ပြည်တွင်းကုန်သွယ်မှုသတင်း

           ကန့်ဘလူခရိုင်၊ ကန့်ဘလူမြို့တွင် စိုက်ပျိုးရေးကို အဓိကလုပ်ကိုင်လျက်ရှိသော ပြည်သူများရှိ သလို စာဝတ်နေရေးအတွက် စိုက်ပျိုးရေးမဟုတ်ပဲ ကျရာပင်ပေါက် လုပ်ကိုင်ရသော လက်လုပ် လက်စားသမားလေးများလည်းရှိပါသည်။ ထိုလက်လုပ်လက်စားလုပ်ငန်း လုပ်ကိုင်ပြီး မိသားစုစားဝတ်နေရေးအတွက် တောတောင်ဒေသကိုအမှီပြု၍ ရာသီအလိုက် ပေါက်ရောက်သော သီးနှံများ ဖြစ်သည့် မျှစ်ရာသီ မျှစ်ချိုးခြင်း၊ မှိုရာသီ မှိုရှာခြင်းနှင့် နှမ်း၊ နေကြာပွင့်ချိန်တွင် ပျားဖွတ်၍ ပျားရည်နှင့် ပျားသလက် ရှာဖွေသည့် လုပ်ငန်းကိုလည်း လုပ်ကိုင်လျက်ရှိသည့်အနက် ပျားသလက်နှင့် ပျားရည်ကို ကန့်ဘလူမြို့မဈေးသို့ လာရောက်ရောင်းချကြပါသည်။

             ပျားရည်သည် ဆေးဘက်ဝင်သော အရာတစ်ခုဖြစ်၍ တနှစ်ပတ်လုံး ဆေးအသုံးပြုရန်အတွက် ကြိုတင်ဝယ်ယူကြသလို ၊ ပျားရည်ကို သောက်သုံးခြင်းဖြင့် အားပြည်သည်ဟု သိရှိရသဖြင့် ရေနှင့် ဖျော်ပြီး သောက်သုံးကြရန်အတွက်လည်း ဝယ်ယူခြင်း၊ မြို့ကြီးပြကြီးတွင် သဘာဝ ပျားရည်အစစ် ရှားသည့်အတွက် မြို့ကြီးပြကြီးရှိ ဌာနပေါင်းစုံလူကြီးများ/ မိတ်ဆွေ အပေါင်းသင်းများကို လက် ဆောင်ပေးရန်အတွက်လည်းဝယ်ယူကြပါသည်။

            ယခု ဖေဖော်ဝါရီလ ဒုတိယအပတ် ကန့်ဘလူမြို့မဈေးတွင် ရောင်းချနေသော ပျားရည် ဈေးနှုန်းအနေဖြင့် ပျားရည် တစ်ပိဿာလျှင်(၃၅၀၀၀)ကျပ်နှုန်း၊ ပျားရည်(၄၀)ကျပ်သားဝင် ပုလင်း တစ်လုံးလျှင်(၁၅၀၀၀)ကျပ်၊ ပျားရည်(၂၀)ကျပ်သား ဂျပ်ပြားပုလင်း တစ်လုံးလျှင်(၈၀၀၀)ကျပ် နှင့် ပျားရည်(၁၀)ကျပ်သား ဂျပ်ပြားပုလင်း တစ်လုံးလျှင်(၄၀၀၀)ကျပ် ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း  ပျားရည်ရောင်းချနေသည် ဈေးသည်တစ်ဦးထံမှ သိရှိရပါသည်။

DOCA(စစ်ကိုင်း)

ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်အတွင်းရှိ ကျေးရွာအုပ်စုများတွင် စိုက်ပျိုးရေးလုပ်ငန်းများကို ရာသီအလိုက်လုပ်ကိုင်ကြပြီး ယခုနှစ်‌ဆောင်းရာသီတွင် ဂေါ်ဖီထုပ် များကို အများဆုံးစိုက်ပျိုးကြကြောင်းသိရှိရပါသည်။ဂေါ်ဖီထုပ်မျိုးအနေဖြင့် သက်လျင မျိုးနှင့် သက်ကြီးမျိုး ဟူ၍ ရှိပြီး ဇလွန်မြို့နယ် သဲကုန်းကျေးရွာတွင် သက်လျင်ဂေါ်ဖီထုပ်မျိုးကိုသာ စိုက်ပျိုးကြပါသည်။ (၆.၂.၂၀၂၅)ရက်နေ့ နံနက်(၁၀:၀၀)နာရီအချိန်တွင် စားသုံးသူရေးရာဦးစီးဌာနမှ ဇလွန်မြို့နယ်တာဝန် ခံ ဦးသန့်ဇင်ဦးမှ သဲကုန်းကျေးရွာနေ တောင်သူ ဦးခင်ဝင်း စိုက်ပျိုးထားသော (ဒဿမ ၂၀)ဧကရှိ သက်လျင် ဂေါ်ဖီထုပ်စိုက်ခင်းသို့ ကွင်းဆင်းလေ့လာခြင်းကို ဆောင်ရွက်ခဲ့ပါသည်။

ထိုသို့ကွင်းဆင်းရာ နိုဝင်ဘာလတွင် စတင်စိုက်ပျိုးသော ဂေါ်ဖီထုပ်များသည် ဖေဖော်ဝါရီလ ပထမပတ်တွင် စတင်ခူးစွတ်ရောင်းချနေပြီဖြစ်ကြောင်း၊ ဘောင်ခတ်စနစ်ဖြင့် စိုက်ပျိုးရပြီး(ဒဿမ ၂၀)ဧကတွင် စိုက်ပျိုးမှုကုန်ကျစရိတ်အနေဖြင့် မျိုးစေ့တစ်ထုပ်လျှင်(၁၈၀၀၀/-) ကျပ်ဖြင့် ဝယ်ယူရပြီး  သွင်းအားစု၊ လုပ်သားခအပါအဝင် စုစုပေါင်းငွေကျပ် ၅ သိန်းခန့် ကုန်ကျပြီး၊ အထွက်နှုန်းအနေဖြင့် ဂေါ်ဖီအထုပ်ရေ ၁၅၀၀ ခန့် ထွက်ရှိကြောင်း သိရှိရပါသည်။  ဈေးနှုန်းအနေဖြင့် ဂေါ်ဖီတစ်ထုပ်လျှင် ၁၄၀၀ ကျပ်ဖြင့် ရောင်းချရပြီး ၁၆ သိန်းကျပ်ဝန်းကျင် အကျိုးအမြတ်ရရှိကြောင်း တောင်သူ ဦးခင်ဝင်းထံမှ သိရသည်။  ဈေးကွက်အနေဖြင့် ဒေသတွင်း ရောင်းချမှုအပြင် အဝယ်ဒိုင်များမှ တစ်ဆင့် အခြားဒေသများသို့လည်း  တင်ပို့ရောင်းချ လျက်ရှိကြောင်း သိရှိရပါသည်။

DOCA(ဧရာဝတီ)

             စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့်ဆီထွက်သီးနှံများ အပြင် ပဲမျိုးစုံကိုလည်း စိုက်ပျိုးကြောင်း၊ မတ်ပဲသီးနှံများသည် ကန့်ဘလူမြို့နယ်အတွင်းရှိ ကျေးရွာများမှ အဓိကဝင်ရောက်လျက်ရှိပြီး ဖေဖေါ်ဝါရီလ ဒုတိယပတ်အတွင်း ဈေးနှုန်းများမှာ မတ်ပဲရိုးရိုးတစ်တင်းလျှင် (၈၀၀၀၀)ကျပ်၊ မတ်ပဲ(မျက်ကွင်းဖြူ)တစ်တင်းလျှင်(၈၅၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ကန့်ဘလူခရိုင်မှထွက်ရှိသော မတ်ပဲများကို ရွှေဘိုမြို့နှင့်မန္တလေးမြို့ ရှိပွဲရုံများ၊ ကုန်စည်ဒိုင်များသို့ တင်ပို့လျက်ရှိကြောင်း သိရသည်။

              ယခုအခါ ဈေးကွက်အတွင်း မတ်ပဲသီးနှံများ အရောင်းအဝယ်ဖြစ်လျက်ရှိပြီး ၂၀၂၅ ခုနှစ် ဖေဖေါ်ဝါရီလ ပထမပတ် ဈေးနှုန်းများနှင့်နှိုင်းယှဉ်ပါက ယခုလဒုတိယပတ်အတွင်း မတ်ပဲဈေးနှုန်း တစ်တင်းလျှင်(၅၀၀၀)ကျပ်ကျဆင်းသွားကြောင်း သီးနှံရောင်းဝယ်ရေး လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးတွင် ရောင်းချလျက်ရှိသည့် ကြက်ဥ၊ ဘဲဥများမှာ ဒေသတွင်းကြက်ခြံ၊ ဘဲခြံများမှ ဝယ်ယူရောင်းချလျက်ရှိပြီး၊ လိုအပ်ချက်အရ မန္တလေးမှလည်း ဝယ်ယူရောင်းချကြောင်းသိရသည်။ ၂၀၂၅ ခုနှစ်၊ ဖေဖော်ဝါရီလ ဒုတိယပတ် အတွင်း ဖြစ်ပေါ်နေသော ကြက်ဥ၊ ဘဲဥ၊ ငုံးဥဈေးနှုန်းများမှာ ကြက်ဥကြီးတစ်လုံးလျှင် (၄၇၀)ကျပ်၊ ဥလတ်တစ်လုံးလျှင်(၄၅၀)ကျပ်၊ ဥသေးတစ်လုံးလျှင်(၄၂၀)ကျပ်နှင့် ဘဲဥကြီးတစ်လုံးလျှင်(၈၀၀) ကျပ်၊ ဥသေးတစ်လုံးလျှင် (၇၅၀)ကျပ်၊ ငုံးဥ(၈)လုံးလျှင် (၁၀၀၀)ကျပ်ဖြင့် အရောင်းအဝယ်ဖြစ်လျက် ရှိပြီးယခင်လကာလတူဖြစ်ပေါ်ခဲ့သော ဈေးနှုန်းများထက်ဈေးနှုန်းအနည်းငယ်မြင့်တက်လာကြောင်း ကြက်ဥ၊ ဘဲဥ၊ ငုံးဥများကို စားသောက်ဆိုင်များ၊ မုန့်လုပ်ငန်းများတွင် အများဆုံးအသုံးပြုကြပြီး အိမ်ရှင်မများမှမိသားစုထမင်းဝိုင်းအတွက် ဟင်းလျာအဖြစ် ချက်ပြုတ်ရာတွင်လည်း အသုံးပြုကြကြောင်း ကန့်ဘလူမြို့မဈေးအတွင်းရှိ ဈေးသည်များထံမှသိရှိရပါသည်။

DOCA(စစ်ကိုင်း)

           စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံရုံးသည် စားသုံးသူကာကွယ်ရေးလုပ်ငန်းများကို ဆောင်ရွက်လျက်ရှိသလို   စားသုံးသူများ နေ့စဉ်ဝယ်ယူသုံး စွဲလျက်ရှိသည့် အခြေခံစားသောက်ကုန်များ၏ ဈေးနှုန်း၊ဈေးကွက်အခြေအနေများကို လေ့လာ၍ အပတ်စဉ်၊ လစဉ် အထက်အဆင့်ဆင့်သို့ တင်ပြဆောင်ရွက်လျက်ရှိသည်။

           စားသုံးသူများ နေ့စဉ်ဝယ်ယူအသုံးပြုလျက်ရှိသည့် အာလူးသီးများကို ရှမ်းပြည်နယ်၊ အောင်ပန်းမြို့မှတဆင့် ကန့်ဘလူမြို့နယ်၊ ဇီးကုန်းမြို့နှင့်ကန့်ဘလူမြို့များရှိ လက္ကားကုန်သည်များ မှတစ်ဆင့် ကန့်ဘလူခရိုင်အတွင်းရှိ လက်လီအရောင်းဆိုင်များသို့ ဖြန့်ဖြူးပေးလျက်ရှိကြောင်း၊ ခရမ်းချဉ်သီးများကို ကန့်ဘလူမြို့နယ်နှင့် ကျွန်းလှမြို့နယ်များမှ မှာယူရောင်းချလျက်ရှိကြောင်း သိရသည်။

          ၂၀၂၅ ခုနှစ်၊ ဖေဖော်ဝါရီလ ဒုတိယပတ်အတွင်း ကန့်ဘလူမြို့မဈေးတွင် ခရမ်းချဉ်သီး (၂၅) ကျပ်သားလျှင် ငွေကျပ်(၃၀၀)၊ (၁)ပိဿာလျှင် ငွေကျပ်(၁၀၀၀)၊ အာလူးသီး(၁)ပိဿာလျှင်ငွေကျပ် (၇၀၀၀)ဖြင့်ရောင်းချကြောင်း၊ ယခင်အပတ် ဈေးနှုန်းများနှင့်နှိုင်းယှဉ်ပါက ခရမ်းချဉ်သီး(၁)ပိဿာ လျှင်ငွေကျပ်(၅၀၀)နှင့် အားလူးသီး(၁)ပိဿာလျှင်ငွေကျပ်(၃၀၀၀) ဈေးနှုန်းကျဆင်းလာပြီးပုံမှန်အ တိုင်းအရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူများထံမှ သိရှိရပါသည်။

DOCA(စစ်ကိုင်း)