သတင်းနှင့် လှုပ်ရှားမှုများ

      ၁.၆.၂၀၂၅ ရက်နေ့တွင် ကျိုက်ထိုခရိုင်၊ ကျိုက်ထိုမြို့နယ်ရှိ ဟိုတယ်နှင့်စားသောက်ဆိုင်လုပ်ငန်းများအား ခရိုင်စီမံအုပ်ချုပ်ရေးအဖွဲ့ဝင်များ၊ မြို့နယ်စီမံအုပ်ချုပ်ရေးအဖွဲ့ဝင်များ၊ စားသုံးသူရေးရာဦးစီးဌာန၊ မြို့နယ်စည်ပင်၊ ဟိုတယ်နှင့်ခရီးသားဝန်ကြီးဌာနတို့ ပူးပေါင်း၍ ကွင်းဆင်းစစ်ဆေးခဲ့ကြပါသည်။

    ကျိုက်ထိုမြို့၊ ကျိုက်ထီးရိုးဘုရားလမ်းပေါ်ရှိ mII ဟိုတယ်နှင့်စားသောက်ဆိုင်လုပ်ငန်းနှင့် လက်ပြကျေးရွာရှိ ရွှေကျိုက်ထို ဟိုတယ်နှင့်စားသောက်ဆိုင်လုပ်ငန်းသို့အား စစ်ဆေးရာတွင် ခရိုင်စီမံအုပ်ချုပ်ရေးအဖွဲ့ဥက္ကဌ ဦးကံစောလှိုင်က ဟိုတယ်လုပ်ငန်းများအား ဆောင်ရွက်ရာတွင် ဧည့်စာရင်းစနစ်တကျပြုစုထားရှိရန်၊ သက်ဆိုင်ရာဌာနများ၏ ခွင့်ပြုချက်လိုင်စင်များ ပြည့်စုံအောင်ဆောင်ရွက်ထားရှိရန် ပြောကြားပြီး စားသုံးသူရေးရာဦးစီးဌာနမှ ခရိုင်တာဝန်ခံ ဦး‌အောင်ကျော်မင်းက အစားအသောက်ဝန်ဆောင်မှုနှင့်ပတ်သက်၍ အစားအသောက်ပြုပြင် ရောင်းချသည့် နေရာများသန့်ရှင်းအောင် ဆောင်ရွက်ထားရှိရန်၊ ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှုရှိစေရန်၊ ဟိုတယ်ဝန်ဆောင်မှုနှင့် ပတ်သက်၍ တန်ဖိုးနှင့်ညီမျှသော ဝန်ဆောင်မှုပေးရန် အပိုဝန်ဆောင်မှုပေးမည်ဟုသဘောတူထားသည့်အတိုင်း စီစဉ်ဆောင်ရွက်ပေးရန် ပြောကြားပြီး၊ မြို့နယ်စည်ပင်မှ ဦးဝဏ္ဏအောင်က ရေဆိုးစွန့်ပစ်မှုကို စနစ်တကျ ဆောင်ရွက်ရန်၊ အမှိုက်စွန့်ပစ်မှုနှင့် စည်ပင်လိုင်စင်သက်တမ်းကုန်ဆုံးပါက အချိန်မီသက်တမ်း တိုးဆောင်ရွက်ရန် ပြောကြားခဲ့ကြောင်း သိရသည်။

DOCA (မွန်)

    မွန်ပြည်နယ်၊ မုဒုံမြို့နယ် သစ်တောဦးစီးဌာနမှ ၂၀၂၅ ခုနှစ် ကမ္ဘာ့ပတ်ဝန်းကျင်ထိန်းသိမ်းရေးနေ့ အထိမ်းအမှတ် မိုးရာသီ စုပေါင်းသစ်ပင်စိုက်ပျိုးပွဲ အခမ်းအနားကို ၅.၆.၂၀၂၅ ရက်နေ့ နံနက် (၈:၃၀) နာရီအချိန်တွင် မြို့မ(၄) ရပ်ကွက်ရှိ ကန်ကြီးသုဿာန်ဝင်း မြေနေရာ၌ ကျင်းပခဲ့သည်။

     ရှေးဦးစွာ မုဒုံမြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးပြည်သိမ်းနှင့်အဖွဲ့ဝင်များ၊ မြို့နယ်သစ်တောဦးစီးဌာနမှူး ဦးကျော်ဇောအောင်နှင့် တာဝန်ရှိသူများက စိုက်ပျိုးမည့် ပျိုးပင်များ ပေးအပ်သည်။ သစ်ပင်စိုက်ပျိုးပွဲတွင် မြို့နယ်အဆင့်ဌာနဆိုင်ရာများ၊ မီးသတ်တပ်ဖွဲ့ဝင်များ၊ မြို့နယ်အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်း၊ ကြက်ခြေနီတပ်ဖွဲ့၊ လူမှုကူညီရေးအသင်းတို့မှ အသင်းသားများနှင့် ပြည်သူများ အင်အား ၁၅၀ ခန့်က မန်ဂျန်ရှားပင် ၄၀၀၊ အော်ရီးရှားပင် ၄၀၀၊ မဟော်ဂနီ ပင် ၁၀၀၊ သင်္ကန်း ၅၀၊ ပျဥ်းမ ၅၀ တို့ကို သတ်မှတ်နေရာ အသီးသီးတွင် တပျော်တပါး စိုက်ပျိုးခဲ့ကြသည်။

     မုဒုံမြို့နယ် သစ်တောဦးစီးဌာနအနေဖြင့် သဘာဝပတ်ဝန်းကျင် စိမ်းလန်းစိုပြေ ထိန်းသိမ်းစောင့်ရှောက်နိုင်ရေး၊ မျှတသောရာသီဥတုရရှိစေရေး၊ အပူဒဏ်အန္တရာယ် ကာကွယ်နိုင်ရေးနှင့် သစ်တောသစ်ပင် နှစ်ရှည်ပင်များ ပိုမိုစိုက်ပျိုးနိုင်ရေးအတွက် ယခုနှစ်တွင် ပျိုးပင်ပေါင်း (၃၅၀၀၀)ကို စိုက်ပျိုးထားရှိပြီး ဒေသခံပြည်သူများ၊ ဌာနဆိုင်ရာ များ၊ လူမှုအဖွဲ့အစည်းများတွင် စိုက်ပျိုးနိုင်ရန်အတွက် အခမဲ့ ဖြန့်ဝေပေးသွားမည်ဖြစ်ကြောင်း သိရသည်။

DOCA (မွန်)

             ၂၀၂၅ ခုနှစ် ဇွန်လ ၁ ရက်နေ့ နံနက်(၀၉:၀၀) နာရီအချိန်တွင် ဧရာဝတီတိုင်းဒေသကြီး၊ မြန်အောင်ခရိုင်၊ ကြံခင်းမြို့နယ်၊ ဘက်ရဲမြို့၊ အမှတ်(၂) ရပ်ကွက်ရှိ စံပြဧက(၁၀၀)တောင်သူပညာပေးစခန်း ခန်းမဆောင်၌ မြို့နယ်စိုက်တိုးမြှင့်ဥက္ကဌ၊ အဖွဲ့ဝင်များနှင့်အတူ စားသုံးသူရေးရာဦးစီးဌာန၊ ကြံခင်းမြို့နယ်တာဝန်ခံသည် ၂၀၂၅ ခုနှစ် မိုးစပါးအထွက်တိုးရေးနှင့် ကြဲခင်းစနစ် ပပျောက်ရေးအသိပညာပေး ဟောပြောပွဲအခမ်းနားသို့ တက်ရောက်ခဲ့ကြပါသည်။

          အဆိုပါ ဟောပြောပွဲကို ဦးစွာမြို့နယ်စိုက်တိုးမြှင့်အဖွဲ့ ဥက္ကဌ ဦးဝင်းလှိုင်က ၂၀၂၅ ခုနှစ် မိုးစပါးပန်းတိုင် အထွက်နှုန်းရရှိစေရေးအတွက် ဆာဖိုးသာစပါးကို စိုက်ပျိုးရာတွင် သက်တမ်းအားဖြင့် (၁၁၅)ရက်၊ အောင်နိုင်တိုးစပါးသက်တမ်းမှာ (၁၂၀)ရက်သာ ဖြစ်သည့်အတွက် တောင်သူများအနေဖြင့် စိုက်ပျိုးသင့်ကြောင်း၊ ကြဲခင်းဧရိယာ စနစ်ပပျောက်ရေးနှင့် သစ်စိမ်း မြေဩဇာ  ထည့်ဝင်စိုက်ပျိုး ‌ရေး အသိပညာပေး ပြောကြားပြီး၊ မြို့နယ်စိုက်ပျိုးရေးဦးစီးဌာန ဦးစီးမှူးမှ တောင်သူများစိုက်ပျိုးနိုင်ရေးအတွက် ဖြည့်ဆည်းကူညီပေးသွားမည့်အပြင်  ကြဲခင်း ဧရိယာများအား Seeder စနစ်ဖြင့်  စိုက်ပျိုးနိုင်ရေး ပူးပေါင်းဆောင်ရွက်ပေးသွားမည် ဖြစ်ကြောင်းရှင်းလင်းဆွေးနွေးခဲ့ပြီး၊ စံပြ ဧက(၁၀၀)တွင် နွေစပါးစိုက်ပျိုးထားရှိမှုအား မြို့နယ်စိုက်တိုးမြှင့်အဖွဲ့ ဥက္ကဌ ဦးဝင်းလှိုင်၊ မြို့နယ်မြေစာရင်းဦးစီးဌာန၊ မြို့နယ်စားသုံးသူရေးရာဦးစီးဌာန၊ မြို့နယ်စိုက်ပျိုးရေးဦးစီးဌာန၊ မြို့နယ်သစ်တောဦးစီးဌာနနှင့် မြို့ နယ်ဆည်မြောင်းနှင့်ရေအသုံးချ‌ရေး စီမံခန့်ခွဲမှုဦးစီးဌာနမှ မြို့နယ်ဦးစီးမှူးများက ကြည့်ရှု့အားပေးခဲ့ကြပြီး လိုအပ်သည်များ ညှိနှိုင်းဆောင်ရွက်ပေးခဲ့ကြကြောင်း သတင်းရရှိပါသည်။

(DOCA) ဧရာဝတီ

    စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ၂၀၂၅ ခုနှစ် ၊ ဇွန်လ (၄) ရက်နေ့ နံနက်(၁၀ : ၀၀) အချိန်တွင်  လွိုင်ကော်မြို့ပေါ်ရှိ ဆေးနှင့် ဆေးပစ္စည်းရောင်းချ နေသည့် ဆေးဆိုင်များသို့ ကွင်းဆင်း၍ ဆေးနှင့်ဆေးပစ္စည်းများ ဖြစ်သင့်ဖြစ်ထိုက်သည့် ဈေးနှုန်းနှင့် ဈေးနှုန်းမြှင့်တင်ရောင်းချခြင်း ၊ ပြည်နယ်အတွင်း  ရောင်းဝယ်ဖောက်ကားခြင်း ၊ ဆေးများပြတ်လပ်ခြင်း၊ ဈေးကွက်အတွင်း၌ စပ်ဆေးများရောင်းချခြင်း ရှိ/မရှိ အိမ်သုံး ဆေးဝါးများ ရောင်းချနေသော ဆေးဆိုင်များ၌ သက်တမ်းလွန်ဆေးဝါးများ ရောင်းချနေမှုများ ရှိ/မရှိနှင့်  မြန်မာနိုင်ငံစားသုံးသူရေးရာ ကော်မရှင်၏ ညွှန်ကြားချက် အမှတ် ၂/ ၂၀၁၉ ပါ သတ်မှတ် ချက်နှင့် ကိုက်ညီမှုရှိ/မရှိ စစ်ဆေးခြင်းကို  သက်ဆိုင်မိတ်ဖက်များနှင့်ပူးပေါင်း၍  ဈေးကွက် စောင့်ကြည့်စစ်ဆေးခဲ့ကြောင်းသိရှိရပါသည်။  

   ထိုသို့ ဈေးကွက်စောင့်ကြည့်စစ်ဆေးခြင်းဆောင်ရွက်ခဲ့ရာတွင်    ဆေးဆိုင်များ၌ ရောင်း ချနေသော အိမ်သုံးဆေးဝါးများ ပြတ်လပ်မှုမရှိကြောင်း၊ သက်တမ်းလွန်ရောင်းချခြင်း မရှိကြောင်း၊ ဆေးဝါးများအား ဈေးနှုန်းမြှင့်တင် ရောင်းချခြင်းမရှိဘဲ ၊ဈေးကစားခြင်း အလို့ငှာ သိုလှောင်ထားခြင်းလည်းမရှိကြောင်း၊ မိမိတို့အနေဖြင့်ဆေးများကို မန္တလေးမြို့၊ တောင်ကြီးမြို့၊ အောင်ပန်းမြို့တို့တွင် ဖြန့်ဖြူးရောင်းချနေသော ကုမ္ပဏီများ ထံမှမှာယူရောင်းချကြောင်း၊ မှာယူရောင်းချသောဆေးများသည်  မြန်မာနိုင်ငံစားသုံးသူကာကွယ်ရေးကော်မရှင်ရုံး၏ ၂/ ၂၀၁၉ ကုန်အညွှန်းအမှတ်အသားပါ မြန်မာဘာသာဖြင့်ဖြစ်စေ ၊မြန်မာဘာသာနှင့် အခြား ဘာသာတစ်ခုသို့မဟုတ်တစ်ခုထက်ပို၍ တွဲလျက် ဖော်ပြထားသော  စာသားများပါ ကိုက်ညီမှု ရှိတဲ့ ဆေးဝါးများသာ ဝယ်ယူရောင်းချကြောင်း သတင်းရရှိပါသည်။

DOCA(ကယား)

     ကချင်ပြည်နယ်၊ မြစ်ကြီးနားခရိုင်အတွင်း အွန်းလိုင်းစနစ်ဖြင့် ရောင်းချခြင်းလုပ်ငန်းများနှင့် စပ်လျဉ်း၍ အသိပညာပေးဆောင်ရွက်မှုအနေဖြင့် စားသုံးသူရေးရာဦးစီးဌာန၊ မြစ်ကြီးနားခရိုင် ဦးစီးမှူးရုံးမှ ဦးဘောမ်ဇုံး(ရုံးအုပ်)သည် ၄.၆.၂၀၂၅ ရက်နေ့တွင် မြစ်ကြီးနားမြို့၊ လယ်ကုန်းရပ်ကွက်ရှိ ရွှေမြင့်မိုရ်မုန့်တိုက်မှ လုပ်သားဝန်ထမ်း(၉)ဦးနှင့် တွေ့ဆုံ၍ အသိပညာပေးဆောင်ရွက်ခဲ့ပါသညါ။

     ထိုသို့အသိပညာပေးဆောင်ရွက်ခဲ့ရာတွင် ဦးဘောမ်ဇုံး(ရုံးအုပ်)က စားသုံးသူကာကွယ်ရေး ဥပဒေ (၂၀၁၉)ပါ စားသုံးသူ၏အဓိပ္ပာယ်ဖွင့်ဆိုချက်၊ စားသုံးသူအခွင့်အရေးနှင့် တာဝန်များ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၏ အမိန့်ကြော်ငြာစာအမှတ်၅၁/၂၀၂၃ အရ အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်ထားရှိမှုအခြေအနေ၊ အွန်လိုင်းရောင်းချခြင်းလုပ်ငန်း၏ အဓိပ္ပာယ်ဖွင့်ဆိုချက်၊ အွန်လိုင်းမှ ဈေးဝယ်ယူရာတွင် တွေ့ရှိရသည့် အားသာချက်၊ အားနည်းချက်များ၊ အွန်လိုင်းမှ လိမ်လည်မှု ပုံစံ(၂)မျိုး၊ စားသုံးသူများအနေဖြင့် အွန်လိုင်းမှတဆင့် ကုန်စည် သို့မဟုတ် ဝန်ဆောင်မှုကို ဝယ်ယူရာတွင် စိစစ်သင့်သည့်အချက်အလက်များ၊ အွန်လိုင်းစနစ်ဖြင့်ရောင်းချခြင်း လုပ်ငန်းများနှင့်စပ်လျဉ်း၍ ကုန်သွယ်ရေးဦးစီးဌာနနှင့်စားသုံးသူရေးရာဦးစီးဌာနတို့မှဆောင်ရွက်ပေးမည့်အခြေအနေ၊ မှတ်ပုံတင် ထားသောအွန်လိုင်းရောင်းချမှုလုပ်ငန်းများမှ ဈေးဝယ်ယူခြင်းဖြင့်ရရှိလာမည့် အကျိုးရလဒ်များအား အသိပညာပေး ဆွေးနွေးခဲ့ပါသည်။

DOCA(ကချင်)