ပြည်တွင်းကုန်သွယ်မှုသတင်း

   မိတ္ထီလာမြို့ဆန် ဈေးကွက်တွင် ဇွန်လတတိယပတ်၌ ရောင်းချနေသော ဆန်ဈေးနှုန်းများမှာ  ရွှေဘိုပေါ်ဆန်း (ပထမတန်းစား) တစ်အိတ်လျှင် ၁၆၀၀၀၀/ကျပ် ၊ ရွှေဘို ပေါ်ဆန်း(ဒုတိယတန်းစား ) တစ်အိတ်လျှင် ၁၄၅၀၀၀/ကျပ် ၊ ဧရာဝတီပေါ်ဆန်း တစ်အိတ်လျှင် ၁၃၀၀၀၀/ကျပ် ၊ ရွှေဘိုမဂျမ်းတော တစ်အိတ်လျှင် ၁၁၀၀၀၀/ကျပ်၊ မြောင်းမမဂျမ်းတော တစ်အိတ်လျှင် ၁၀၀၀၀၀/ကျပ်၊ ကျောက်ဆည် ပဒေသာ တစ်အိတ်လျှင် ၁၂၅၀၀၀/ကျပ်၊ အရပ် ပဒေသာ တစ်အိတ်လျှင် ၁၁၅၀၀၀/ကျပ် ၊ မကွေးတိုင်းဒေသကြီးမှလာသော ဖန်သီးသုခ တစ်အိတ်လျှင် ၉၅၀၀၀/ကျပ်၊ ဧရာဝတီတိုင်းမှလာသော ဖန်သီးသုခတစ်အိတ်လျှင် ၈၀၀၀၀/-၈၅၀၀၀/ကျပ် ၊ပဲခူးတိုင်းဒေသကြီးမှ လာသော ဗျော့ သုခ တစ်အိတ်လျှင် ၈၀၀၀၀/ကျပ် ၊ ဆင်းသုခ တစ်အိတ်လျှင် ၇၅၀၀၀/ကျပ် ၊ ငစိန် တစ်အိတ်လျှင် ၆၅၀၀၀/ကျပ် ၊ ရက်(၉၀)ဆန် တစ်အိတ်လျှင် ၆၅၀၀၀/-၇၀၀၀၀/ကျပ် တို့ရှိပြီး ယခင်တစ်ပတ်နှင့် နှိုင်းယှဉ်ပါက ဈေးငြိမ်နေကြောင်းသိရပါသည်။

    မိတ္ထီလာဈေးကွက်အတွင်း ရောင်းချနေသော ပေါ်ဆန်းဆန်များကို စစ်ကိုင်းတိုင်း ၊ ဧရာဝတီ တိုင်းဒေသကြီးမှ လည်းကောင်း ၊ ပဒေသာဆန်ကို ဝမ်းတွင်း ၊ ကျောက်ဆည် ၊ စစ်ကိုင်း ၊ မကွေး ၊ ဧရာဝတီတိုင်းဒေသကြီးတို့မှ လည်းကောင်း ၊ မနောသုခဆန်များမှာ ‌ဒေသထွက် ဆန်များ အပြင် ဝမ်းတွင်း ၊ ပဲခူး ၊ ဧရာဝတီတိုင်းဒေသကြီး တို့မှလည်းကောင်း ဝယ်ယူ၍ မိတ္ထီလာမြို့နယ်နှင့် မလှိုင် ၊ သာစည်မြို့နယ် များသို့ရောင်းချရကြောင်းသိရပါသည်။

DOCA(မန္တလေး)

ရမည်းသင်းမြို့နယ်မှထွက်ရှိသော တို့ဟူးသည် ဒေသထွက်ကုန်တစ်ရပ်အနေဖြင့် အထင်ကရရှိ သော စားသောက်ကုန်တစ်မျိုးဖြစ်ပါသည်။ ဒေသတွင်းနေထိုင်သူများအနေနှင့် မိရိုးဖလာလုပ်ငန်းကဲ့သို့ မှတ်ယူကာ မိသားစုတစ်ပိုင်တစ်နိုင် လုပ်ကိုင်ခြင်းဖြင့် ဝင်ငွေရသော လုပ်ငန်းလည်းဖြစ်ပါသည်။

          တို့ဟူးပြုလုပ်ရန် ကုလားပဲခြမ်းကို (၄) နာရီကြာရေစိမ်ပြီးနောက် ကြိတ်ပေးရပါသည်။ ရရှိလာ သော အရည်ကိုပိတ်စဖြင့် အနှစ်ရအောင်စစ်ပေးပြီးနောက် ၎င်းအနှစ်ကို မိနစ် (၄၀) ကြာကျိုချက်ပြီး အအေးခံခွက်တွင်ထည့်၍ အအေးခံပြီးပါက တို့ဟူးတုံးရရှိလာပါသည်။ ကုလားပဲခြမ်း တစ်ပိဿာလျှင် တို့ဟူး (၂.၅) ပိဿာထွက်ရှိပြီး၊ ပဲစိမ်၍ရသောအရည်မှာလည်း တိရိစ္ဆာန်အစာအဖြစ်ရောင်းချရသဖြင့် ၎င်းအရည်ကို စွန့်ပစ်သဖြင့်ထွက်ပေါ်လာမည့် အနံ့အသက်ကို ကာကွယ်နိုင်သည့်အပြင် ဝင်ငွေရရှိ သောကြောင့် အကျိုးကျေးဇူးများသည့် လုပ်ငန်းတစ်ရပ်ဖြစ်သည်။

          ရမည်းသင်းတို့ဟူး၏ထူးခြားချက်မှာ(၁၀)ရက်ခန့်တာရှည်အထားခံသဖြင့် ဒေသထွက်ကုန်အနေ ဖြင့် နယ်ဝေးဒေသများသို့ တင်ပို့နိုင်သည်ကို တွေ့ရသည်။ ရမည်းသင်းတို့ဟူးကို စားသုံးသူအများစုက တို့ဟူးချဉ်ဟူ၍ လူသိများကြောင်း၊ ဒေသထွက်လက်ဆောင်ဝယ်ယူခြင်း၊ လက်ဆောင်ပေးပို့ခြင်းများ ရှိကြောင်း၊ ဈေးကွက်အနေဖြင့် ရန်ကုန်၊ မန္တလေး၊ မြစ်ကြီးနားမြို့များထိ တင်ပို့ရောင်းချကြောင်း၊ မိရိုးဖလာမိသားစု တစ်ပိုင်တစ်နိုင်လုပ်ငန်းမှ ယခုအခါ စီးပွားဖြစ်လုပ်ကိုင်လာ၍ ဒေသထွက်ကုန်အထိ တိုးတက်လာသော ရမည်းသင်းတို့ဟူးမှာ တစ်ပိဿာလျှင် (၈၀၀၀) ကျပ်ဈေးဖြင့် အရောင်းသွက်လျက် ရှိကြောင်းသိရှိရသည်။

DOCA(မန္တလေး)

    ပန်းထိမ်ငိုဘုရားပန်များကို မြိတ်ခရိုင်တောင်ပိုင်းဒေသဖြစ်သော အပူပိုင်းဒေသတွင်လည်း စိုက်ပျိုးနိုင်သည်။ အအေးပိုင်းဒေသတွင် ပိုမိုဖြစ်ထွန်းသောကြောင့် စီးပွားဖြစ်မစိုက်ပျိုးနိုင်ဘဲ တစ် နိုင်တစ်ပိုင် စိုက်ပျိုးခြင်းသာရှိပေသည်။ အများအားဖြင့် ရန်ကုန်မြို့မှ လေကြောင်းနှင့်ကားလမ်း များဖြင့်သယ်ယူ၍ မြိတ်မြို့ပေါ်ရှိစျေးများနှင့် ရပ်ကွက်ဆိုင်များတွင် ရောင်းချကြသည်။

    ပန်းထိမ်ငိုပန်းများသည် မိုးများသောဇွန်လလောက်တွင် စတင်ဖူးပွင့်၍ အဖြူရောင်နှင့် ခရမ်းရောင်ဟူ၍ နှစ်မျိုးရှိသည်။ ရာသီချိန်ထွက်ပေါ်ဦးပေါ်ဖျားဖြစ်ပြီး တာရှည်ခံသောပန်းဖြစ် သောကြောင့် လူကြိုက်များကာ အရောင်းအဝယ်ဖြစ်နေကြောင်း သိရှိရပါသည်။ ပန်းထိမ်ငိုပန်း အခက်အကြီး၊ အသေးပေါ်မူတည်၍ စျေးနှုန်းများကွာဟမှုရှိကြောင်း သိရှိရပါသည်။ ၂၀၂၅ခု၊ ဇွန်လ၊ ဒုတိယပတ်တွင် ပန်းထိမ်ငိုပန်းတစ်ခက်လျှင် (၁၈၀၀)ကျပ်၊ (၁၀)ခက်ပါတစ်စည်းလျှင် (၁၅၀၀၀)ကျပ်ဖြစ်နေကြောင်း ရောင်းချသူထံမှ သိရှိရပါသည်။

DOCA(တနင်္သာရီ)

              ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ ၏  ကြက်သွန်နီ လက်ကျန် အခြေအနေများ အား  အမှန်ကန်ဆုံး သိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရ လည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ် ဝင်ရောက်မှု စာရင်းများအရလည်းကောင်း၊ ကြက်သွန်နီ လက်ကျန်အခြေအနေအား နေ့စဉ်စုံစမ်း လျက်ရှိပါသည်။

           ဇွန်လ (၁၉) ရက်နေ့တွင် ဘုရင့်နောင် ကုန်စည်ဒိုင်သို့ ကြက်သွန်နီ ဝင်ရောက်ရာဒေသ များ ဖြစ်သည့် ဆိပ်ဖြူ၊ မြင်းခြံ၊ ပခုက္ကူ၊ ရွှေဘို၊ မိတ္ထီလာဒေသတို့မှ ကြက်သွန်နီ (၇၃၂၀၀၀) ပိဿာ ဝင်ရောက်ခဲ့ပြီး (၆၀) ရာခိုင်နှုန်းခန့် ပြန်လည်စီးထွက်မှုရှိကြောင်း သိရှိရပါသည်။ ထို့ကြောင့် ကြက်သွန်နီ လက်ကျန် မှာ (၂၉၂၈၀၀) ကျန်ရှိကြောင်း ကုန်စည်ဒိုင်သတင်းအရ သိရှိရသည်။ ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၉၀၀၊ အသန့်မှာ တစ်ပိဿာ ကျပ် ၁၄၀၀၊ အကြီးမှာ ကျပ် ၁၅၀၀၊ ရှယ်မှာ ကျပ် ၁၆၀၀၊ ပခုက္ကူ ကြက်သွန်နီ (အသစ်) အချော တစ်ပိဿာ ကျပ် ၉၀၀၊ အသန့်မှာ တစ်ပိဿာ ကျပ် ၁၃၀၀၊ အကြီးမှာ ကျပ် ၁၃၅၀၊ ရှယ်မှာ ကျပ် ၁၄၅၀၊ မြင်းခြံ ကြက်သွန်နီ (အသစ်) အချော တစ်ပိဿာ ကျပ် ၆၀၀၊ အသန့်မှာ တစ်ပိဿာ ကျပ် ၉၀၀၊ အကြီးမှာ ကျပ် ၁၀၀၀၊ ရှယ်မှာ ကျပ် ၁၁၀၀၊ ရွှေဘို ကြက်သွန်နီ(အသစ်) အချော တစ်ပိဿာ ကျပ် ၁၂၀၀၊ အသန့်မှာ တစ်ပိဿာ ကျပ် ၁၆၀၀၊ အကြီးမှာ ကျပ် ၁၇၀၀၊ ရှယ်မှာ ကျပ် ၁၇၀၀၊ မိတ္ထီလာ ကြက်သွန်နီ(အသစ်) အချော တစ်ပိဿာ ကျပ် ၉၀၀၊ အသန့်မှာ တစ်ပိဿာ ကျပ် ၁၃၅၀၊ အကြီးမှာ ကျပ် ၁၄၅၀၊ ရှယ်မှာ ကျပ် ၁၅၀၀  ဈေးတို့အသီးသီး ရှိကြောင်း စုံစမ်းသိရှိရပါသည်။

          ယခင်တစ်ပတ်နှင့် ယခုတစ်ပတ် ကြက်သွန်နီဈေးနှုန်းများ နှိုင်းယှဉ်ရာတွင် ပခုက္ကူ ကြက်သွန် နီဈေးနှုန်းများမှာ ဈေးနှုန်းအနည်းငယ်မြင့်တက်သွားကြောင်း သိရှိရပါသည်။

DOCA(ရန်ကုန်)

    မြန်မာနိုင်ငံရှိမြို့နယ်အများစုသည် ဆံပင်ကျွတ်နှင့် ဆံပင်အရှည်ရောင်းဝယ်ရေးလုပ်ငန်း များ ဖြင့်  တွင်တွင်ကျယ်ကျယ် လုပ်ကိုင်ကြပြီး ဆံပင်ကျွတ်ရောင်းဝယ်ရေးလုပ်ငန်းသည် ဈေးကွက် တစ်ခု အဖြစ် တည်ရှိကြောင်း၊ ဆံပင်ကျွတ်ရောင်းဝယ်‌ရေးဆိုသည်မှာ လူတစ်ဦး၏ ဆံပင်ကိုဖြတ်ပြီး ရောင်းချခြင်း၊ ခေါင်းဖီးရာတွင် ကျွတ်လာသော ဆံပင်များကို စုဆောင်း၍ ရောင်းချခြင်းကို ဆိုလို ကြောင်းသိရှိရသည်။

    မြင်းခြံမြို့နယ်တွင် ၂၀၂၅ ခုနှစ်၊ ဇွန်လ တတိယပတ်တွင် ဖြစ်ပေါ်နေသော ဆံပင်ကျွတ် (အနက်) တစ်ကျပ်သားလျှင် (၅၅၀၀) ကျပ်၊ ဆံပင်ကျွတ်(အဖြူ) တစ်ကျပ်သားလျှင် (၃၅၀၀) ကျပ်၊ လက်မအလိုက် ဖြတ်ထားသောဆံပင်အရှည် ၁၈လက်မ တစ်ကျပ်သားလျှင်(၈၀၀၀) ကျပ်၊ အရှည် (၂၀) လက်မ တစ်ကျပ်သားလျှင်(၁၁၀၀၀)ကျပ် ပေါက်ဈေးများဖြင့် ရောင်းဝယ်လျက်ရှိကြောင်း၊ ယခင်လ မေလတတိယပတ်တွင် ဖြစ်ပေါ်ခဲ့သောဆံပင်ကျွတ်(အနက်) တစ်ကျပ်သားလျှင် (၅၀၀၀) ကျပ်၊ ဆံပင်ကျွတ်(အဖြူ) တစ်ကျပ်သားလျှင် (၃၀၀၀) ကျပ်၊ လက်မအလိုက်ဖြတ်ထားသော ဆံပင် အရှည် ၁၈လက်မ တစ်ကျပ်သားလျှင် (၇၀၀၀) ကျပ်၊ ဆံပင်အရှည်(၂၀) လက်မ တစ်ကျပ်သား လျှင် (၁၀၀၀၀)ကျပ် ပေါက်ဈေးများဖြင့် အရောင်းအဝယ်များဖြစ်ခဲ့ကြောင်း၊ ကာလတူနှိုင်းယှဉ်ပါက  ယခင်လထက် ယခုလတွင် ဆံပင်ကျွတ်တစ်ကျပ်သားလျှင် (၅၀၀) ကျပ်၊ လက်မအလိုက် ဖြတ်ထား သော  ဆံပင်အရှည် တစ်ကျပ်သားလျှင် (၁၀၀၀) ကျပ်ခန့်ဈေးနှုန်းများမြင့်တက်ခဲ့ကြောင်း၊ အလှပ ရေးရာအတွက် အသုံးပြုမှုများပြားလာသောကြောင့် ဈေးနှုန်းအနည်းငယ် မြင့်တက်ခဲ့ကြောင်း၊ ဈေးကွက် တင်ပို့ရောင်းချမှုအနေဖြင့် မန္တလေးမြို့နှင့် မိတ္ထီလာမြို့သို့ရောင်းချလျက်ရှိကြောင်း သိရှိရ သည်။ ဆံပင်အရှည်များကို လက်မအလိုက် ဈေးကောင်း‌ပေး၍လည်း ဝယ်ယူကြောင်း၊ ရောင်းချရာ တွင် ဆံပင် အမျိုးအစားအလိုက်၊ ဆံပင်အရည်အသွေးအလိုက် ဈေးနှုန်းများလည်း ကွာခြားကြောင်း သိရှိရသည်။ ဆံပင်ကျွတ်ရောင်းဝယ်ရေးလုပ်ငန်းသည်  ဆံပင်တုပြုလုပ်ရာတွင်လည်းကောင်း၊ ဆံပင်ရှည်ဆက်ရာ တွင်လည်းကောင်း၊ ဆံထုံးအတုများပြုလုပ်ရာတွင်လည်း အသုံးပြုကြောင်း ဆံပင်ကျွတ်ရောင်းဝယ်ရေးသည် စီးပွားရေးအရ အကျိုးအမြတ်ရရှိကြောင်း သိရှိရသည်။

DOCA(မန္တလေး)