ပြည်တွင်းကုန်သွယ်မှုသတင်း

          တနင်္သာရီတိုင်းဒေသကြီး၊ မြိတ်မြို့တွင် ယခုဖေဖော်ဝါရီလအချိန်တွင် အိမ်ဆောက် ပစ္စည်းလုပ်ငန်းများ အရောင်းအဝယ်ဖြစ်ထွန်းလျက်ရှိသည်။ အိမ်ဆောက်ပစ္စည်းများတွင်  မဖြစ်မနေလိုအပ်သောအရာသည် ဘိလပ်မြေဖြစ်သည်။ ဘိလပ်မြေလိုအပ်ချက်များအား ပြည်တွင်းဘိလပ်မြေစက်ရုံများ၏ ထုတ်ကုန်များအပြင် ပြည်ပဘိလပ်မြေများကို နယ်စပ် ကုန်သွယ်ရေးနှင့်ပင်လယ်ရေကြောင်းတို့မှလည်း တင်သွင်းခွင့်ပြုထားကြောင်းလည်း သိရှိရပါသည်။   

            မြိတ်ခရိုင်၊ မြိတ်မြို့နယ်တွင် ဘိလပ်မြေများတွင် ကြံ့တစ်ကောင်ဘိလပ်မြေ ဈေးနှုန်းမှာ (၃၀၀၀၀)ကျပ်ခန့် ရှိနေပြီး အယ်ဖာစျေးနှုန်းမှာလည်း ၃၀၀၀၀ကျပ်ခန့်ရှိ ကြောင်းသိရှိရပါသည်။ မြိတ်မြို့တွင် ကျန်အမျိုးအစားဘိလပ်မြေများ ပစ္စည်းပြတ်လပ်လျက်ရှိကြောင်း သိရှိရပါသည်။

DOCA(တနင်္သာရီ)

            မအူပင်ခရိုင်၊ မအူပင်မြိုနယ် သို့ အသုတ်၊ကျောင်းကုန်း၊ ရေကြည်ဘက်မှ စိုက်ပျိုးထွက်ရှိသော ဖရဲကျားသီး မအူပင်သို့ ဝင်ရောက်လျှက်ရှိပြီး မအူပင်မြို့၊ အခွန်လွတ်ဈေး ၃လမ်းထိပ် တွင် ဦးမွန်ဟန်း ဖရဲသီး ရောင်းဝယ်ပြုလုပ်လျက်ရှိကြောင်း သိရသည်။

            ဖရဲသီးဝယ်ယူရောင်းချမှု အနေဖြင့် ရေကြည်၊ အသုတ်၊ ကျောင်းကုန်းဘက်မှ ဖရဲကျားသီး စိုက်ပျိုးသူများရှိပြီး ယခင်က ပြည်ပသို့တင်ပို့ရောင်းချသူများဖြစ်ကြောင်း သိရသည်။ ယခုအနေဖြင့် ပြည်နယ် တိုင်းဒေသအတွင်းသို့ တင်ပို့ရောင်းချနေကြပြီး ဖရဲကျားသီးအနီကို အလုံးကြီး လက်ကားဈေး ၇၅၀၀ကျပ်၊ အလုံးလတ် ၆၅၀၀ကျပ်၊ အလုံးသေး ၆၀၀၀ကျပ်ဖြင့် ဝယ်ယူရကြောင်း သိရသည်။ ဖရဲများကို ၁လအတွင်း ၂ကြိမ် မှာယူရောင်းချရပြီး ကားတစ်စီးတွင် ဖရဲသီးအလုံး ၅၀၀ခန့် ဝင်ဆံကြောင်းသိရသည်။  နွေရာသီရောက်ပါက ဖရဲကျားအနီသည် ပိုမိုရောင်းချရကြောင်း သိရသည်။

            ဖရဲကျားအနီ ရောင်းချမှု ဈေးနှုန်းအနေဖြင့် အလုံးကြီး ၁လုံး ၁၀၀၀၀-၉၀၀၀ကျပ်၊ အလုံးလတ် ၁လုံး ၇၀၀၀-၈၀၀၀ကျပ်၊ အလုံးသေး ၁လုံး ၆၀၀၀ကျပ်ဖြင့် လက်လီရောင်းချကြောင်း ၎င်းထံမှ အခြားသော လက်လီရောင်းချသူများလည်း လာရောက်ဝယ်ယူကြောင်း သိရှိရပါသည်။

DOCA(ဧရာဝတီ)

          ဧရာဝတီတိုင်းဒေသကြီး၊ မအူပင်မြို့နယ်တွင် ဒေသခံတောင်သူများက မြေအောက်ရေနှင့် မြစ်ရေကို အကျိုးရှိစွာ အသုံးချပြီး စားဖိုဆောင်သီးနှံများကို မိသားစုစားဝတ်နေရေးအတွက် အပိုဝင်ငွေရရှိအောင် တစ်ပိုင်တစ်နိုင် စိုက်ပျိုးလုပ်ကိုင်ကြသည်။ ဗုံလုံသီး (ခေါ်) ပဲလင်းမြွေသီး စိုက်ပျိုးရေးလုပ်ငန်းမှာ အောင်မြင်ဖြစ်ထွန်း၍ နေ့စဉ်အပိုဝင်ငွေရရှိပြီး စီးပွားဖြစ်ထွန်း၍  မအူပင်မြို့နယ်၊ အရှေ့ဘက်ကမ်း ကမ်းနားသဲသောင်မြေပေါ်တွင် စိုက်ပျိုးကြောင်း ဒေသခံတောင်သူများထံမှ သိရသည်။

            စိုက်ပျိုးမှုအနေဖြင့် ဗုံလဲသီး မျိုးစေ့ တစ်စေ့ကို ၁၀၀ကျပ်ဖြင့် ၁ဧကတွင် အစေ့ ၂၀၀၀ စိုက်ပျိုးပြီး ၂၀၂၄ခုနှစ် အောက်တိုဘာလက စတင်စိုက်ပျိုးခဲ့ပြီး ၂၀၂၅ခုနှစ် မေလတွင် အသီးမျိူး ပြတ်မည်ဖြစ်ကြောင်းသိရသည်။ စိုက်ပျိုးမှု ကုန်ကျစရိတ် ဝါး၊ မျိုး၊ လုပ်သား၊ သွင်းအားစု ကုန်ကျစရိတ် ၃၀ ၀၀၀ ၀၀၀ကျပ်ခန့် ကုန်ကျကြောင်း သိရသည်။ စိုက်ပျိုးရာ၌ စိုက်ဘောင်စနစ်ဖြင့် ကျင်းတူးကာ တစ်ကျင်းနှင့် တစ်ကျင်း ငါးပေခန့်ခွါ၍ မျိုးစေ့ချ စိုက်ပျိုးနိုင်သည်။ စိုက်ပျိုးပြီး (၁၀)ရက်ခန့်တွင် အပင်ပေါက်ပြီး နွယ်တက်ရန်အတွက် ဝါးခြမ်းများစိုက်၍ စင်ထိုးခြင်းကို ပြုလုပ်ပေးရန်လိုအပ်ပြီး ရေကိုနှစ်ရက်ခြား၊ သုံးရက်ခြားတစ်ကြိမ် ရေလောင်းပေးရန် လိုအပ်ပါသည်။ စိုက်ပျိုးပြီး တစ်လကျော်အကြာတွင် အသီးများ စတင်သီးကာ အသီးများကို ခဲဆွဲထားရန်လည်း လိုအပ်ပြီး ၁ဧကတွင် သီးနှံအတောင့်ရေ သုံးသောင်းနှစ်ထောင်အထိ ဆွတ်ခူးရရှိနိုင်ကြောင်း သိရသည်။ 

            ဈေးနှုန်းအနေဖြင့် စတင်ထွက်ရှိချိန်က ၁တောင့်ကို ၁၀၀၀/-၊ ၁၅၀၀/-၊ကျပ်ဈေးကောင်း ရရှိပြီး ယနေ့ဈေးနှုန်း တစ်တောင့်ကို လက်ကားဈေး ၂၀၀-၃၀၀ ကျပ်ဖြင့်သာ ရောင်းချရကြောင်း သိရသည်။ ရန်ကုန်သို့ အဓိကထားတင်ပို့ရောင်းချပြီး စိုက်ပျိုးမှုအကျိုးအမြတ်အနေဖြင့် တစ်နှစ်အတွင်း သိန်း ၅၀နီးပါး ရရှိကြောင်း စိုက်ပျိုးတောင်သူပြောကြားချက်အရ သိရှိရပါသည်။

DOCA(ဧရာဝတီ)

ကောက်ရိုးမှိုစိုက်ပျိုးခြင်းသည် မြန်မာလူမျိုးတို့နှင့် မစိမ်းပါ။ ကောက်ရိုးမှိုသည် သဘာဝ အလျောက် ကောက်ရိုးပုံ၊ ကောက်ရိုးပြတ်ပုံများမှ အလိုအလျောက်ကောက်ရိုးမှိုများ ပွင့်ထွက်လာ သည်ကိုလည်း တွေ့ရကြောင်း၊ ကျေးလက်ဒေသများတွင် ကောက်ရိုးပုံများကို ရေလောင်းခြင်း၊ ဆန်ကွဲ၊ ဖွဲနုများကြဲပက်ပေးခြင်းဖြင့် ကောက်ရိုးမှိုစိုက်ပျိုးကြကြောင်း၊ ကောက်ရိုးမှိုကို စနစ်တကျ စိုက်ပျိုးခြင်းမရှိလျှင် အထွက်နှုန်းမကောင်းခြင်း၊ လုံးဝမထွက်ခြင်း၊ အထွက်နောက်ကျခြင်းနှင့် အပွင့်ငယ်ခြင်းတို့ ဖြစ်တတ်ကြောင်း သိရသည်။

          ကန့်ဘလူမြို့နယ်တွင် တစ်နိုင်တစ်ပိုင် ကောက်ရိုးမှိုစိုက်ပျိုးသူ ဦးဝင်းဦး၏ပြောပြချက်အရ ကောက်ရိုးမှိုစိုက်ပျိုးချိန်သည် အလွန်အရေးကြီးကြောင်း၊ ကောက်ရိုးမှိုစိုက်ပျိုးရာတွင် လိုအပ်သော အခြေခံကုန်ကြမ်းများဖြစ်သည့် သန့်ရှင်းခြောက်သွေ့သော ကောက်ရိုး(သို့မဟုတ်) ရိုးပြတ်များ၊ ဂျပ်စက္ကူများ၊ နွားချေးမြေဆွေး စသည်တို့နှင့် စိုက်ပျိုးကြကြောင်း၊ စိုက်ပျိုးစရိတ် အနေဖြင့် အလျား(၉)ပေနှင့် အနံ(၃)ပေကို(၄၅၀၀၀)ကျပ်ခန့် ကုန်ကျစရိတ်ရှိကြောင်း၊ ကောက်ရိုးမှိုများကို စိုက်ပျိုးပြီး(၁၅)ရက်ခန့်တွင် စတင်ခူးဆွတ်ရကြောင်း၊ ကောက်ရိုးမှိုတစ်ဘောင်လျှင်(၁၀-၁၅)ပိဿာ ထိခူးဆွတ်ရကြောင်း၊ ဈေးကွက်အတွင်း  ကောက်ရိုးမှိုတစ်ပိဿာလျှင် လက်လီဈေး(၁၁၀၀၀)ကျပ် (၁၀)ကျပ်သားလျှင်(၁၂၀၀)ကျပ်နှင့် လက်ကားဈေး(၁၀၀၀၀)ကျပ် ရောင်းချရသောကြောင့် စိုက်ပျိုး သူများအနေဖြင့် ထိုက်သင့်သည့်အကျိုးအမြတ်များရရှိကာ မိသားစုစားဝတ်နေရေး အဆင်ပြေလျက် ရှိကြောင်း သိရသည်။

DOCA(စစ်ကိုင်း)

   စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့နယ် နတ်ပေးကျေးရွာတွင် ကျောက်ဖ ရုံပင်များ စိုက်ပျိုးရောင်းချပြီး မိသားစုဝင်ငွေများ ရရှိလျက်ရှိကြောင်း၊ ကျောက်ဖရုံပင်စိုက်ပျိုးရာတွင် စင်တင်စနစ်ဖြင့်စိုက်ပျိုးခြင်း၊ မြေလွှတ်စိုက်ပျိုးခြင်း စသည်ဖြင့်ရှိပြီး စင်တင်စနစ်ဖြင့် အများဆုံး စိုက်ပျိုးကြောင်း ကျောက်ဖရုံပင် စိုက်ပျိုးသူ ဦးမောင်ဝင်း၏ ပြောပြချက်အရ သိရသည်။

          ကျောက်ဖရုံပင်သည် မျိုးစေ့ချပြီး (၄)လခန့်အကြာတွင် စတင်၍ခူးဆွတ်နိုင်ကြောင်း၊ ကျောက်ဖရုံပင်ကို စင်တင်စိုက်ပျိုးခြင်းဖြင့် တစ်နှစ်ပတ်လုံး ခူးဆွတ်ရောင်းချနိုင်ကြောင်း၊ ကျောက်ဖ ရုံသီးသည် တာရှည်အထားခံသည့်အပြင် ဆေးအသုံးဝင်သည့်အတွက် အိမ်များတွင်ဆောင်ထားလေ့ ရှိကြောင်း၊ အပင်အမျိုးအစားနှင့် ပြုစုခြင်းပေါ်မူတည်၍ အသီးထွက်နှုန်းကွာခြားလေ့ရှိကြောင်း၊ ကျောက်ဖရုံတစ်စင်ကို ခူးဆွတ်ရာတွင် တစ်ကြိမ်လျှင် အလုံး ၃၀-၄၀ ခန့်ခူးဆွတ်ရကြောင်း၊ ဈေးကွက်အနေဖြင့် ကန့်ဘလူမြို့နယ်မှ ထွက်ရှိသော ကျောက်ဖရုံသီးများကို ကန့်ဘလူမြို့မဈေးတွင် ရောင်းချလျက်ရှိရာ အလုံးကြီးတစ်လုံးလျှင် ၆၀၀၀ကျပ်၊ အလုံးသေးတစ်လုံးလျှင် ၅၀၀၀ကျပ်ဖြင့် ရောင်းချရသည့်အတွက် မိသားစုဝင်ငွေရရှိကာ အဆင်ပြေလျက်ရှိကြောင်း သီးနှံစိုက်ပျိုးရေး လုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)