သတင်းနှင့် လှုပ်ရှားမှုများ

             ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ မြောင်းမြမြို့နယ်တာဝန်ခံ ဒေါ်ရည်မွန်သန့် နှင့်ဝန်ထမ်းများသည်မိတ်ဖက်ဌာနများနှင့်ပူးပေါင်း၍(၂၁.၉.၂၀၂၆)ရက်နေ့      နံနက်(၁၀;၀၀)နာရီက    မြောင်းမြမြို့ နယ် အတွင်းရှိဓါတ်မြေဩဇာဆိုင်များတွင် ရောင်းချနေသော ယူရီးယား၊ တီစူပါ၊ ကွန်ပေါင်းနှင့် ကောမတ်တံဆိပ် ဓါတ်မြေဩဇာ အိတ်အတွင်း အခြားဓါတ်မြေဩဇာများ ထည့်သွင်းရောင်းချခြင်းနှင့် ကုန်အညွှန်းအမှတ်အသားပြည့်စုံစွာ  ဖော်ပြထားခြင်း ရှိ/မရှိနှင့် ဈေးနှုန်းမြှင့်တင် ရောင်းချ ခြင်းမရှိစေရန်  ကွင်းဆင်းစစ်ဆေး ခဲ့ပါသည်။

             ထိုသို့ကွင်းဆင်းစစ်ဆေးရာတွင် မြို့နယ်တာဝန်ခံမှ ဓါတ်မြေဩဇာရောင်းချနေသော ပိုင်ရှင်များအား စားသုံးသူ ကာကွယ်ရေး ဥပဒေ၂၀၁၉ပါ ပြဌာန်းချက်များမှ စီးပွားရေး လုပ်ငန်းရှင်များ၏တာဝန်များ၊ တားမြစ်ချက်များ၊ ပြစ်မှုပြစ်ဒါဏ်များ၊ ကုန်အညွှန်းအမှတ်အသားဖော်ပြရာတွင် စားသုံးသူကာကွယ်ရေးဥပဒေ အခန်း(၁၈)ပါအတိုင်း လိုက်နာဆောင်ရွက်ရန်နှင့်  စီးပွားရေးလုပ်ငန်းရှင်များအနေဖြင့် ထုတ်ပြန်ထားသည့် ဥပဒေညွှန်ကြားချက်များအား လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံမှု ရှိ/မရှိနှင့်သတ်မှတ်ဈေးနှုန်းထက် ပိုမိုမရောင်းချရန်ဌာနမှ ဈေးကွက်စောင့်ကြည့်စစ်ဆေးမှုများ စဉ်ဆက်မပြတ် ဆောင်ရွက်လျှက်ရှိကြောင်း သိရှိရပါသည်။

  (DOCA ဧရာဝတီ)

                    စားသုံးသူရေးရာဦးစီးဌာန၊ ဘိုကလေးမြို့နယ်တာဝန်ခံနှင့် ဝန်ထမ်းတို့သည် မြို့နယ်တာဝန်ခံရုံးတွင် ၂၀၂၆ခုနှစ်၊ စက်တင်ဘာလ(၁၅)ရက်နေ့၊နံနက်(၁၁:၃၀)အချိန်တွင်မြို့နယ်တာဝန်ခံရုံး၌ဆီဖြန့်ဖြူးရောင်းချသူလုပ်ငန်းရှင်အသင်း(ယာယီ)နှင့် တွေ့ဆုံဆွေးနွေးခဲ့ပါသည်။

                ဆီဖြန့်ဖြူးရောင်းချသူလုပ်ငန်းရှင်အသင်း(ယာယီ)ကို ၂၀၂၄ခုနှစ် ဇန်နဝါရီလ(၁၀)ရက်နေ့တွင် ဆီ လုပ်ငန်းရှင်(၁၁)ဦးဖြင့် ဉက္ကဌ၊ ဒုဉက္ကဌ၊ ဘဏ္ဍာရေးမှူး၊ စာရင်းစစ်၊ အမှုဆောင်အဖွဲ့ဝင်များဖြင့် အသင်းဖွံ့ဖြိုး တိုးတက်အောင်ဆောင်ရွက်နေပါကြောင်း၊ မြို့နယ်အနေဖြင့် ဆီလက်လီ၊လက္ကား ကိုယ်စားလှယ်များအား ကျေးရွာ၊ ရပ်ကွက်၊ အိမ်ထောင်စုများ၊ ဆီစာအုပ်များဖြင့် ရောင်းချရာတွင် မှန် (၆)မှန်ဖြင့် ရောင်းချနေရေး နှင့်ဈေးကစားရန်အလိုဌာ သိုလှောင်ခြင်းများကြောင့် ဈေးကွက်အတွင်းပစ္စည်းပြတ်လပ်မှုမရှိစေရေးနှင့် ဖြစ်သင့်ဖြစ်ထိုက်သည့် ဈေးနှုန်းများဖြင့် ပြည်သူများထံသို့ ရောင်းချပေးရန် အသိပေး သတိပေး ဆောင်ရွက် သွားရန် ရည်ညွှန်းပါစာဖြင့် အကြောင်းကြားမှုများအရ စားသုံးသူဌာနနှင့် ပူးပေါင်း၍ အပတ်စဉ်၊ လစဉ် ကွင်းဆင်းရာတွင် ပူးပေါင်းဆောင်ရွက်နိုင်ရေးကို စားသုံးသူများ စိတ်ကျေနပ်စွာ ရောင်းချပေးကြရန် ဆီအသင်းမှ ကြီးကြပ်ဆောင်ရွက်ပေးရန်လိုကြောင်း တွေ့ဆုံဆွေးနွေးခဲ့ကြပါသည်။

(DOCA ဧရာဝတီ)

             ဧရာဝတီတိုင်းဒေသကြီး၊ ဖျာပုံခရိုင်၊ ဖျာပုံမြို့နယ်  ကုန်မျိုးစုံဆိုင်တွင် ရောင်းချနေသော ဟင်းသီး ဟင်းရွက်ဘူးဆီများအား ကုန်အညွှန်းအမှတ်အသားပြည့်စုံမှုမရှိသော ကုန်စည်များ ဈေးကွက်အတွင်းမှ ပပျောက်စေရန် ရည်ရွယ်၍ စားသုံးသူရေးရာဦးစီးဌာန၊ မြို့နယ်စည်ပင် သာယာရေးအဖွဲ့တို့ အတူပူးပေါင်း၍ ၂၀၂၆ခုနှစ်၊ စက်တင်ဘာလ(၁၅)ရက်နေ့၊ နေ့လည်(၁၄ : ၀၀) နာရီတွင်  ကုန်မျိုးစုံအရောင်းဆိုင်များသို့ ကွင်းဆင်းစစ်ဆေးခဲ့ပါသည်။

          အဆိုပါကွင်းဆင်းစစ်ဆေးရာတွင်  ကုန်ခြောက်ဆိုင်များတွင် ရောင်းချနေသော  စားသုံးဆီဘူးဆီ များနှင့် ကုန်ပစ္စည်းများတွင် ကုန်အညွှန်းအမှတ်သားဆိုင်ရာ ဖော်ပြချက်များတွင် မြန်မာဘာသာဖြင့်ဖြစ်စေ၊ မြန်မာ ဘာသာနှင့် အခြားဘာသာတစ်ခုထက်ပို၍ တွဲလျှက်ရေးသားဖော်ပြထားခြင်း ရှိ/မရှိနှင့် ကုန်စည်၏ အမှတ်အသား၊အမျိုးအမည်၊ အရွယ်အစား၊အရေအတွက်နှင့် အသားတင်ပမာဏ၊ ထားသိုသိမ်းစည်းမှု၊ ထုတ်လုပ်မှုရက်စွဲ၊ သက်တမ်းကုန်ဆုံးရက်၊ ထုတ်လုပ်သည့်အမှတ်စဉ်၊ ထုတ်လုပ်သည့်နေရာ၊ ပါဝင်ပစ္စည်း အမျိုးအမည် နှင့် ပါဝင်မှုအချိုးအစား စသည့် ကုန်အညွှန်းအမှတ်အသားဆိုင်ရာ ဖော်ပြချက်များ ပြည့်စုံမှု ရှိ/မရှိ ကွင်းဆင်းစစ်ဆေးခဲ့ကြောင်း သိရရှိပါသည်။

DOCA(ဧရာဝတီ)

                    ဧရာဝတီတိုင်းဒေသကြီး၊ မအူပင်ခရိုင် ဓနုဖြူမြို့နယ် စားသုံးသူရေးရာဦးစီးဌာနမှ ကလေးအာဟာရဖြည့်စွက်စာအမျိုးမျိုးတို့တွင် ကုန်အညွှန်းအမှတ်အသား ဖော်ပြထားခြင်း ရှိ/ မရှိ ဈေးကွက်စောင့်ကြည့်စစ်ဆေးခြင်းကို ၁၈-၉-၂၀၂၆ နေ့နံနက် ၁၀ နာရီအချိန်က မြို့ပေါ်ရပ်ကွက် ကုန်စုံဆိုင်ကြီးများနှင့် ဆေးဆိုင်ကြီးများအား ဈေးကွက်စောင့်ကြည့်စစ်ဆေးခြင်း လုပ်ငန်းအား ဆောင်ရွက်ခဲ့ကြောင်း သိရသည်။

                စားသုံးသူများအသုံးပြုလျက်ရှိသည့် ကုန်စည်များနှင့် စပ်လျဥ်း၍ ဈေးကွက်အတွင်းနှင့် ကုန်စုံဆိုင်ကြီး များတွင် ရောင်းချနေသည့် ကလေးအာဟာရ ဖြည့်စွက်စာအမျိုးမျိုးနှင့် စားသုံးဆီအမျိုးမျိုးတို့တွင် ကုန်အညွှန်းအမှတ် အသားဖော်ပြ ထားခြင်း ရှိ/ မရှိ DUMEX DUPRO အမှတ်တံဆိပ် ကလေးငယ်ဖော်စပ်စာ ၆၅၀ ဂရမ်အား ဈေးကွက်စောင့်ကြည့်စစ်ဆေးခြင်း၊ များ ဆောင်ရွက်ခဲ့ကြ သည်။  ဓနုဖြူမြို့နယ်အတွင်းရောင်းချနေသော ကလေးအဟာရဖြည့်စွပ်စာ အမျိုးမျိုးတို့တွင် သက်ဆိုင်ရာဌာန၏ ထောက်ခံချက် များပါဝင်သော ကုန်စည်များ၊ ကုန်အညွှန်းအမှတ်အသား သတ်မှတ်ချက် ဖော်ပြခြင်းတို့ပါဝင်ကြောင်း စစ်ဆေးတွေ့ရှိကြောင်း သိရသည်။ ဆိုင်တာ ဝန်ံခံများကို ကလေးအဟာရဖြည့်စွပ်စာနှင့် စပ်လျဉ်း၍ တရားမဝင်ကုန်စည်များကို ရောင်းချခြင်းမပြုရန်၊ ကုန်အညွှန်းအမှတ်အသားဖော်ပြပါဝင်ပြီး သက်ဆိုင်ရာဌာန၏ ခွင့်ပြုချက်ပါဝင်သော တရားဝင်ကုန်စည်များကို ဈေးကွက်အတွင်း ဦးစားပေးရောင်းချရန်ကို လမ်းညွှန်မှာကြား အသိပေး ပြောကြားခဲ့ကြောင်း သိရသည်။

             ဈေးကွက်စောင့်ကြည့်စစ်ဆေးခြင်း လုပ်ငန်းဆောင်ရွက်ရာတွင် မြို့နယ်စားသုံးသူရေးရာဦးစီးဌာန၊ ကျန်းမာရေးဦးစီးဌာနနှင့် စည်ပင်သာယာရေးဦး စီးဌာနတို့ ပူးပေါင်းဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)

         စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံး၏ ညွှန်ကြားချက်နှင့်အညီ ရန်ကုန်တောင်ပိုင်းခရိုင်၊ ကော့မှူးမြို့နယ် စည်ပင်သာယာမြို့မဈေး ဈေးတာဝန်ခံရုံးတွင် စက်တင်ဘာလ(၂၃)ရက်နေ့၊ နံနက်(၁၀:၀၀)နာရီအချိန်တွင် မြို့မဈေးအတွင်း/ အပြင်ရှိ စီးပွားရေး လုပ်ငန်းရှင်များအား စားသုံးသူကာကွယ်ရေး အသိပညာပေးဟောပြောပွဲကျင်းပပြုလုပ်ခဲ့ကြောင်း သိရသည်။

        အဆိုပါ အသိပညာပေးဟောပြောပွဲတွင် စားသုံးသူရေးရာဦးစီးဌာန၊ ကော့မှူးမြို့နယ် တာဝန်ခံ ဦးတင်မင်းက စားသုံးသူကာကွယ်ရေးဥပဒေပါ ထုတ်ကုန်များလုံခြုံစိတ်ချရမှုရှိစေရေးနှင့် စားသုံးသူပြည်သူများဘေးအန္တရာယ်ကင်းရှင်းစေရေးတို့အတွက် စီးပွားရေးလုပ်ငန်းရှင်ဆို သောအဓိပ္ပါယ်မှာ ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊ သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကို ဆိုသည်ဟု ဖွင့်ဆိုထားသော အချက်များထဲက မိမိတို့နှင့်သက်ဆိုင်သော လုပ်ကိုင်ဆောင်ရွက်နေသည့် စီးပွားရေးလုပ်ငန်းရှင်များအနေဖြင့် လုပ်ငန်းများ လုပ်ကိုင် ဆောင်ရွက်ရာတွင် စီးပွားရေးလုပ်ငန်းရှင်များ၏ကျင့်ဝတ်၊ စည်းကမ်းများနှင့်အညီ စားသုံးသူပြည်သူများ ဘေးအန္တရာယ်ဖြစ်စေမည့် ကုန်ပစ္စည်းများအား ဝယ်ယူဖြန့်ဖြူးရောင်းချခြင်းများ မပြုလုပ်ကြရန်နှင့် စီးပွားရေးလုပ်ငန်းရှင်၏ တာဝန်များနှင့်အညီ လုပ်ငန်းများ လုပ်ကိုင်ဆောင်ရွက်ပေးကြရန် စားသုံးသူကာကွယ်ရေး အသိပညာပေး ဆွေးနွေးပြောကြားခဲ့ကြောင်း သိရှိရပါသည်။

DOCA(ရန်ကုန်)