နှင်းဆီပန်းသည် လူကြိုက်များသော ပန်းတစ်မျိုးဖြစ်သည်။ နှင်းဆီပန်းကို အလှအပ ပန်းဆင်၊ ပန်းခင်း၊ ပွဲလမ်းသဘင်များတွင် အလှပန်းအနေဖြင့် အသုံးပြုကြပြီး၊ မြန်မာလူမျိုးများအနေဖြင့် ဘုရားပန်းကပ်လှူခြင်းများလည်းရှိသည်။ နှင်းဆီအမျိုးပေါင်း ၁၀၀လောက်ရှိပြီး အရောင်းအသွေးအမျိုးမျိုးရှိသည်။ နှင်းဆီပန်းသည် အာရှမျိုးရင်း ပင်ဖြစ်သည်ဟု ဖတ်ရှုလေ့လာသိရှိရသည်။
မအူပင်မြို့တွင် ဒေသပန်းများကို တနိုင်တပိုင် ခြံမြေများ၊ လယ်ကွက်ဘေးဘောင် ပိုလျှံနေရာများတွင် စိုက်ပျိုးကြောင်း တွေ့ရှိရသည်။ ပွင်းလင်းရာသီတွင်သာ ကျေးရွာများ၌ ပန်းစိုက်ပျိုးကြောင်း သိရသည်။ ယခုလို မိုးတွင်ကာလတွင် မအူပင်ပန်းဈေးကွက်၌ ရောင်းချသောပန်းများကို တွေ့ရှိရပြီး ရောင်းချနေသောပန်းများမှ ရန်ကုန် သီရိမင်္ဂလာဈေးမှ မှာယူဝယ်ယူပြီး မအူပင်တွင်ပန်းများကို ရောင်းချနေခြင်းဖြစ်သည်။
မအူပင်တွင် ဘုရားပန်းရောင်းချသူများ ရောင်းချသောပန်းများတွင် ရေမွေးနှင်းဆီ၊ ချိုချဉ်နှင်းဆီ၊ အနီရောင်နှင်းဆီပန်းများ ရောင်းချနေကြောင်းတွေ့ရပြီး ရေမွေးနှင်းဆီခေါ် ပန်းဆီရောင်နှင်းဆီ ၁၀ပွင့် တစ်စည်းကို ၂၅၀၀ကျပ်၊ ချိုချဉ်နှင်းဆီ ၃၀၀၀ကျပ်၊ နှင်းဆီအနီရောင် ၁၀ပွင့်တစ်စည်းကို ၃၅၀၀ကျပ် ရောင်းချနေပြီး၊ ပန်းလှည်းဖြင့် မြို့နယ်ရပ်ကွက်များသို့ လှည့်လည်ရောင်းချသူများကိုလည်းတွေ့ရှိရသည်။ ၎င်းနှင်းဆီ ပန်းများသည် တောင်ကြီးဘက်မှ ဝင်ရောက်လာပြီး ရန်ကုန်သီရိမင်္ဂလာဈေးမှ ဝယ်ယူပြီး မအူပင်မြို့အတွင်း ရောင်းချခြင်းဖြစ်ကြောင်း ပန်းရောင်းချသူတစ်ဦး ပြောကြားချက်အရ သိရှိရပါသည်။
DOCA(ဧရာဝတီ)
