သတင်းနှင့် လှုပ်ရှားမှုများ

        (၂၆.၅.၂၀၂၅) ရက်နေ့၊ နေလယ်(၁၃:၀၀)နာရီအချိန်တွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင် ဦးစီးမှူးရုံးမှ ဒေါ်လဲ့လဲ့ဌေး (ဒုဦးစီးမှူး)နှင့် ဝန်ထမ်းများသည် ဗိုလ်တထောင်ခရိုင်၊ သာကေတမြို့နယ်ရှိ အသင့်စားမုန့်အမျိုးမျိုးအားရောင်းချသည့် ကုန်စုံဆိုင်(ရ)ဆိုင်အား ကုန်အညွှန်းအမှတ်အသား ပြည့်စုံစွာပါရှိမှုရှိ/ မရှိ စစ်ဆေးမှုများ ဆောင်ရွက်ခဲ့ကြောင်း သိရှိရပါသည်။

           အဆိုပါ အသင့်စားမုန့်အမျိုးမျိုးအား စစ်ဆေးရာတွင် သက်ဆိုင်ရာဌာနများ၏ သတ်မှတ်ချက်များပါရှိပြီး စားသုံးသူကာကွယ်ရေးဥပဒေနှင့် ကိုက်ညီမှုရှိသော ကုန်အညွှန်းအမှတ်အသား ပြည့်စုံစွာဖော်ပြပါရှိသည့် မုန့်များကိုသာရောင်းချသည်ကို စစ်ဆေးတွေ့ရှိခဲ့ကြောင်း သတင်းရရှိရပါသည်။

DOCA(ရန်ကုန်)

           ရန်ကုန်တိုင်းဒေသကြီး၊ စားသုံသူရေးရာဦးစီးဌာန၊ အရှေ့ပိုင်းခရိုင်ဦးစီးမှူးရုံးမှ ဦးမြသန်းနိုင်(လ/ထ ကြီးကြပ်ရေးမှူး)နှင့် ဝန်ထမ်းများသည် ၂၀၂၅ ခုနှစ်၊ မေလ(၂၇)ရက်နေ့၊ နေ့လယ် (၁၃:၃၀)နာရီအချိန်တွင် သာကေတမြို့နယ်အတွင်းရှိ ဆေးနှင့် ဆေးပစ္စည်း အရောင်း ဆိုင်များအား   ကွင်းဆင်းစစ်ဆေးခြင်း ဆောင်ရွက်ခဲ့ကြောင်းသိရှိရပါသည်။

         ထိုသို့ ဈေးကွက်စောင့်ကြည့်စစ်ဆေးခြင်းဆောင်ရွက်ရာတွင် ဆေးနှင့်ဆေးပစ္စည်းအရောင်းဆိုင်မှ စီးပွားရေးလုပ်ငန်းရှင်များအနေဖြင့် ဈေးကွက်အတွင်း ဆေးနှင့် ဆေးပစ္စည်းများအား ဈေးနှုန်းမြှင့်တင်ရောင်းချခြင်းရှိ/ မရှိ၊ ဈေးနှုန်းမြှင့်တင်ဖြန့်ဖြူးခြင်း (သို့မဟုတ်) ဈေးကစားရန် ရည်ရွယ်ချက်ဖြင့် သိုလှောင်ထားခြင်းရှိ/မရှိ၊ တရားမဝင်ဆေးဝါးများနှင့် သက်တမ်းလွန် ဆေးဝါးများ ရောင်းချခြင်းမရှိစေရေးတို့အတွက် ကွင်းဆင်းစစ်ဆေးခဲ့ရာ ဈေးနှုန်းမြှင့်တင် ရောင်းချခြင်းမရှိကြောင်း၊ လုပ်ငန်းရှင်များအနေဖြင့် ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း (သို့မဟုတ်) ဈေးကစားရန်ရည်ရွယ်ချက်ဖြင့် သိုလှောင်ထားခြင်းများ ရှိပါက အရေးကြီးကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်ခြင်းခံရမည် ဖြစ် ကြောင်း အသိပညာပေး ဆွေးနွေးခဲ့ပြီး  စားသုံးသူအသိပညာပေး လက်ကမ်းစာစောင်များ ဖြန့်ဝေပေးခဲ့ကြောင်းသိရှိရပါသည်။

    စားသုံးသူရေးရာဦးစီးဌာန ၊ ရန်ကုန်အရှေ့ပိုင်းခရိုင်ဦးစီးမှူးရုံးမှ ဒေါ်လဲ့လဲ့ဌေး (ဒု-ဦးစီးမှူး) နှင့်ဝန်ထမ်းများသည် မင်္ဂလာတောင်ညွှန့်မြို့နယ်(Makro)ရှိ (၃.၆.၂၀၂၅) ရက်နေ့ ၊ နေ့လယ် (၁၂:၃၀) အချိန်တွင်  အမှတ် (၃၂၂) ၊ အထက်ပုဇွန်တောင်လမ်း ၊ မင်္ဂလာတောင်ညွှန့် မြို့နယ်(Makro)အား သွားရောက်၍ ဆန်ရောင်းချမှု ကွင်းဆင်းအသိပညာပေးမှုများ ဆောင်ရွက် ခဲ့ကြကြောင်း သိရှိရပါ သည်။

     ထိုသို့ ကွင်းဆင်းအသိပညာပေးရာတွင် (Makro)ဆန်ဆိုင်ရှိ ရောင်းချနေသော ဆန်များ သည် မြတ်(မြောင်းမြပေါ်ဆန်း)(၂၄kg) ၊ မြတ်(ရက်၉၀)(၁၂kg) ၊ မြတ်(ဧရာပဒေသာ)(၁၂kg) ၊ Ayeyar (ဇီယာ) (၁၀kg) ၊ Nursery (ပေါ်ဆန်း)(၂၄kg) ၊ Win (တောင်ပျံ-ရှယ်)(၂၄kg) ၊ Win (ရွှေဘိုပေါ်ဆန်း)(၂၄kg) ၊ မြတ် (ကျားပျံ) (၂၄kg) ၊ Meizan (ပေါ်ဆန်းမွှေး)(၁၂kg) ၊ Ayeyar (ပေါ်ဆန်းမွှေး) (၅kg)၊ Nursery (ပေါ်ဆန်း)(၅kg)၊ Win (ဇီယာ)(၆kg)၊ မြ(ရွှေဘိုပေါ်ဆန်း) (၅kg) စသည့်ဆန်များကို   သတ်မှတ်ရည်ညွှန်းဈေးအတိုင်း ရောင်းချလျက်ရှိကြောင်းနှင့် ဆန် ဈေးနှုန်းကြီးမြှင့်မှု မဖြစ်ပေါ်စေရေးအတွက် ဈေးကစားရန်အလို့ငှာ ဆန်များသိုလှောင် ထားခြင်းမပြုရန် နှင့်သတ်မှတ်ထားသော ဈေးနှုန်းများအတိုင်းရောင်းချသွားရန် ၊ ဈေးနှုန်းများ အဆမတန်မြှင့်တင်ရောင်းချခြင်းမပြုရန်၊ လိုက်နာမှုမရှိပါက ဥပဒေအရ အရေးယူခံရမှာ ဖြစ်ကြောင်း  အသိပညာပေးပြောကြားခြင်းများ  ဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

      စားသုံးသူများ အသုံးပြုလျက်ရှိသည့် ကုန်စည်နှင့် ဝန်ဆောင်မှုများ ဘေးအန္တရာယ် ကင်းရှင်းစေရေးအတွက် စားသုံးသူရေးရာဦးစီးမှူးရုံး၏ လမ်းညွှန်ချက်များအရ အစားအသောက် ပြုပြင်ရောင်းချသည့် နေရာများ မသန့်ရှင်းခြင်း၊ အစားအသောက်ကိုင်တွယ်ချက်ပြုတ်သူများ၊ ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှု အားနည်းခြင်း၊ အစားအသောက်များ သန့်ရှင်းလတ်ဆက်မှုမရှိခြင်းစသည့် အကြောင်းအရင်းများကြောင့် ဖြစ်ပေါ်သည့် ကျန်းမာရေး ပြဿနာများမှ စားသုံးသူအား ကာကွယ်ရန်၊ စားသောက်ဆိုင်များသည် မိမိတို့ဆိုင်များမှပေးအပ်သည့်ဝန်ဆောင်မှုနှင့် စပ်လျဉ်း၍ စားသုံးသူများအား လုံလောက်သည့် သတင်းအချက်အလက်များ ကိုအသိပေးဖော်ပြစေခြင်းဖြင့် စားသုံးသူအခွင့်အရေးရရှိစေရန်နှင့် ရောင်းချသည့် စားသောက် ဖွယ်ရာများ၏ အမျိုးအစား၊အရွယ်အစား၊ပမာဏအလိုက် ဈေးနှုန်းအားပွင့်လင်းမြင်သာစွာ ကြိုတင် အသိပေး‌ဖော်ပြထားခြင်းဖြင့် စားသုံးသူတို့၏ အခွင့်အရေးကို ကာကွယ်ရန် ရည်ရွယ်၍ ၂၀၂၅ခုနှစ် မေလအတွင်း အစားအသောက်ရောင်းချသည့် ဝန်ဆောင်မှုလုပ်ငန်းများ ဈေးကွက်စောင့်ကြည့် စစ်ဆေးရန်  အကြောင်းကြားမှုအပေါ် ဆောင်ရွက်လျက်ရှိရာ ပြည်ခရိုင်အတွင်းပြည်မြို့နယ်တွင် ခေတ္တရာမြို့သစ်ရပ်ကွက်၊ (၅)လမ်းထိပ်ရှိ "ရွှေကံကော်"စားသောက်ဆိုင်၊ ရွှေတောင် မြို့နယ်တွင် ကြာနီကန်ရပ်ကွက်၊ရန်ကုန်-ပြည်လမ်းရှိ “ရွှေဝတ်မှုန်”မြန်မာထမင်းဆိုင်၊ ပန်းတောင်း မြို့နယ်တွင် မကျီးထုံးကျေးရွာရှိ "Gray House"စားသောက်ဆိုင်၊ ပေါက်ခေါင်းမြို့နယ်တွင် အမှတ်(၄)ရပ်ကွက်ရှိ ပြည်-တောင်ငူလမ်းပေါ်ရှိ "ဖြိုး"လက်ဖက်ရည်နှင့်စားဖွယ်စုံ ဆိုင်များသို့ သက်ဆိုင်ရာမြို့နယ် တာဝန်ခံနှင့် ဝန်ထမ်းများသည် မိမိတို့ခရိုင်/မြို့နယ်များရှိ မိတ်ဖက်ဌာနဆိုင်ရာများဖြစ်သော ခရိုင်FDAဌာန၊မြို့နယ်ထွေ/အုပ်၊ မြိုနယ်ပြည်သူ့ကျန်းမာရေး၊ မြို့နယ်စည်ပင်သာယာရေးအဖွဲ့များနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

    ထိုသို့ဆောင်ရွက်ရာတွင် ‌အစားအသောက်ပြုပြင်ရောင်းချသည့်နေရာများ သန့်ရှင်းမှု ရှိ/မရှိ၊ အစားအသောက်ကိုင်တွယ်ချက်ပြုတ်သူများနှင့် ဝန်ဆောင်မှုပေးသူများ၏ တစ်ကိုယ်ရည်သန့်ရှင်းမှု ရှိ/မရှိ၊ အစားအသောက်များ သန့်ရှင်းလတ်ဆက်မှုရှိ/မရှိ၊ စားသောက်ဆိုင်များသည် မိမိတို့ဆိုင်များမှ ပေးအပ်သည့် ဝန်ဆောင်မှုနှင့် စပ်လျဉ်း၍ စားသုံးသူများအား လုံလောက်သည့် သတင်းအချက်အလက်များကို အသိပေးဖော်ပြခြင်း ရှိ/မရှိနှင့် ရောင်းချသည့် စားသောက်ဖွယ်ရာများ၏ အမျိုးအစား၊အရွယ်အစား(size)ပမာဏအလိုက် ဈေးနှုန်းအား ပွင့်လင်းမြင်သာစွာ ကြိုတင်ဖော်ပြထားခြင်းရှိ/မရှိ ၊ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ရာ သန့်ရှင်းလတ်ဆက်မှုရှိခြင်း၊ ဝန်ဆောင်မှုနှင့် စပ်လျဉ်း၍ သီးခြားရယူထားမှုမရှိခြင်းနှင့် ဈေးနှုန်းများ ဖော်ပြထားသည့် Menuစာရွက်များကို စားပွဲများတွင် တင်ထားသည်ကို စစ်ဆေးတွေ့ရှိခဲ့ပါကြောင်းနှင့် အစားအသောက်ရောင်းချသည့် ဝန်ဆောင်မှုလုပ်ငန်းများအနေဖြင့် စားသုံးသူများအား ဝန်ဆောင်မှုပေးရာတွင် စားသုံးသူစိတ်ကျေနပ်မှုရှိစေရေး၊ စားသုံးသူဘေးအန္တရာယ် ကင်းရှင်းစွာ စားသောက်နိုင်ရေး၊ စားသုံးသူနစ်နာ ဆုံးရှုံးမှု မဖြစ်စေရေးတို့ကို ဦးစားပေး ဆောင်ရွက်ရန် အသိပညာပေးဆွေးနွေးခြင်းများ ဆောင်ရွက်ခဲ့ပါကြောင်း သတင်းရရှိပါသည်။

DOCA(ပဲခူး)

     စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေတို့နှင့် စပ်လျဉ်း၍ သက်ဆိုင်ရာ မိတ်ဖက်ဌာနများနှင့် ပူးပေါင်း၍ ဈေးကွက်စောင့်ကြည့်စစ်ဆေးခြင်း လုပ်ငန်းများဆောင်ရွက်လျက်ရှိရာ ၂၀၂၅ ခုနှစ်၊ မေလ (၁) ရက်နေ့မှ (၃၁) ရက်နေ့ အတွင်းတွင် ပြည်ခရိုင်၊ ပြည်မြို့နယ်၊ အောင်ဆန်း(၂)ဥယာဉ်စုလမ်းရှိ “သူ့ထက်သာ”ကိတ်မုန့်၊ပေါင်မုန့်လုပ်ငန်းနှင့် “ပစ်တိုင်းထောင်” ပဲကိတ်လုပ်ငန်း၊ အမှတ်(၅)သီရိလမ်း၊ ဂေါက်ကွင်းရပ်ရှိ “ကျော်” ပြလို့နံကထိုင် လုပ်ငန်း၊ (၃)လမ်း၊ မြို့ပတ်ကွက်ရှိ “ပြည့်လျှံ” နံကထိုင်၊ ပေါင်မုန့်လုပ်ငန်း သို့လည်းကောင်း၊ ရွှေတောင်မြို့နယ်တွင် သရက်‌တောရပ်ကွက်၊ ရန်ကုန်-ပြည်လမ်းရှိ “အိုဆာကာ” ထမင်းသုပ်လုပ်ငန်း၊ ကြာနီကန်ရပ်ကွက်၊ ကူကြီးလမ်းရှိ “Top”ယိုစုံ လုပ်ငန်းသို့ လည်းကောင်း၊ ပန်းတောင်းမြို့တွင် လဲကျေးရွာရှိ “Ever Cool”ရေသန့်လုပ်ငန်း၊ ဝန်လိုရပ်ကွက်ရှိ “သဘာဝအရသာ” ယိုစုံလုပ်ငန်းသို့ လည်းကောင်းသက်ဆိုင်ရာ မြို့နယ်တာဝန်ခံနှင့် ဝန်ထမ်းများသည် သွားရောက်၍ ဈေးကွက်မရောက်မီ ကုန်စည်များတွင် ကုန်အညွှန်း အမှတ်အသားပါ သတ်မှတ်ချက်များနှင့် ကိုက်ညီမှုရှိသော ကုန်စည် များကို တင်သွင်းရောင်းချခြင်း ရှိ/မရှိ၊ သက်ဆိုင်ရာဌာန၏ ထောက်ခံမှုရှိ/မရှိ ဈေးကွက် စောင့်ကြည့်စစ်ဆေးခဲ့ပါကြောင်းနှင့် စောင့်ကြည့် စစ်ဆေးခဲ့သည့် ကုန်စည်များတွင် ကုန်အညွှန်း အမှတ်အသား ဖေါ်ပြချက်များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)