သတင်းနှင့် လှုပ်ရှားမှုများ

     စားသုံးသူရေးရာဦးစီးဌာန၊ ရန်ကုန်အနောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိ(၂)ဦး နှင့် ဝန်ထမ်း(၂) ဦးတို့သည်  အလုံခရိုင်၊ အလုံမြို့နယ်၊ အလုံဈေး အတွင်းရှိ ဒေါ်အေးသီတာ (ဆီဆိုင်) နှင့် ဒေါ်သိန်းဌေး (ဆီဆိုင်) တို့အား ဈေးတာဝန်ခံတို့နှင့် ပူးပေါင်းပြီး ဆီရောင်းချမှုအခြေအနေများနှင့် ကွင်းဆင်းစစ်ဆေး အသိပညာပေးမှုအား ၁၇.၆.၂၀၂၅ ရက်နေ့တွင် ဆောင်ရွက်ခဲ့ကြောင်း သိရှိရပါသည်။

    ထိုသို့ ကွင်းဆင်းအသိပညာပေးရာတွင် ဆီဆိုင်များမှရောင်းချနေသော ဆီများသည် သတ်မှတ်ထားသော ရည်ညွှန်းဈေးနှုန်းများအတိုင်း ရောင်းချခြင်း ရှိ/မရှိနှင့် ဆီဈေးနှုန်းကြီးမြင့်မှု မဖြစ်ပေါ်စေရန် စစ်ဆေးခဲ့ကြပြီး ရောင်းချနေသော ဆီကိုယ်စားလှယ်များအား ဈေးတင်ရောင်းချပါက အရေးယူခံရမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သိရှိရပါသည်။

DOCA (ရန်ကုန်)

       ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် စားသုံးသူရေးရာဦးစီးဌာနမှ ဝန်ထမ်းများသည် ရန်ကုန်တောင်ပိုင်းခရိုင်ဦးစီးမှူးရုံး၏ ညွှန်ကြားချက်နှင့်အညီ ကွမ်းခြံကုန်းမြို့နယ် မြို့မဈေးအတွင်း အခြေခံစားသောက်ကုန် ရောင်းချသည့်ဆိုင်များသို့  ဇွန်လ (၁၆)ရက် နေ့၊ နံနက် (၁၀:၃၀) နာရီအချိန်တွင် ကွင်းဆင်းစစ်ဆေးခဲ့ကြောင်း သိရသည်။

     ထိုသို့ ကွင်းဆင်းစစ်ဆေးခဲ့ရာတွင် ကွမ်းခြံကုန်းမြို့နယ် စည်ပင်သာယာရေးအဖွဲ့မှ ဈေးတာဝန်ခံ ကျန်းမာရေးမှူး(၃) ဦးထွန်းထွန်း၊ စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးနှင့် ဌာနခွဲစာရေး ဦးတင်ထွန်းဦးတို့ ပူးပေါင်းပါဝင်သောအဖွဲ့သည် ကွမ်းခြံကုန်း မြို့နယ် မြို့မဈေးအတွင်း ရောင်းချသောဆန်ဆိုင်များဖြစ်သည့် တို့ရန်ကုန်သား ဆန်နှင့်ဆန်ထွက် ပစ္စည်းရောင်းဝယ်ရေး၊ အောင်မိသားစု (ဆန်နှင့်ဆန်ထွက်ပစ္စည်းရောင်းဝယ်ရေး) ဆိုင်များတွင်လည်းကောင်း၊ စားဖိုဆောင်သုံးပစ္စည်းများ ဖြစ်သော ငရုပ်အရှည်၊ ငရုပ်အပု၊ ကြက်သွန်နီ၊ ကြက်သွန်ဖြူ၊ ဆီ၊ ဆား၊ ကုလားပဲတို့ကို မခိုင် (ကုန်မျိုးစုံဆိုင်)၊ ဒေါ်ရီရီသန်း (ကုန်စုံဆိုင်)တို့တွင် လည်းကောင်း ငံပိကို ဆရာမ (မုန့်ဖတ်နှင့် ငံပိဆိုင်)တွင်လည်းကောင်း၊ အသား၊ ငါးများကို သားငါးတန်းမှ ကိုမင်းသူ+ မမာမာလွင်ဆိုင်၊ ဒေါ်အေးအေးမော် (ရေချို၊ ရေငံ၊ ငါး၊ ပုဇွန်)ရောင်းဝယ်ရေးတို့တွင်လည်းကောင်း၊ ဝက်သားကို ဦးကုလားဆိုင်နှင့် ဦးအောင်လင်းထိုက်ဆိုင်တို့တွင် လည်းကောင်း၊ ကြက်သားကို ဒေါ်ရွှေရည်ဝင်းဆိုင်တွင်လည်းကောင်း၊ ကြက်ဥ၊ ဘဲဥ စသည့်တို့ကို ဒေါ်နှင်းဝေဦးဆိုင်တွင်လည်းကောင်း ကွင်းဆင်းစိစစ်မေးမြန်းစုံစမ်းခဲ့ကြောင်း သိရှိရပါသည်။

     အဆိုပါ ကွင်းဆင်းစစ်ဆေးရာတွင် အခြေခံစားသောက်ကုန်ဈေးနှုန်းများမှာ ယခင်တစ် ပတ်နှင့် ယခုတစ်ပတ်ဈေးနှုန်းများ ကွာခြားမှုမရှိကြောင် စိစစ်တွေ့ရှိရကြောင်း သိရှိရပြီး စားသုံးသူရေးရာဦးစီးဌာနမှ မြို့နယ်တာဝန်ခံ ဒေါ်နွယ်နွယ်အေးက ဆန်ဆိုင်ပိုင်ရှင်များသို့ သတ်မှတ် ရည်ညွှန်းဈေးများဖြင့် ရောင်းချကြရန်၊ ဈေးနှုန်းမြှင့်တင်ရောင်းချခြင်း၊ သိုလှောင်ခြင်းများ မပြုလုပ်ကြရန်၊ အခြေခံစားသောက်ကုန်ရောင်းချသည့်ဆိုင်များမှ လုပ်ငန်းရှင်များသို့ လူတိုင်းနေ့စဉ်မဖြစ်မနေ စားသောက်ရသည့် အခြေခံစားကုန်များ ပြတ်လပ်မှုမရှိစေရေး၊ ဈေးနှုန်းမြှင့်တင်မှုမရှိစေရေးတို့ကို တွေ့ဆုံဆွေးနွေး ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ရန်ကုန်)

     ရန်ကုန်တိုင်းဒေသကြီး၊ တွံတေးခရိုင်၊ ကွမ်းခြံကုန်းမြို့နယ် မြို့နယ်အထွေထွေအုပ်ချုပ်ရေးဦးစီးဌာနမှ ဦးဆောင်၍ စားသုံးသူရေးရာဦးစီးဌာနသည် ပူးပေါင်းအဖွဲ့ဝင်အဖြစ် ကွမ်းခြံကုန်းမြို့နယ်အတွင်း အိမ်ဆောက်ပစ္စည်းများ ရောင်းချသော အရောင်းဆိုင်များသို့ ဇွန်လ (၁၆)ရက်နေ့၊ နေ့လယ် (၁၃:၃၀) နာရီအချိန်တွင် ကွင်းဆင်းစစ်ဆေးခဲ့ကြောင်း သိရသည်။

    ထိုသို့ ကွင်းဆင်းစစ်ဆေးခဲ့ရာတွင် မြို့နယ်အထွေထွေအုပ်ချုပ်ရေးဦးစီးဌာနမှ ဒုတိယ ဦးစီးမှူး ဦးအောင်ပြည့်စိုး ဦးဆောင်၍ မြို့နယ်ပြည်တွင်းအခွန်ဦးစီးဌာနမှ  ဒုတိယဦးစီးမှူး ဦးမင်းသူ၊ မြို့မရဲစခန်းမှ ဒုရဲအုပ် သက်နိုင်ဦး၊ မြို့နယ်စည်ပင်သာယာရေးအဖွဲ့မှ အခွန်ကောက် တာဝန်ခံ ဦးချစ်ထွေး၊ မြို့နယ်စားသုံးသူရေးရာဦးစီးဌာနမှ ဌာနခွဲစာရေး ဦးတင်ထွန်းတို့ ပူးပေါင်းပါဝင်သော အဖွဲ့သည် တော်မုကဲရပ်ကွက်ရှိ ကိုထက် အိမ်ဆောက်ပစ္စည်းရောင်းဝယ်ရေး၊ ဈေးပိုင်းရပ်ကွက်ရှိ ဒေါ်ခင်မာဝေ (အိမ်ဆောက်ပစ္စည်းရောင်းဝယ်ရေး)၊ ရွှေမေတ္တာ အိမ်ဆောက်ပစ္စည်းနှင့် သင်္ဘောဆေးဆိုင်၊ မြို့သစ်၊ ထွန်းတောရပ်ကွက်ရှိ သီဟထွန်း အိမ်ဆောက်ပစ္စည်း အရောင်းဆိုင်များတွင် ဘိလပ်မြေပစ္စည်းပြတ်လပ်မှုရှိ/မရှိ၊ ဝယ်ရင်းဈေးနှုန်း၊ ပြန်လည်ရောင်းချသည့်ဈေးနှုန်းများ၊ ဈေးနှုန်းမြှင့်တင်ရောင်းချမှုရှိ/မရှိ ကွင်းဆင်းစစ်ဆေးခဲ့ကြောင်း သိရှိရသည်။

    ထို့နောက် စားသုံးသူရေးရာဦးစီးဌာနမှ ဌာနခွဲစာရေး ဦးတင်ထွန်းဦးက မန္တလေး ငလျင်ဒဏ်ကြောင့် ပျက်စီးဆုံးရှုံးရခြင်းအပေါ် ဆောက်လုပ်ရေး လုပ်ငန်းသုံးပစ္စည်းများဖြစ်သည့် အုတ်၊ သဲ၊ ကျောက်၊ ဘိလပ်မြေ၊ သံချောင်းစသည့် ပစ္စည်းများ ဈေးနှုန်းမြှင့်တင်ရောင်းချခြင်း မပြုလုပ်ရန်၊ ဈေးကစားရန်ရည်ရွယ်၍ သိုလှောင်ထားခြင်းမပြုလုပ်ကြရန် ဆိုင်ပိုင်ရှင်လုပ်ငန်းရှင်များနှင့် တွေ့ဆုံဆွေးနွေး ကွင်းဆင်းစိစစ်ခဲ့ကြောင်း သိရှိရပါသည်။

DOCA(ရန်ကုန်)

    စားသုံးသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဦးမြသန်းနိုင်(ဒု-ကြီးကြပ်ရေးမှူး)နှင့် ဝန်ထမ်းများ၊ ဆန်ကုန်သည်များအသင်း၊ မြို့နယ်စည်ပင်သာယာရေးဦးစီးဌာန၊ မြို့နယ်အထွေထွေအုပ်ချုပ်ရေးဦးစီးဌာနတို့နှင့် (၁၆.၆.၂၀၂၅) ရက်နေ့၊ နေ့လယ် (၁၂:၀၀)နာရီ အချိန်တွင် မြောက်ဥက္ကလာပမြို့နယ်၊ ရပ်ကွက်နှင့်ဈေးများရှိ ဆန်အရောင်းဆိုင် အချို့အား စိစစ်ခဲ့ရာ ဆန်ရောင်းချသည့် အမျိုးအစားများတွင် ရွှေဘိုပေါ်ဆန်း၊ ဧရာဝတီပေါ်ဆန်း၊ ဧည့်မထစသည့် ဆန်အမျိုးအစားများကိုသာ ရောင်းချလျက်ရှိပြီး အဆိုပါ ဆန်အမျိုးအစားများသည် ရန်ကုန်တိုင်းဒေသကြီးမြို့နယ်များရှိ ဆန်စက်များ၊ ဧရာဝတီတိုင်း၊ ပဲခူးတိုင်းဒေသကြီး များရှိ ဆန်စက်များမှကြိတ်ခွဲထွက်ရှိသော ဆန်များကို ရန်ကုန်မြို့၊ ဝါးတန်း ကုန်စည်ဒိုင် / ဘုရင့်နောင်ကုန်စည်ဒိုင်တို့မှတစ်ဆင့် ပြန်လည်ဖြန့်ဖြူးရောင်းချခြင်းဖြစ်ကြောင်း၊ တံဆိပ် အမှတ်အသားများဖြင့် ပြန်လည်ထုပ်ပိုးရောင်းချခြင်းဖြစ်ကြောင်းနှင့် ဆန်အမျိုးအစားများကို ရောနှောရောင်းချခြင်းမျိုး မရှိကြောင်း စစ်ဆေးတွေ့ရှိခဲ့ကြောင်း သိရှိရပါသည်။

     စစ်ဆေးတွေ့ရှိချက်များအရ ဈေးကွက်အတွင်း ဆန်ဈေးနှုန်းများအား သတ်မှတ်ရည်ညွှန်းစျေးများအတိုင်း ရောင်းချလျက်ရှိသည့်အတွက် သက်ဆိုင်ရာဌာနများမှလည်း ဆန်စျေးနှုန်းတည်ငြိမ်ရေး ဝိုင်းဝန်းကြပ်မတ်စစ်ဆေးဆောင်ရွက်လျက်ရှိရာ ဈေးကွက်အတွင်း ဈေးနှုန်းအဆမတန်မြှင့်တက်ခြင်း၊ ဆန်ပြတ်လပ်မှု မရှိ ပုံမှန်ဈေးကွက်အတွင်း၌သာ အရောင်းအဝယ်ဖြစ်ပေါ်လျက်ရှိကြောင်းသိရပါသည်။

DOCA (ရန်ကုန်)

   (၁၆-၆-၂၀၂၅) ရက်နေ့၊ နံနက် (၁၁:၀၀)နာရီအချိန်တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဦးသိန်းထွန်း(ဌာနခွဲစာရေး)နှင့် ဝန်ထမ်းများသည် အမှတ်(၂) ဈေး၊ သာကေတမြို့နယ်အတွင်းရှိ ဆန်အရောင်းဆိုင်(၃)ဆိုင်သို့ သွားရောက်၍ ဆန်ရောင်းချမှု အခြေအနေအား စစ်ဆေးဆောင်ရွက်ခဲ့ပါသည်။

     ထိုသို့ ကွင်းဆင်းစစ်ဆေးရာတွင် ဆန်များသတ်မှတ်ဈေးနှုန်းဖြင့် ရောင်းချနေခြင်း ရှိ/မရှိကို စစ်ဆေးခြင်းဖြစ်ပြီး ၊ စားသုံးသူရေးရာဦးစီးဌာနမှ ဆန်ဈေးနှုန်းမြှင့်တင် ရောင်းချခြင်း မပြုရန်နှင့် ဈေးကစားရန် အလို့ငှာ ဆန်များကို သိုလှောင်ထားခြင်းမပြုရန် ပြောကြားခဲ့ပြီး ၊ ထိုသို့ ပြုလုပ်သည်ကို စစ်ဆေးတွေ့ရှိပါက  အရေးကြီးကုန်စည်နှင့်ဝန်ဆောင်မှုဥပဒေအရ အရေးယူခံရမည်ဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA (ရန်ကုန်)