ပြည်တွင်းကုန်သွယ်မှုသတင်း

      တောင်သာမြို့နယ်တွင် စက်သုံးဆီအရောင်းဆိုင်(၁၃)ဆိုင်မှ စက်သုံးဆီများကို နေ့စဉ်ပုံမှန် ဖွင့်လှစ်ရောင်းချလျက်ရှိရာ ၂၀၂၅ခုနှစ်၊နိုဝင်ဘာလ(၁၄)ရက်နေ့ စက်သုံးဆီတစ်လီတာ အရောင်းဈေးနှုန်းများအနေဖြင့် 92 Octance(၂၇၅၀)ကျပ်၊ 95 Octance(၂၈၂၅)ကျပ်၊ ရိုးရိုးဒီဇယ် (၂၇၀၅) ကျပ်၊ ပရီမီယမ်ဒီဇယ်(၃၂၅၀)ကျပ်ဝန်းကျင်ဖြင့် ရောင်းချလျက်ရှိကြောင်း သိရှိရသည်။

         စက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ၁၄.၁၁.၂၀၂၅ရက်နေ့တွင် ထုတ်ပြန်ထားသည့် စက်သုံးဆီတစ်လီတာ၏ သတ်မှတ်ရည်ညွှန်းဈေးများမှာ 92 Octance (၂၇၀၀)ကျပ်၊ 95 Octance(၂၇၇၅)ကျပ်၊ ရိုးရိုးဒီဇယ်(၂၆၅၅)ကျပ်၊ ပရီမီယမ်ဒီဇယ်(၃၂၀၀)ကျပ် ဖြစ်ကြောင်း  သိရှိရသည်။ သတ်မှတ်ရည်ညွှန်းဈေးများသည် ယခင်အပတ်နှင့် နှိုင်းယှဉ်ပါက 92 Octance တစ်လီတာလျှင် (၂၀)ကျပ်၊ 95 Octance တစ်လီတာလျှင်(၂၅)ကျပ်ဖြင့် ဈေးနှုန်းကျဆင်းခဲ့ပြီး  ရိုးရိုးဒီဇယ်တစ်လီတာလျှင် (၃၅)ကျပ်၊ ပရီမီယမ်ဒီဇယ်တစ်လီတာလျှင်(၄၀) ကျပ်တို့ ဈေးနှုန်းမြင့်တက်ခဲ့ကြောင်း သိရှိရပါသည်။

DOCA(မန္တလေး)

                 မြင်းခြံမြို့၊ အေးမြသီတာဈေးတွင်ရောင်းချနေသော ငါးကြင်းခြစ်အသားများကို ရန်ကုန်မြို့ရှိ ကြည့်မြင်တိုင်ဈေးမှ တင်သွင်းရောင်းချ‌ကြောင်း၊ ၂၀၂၅ခုနှစ်၊ နိုဝင်ဘာလတွင် ငါးကြင်းခြစ်အသား (၂၅)ကျပ်သားလျှင်(၇၇၀၀)ကျပ်၊ တစ်ပိသာလျှင်(၃၀၀၀၀)ကျပ်ခန့် ပေါက်ဈေးများဖြင့် ရောင်းချ လျက်ရှိကြောင်း၊ ငါးကြင်းခြစ်အသားများသည် အရိုးမပါသောကြောင့် ဈေးကွက်တွင် လူမျိုးဘာသာ မရွေးစားသုံးမှုများပြားပြီး အရောင်းအဝယ်သွက်လျက်ရှိကြောင်း၊ နေ့စဉ် ငါးကြင်းခြစ်အသား (၁၀-၂၀)ပိဿာခန့် ရောင်းချရကြောင်း ငါးပုစွန်ရောင်းဝယ်‌ရေးဆိုင်များမှ သိရှိရသည်။ ငါးကြင်းခြစ်အသားသည် ပရိုတင်းဓာတ်ကြွယ်ဝစွာပါဝင်သောကြောင့် သွေးသားသန့် စင်ခြင်း၊ ကြွက်သားဖွဲ့စည်းမှု အားကောင်း၍ ကိုယ်ခံအားမြှင့်တင်ပေးခြင်း၊ အိုမီဂါ-3(အဆီဓာတ်) များကြွယ်ဝစွာပါဝင်သောကြောင့်နှလုံးကျန်းမာရေး၊ဦးနှောက်ဖွံဖြိုးမှုနှင့်သံဓာတ်စသည့်အာဟာရဓာတ်များ ပါဝင်သောကြောင့် အရိုးမပါသောအသားစ ငါးကြင်းခြစ်များသည် ဈေးကွက်၌ တွင်တွင်ကျယ်ကျယ်ရောင်းဝယ် လျက်ရှိကြောင်းသိရှိရသည်။

DOCA(မန္တလေး)

             မြင်းခြံမြို့နယ် ကျေးရွာအချို့သည် စိုက်ပျိုးရေးလုပ်ငန်းကို လုပ်ကိုင်စားသောက်ကြရာ စပါးခင်း၏ ကန်သင်ရိုးတွင် စားဖိုဆောင်သီးနှံဖြစ်သော ပဲသီးတောင့်ရှည်ကိုလည်း တိုင်ထောင်၍ အပိုဝင်ငွေရရှိရန် တိုင်ထောင်၍ စိုက်ပျိုးကြကြောင်း သိရသည်။ မြင်းခြံမြို့ပေါ်ရှိ မြို့မစည်ပင်သာ ယာဈေး၊ အေးမြသီတာ ဈေးနှင့် စံပြဈေးတို့တွင် အချို့က ဖောက်သည်ပေးပြီး အချို့က ကိုယ်တိုင်ရောင်းချကြောင်း ဒေသခံတောင်သူတစ်ဦး၏ ပြောကြားချက်အရ သိရပါသည်။ ပဲသီးကို ကြက်ဥနှင့်ကြော်စား၍ လည်းကောင်း၊ ငါးဖယ်ခြစ်နှင့်ချက်စား၍လည်းကောင်း၊ ပဲသီးအစပ်ချက်ချက် စား၍လည်းကောင်း၊ ပဲသီးပြုတ်၍ မြေပဲဆံထောင်း၊ ပဲကျက်မှုန်နှင့် ကြက်သွန်ဖြူဆီချက်ဖြင့်သုပ် ၍လည်းကောင်း စားသုံးခြင်းကြောင့် လူကြိုက်များပြီး အရောင်းအဝယ်သွက်သော သီးနှံတစ်မျိုး ဖြစ်ပါသည်။ ယခု နိုဝင်ဘာလ ပထမပတ်တွင် ပဲသီးတောင့်ရှည်များ ခူးဆွတ်ရာသီကုန်သွားပါသဖြင့် မိတ္ထီလာမှ ဝယ်ယူရောင်းချကြောင်း၊ မိတ္ထီလာမြို့မှ ပဲသီးသည် အတောင့်ချောပြီး ဒေသထွက် ပဲသီးထက် ပို၍ရှည်ကြောင်း သိရသည်။နိုဝင်ဘာလ ပထမပတ်တွင် ပဲသီးတောင့်ရှည်ဈေးနှုန်းမှာ (၂၅)ကျပ်သား လျှင်  (၁၀၀၀)ကျပ်နှင့် တစ်ပိဿာလျှင် (၃၅၀၀/၄၀၀၀) ကျပ်ဈေးဖြင့် ရောင်းချ ကြောင်း၊ နိုဝင်ဘာလ တတိယပတ်တွင် ပဲသီးတောင့်ရှည် (၂၅) ကျပ်သားလျှင် (၁၅၀၀)ကျပ်နှင့် တစ်ပိဿာလျှင် (၅၀၀၀/၅၅၀၀)ကျပ် ဖြင့်ရောင်းချကြောင်း ၊ ယခင်ပတ်နှင့် နှိုင်းယှဉ်လျှင် (၂၅)ကျပ် သားလျှင် (၅၀၀)ကျပ် ဈေးနှုန်းမြင့်တက်လာကြောင်း၊ ပဲသီးအထွက်နှုန်းများ လျော့နည်းလာပြီဖြစ် သောကြောင့် ဝင်ရောက်မှုနည်း၍ ဈေးနှုန်းမြင့်တက်လာကြောင်း သိရှိရသည်။

DOCA(မန္တလေး)

           အပူပိုင်းမိုးနည်းရပ်ဝန်းဒေသဖြစ်သော မြင်းခြံမြို့နယ်သည် မြန်မာနိုင်ငံအလယ်ပိုင်းတွင်တည်ရှိ၍  မိုးကောင်းသောက်ဧရိယာများတွင် ဆန်စပါး၊ ပဲမျိုးစုံ၊ ဆီထွက်သီးနှံနှင့် ဆေးရွက်ကြီး၊ ပြောင်းနှင့် ကြက်သွန်နီများစိုက်ပျိုးလျက်ရှိကြောင်းသိရှိရသည်။ ပဲကြီး(မိုး)ကို ဩဂုတ်လနှင့် စက်တင်ဘာလတို့တွင်စတင်စိုက်ပျိုးပြီး၊ နိုဝင်ဘာလနှင့် ဒီဇင်ဘာလတို့တွင် ရိတ်သိမ်းထွက် ပေါ်ကြောင်း သိရှိရသည်။ ၂၀၂၅/၂၀၂၆ ခုနှစ်တွင် ပဲကြီး (မိုး) သီးနှံအား စီမံကိန်း(၃၀၀) လျာထားဧကအနက် (၃‌၇၇)ဧက စိုက်ပျိုးထားရှိကြောင်း၊ စီမံကိန်းလျာထား ဧကထက် (၇၇)ဧကကျော် ပိုမိုစိုက်ပျိုးထားကြောင်း၊ မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်း များအရသိရှိရသည်။ ပဲကြီး (မိုး) သီးနှံကို လှိုင်းတက်ကျေးရွာ၊ ဘောလုံးကျေးရွာ၊ ဓါးကျွန်းရွာ၊ ဖိုးတုတ်ဖြူရွာ နှင့် သဲဖြူဝရွာများတွင်စိုက်ပျိုးထားကြောင်း၊ ယခင်နှစ် အထွက်နှုန်းအနေဖြင့်  ပဲကြီးတစ်ဧကလျှင် (၈-၉)ခန့်ထွက်ရှိကြောင်း၊ ပင်ကြား၊တန်းကြား (၃ပေ×၃ပေ) စနစ်ဖြင့် စိုက်ပျိုးထားရှိကြောင်း၊ မိုးကိုမျှော်၍စိုက်ပျိုးရသော သီးနှံဖြစ်သောကြောင့် ရာသီဥတုကောင်းမွန်ပါက ယခင်ထက်အထွက်နှုန်း ကောင်းနိုင်ကြောင်း ပဲကြီးစိုက်တောင်သူတစ်ဦး၏ ပြောပြချက် အရသိရှိရသည်။

DOCA(မန္တလေး)

            ဖရဲသီး၏အသားထူထူကို လူတို့စားသုံးကြသည်သာမက ဖရဲသီးမှထွက်ရှိသောအစေ့ ဖရဲစေ့ကို လည်း ကွာစေ့လှော်ပြုလုပ်၍စားသုံးကြကြောင်း၊ မြင်းခြံဈေးကွက်၌ ရောင်းချနေသော ကွာစေ့လှော် များကို မုံရွာမြို့တို့မှ တင်သွင်းရောင်းချကြောင်း၊ ၂၀၂၅ခုနှစ်၊ နိုဝင်ဘာလ၌ ကွာစေ့လှော် တစ်ပြည်လျှင် ()ကျပ်ခန့် ပေါက်ဈေးများဖြင့်‌ရောင်းချကြောင်း၊ အညာဒေသ၌ ကွာစေ့လှော်ကို အပျင်းပြေစားသုံး ကြသလို သာရေး၊ နာရေးပွဲများတွင်လည်း တည်ခင်းဧည့်ခံကြကြောင်း၊ စားသုံးခြင်းဖြင့် ဆံပင်ကောင်း ခြင်း၊ အသားအရေလှပခြင်း၊ ခွန်အားတိုးခြင်း၊ သွေးတိုးကျခြင်း၊ အစာကြေခြင်း၊ သွေးတွင်း သကြားဓာတ်ကို ထိန်းညှိပေးခြင်းနှင့် အရိုးအဆစ်သန်မာခြင်းစသည့် အာဟာရဓာတ်များ ပါဝင်သော ကြောင့် ဈေးကွက်တွင် စားသုံးမှုများပြား၍ နေ့စဉ်ကွာစေ့လှော် (၅-၈)ပြည်ခန့် ရောင်းချရပြီး အရောင်းအဝယ် သွက်လျက်ရှိသည်။

DOCA(မန္တလေး)