ဧရာဝတီတိုင်းဒေသကြီး၊ မအူပင်ခရိုင်၊ ပန်းတနော် မြို့နယ်အတွင်းရှိ ကျေးရွာများသည် လယ်ယာစိုက်ပျိုးရေးလုပ်ငန်းကို လုပ်ကိုင်ကြပြီး သီးနှံမျိုးစုံ စိုက်ပျိုးလျက်ရှိကြောင်း၊ မိသားစုအပိုဝင်ငွေရရှိရန်အတွက် စားဖိုဆောင်သီးနှံများကိုလည်း ရာသီအလိုက် စိုက်ပျိုးလျက်ရှိရာ တိုင်ထောင်ပဲ (ခေါ်) ပဲတောင့်ရှည်သီးနှံများကို တစ်နိုင်တစ်ပိုင်စိုက်ပျိုးရာမှ စီးပွားဖြစ်စိုက်ပျိုးလာကြကြောင်း သိရသည်။
ပဲတောင်ရှည်စိုက်ပျိုးရာတွင် မျိုးစေ့ Super 222 မျိုး ၁ထုတ်လျှင် ငွေကျပ် ၂၅၀၀၀ဖြင့် ဝယ်ယူရကြောင်း၊ ၁ဧကလျှင် မျိုးထုတ် ၁၂ထုတ် စိုက်ပျိုးရကြောင်း၊ စတင်စိုက်ပျိုးချိန်မှာ ၂၀၂၅ခုနှစ် မေလက စတင်စိုက်ပျိုးပြီး စိုက်ပျိုးပြီး ၄၅ရက်အကြာတွင် အသီးစတင် သီးကြောင်း ၂လအကြာတွင် အသီးခူးရောင်းချလို့ ရပြီဖြစ်ကြောင်း၊ တစ်ခါခူးပြီး လျှင် ၅ရက်မှ ၇ရက်ခြားအကြား ထပ်မံခူးရကြောင်း၊ စိုက်ပျိုးမှုကုန်ကျစရိတ် အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် ၇၀၀ ၀၀၀/- ကုန်ကျကြောင်း၊ အသီးကျသည်အထိ ခူးဆွပ်ရ၍ ခူးဆွပ်ကာလ ၄လအထိ ကြာမြင့်ကြောင်း သိရသည်။ ရောင်းချသော လက်ကားဈေးနှုန်းအနေဖြင့် ၁၀တောင့် ၁စီးလျှင် ၅၀၀ကျပ်ဖြင့် ရောင်းချရကြောင်း အထွက်နှုန်းအနေဖြင့် ၁၀တောင့်စီး ၂၅၀၀ခန့် ထွက်ရှိကြောင်း သိရသည်။ အကျိုးအမြတ်အနေဖြင့် ငွေကျပ် ၅၅၀ ၀၀၀/- ကျော် အကျိုးအမြတ်ကျန်ရှိကြောင်း နှစ်စဉ် ပဲတောင့်ရှည်သီးနှံကို စီးပွားဖြစ်လုပ်ငန်းတစ်ခုအဖြစ် စိုက်ပျိုးကြောင်း စိုက်ပျိုးသူထံမှ သိရှိရပါသည်။
DOCA(ဧရာဝတီ)