်သီး၊ ဗမာသီးများ မျိုးစုံစွာ ဝင်ရောက်လျှက်ရှိပါသည်။ ယခင်က ခရမ်းချဉ်သီး( အင်းသီး)နှင့် ထိုင်ဝမ်သီးတို့ကို ရှမ်းပြည်နယ်နှင့် ပြင်ဦးလွင်တို့မှ ဝင်ရောက်လျှက်ရှိပြီး ယခုအခါ မန္တလေးတိုင်းတွင်းဒေသထွက် ဗမာခရမ်းချဉ်သီး (ခေါ်) ကိုင်းသီးများနှင့် ထိုင်ဝမ်ခရမ်းချဉ်သီးများ အများအပြား ဝင်ရောက်လျှက်ရှိပါသည်။ ကျောက်ဆည်ဒေသထွက် ဗမာခရမ်းချဉ်သီးများမှာ သီးသန့်စိုက်ပျိုးခြင်းမဟုတ်ပဲ ကြက်သွန်မျိုး စေ့ပျိုးထောင်စဉ် အချိန်က ခရမ်းချဉ်မျိုးစေ့များ ရောနှော၍ သီးညှပ်စိုက်ပျိုးခဲ့ခြင်း ဖြစ်ပါသည်။ ကြက်သွန်ပျိုးပင်များကို နုတ်၍ ရွှေ့ပြောင်းစိုက်ပျိုးပြီးသည့်အခါ ခရမ်းချဉ်သီးစိုက်ခင်းအဖြစ် ကျန်ရှိခဲ့ခြင်းဖြစ်ပါသည်။ ၎င်းဗမာခရမ်းချဉ်သီးများ ယခုအခါ လှိုင်လှိုင်ထွက်ပေါ်လျှက်ရှိပါသည်။ ဒေသအတွင်း ထိုင်ဝမ်ခရမ်းချဉ်သီးမျိုးများကိုလည်း စီးပွားဖြစ်စိုက်ပျိုးလာခြင်းကြောင့် ယခုရာသီ တွင် ဗမာခရမ်းချဉ်သီးနှင့် ထိုင်ဝမ်ခရမ်းချဉ်သီးများ အပြိုင်ထွက်ပေါ်လာခြင်းဖြစ်ပါသည်။ ဈေးကွက် အတွင်း၌ ခရမ်းချဉ်သီးများ အနယ်နယ်အရပ်ရပ်မှ အများအပြားဝင်ရောက်လျှက်ရှိခြင်းကြောင့် ခရမ်းချဉ်သီးဈေးနှုန်းများ သိသိသာသာကျဆင်းလျှက်ရှိပါသည်။ ဒီဇင်ဘာလအတွင်း၌ ခရမ်းချဉ်သီး တစ်ပိဿာလျှင်(၆၀၀၀/၈၀၀၀)ကျပ် ဈေးနှုန်းများဖြင့် ရောင်းဝယ်လျှက်ရှိခဲ့ရာမှ ဇန်နဝါရီလအတွင်း ၌(၃၀၀၀/၄၀၀၀)ကျပ်၊ ယခု ဖေဖော်ဝါရီလ ဒုတိယအပတ်တွင် မည်သည့်ခရမ်းချဉ်သီး အမျိုးအစား မဆို အလုံးအကြီးအသေးပေါ်မူတည်၍ တစ်ပိဿာလျှင် (၁၅၀၀/၂၀၀၀)ကျပ် ဈေးနှုန်းများဖြင့် ရောင်းချလျှက်ရှိကြောင်း ဈေးကွက်အတွင်းမှ သိရှိရသည်။

DOCA(မန္တလေး)

          သမုန်းပင်သည်ပူပြင်းသောအညာဒေမှာသာ ပေါက်ရောက်သည့် အပင်ကြီးမျိုးဖြစ်ပါသည်။ သမုန်းပင်သည် သဘာဝကပေးသော အလေ့ကျပေါက်ပင်တမျိုးလည်းဖြစ်ပါသည်။ ရှေးယခင် ကတည်းက သမုန်းပင်၏ ဆေးဘက်ဝင်မှုကြောင့်သမားတော်များ မုန်းခဲ့လို့သမားမုန်းပင်ဟု ခေါ်ဆိုကြရာမှ သမုန်းပင်ဟု ခေါ်ဆိုကြခြင်းဖြစ်ကြောင်းသိရှိရပါသည်။ သမုန်းပင်၏အသားသည် သစ်မာပင်ဖြစ်၍ ခုံဖိနပ်လုပ်ရာတွင်အသုံးပြုသည်ဟုလည်း သိရှိရပါသည်။ သမုန်းပင်မှသမုန်းဥသည် ဆေးဘက်ဝင်သည့်အတွက်ကြောင့် မျက်စေ့အောင့်မျက်စေ့နာအတွက် သမုန်းဥသွေးကွင်းလိမ်းပေး ပါက သက်သာပျောက်ကင်းသည်ဟုသိရှိရသည်။ သမုန်းပင်သည် ဆေးဘက်ဝင်အပင်တမျိုး ဖြစ်သလို စားသုံးရန်အတွက်လည်း ဟင်းတခွက်လဲဖြစ်ပါသည်။ အညာဒေသမှာသာပေါက်ရောက်၍ အညာသူအညာသားများကြိုက်နှစ်သက်ကြပါသည်။ သမုန်းဖူးများသည် ဆောင်းအကုန်နွေအကူး တပို့တွဲတပေါင်းလများတွင် သမုန်းရွက်နုထွက်ပါသည်။ သမုန်းရွက်နု၊ သမုန်းဖူးများကို အတို့ အမြုတ်လုပ်၍သော်လည်းကောင်း၊ သုတ်၍သော်လည်းကောင်း စားသုံးပါကခံတွင်းမြိန်စေပါသည်။ အညာဒေသထွက်သမုန်းဖူးများကို ပြုတ်၍ မြို့ဈေးကွက်သို့ တင်ပို့ရောင်းချခြင်းများလည်း ရှိပါ သည်။ ဒီအချိန်ဒီရာသီမှာသာ ထွက်ပေါ်သောရာသီစာတမျိုးဖြစ်ပြီး ဈေးကွက်အနည်းငယ်ရှိနေ ပါသည်။ ဈေးနုန်းဈေးကွက်အနေဖြင့် သမုန်းဖူးပြုတ် (၁၀)ကျပ်သားလျှင်(၁၅၀၀ ) ကျပ်ဈေးဖြင့် ရောင်းချလျှက်ရှိပါကြောင်း လေ့လာသိရှိရပါသည်။ 

DOCA(မန္တလေး)

မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် ဆီထွက်သီးနှံ ဖြစ်သည့် မိုးမြေပဲကို အဓိကစိုက်ပျိုးလျက်ရှိပြီး ဆောင်းမြေပဲကို အနည်းငယ်သာစိုက်ပျိုးမှုရှိပါသည်။ ၂၀၂၃-၂၀၂၄ ခုနှစ်တွင် မိုးမြေပဲကို (၆၃၈၆၀)ဧက စိုက်ပျိုးခဲ့ပြီး တစ်ဧကပျမ်းမျှအထွက်နှုန်း (၄၂.၁၉) တင်းနှုန်းဖြင့် တင်းပေါင်း(၂၆၉၄၅၅၁)တင်းထွက်ရှိခဲ့ပါသည်။ ဆောင်းမြေပဲစိုက်ပျိုးမှုအနေဖြင့် (၁၈၄)ဧကသာ စိုက်ပျိုးခဲ့ပြီး တစ်ဧကပျမ်းမျှအထွက်နှုန်းမှာ(၄၆)တင်းဖြင့် တင်းပေါင်း(၈၄၆၄)တင်း ထွက်ရှိခဲ့ပါသည်။ ၂၀၂၄-၂၀၂၅ ခုနှစ်တွင် မိုးမြေပဲကို စိုက်ပျိုးရန်လျာထားမှုအနေဖြင့် (၅၈၂၇၁) ဧက ဖြစ်ပြီး မိုးရာသီကုန်အထိ (၆၅၈၉၀)ဧကစိုက်ပျိုးခဲ့ပြီး ရိတ်ဧက(၆၅၈၉၀)ဧက ရာသီကုန် ရိတ်သိမ်းခဲ့ပြီး တစ်ဧကပျမ်းမျှအထွက်နှုန်းမှာ(၅၁.၄၉)တင်းထွက်ရှိခဲ့ပါသည်။ အထွက်တင်းစုစုပေါင်း (၃၃၉၃၀၀၄) တင်းထွက်ရှိခဲ့ပါသည်။ဆောင်းမြေပဲစိုက်ပျိုးရန် လျာထားမှုမှာ (၃၁၉)ဧကရှိပြီး  ယခုစိုက်ပျိုးပြီးစီးမှုမှာ(၁၈၅)ဧက ရှိပါသည်။ ထွက်ရှိသောမြေပဲများကို ကျောက်ပန်းတောင်းမြို့ နှင့်ထိစပ်လျက်ရှိသောကျေးရွာများမှ မြို့ပေါ်ရှိပွဲရုံများနှင့် ဆီစက်များသို့လာရောက်ရောင်းချကြ ပါသည်။ ၂၀၂၃-၂၀၂၄ ခုနှစ် ဖေဖော်ဝါရီလတွင် မြေပဲဆီဆံတစ်တင်းလျှင်(၁၀၀၅၀၀)ကျပ်၊ မြေပဲလုံးဆံတစ်တင်းလျှင်(၁၀၅၀၀၀)ကျပ်၊မျိုးမြေပဲတစ်တင်းလျှင်(၁၂၀၀၀၀)ကျပ်များဖြင့် ရောင်းချ ခဲ့ကြပြီး၊ ၂၀၂၄-၂၀၂၅ ခုနှစ်ကာလတူလတွင် မြေပဲဆီဆံတစ်တင်းလျှင်(၁၂၇၅၀၀)ကျပ်၊ မြေပဲလုံးဆံ တစ်တင်းလျှင် (၁၃၂၀၀၀)ကျပ်၊ မျိုးမြေပဲတစ်တင်းလျှင်(၁၃၅၀၀၀)ကျပ်ဝန်းကျင်များဖြင့် အရောင်း အဝယ်ဖြစ်ပေါ်လျက်ရှိပါသည်။

        ၂၀၂၄-၂၀၂၅ ခုနှစ်တွင် ကျောက်ပန်းတောင်းမြို့နယ်၏ မြေပဲတစ်ဧကစိုက်ပျိုးမှုကုန်ကျစရိတ် အနေဖြင့်(၉၄၁၀၀၀)ကျပ်ဝန်းကျင်ကျသင့်ပြီး တစ်ဧကပျမ်းမျှအထွက်တင်း(၅၁.၄၉)တင်းနှုန်း ထွက် ရှိခဲ့ပါသည်။ ယခုမြေပဲတောင့်တစ်တင်းလျှင်(၃၈၅၀၀)ကျပ်နှုန်းရောင်းချခဲ့ရပြီး၊ တစ်ဧကဝင်ငွေ (၁၉၈၂၃၆၅)ကျပ်ရရှိ၍ တောင်သူအကျိုးအမြတ်မှာ(၁၀၄၁၃၆၅)ကျပ်ရရှိခဲ့သည်။ ဒေသထွက်မြေပဲ များကို ယခင်က အခြားဒေသများသို့တင်ပို့ရောင်းချမှုများရှိခဲ့သော်လည်း ယခုအချိန်တွင် ပြည်ပ သို့ရောင်းချမှုနည်းပါးလာပြီး ဒေသတွင်း၌သာဆီကြိတ်ခွဲသုံးစွဲမှုများလာပါသည်။ တောင်သူအကျိုး အမြတ်ရရှိသော ဆီထွက်သီးနှံမြေပဲကို ပိုမိုစိုက်ပျိုးပြီး ပြည်ပသို့ရောင်းချခြင်းမပြုပဲ ပြည်တွင်း၌ သုံးစွဲခြင်း၊ ဆီကြိတ်ခွဲရောင်းချခြင်းများပြုလုပ်ပါက ဒေသတွင်းဆီစားသုံးမှုဖူလုံလာခြင်း၊ တိရစ္ဆာန် အစာများပေါများလာခြင်း၊ ဒေသတွင်းလုပ်သားများအလုပ်အကိုင်အခွင့်အလမ်းများပိုမိုရရှိစေခြင်း အပြင် ဘေးအန္တရာယ်ကင်းသောဆီများစားသုံးရခြင်းကြောင့် ကျန်းမာရေးညီညွတ်ကောင်းမွန်လာ စေခြင်း စသည့်အကျိုးကျေးဇူးများရရှိလာစေသည့်အတွက် ဆီထွက်သီးနှံမြေပဲကို ပိုမိုတိုးချဲ့ စိုက်ပျိုးသင့်ပါသည်။

DOCA(မန္တလေး)