သတင်းနှင့် လှုပ်ရှားမှုများ

     မြိတ်ခရိုင်၊ စားသုံးသူရေးရာဦးစီးဌာနအပါအဝင် မြို့နယ်စီမံအုပ်ချုပ်ရေးအဖွဲ့၊ သမဝါယမဦးစီးဌာန၊ ငါးလုပ်ငန်းဦးစီးဌာနနှင့် မြို့နယ်စည်ပင်သာယာရေးအဖွဲ့စသောဌာနဆိုင်ရာများပါဝင်သော အဖွဲ့များဖြင့် ၂၀၂၅ခုနှစ်၊ ဇွန်လ(၅)ရက်နေ့တွင် မြိတ်မြို့၊ သာကေတရပ်ရှိ ဓမ္မာရုံရှေ့တွင် အများပြည်သူများ သက်သာသည့်စျေးနှုန်းဖြင့် အခြေခံစားကုန်များဝယ်ယူနိုင်ရေး ဆောင်ရွက်ခဲ့ကြောင်း သတင်းရရှိပါသည်။

      အခြေခံစားကုန်များရောင်းချရာတွင် ဆန်၊ စားအုန်းဆီ၊ ချဉ်ပေါင်ရွက်၊ ပဲခြမ်း၊ ကန်စွန်း ရွက်၊ မန်ကျည်းသီးနှင့် အိုင်အိုဒင်းဆား စသည်တို့ကိုရောင်းချခဲ့ပြီး ဆန်တစ်ပြည်လျှင် (၃၀၀၀) ကျပ်၊ စားအုန်းဆီ ၅၀ကျပ်သားလျှင် (၃၉၅၀)ကျပ်၊ အိုင်အိုဒင်းဆား တစ်ထုပ်လျှင် (၅၀၀) ကျပ်၊ ကန်စွန်းရွက်တစ်စည်း (၂၀၀)ကျပ် ၊ ချဉ်ပေါင်ရွက်တစ်စည်း(၂၀၀)ကျပ် မန်ကျည်းသီး တစ်ထုပ် (၁၀၀၀) ကျပ် နှင့် ပဲခြမ်းတစ်ထုပ်(၁၀၀၀)ကျပ်တို့ဖြင့် ရောင်းချခဲ့ကြောင်း သိရှိရပါသည်။

DOCA(တနင်္သာရီ)

          ညောင်တုန်းမြို့နယ်အတွင်းရှိ စားသုံးသူပြည်သူများနှင့် အဖက်ဖက်ဆိုင်ရာ အသိပညာဗဟူသုတရှာဖွေနေသူ သင်တန်းသူ/ သင်တန်းသားများအား စားသုံးသူကာကွယ်ရေးဆိုင်ရာ အသိပညာများ ပိုမိုဖွံ့ဖြိုးတိုးပွားလာစေရန် ရည်ရွယ်၍ စားသုံးသူအသိပညာပေးဟောပြောပွဲနှင့် စိုက်ပျိုးမွေးမြူရေးလြေလာနေသူများကို  (၂-၆-၂၀၂၅) ရက်နေ့၊ နံနက် (၁၀:၀၀) နာရီအချိန်တွင် မြို့နယ်စိုက်ပျိုးရေးဦးစီးဌာန၊ ခန်းမ၌ ကျင်းပပြုလုပ်ခဲ့ကြောင်း သိရသည်။

             စိုက်ပျိုးဦးစီးဌာနမှ တာဝန်ရှိသူက -မွေးမြူရေးကဏ္ဍတွင် လိုအပ်လျက်ရှိသည့် ကျွမ်းကျင်သော လူသားအရင်းအမြစ်များ လေ့ကျင့်မွေးထုတ်ပေးနိုင်ရန် စိုက်ပျိုးရေးနှင့် မွေးမြူရေး ကိစ္စရပ်အကြောင်း ကိုအသိပညာပေးဟောပြောခဲ့သည်။

               စားသုံးသူရေးရာဦးစီးဌာနမှ မြို့နယ်ဦးစီးမှူး ဦးအောင်လွင်က စားသုံးသူကာကွယ်ရေးဥပဒေအကြောင်းကိုလည်းကောင်း၊ စားသုံးသူအခွင့်အရေးဆိုင်ရာ  ရည်ရွယ်ချက်များကိုလည်းကောင်း၊ စားသုံးသူအခွင့်အရေးနှင့်ပတ်သက်၍ စားသုံးသူကာကွယ် ရေးဥပဒေတွင် ပြဋ္ဌာန်းချက်များကို ရှင်းလင်းဆွေးနွေးခြင်း၊ သင်တန်းသားများနှင့် အမြင်ချင်းဖလှယ် ဆွေးနွေးခြင်း ပြုလုပ်ခဲ့ပြီးနောက် စားသုံးသူအခွင့်အရေးဆိုင်ရာ အသိပညာပဟုသုတများကိုလည်း လေ့လာမှတ်သား စေလိုကြောင်းနှင့် မိမိဘဝ ဖွံ့ဖြိုးတိုးတက်ရေးအတွက် လက်တွေ့အသုံးချဆောင်ရွက်သွားကြရန် တိုက်တွန်းပြောကြားခဲ့ပြီး ပြည်သူများအနေဖြင့် စားသုံးသူရေးရာဦးစီးဌာနနှင့်ပတ်သက်သော သတင်းအချက်အလက် များကို အလွယ်တကူ မေးမြန်းစုံစမ်းနိုင်ရန်အတွက်လည်းကောင်း၊ ကုန်စည်နှင့်ဝန်ဆောင်မှုများ ဝယ်ယူသုံးစွဲရာတွင် နစ်နာဆုံးရှုံးမှုကြုံရပါက ဌာနသို့ အလွယ်တကူဆက်သွယ်တိုင်ကြားနိုင်ရန်အတွက်လည်းကောင်း၊ လုပ်ငန်းရှင်များအနေဖြင့် မိမိတို့၏ ကုန်စည်/ဝန်ဆောင်မှုများထုတ်လုပ်၊ ဖြန့်ဖြူးရောင်းချရာတွင် ကုန်အညွှန်းအမှတ်အသားအပါအဝင် လိုက်နာဆောင် ရွက်ရမည့်အချက်များကို အလွယ်တကူ စုံစမ်းနိုင်ရန်အတွက်လည်းကောင်း ရည်ရွယ်၍ စားသုံးသူရေးရာဦးစီးဌာနအနေဖြင့် Consumer Call Center ဝန်ဆောင်မှုကို ဆောင်ရွက်ပေးလျက်ရှိရာ Consumer Call Center နံပါတ် ၁၅၃၅ သို့ Telenor၊ Mytel နှင့် Ooredoo User များအပြင် MPT Sim Card User များလည်း ခေါ်ဆိုနိုင်ပြီဖြစ်ပါကြောင်း အသိပညာပေးဟောပြောခဲ့ပြီး အဆိုပါသင်တန်းသို့ မြို့နယ်များမှ သင်တန်းသား၊ သင်တန်းသူ စုစုပေါင်း ၇၀ ဦး တက်ရောက်လျက်ရှိကြောင်း သိရှိရပါသည်။

DOCA(ဧရာဝတီ)

            ၂၀၂၅ ခုနှစ်၊ ဇွန်လ ၅ ရက်နေ့တွင်ကျရောက်မည့် ကမ္ဘာ့ပတ်ဝန်းကျင်ထိန်းသိမ်းရေးနေ့အကြို လှုပ်ရှားမှုအဖြစ် ဧရာဝတီတိုင်းဒေသကြီး၊ ညောင်တုန်းမြို့ စည်ပင်သာယာဈေး အနီး ၌ စုပေါင်းအမှိုက်ကောက်ခြင်းကို ၃-၆-၂၀၂၅)ရက်နေ့ နံနက်(၀၈း၃၀) နာရီအချိန်တွင်  ညောင်တုန်းမြို့နယ် ပတ်ဝန်းကျင်ထိန်းသိမ်းရေးဦးစီးဌာန၊ မြို့နယ်စည်ပင်သာရေးအဖွဲ့နှင့် မြို့ နယ်စားသုံးသူရေးရာဦးစီးဌာန၊ အမှိုက်သိမ်းဝန်ဆောင်မှုအဖွဲ့တို့ပါဝင်သည့် စုပေါင်းအင်အား ၂၀ ဦးဖြင့် ပူးပေါင်းဆောင်ရွက်ခဲ့ကြသည်။

              အဆိုပါပူးပေါင်းအဖွဲ့က ညောင်တုန်းမြို့ပေါ်ရပ်ကွက်များ၊ ဈေးအနီးများတွင်  စွန့်ပစ်ပစ္စည်းအမှိုက်သရိုက်များနှင့် ပလတ်စတစ်အမှိုက်များကို စုပေါင်းသန့်ရှင်းရေးဆောင်ရွက်ခဲ့ကြပြီး ယခုနှစ်ကမ္ဘာ့ပတ်ဝန်းကျင်ထိန်းသိမ်းရေးနေ့၏ “ကမ္ဘာ့တစ်ဝန်း ပလတ်စတစ်ညစ်ညမ်းမှုပပျောက်ရေး စုပေါင်းအားဖြင့်ဆောင်ရွက်ပေး” ဆောင်ပုဒ်နှင့်အညီ ပလတ်စတစ်ညစ်ညမ်းမှု အဆုံးသတ်ရေး လူထုလှုပ်ရှားမှု အသိပညာပေးလက်ကမ်းစာစောင်ဖြန်ဝေ ဆောင်ရွက်ခြင်းဖြစ်ကြောင်း သိရသည်။

DOCA(ဧရာဝတီ)

           မအူပင်ခရိုင်၊ စားသုံးသူရေးရာဦးစီးဌာနနှင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့ပူးပေါင်း၍ (၂-၆-၂၀၂၅) ရက်နေ့ နံနက်(၀၈း၀၀)နာရီအချိန်တွင် ဓနုဖြူမြို့နယ် စားသုံးသူအသိပညာပေး Talk Show ဆွေးနွေးပွဲအား ပြန်ကြားရေးနှင့်ပြည်သူ့ဆက်ဆံရေးဦးစီးဌာန Community Center ခန်းမများ၌ ကျင်းပခဲ့ပါသည်။

             အဆိုပါ ဆွေးနွေးပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ တာဝန်ရှိသူများက အသိပညာပေး  Talk Show ဆွေးနွေးပွဲကျင်းပရခြင်း၏ ရည်ရွယ်ချက်များအား ပြောကြးခဲ့ပြီး စားသုံးသူရေးရာဦးစီးဌာန၊ ဓနုဖြူမြို့နယ်ဦးစီးမှူးရုံးမှ ဦးခိုင်လွမ်းမိုးက စားသုံးသူကာကွယ်ရေးဥပဒေ ပြဌာန်းထားရှိမှု၊ ဥပဒေပါစားသုံးသူအခွင့်အရေး(၈)ချက်နှင့် စားသုံးသူတို့၏တာဝန်များ၊ ကုန်စည်ဝန်ဆောင်မှုနှင့်စပ်လျဉ်း၍ အာမခံပေးထားမှုအပေါ် စားသုံးသူက တောင်းဆိုနိုင်သည့်အခွင့်အရေးများ၊ စားသုံးသူနစ်နာဆုံးရှုံးမှုဖြစ်ပေါ်ပါက တိုင်းဒေသကြီးပြည်နယ်များ၊ ခရိုင်ဦးစီးမှူးရုံးများရှိ စားသုံးသူသတင်း ပြန်ကြားရေးနှင့် တိုင်ကြားမှုလက်ခံ‌ဆောင်ရွက်ရေးစင်တာ(CICC)ရုံးများ၊ စားသုံးသူရေးရာဦးစီးဌာန၏ Website ဖြစ်သော www.doca.gov.mm ထဲသို့ ဝင်ရောက်တိုင်ကြားနိုင်ပါကြောင်းနှင့် Consumer Call Center ဖြစ်သည့်(1535)သို့  ခေါ်ဆိုတိုင်ကြားနိုင်ပါကြောင်း ဆွေးနွေးပြောကြားခဲ့ကြောင်း သတင်းရရှိသည်။

DOCA(ဧရာဝတီ)

           အိမ်တွင်းလျှပ်စစ်သွယ်တန်းတပ်ဆင်ခြင်း သင်တန်းဆင်းပွဲအခမ်းအနားကို အလုပ်သမား ညွှန်ကြားရေးဦးစီးဌာန ကျွမ်းကျင်မှုလေ့ကျင့်ရေးသင်တန်းကျောင်း(ပုသိမ်)တွင် ၃၀.၅.၂၀၂၅ ရက်နေ့ နံနက် (၁၀:၀၀) နာရီအချိန်တွင် ကျင်းပခဲ့ရာ တိုင်းအဆင့်ဌာနဆိုင်ရာများ၊ စက်ရုံအလုပ်ရုံများမှ တာဝန်ရှိသူများနှင့် သင်တန်းသားများ တက်ရောက်ခဲ့ပါသည်၊၊

              အခမ်းအနားတွင် အလုပ်သမားညွှန်ကြားရေးဦးစီးဌာန ညွှန်ကြားရေးမှူး အဖွင့်အမှာ စကားပြောကြားရာ အိမ်တွင်းလျှပ်စစ်သင်တန်းတွင် သင်ကြားပြသပေးသော သင်ခန်းစာများကို လေ့လာဆည်းပူးသင်ကြားပြီး မိမိအိမ်၊ ပတ်ဝန်းကျင်နှင့် အလုပ်ရုံများဝင်ရောက်လုပ်ကိုင်နိုင်ပြီး လျှပ်စစ်လုပ်သားကောင်းများဖြစ်စေရေးနှင့် လျှပ်စစ်ကြောင့် ဖြစ်ပေါ်လာမည့် Wire Shock ဖြစ်ပွားမည့် အန္တရာယ်များမဖြစ်ပေါ်စေရေး အထူးဂရုပြုဆောင်ရွက်ကြရန် လိုအပ်ကြောင်းပြောကြားခဲ့ပြီး အမှတ်တရ ဓာတ်ပုံရိုက်ကူးပြီး သင်တန်းဆင်းပွဲအခမ်းအနားကို ရုတ်သိမ်းခဲ့ကြောင်း သတင်းရရှိပါသည်၊၊

(DOCA)ဧရာဝတီ