ပြည်တွင်းကုန်သွယ်မှုသတင်း

          ပြည်ခရိုင်၊ ရွှေတောင်မြို့နယ် ဝါးတောအုပ်စု၊ ဝါလည်ကျေးရွာတွင် ကြက်ဟင်းခါးသီး များစိုက်ထားရှိထားကြောင်း သိရှိရပါသည်။ ထိုဒေသတွင် စိုက်ပျိုးထားသော ကြက်ဟင်းခါးသီးမျိုးမှာ ဂုဏ်မာန်မျိုးဖြစ်ပြီး စိုက်ပျိုးသောစင်မှာ အလျား ၁၅တောင်၊ အနံ ၅၀တောင်ရှိသော စင်ဖြင့် စိုက်ပျိုး ကြပါသည်။ စိုက်ပျိုးထုတ်လုပ်ကုန်ကျစရိတ်အနေဖြင့် စင်အပါအဝင် စုစုပေါင်း (၂)သိန်းကျပ်ခန့် ကုန်ကျကြောင်း သိရပါသည်။ ကြက်ဟင်းခါးသီးများစတင်ထွက်ပေါ်ချိန်တွင် (၃)ရက်လျှင် တစ်ကြိမ် ခူးဆွတ်ရပြီး တစ်ခါခူးဆွတ်လျှင် အလုံးရေ ၃၀၀မှ ၅၀၀ကြားရရှိသည်ဟုသိရပြီး ကြက်ဟင်းခါးသီး ရာသီချိန်တွင် အလုံးရေ ၆၀၀၀ခန့် ခူးဆွတ်၍ရောင်းချရကြောင်း သိရပါသည်။ ဈေးနှုန်းများ အနေ ဖြင့် အထိုင်ဈေး တစ်လုံးလျှင် ၁၃၀/၁၅၀ကျပ်ဖြင့်ရောင်းချ၍ ဈေးကွက်အနေဖြင့် ပေါက်ခေါင်း မြို့နယ်အတွင်းနှင့် အနီးအနားရှိ အခြားကျေးရွာများသို့တင်ပို့ရောင်းချကြောင်း သိရပါသည်။ ကြက်ဟင်းခါးသီး ရောင်းရငွေမှာ ၇၈၀၀၀၀ကျပ်ရရှိပြီး အသားတင်အကျိုးအမြတ်အနေဖြင့် ၅၈၀၀၀၀ကျပ်ခန့်ရရှိသောသီးနှံဖြစ်၍ တောင်သူများအနေဖြင့် တဘက်တလမ်းမှ ဝင်ငွေများ ရရှိအောင် စိုက်ပျိုးသင့်သောသီးနှံဖြစ်ပါသည်။

DOCA(ပဲခူး)

          ယခုဩဂုတ်လနောက်ဆုံးပတ်တွင် ပြည်ဈေးကွက်၌ ဆင်ခရမ်းချဉ်သီးများ ဝင်ရောက်မှု နည်းပါးပြီး ဈေးကောင်းရလျှက်ရှိနေပါသည်။ မင်းတုန်း၊ ဥသျှစ်ပင်ဘက်မှ တစ်ပတ်လျှင် တစ်ကြိမ်ခန့်သာအဝင်ရှိပြီး အလုံး ၃၀/၄၀ခန့်သာဝင်ရောက်မှုရှိနေပြီး ယခင်အချိန်တွင် အလုံးရေ ၁၀၀၀ခန့်ကို ရက်ခြားအဝင်ရှိခဲ့ပြီး ဈေးနှုန်းမှာလည်း တစ်လုံးလျှင်ကျပ် ၂၅၀ဝန်းကျင်ခန့် ရောင်းချမှုရှိခဲ့ကြောင်း သိရသဖြင့် ယခုကာလတွင် တစ်လုံးလျှင် အကြီး၊ အသေး ပေါ်မူတည်၍ ကျပ် ၄၀၀-၅၀၀နှုန်းဖြင့် အသီးသီးရောင်းချလျှက်ရှိကြောင်း သိရပါသည်။

ပြည်ဈေးကွက်၌ ယခုဩဂုတ်လနောက်ဆုံးပတ်တွင် ဒန့်သလွန်သီးဈေးနှုန်းများ မြင့်တက် လျက်ရှိပြီး ဝင်ရောက်မှုမှာလည်း တစ်ပတ်လျှင် တစ်ကြိမ်ခန့်သာ အဝင်ရှိသဖြင့် မြင့်တက်ရခြင်း ဖြစ်ကြောင်း သိရပါသည်။ ပြည်မြို့အနောက်ဘက်ကမ်းရှိ ဆင်တဲရွာအနီးတဝိုက်မှသာ အဝင်ရှိပြီး အတောင့် ၅၀/၆၀ခန့်သာ အဝင်ရှိနေသည်။ ပေါ်ဦးပေါ်ဖျားရှားပါးချိန်ဖြစ်သည့်အတွက် အဝင်လည်း နည်းကာဈေးကောင်းရနေပြီး ယခင်နှစ်တစ်တောင့်လျှင် ကျပ် ၃၀၀နှုန်းရှိခဲ့၍ ယခုလတွင် အတောင့် အချော၊ အသေးပေါ်မူတည်ပြီး ကျပ် ၄၅၀-၅၀၀နှုန်းဖြင့် အသီးသီး ရောင်းချလျက်ရှိကြောင်း သိရပါသည်။

DOCA(ပဲခူး)

          ကွမ်းခြံတစ်ခြံလျှင် ကွမ်းပင် ၅၀၀မှ ၁၀၀၀အထိ စိုက်ပျိုးကြပါသည်။ ကွမ်းညွှန့်တစ်ညွန့်လျှင် ယခင်နှစ်များက ၁၀၀ကျပ်နှုန်းသာ ဈေးနှုန်းရှိပြီး ယခုနှစ်အချိန်တွင် ၃၀၀ကျပ်နှုန်းဈေးရှိပါသည်။ ကွမ်းရွက်များခူးဆွတ်ချိန်တွင် (၁၅)ရက်တစ်ခါခူးဆွတ်ရပြီး တစ်ခါခူးဆွတ်လျှင် ပိဿာချိန် ၃၀မှ ၅၀ အထိထွက်ရှိပါသည်။ ကွမ်းစိုက်ပျိုးရာဒေသများမှာ ပြည်မြို့နယ်အတွင်းရှိ ကြာအင်းရွာ၊ ဖုမ္မသိမ်ရွာ နှင့် ဝက်ပုတ်၊ အင်းမစသည့်မြို့များမှလည်း ကွမ်းများအား စီးပွားဖြစ်စိုက်ပျိုးကြောင်း သိရပါသည်။ စိုက်ပျိုးသောကွမ်းအမျိုးအစားများမှာ စလင်းကွမ်း၊ အင်းမကွမ်း၊ ကွမ်းနုဝါ၊ အင်္ဂပူကွမ်းတို့ စိုက်ပျိုးကြပါသည်။ ယခင်နှစ်တွင် ကွမ်းဈေးမှာ တစ်ပိဿာလျှင် အမြင့်ဆုံးဈေးနှုန်းမှာ ၅၀၀၀ကျပ် သာဖြစ်ပြီး ယခုနှစ်တွင် ကွမ်းဈေးနှုန်းမှာ ယခုအချိန်ထိ ပေါက်ဈေး တစ်ပိဿာလျှင် ၁၂၀၀၀ကျပ်၊ ၁၃၀၀၀ကျပ်ဈေးတို့ဖြင့်ဈေးကွက်အတွင်း ရောင်းချနေကြောင်း သိရပါသည်။

DOCA(ပဲခူး)

        ပြည်မြို့ရှိ ဈေးများထဲတွင် ပြည်အနီးတဝိုက်ရှိ ကျေးရွာများဖြစ်သော မှော်ဇာ၊ တောင်လုံးညို ရွာနှင့် ပြည်မြို့အနောက်ဘက်ကမ်းရှိ ကျေးရွာများမှ မျှစ်များချိုးယူ၍ ရောင်းချကြပါသည်။ မျှစ်၏သဘာဝအရောင်မှ  အဖြူရောင်ဖြစ်ပြီး မျှစ်အစိမ်းကိုပြုတ်လိုက်လျှင် ဝါကျင့်ကျင့်အရောင် ပြောင်းသွားတက်ပါသည်။ ယခုအချိန် ဈေးကွက်တွင်ရောင်းချနေသော မျှစ်အမျိုးအစားများမှာ မျှစ်စပ်နှင့် မျှစ်ပြုတ်များဖြစ်ပါသည်။ မျှစ်စပ်ဈေးမှာတစ်ပိဿာလျှင် ၃၀၀၀-၄၀၀၀ကျပ် နှင့်မျှစ်ပြုတ် တစ်ပိဿာလျှင် ၁၅၀၀-၂၀၀၀ကျပ်ဖြင့် ပြည်မြို့ဈေးကွက်ထဲတွင် ရောင်းချလျက်ရှိပါသည်။ ရွှေဖရုံ သီး၏ အညွန့်နှင့် အသီးကို တို့စရာအဖြစ်လည်းကောင်း၊ သီးစုံအဖြစ် ငါးအသား မျိုးစုံတို့နှင့်ရောနှော၍ ချက်ပြုတ်စားကြပါသည်။ ရွှေဖရုံသီးကို ပြည်မြို့နယ်အတွင်းရှိ မှော်ဇာ ကျေးရွာ၊ တောင်လုံးညို ကျေးရွာများတွင်စိုက်ပျိုးကြပြီး ထွက်ရှိလာသောရွှေဖရုံသီးများကို ပြည်မြို့အတွင်းရှိ ဈေးများနှင့် ရန်ကုန်မြို့ရှိ သီရိမင်္ဂလာဈေး၊ ဒညင်းကုန်းဈေး များသို့တင်ပို့ ရောင်းချကြောင်း သိရပါသည်။ ယခုအချိန်ဖြစ်သော ဩဂုတ်လနောက်ဆုံးပတ်တွင် ရောင်းချလျက်ရှိသော ရွှေဖရုံသီးဈေးမှာ အကြီး တစ်လုံးလျှင် ၁၃၀၀-၁၅၀၀ကျပ်ဖြင့်ရောင်းချကြောင်းသိရပါသည်။ ယခင်နှစ်တွင် ရွှေဖရုံသီးတစ်လုံး လျှင် ၁၅၀၀-၂၀၀၀ကျပ်ဖြင့်ရောင်းချခဲ့သဖြင့် ယခုနှစ်တွင်ရွှေဖရုံသီး ဈေးများအနည်းငယ် ကျဆင်း လာကြောင်းတွေ့ရပါသည်။

DOCA(ပဲခူး)

စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန ကန့်ဘလူမြို့နယ်တာဝန်ခံရုံးသည် တိုင်းဒေသကြီးဦးစီးမှူး၏လမ်းညွှန်မှု ၊ ခရိုင်ဦးစီးမှူး၏ကြီးကြပ်မှုတို့ဖြင့် စားသုံးသူကာကွယ်ရေး လုပ်ငန်းများအပြင် အခြားသောသတင်းအချက်အလက်များကို သိရှိလေ့လာနိုင်စေရန် ရည်ရွယ်၍ ဒေသတွင်းရှိ စိုက်ပျိုးမွေးမြူရေးလုပ်ငန်းများ၏ စိုက်ပျိုးထုတ်လုပ်မှု၊ အကျိုးအမြတ်ရရှိ မှုတို့ကို ကွင်းဆင်းလေ့လာပြီး ရေးသားတင်ပြလျက်ရှိကြောင်း သိရသည်။

          ကန့်ဘလူမြို့နယ်တွင် စိုက်ပျိုးရလွယ်ကူပြီး မြေနေရာသီးသန့်အကျယ်အဝန်းအများကြီး မလိုတာကြောင့် အိမ်ခြံဝန်းအတွင်း စားသုံးသီးနှံပင်အဖြစ် ဒန့်ဒလွန်ကို စိုက်ပျိုးကြသည်။ ဒန့်ဒလွန် စိုက်ပျိုးရာတွင် ကိုင်းဖြတ်စိုက်ခြင်းနဲ့ အစေ့ကိုတိုက်ရိုက်စိုက်ခြင်းဆိုပြီး (၂)မျိုးရှိကြောင်း၊ ဒန့်ဒလွန် ကိုမိုးဦးကျချိန် ဇွန်လတွင် စိုက်ပျိုးလျှင် အကောင်းဆုံးဖြစ်ကြောင်း ၊ ဒန့်ဒလွန်တစ်ပင်သည် အရွယ် ရောက်လာပါက စိုက်ပျိုးနည်းစနစ်ပေါ်မူတည်ပြီး အသီးတောင့်ရေ(၂၀၀)ခန့်သီးကြောင်း သိရသည်။

          မြန်မာလူမျိုးများသည် ဒန့်ဒလွန်သီး၊ ဒန့်ဒလွန်ရွက်တို့ကို နှစ်သက်စွာ ချက်ပြုတ်စားသောက် ကြကြောင်း၊ ဒန့်ဒလွန်တစ်ပင်လုံးသည် ကျန်းမာရေးအတွက်အကျိုးပြုသော အဟာရဓာတ်များစွာ ပါဝင်ကြောင်း၊ ကန့်ဘလူမြို့မဈေးတွင် ဒန့်ဒလွန်သီး (၅)တောင့်ပါတစ်စီးလျှင် ငွေကျပ် ၁၀၀၀၊ အတောင့်လှလျှင်(၄)တောင့်ပါတစ်စီးကို ငွေကျပ် ၁၀၀၀ ဖြင့်ရောင်းချကြောင်း၊ မိမိတို့နေအိမ်ခြံဝန်းမှ စိုက်ပျိုးထွက်ရှိသည့်အတွက် စားစရာဟင်းတစ်ခွက်အပြင် အသီး၊အရွက်တို့ကို ခူးဆွတ်ရောင်းချ ခြင်းဖြင့် မိသားစုဝင်ငွေရရှိကြောင်း သိရသည်။        

DOCA(စစ်ကိုင်း)