ပြည်တွင်းကုန်သွယ်မှုသတင်း

     တနင်္သာရီတိုင်းဒေသကြီး၊ ထားဝယ်မြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များ တွင် ဟင်းသီးဟင်းရွက်စိုက်ပျိုးရေးလုပ်ငန်းများကို အများအပြားလုပ်ကိုင်လျက်ရှိကြောင်း သိရသည်။ ဒေသခံများသည် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ရုံးပတီသီး၊ ဘူးသီး၊ ငရုတ်သီး စသည့် သီးနှံများကို စိုက်ပျိုးကြသည့်အပြင် သင်္ဘောသီးစိမ်းများကိုလည်း တစ်နိုင်တစ်ပိုင် စိုက်ပျိုး ကြပြီး စည်ပင်သာယာဈေးနှင့် ကျေးရွာဈေးများသို့ လာရောက်ရောင်းချကြကြောင်း သိရှိရသည်။

    ၂၀၂၅ခုနှစ်၊ အောက်တိုဘာလအတွင်း ထားဝယ်မြို့နယ်ရှိ ဈေးများ၌ ရောင်းချလျက်ရှိသော သင်္ဘောသီးစိမ်းဈေးနှုန်းမှာ သင်္ဘောသီးစိမ်း(၁)လုံးလျှင် (၅၀၀)မှ (၁,၀၀၀)ကျပ်ဖြင့် အရောင်းအဝယ် ဖြစ်ပွားလျက်ရှိကြောင်း ဒေသခံ ကုန်စိမ်းရောင်းချသူများထံမှ သိရှိရသည်။

DOCA(တနင်္သာရီ)

     တနင်္သာရီတိုင်းဒေသကြီး၊ ထားဝယ်မြို့အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေး လုပ်ငန်းများကို လုပ်ကိုင်စားသောက်ကြရာမှ စားဖိုဆောင်သီးနှံဖြစ်သည့် ပဲတောင့်ရှည် သီးကိုလည်း မိသားစုစီးပွားရေးလုပ်ငန်းများအဖြစ် တစ်နိုင်တစ်ပိုင်စိုက်ပျိုးလျက်ရှိပြီး ထားဝယ်မြို့မ စျေးကြီးများနှင့် ကမ်းနားပျံကျစျေးများတွင် ရောင်းချလျက်ရှိကြောင်းသိရှိရပါသည်။

    ယခုအခါ ထားဝယ်မြို့ရှိ အောက်တိုဘာလဒုတိယအပတ်တွင် ပဲတောင့်ရှည်သီး စျေးနှုန်း များမှာ ပဲတောင့်ရှည်သီး အစီးငယ်တစ်စီးလျှင် (၆၀၀)ကျပ်ရှိပြီး ပဲတောင့်ရှည်သီးတစ်စီးလျှင် (၂၅၀၀) ကျပ်ရှိကြောင်း ရောင်းချသူများထံမှ သိရှိရပါသည်။

DOCA(တနင်္သာရီ)

          နှင်းဆီပန်းသည် လူကြိုက်များသော ပန်းတစ်မျိုးဖြစ်သည်။ နှင်းဆီပန်းကို အလှအပ ပန်းဆင်၊ ပန်းခင်း၊ ပွဲလမ်းသဘင်များတွင် အလှပန်းအနေဖြင့် အသုံးပြုကြပြီး၊ မြန်မာလူမျိုးများအနေဖြင့် ဘုရားပန်းကပ်လှူခြင်းများလည်းရှိသည်။ နှင်းဆီအမျိုးပေါင်း ၁၀၀လောက်ရှိပြီး အရောင်းအသွေးအမျိုးမျိုးရှိသည်။ နှင်းဆီပန်းသည် အာရှမျိုးရင်း ပင်ဖြစ်သည်ဟု ဖတ်ရှုလေ့လာသိရှိရသည်။

          မအူပင်မြို့တွင် ဒေသပန်းများကို တနိုင်တပိုင် ခြံမြေများ၊ လယ်ကွက်ဘေးဘောင် ပိုလျှံနေရာများတွင် စိုက်ပျိုးကြောင်း တွေ့ရှိရသည်။  ပွင်းလင်းရာသီတွင်သာ ကျေးရွာများ၌ ပန်းစိုက်ပျိုးကြောင်း သိရသည်။ ယခုလို မိုးတွင်ကာလတွင် မအူပင်ပန်းဈေးကွက်၌ ရောင်းချသောပန်းများကို တွေ့ရှိရပြီး ရောင်းချနေသောပန်းများမှ ရန်ကုန် သီရိမင်္ဂလာဈေးမှ မှာယူဝယ်ယူပြီး မအူပင်တွင်ပန်းများကို ရောင်းချနေခြင်းဖြစ်သည်။

          မအူပင်တွင် ဘုရားပန်းရောင်းချသူများ ရောင်းချသောပန်းများတွင် ရေမွေးနှင်းဆီ၊ ချိုချဉ်နှင်းဆီ၊ အနီရောင်နှင်းဆီပန်းများ ရောင်းချနေကြောင်းတွေ့ရပြီး ရေမွေးနှင်းဆီခေါ် ပန်းဆီရောင်နှင်းဆီ ၁၀ပွင့် တစ်စည်းကို ၂၅၀၀ကျပ်၊ ချိုချဉ်နှင်းဆီ ၃၀၀၀ကျပ်၊ နှင်းဆီအနီရောင် ၁၀ပွင့်တစ်စည်းကို ၃၅၀၀ကျပ် ရောင်းချနေပြီး၊ ပန်းလှည်းဖြင့် မြို့နယ်ရပ်ကွက်များသို့ လှည့်လည်ရောင်းချသူများကိုလည်းတွေ့ရှိရသည်။ ၎င်းနှင်းဆီ ပန်းများသည် တောင်ကြီးဘက်မှ ဝင်ရောက်လာပြီး ရန်ကုန်သီရိမင်္ဂလာဈေးမှ ဝယ်ယူပြီး မအူပင်မြို့အတွင်း ရောင်းချခြင်းဖြစ်ကြောင်း ပန်းရောင်းချသူတစ်ဦး ပြောကြားချက်အရ သိရှိရပါသည်။

DOCA(ဧရာဝတီ)

          မန္တလေးတိုင်းဒေသကြီး၊ကျောက်ဆည်ခရိုင်တွင် သီးနှံမျိုးစုံစိုက်ပျိုးလျက်ရှိရာ စားဖိုဆောင် သီးနှံတစ်မျိုးဖြစ်သော နနွင်းသီးနှံကိုလည်း စိုက်ပျိုးကြပါသည်။ ၂၀၂၅-၂၀၂၆ ဘဏ္ဍာနှစ်တွင် နနွင်း စိုက်ဧက (၂၀၀၄)ဧကစိုက်ပျိုးနိုင်ခဲ့ကြောင်း သက်ဆိုင်ရာဌာနများ၏စာရင်းများအရ သိရှိရပါသည်။ နနွင်းစျေးနှုန်းအနေဖြင့် ယခင်နှစ် နနွင်းတက်တစ်ပိဿာလျှင် (၉၅၀၀/)ကျပ်၊နနွင်းခေါင်းတစ်ပိဿာ လျှင် (၈၀၀၀/-)ကျပ် ၊ နနွင်းမှုန့်နို့ဆီဗူးတစ်ဗူးလျှင် (၁၅၀၀/-)ကျပ်၊ ယခုအချိန် နနွင်းတက် တစ်ပိဿာလျှင် (၉၀၀၀/)ကျပ်၊နနွင်းခေါင်းတစ်ပိဿာ လျှင် (၉၀၀၀/-)ကျပ်၊နနွင်းမှုန့်နို့ ဆီဗူးတစ်ဗူး လျှင် (၂၅၀၀/-)ကျပ် စျေးနှုန်းများဖြင့်အရောင်းအဝယ်ဖြစ်လျက်ရှိကြောင်း၊ ယခုအချိန် နနွင်းခင်းများ အောင်မြင်ဖြစ်ထွန်းလျက်ရှိပြီး နနွင်းဖူးများလည်း လှိုင်လှိုင်ထွက်ပေါ်လျက်ရှိရာ သွင်းစျေးအနေဖြင့် နနွင်း(၃)ဗူးတစ်တွဲလျှင် (၈၀/-)ကျပ် ၊ နနွင်း(၁၁)ဗူးတစ်တွဲလျှင် (၈၀၀/-)ကျပ် စျေးနှုန်းရရှိပြီး အခင်းထဲအရောက်လာရောက်ဝယ်ယူလျက်ရှိကြောင်း ၊ လက်လီစျေးနှုန်းအနေဖြင့် စျေးထဲ၌ နနွင်းအဖူး(၁၀)ဗူးတစ်စည်းလျင် (၅၀၀/-)ကျပ်နှုန်းဖြင့် ရောင်းချလျက်ရှိပါသည် ။ တင်ပို့မှုအနေဖြင့်  မန္တလေး၊ ရန်ကုန်၊ မော်လမြိုင်၊ ဘားအံ မြို့များသို့တင်ပို့ရောင်းချလျက်ရှိကြောင်း၊ ယခုနှစ် နနွင်းဖူး စျေးကွက်ကောင်းမွန်လျက်သဖြင့် တောင်သူများအတွက် တွက်ချက်ကိုက်သောနှစ်ဖြစ်၍ တောင်သူ ဦးကြီးများ ပြုံးပျော်လျက်ရှိကြောင်း နနွင်းစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)