သတင်းနှင့် လှုပ်ရှားမှုများ

    စားသုံးသူရေးရာဦးစီးဌာန၊ မြန်အောင်မြို့နယ်ဦးစီးမှူးနှင့်ဝန်ထမ်းများသည် (၁၈.၁၁.၂၀၂၅)ရက် နေ့ နံနက် (၀၉:၀၀) နာရီအချိန်တွင် မြန်အောင်မြို့၊ မြို့မတဲကြီးကုန်းရပ်ရှိ အုပ်ချုပ်ရေးမှူးရုံး၌ ကုန်စုံ ဆိုင်လုပ်ငန်းရှင်(၈)ဦးအား စားသုံးသူကာကွယ်ရေး အသိပညာပေးဟောပြောခြင်း ဆောင်ရွက်ခဲ့ပါသည်။

     ဟောပြောပွဲတွင် မြို့နယ်ဦးစီးမှူး ဦးမြင့်အောင်က  စားသုံးကာကွယ်ရေးဥပဒေပါ စီးပွားရေး လုပ်ငန်းရှင်၏ တာဝန်များအကြောင်း၊ ကုန်အညွှန်းအမှတ်အသား  အဓိပ္ပာယ်ဖွင့်ဆိုချက်၊ ကုန်အညွှန်း အမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ(၄၁) ပုဒ်မခွဲ(ခ) နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြား ဘာသာတစ်ခု (သို့မဟုတ်) တစ်ခု ထက်ပို၍ တွဲလျက်ဖြစ်စေ ရေးသားဖော်ပြရမည့် အကြောင်း၊ စားသုံးသူကိုခွဲခြားမှုမရှိဘဲဖြောင့် မတ်မှန်ကန်စွာ ဆက်ဆံခြင်း၊ စီးပွားရေးလုပ်ငန်းလုပ်ကိုင်ရာတွင် စီးပွားရေးကျင့်ဝတ်၊ စည်းကမ်းနှင့်အညီ ဆောင်ရွက်ရန်၊ စားအုန်းဆီရောင်းချသော လုပ်ငန်းရှင်အနေဖြင့် ဈေးနှုန်းမြှင့်တင် ရောင်းချမှုမရှိစေရေး၊ ဈေးကွက်အတွင်း ဈေးနှုန်းမြှင့်တင်ရောင်းချခြင်းများတွေ့ရှိပါက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှထုတ်ပြန်ထားသောအရေးကြီးကုန်စည်နှင့်ဝန်ဆောင် မှုဥပဒေပါ ပြစ်မှုပြစ်ဒဏ်များအရအရေးယူဆောင်ရွက်နိုင်သည့်အကြောင်း အသိပညာပေးဟောပြော ဆွေးနွေးခဲ့ကြောင်းသိရှိရပါသည်။

(DOCA ဧရာဝတီ)

    ဘိုကလေးမြို့နယ် တာဝန်ခံနှင့် ဝန်ထမ်းတို့သည် ဆီအသင်းအဖွဲ့ဝင်များနှင့် ပူးပေါင်း၍ (၁၇.၁၁.၂၀၂၅) ရက်နေ့၊ နံနက် (၁၁:၃၀) နာရီ အချိန်တွင် ဘိုကလေးမြို့၊ ကမ်းနားလမ်းရှိ “လင်းမြတ်” ကုန်စုံဆိုင်တွင် စားအုန်းဆီ များကို သတ်မှတ်ရည်ညွန်းဈေးဖြင့် ရောင်းချမှုရှိ/မရှိ ကွင်းဆင်းစိစစ်ခဲ့ကြပါသည်။

          ထိုသို့ကွင်းဆင်းစိစစ်ရာတွင် ဘိုကလေးမြို့၊ ကမ်းနားလမ်း (၅) ရပ်ကွက်ရှိ ဦးဇော်ဝင်းနိုင်ပိုင် “လင်းမြတ်” ကုန်စုံဆိုင်တွင် နေ့စွဲများပါရှိသော စားအုန်းဆီများကို ရည်ညွှန်းဈေးအတိုင်း ဗွီနိုင်း ကပ်၍ ရောင်းချနေမှု အခြေအနေ၊ အလေးချိန်နှင့် အရည်အသွေး ပြည့်ဝမှန်ကန်မှုရှိ/မရှိ တို့အား စစ်ဆေးခဲ့ရာ ဈေးနှုန်းမှန်ကန်စွာ ရောင်းချနေကြောင်း ကွင်းဆင်းစိစစ်ခဲ့မှုအရ သတင်းရရှိပါသည်။

(Doca ဧရာဝတီ)

        စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံးအနေဖြင့် စားသုံးသူပြည်သူများ ကုန်စည်နှင့် ဝန်ဆောင်မှုများသုံစွဲရာတွင် ထိခိုက်နစ်နာမှုမရှိစေရေး၊ လုံခြုံစိတ်ချရမှုမရှိသော ကုန်စည်များလျော့နည်းပပျောက်သွားစေရေးတို့အတွက် နေရာစုံ၌ နည်းလမ်းပေါင်းစုံဖြင့် စီးပွားရေးလုပ်ငန်းရှင်များအပါအဝင် စားသုံးသူပြည်သူတစ်ရပ်လုံးကို အသိပညာပေးလျက်ရှိရာ တစ်ဖက်မှလည်း ဈေးကွက်များအတွင်း ရောင်းချမှုမရှိစေရေး ရောင်းချမှုမရှိစေရေး ဈေးကွက်စောင့်ကြည့် စစ်ဆေးခြင်းများကို အစဉ်တစိုက်ဆောင်ရွက်လျက်ရှိပါသည်။ မိတ္ထီလာမြို့နယ်တာဝန်ခံနှင့် အဖွဲ့သည် အထွေထွေအုပ်ချုပ်ရေးဦးစီးဌာန၊ ခရိုင်အစားအသောက်နှင့် ဆေးဝါးကွပ်ကဲရေးဦးစီး ဌာနနှင့်မြို့နယ်စည်ပင်သာယာရေးအဖွဲ့ တို့ပူးပေါင်း၍မိတ္ထီလာခရိုင်ဦးစီးမှူး၏ လမ်းညွှန်မှုနှင့်  ၂၀၂၅ ခုနှစ်၊ နိုဝင်ဘာ ၁၁ ရက်နေ့တွင် မိတ္ထီလာမြို့ပေါ်ရှိ ဆေးနှင့်ဆေးပစ္စည်းရောင်းချနေသောဆိုင်များအား  ကွင်းဆင်းဆောင်ရွက်ခဲ့ကြောင်း သိရသည်။

         ကွင်းဆင်းစစ်ဆေးရာတွင် ပူးပေါင်းအဖွဲ့ဝင်များသည် ဆေးနှင့်ဆေးပစ္စည်းရောင်းချသော ဆေးဆိုင်များတွင် ကျန်းမာရေးအထောက်အကူပြု အသုံးအဆောင်ပစ္စည်းများဖြစ်သော သွေးပေါင်ချိန်စက်၊ ဆီးချိုသွေချိုးတိုင်းစက်၊ ကွန်ဒုံး၊ ဆီးစစ်ကိရိယာစသည့် ပစ္စည်းအမျိုးမျိုးနှင့် သက်ဆိုင်ရာဌာန ထောက်ခံချက်ပါဝင်သော ဆေးဝါးများ၊ စားသုံးသူကာကွယ်ရေး ဥပဒေပါ ကုန်အညွှန်းအမှတ်အသား ဖော်ပြခြင်းများနှင့် ကိုက်ညီသော ဆေးဝါးများသာရောင်းချစေရေးတို့အတွက် စစ်ဆေးမှုများဆောင်ရွက်ခဲ့ပြီး၊ စစ်ဆေးမှုများတွင် သတ်မှတ်ချက်များနှင့် ကိုက်ညီမှုရှိသော ကျန်းမာရေးအထောက်အကူပြု အသုံးအဆောင်ပစ္စည်းအမျိုးမျိုးနှင့် ဆေးဝါးများကိုသာ ရောင်းချမှုရှိကြောင်း သိရှိရပါသည်။

DOCA(မန္တလေး)

     ဧရာဝတီတိုင်းဒေသကြီး၊ ဖျာပုံခရိုင်၊ ကျိုက်လတ်မြို့နယ် သမက်ပြေကျေးရွာရှိ ဦးထွန်းထွန်းပိုင် သိုလှောင်ရုံအား မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံ ဦးမိုးမင်းသန်းနှင့် ဝန်ထမ်းတို့သည် ဆန်/စပါး လက်ကျန်အခြေအနေ ကွင်းဆင်းစိစစ်ခဲ့ကြပါသည်။

      မြို့နယ်တာဝန်ခံက ဦးထွန်းထွန်းအား သိုလှောင်ရုံ၏ အရွယ်အစားနှင့် သိုလှောင်ထားရှိသော ဆန်/စပါးများအား မေးမြန်းခဲ့ရာ သိုလှောင်ရုံအရွယ်အစားမှာ အလျား(၇၀) ပေ၊ အနံ (၃၀) ပေ၊ အမြင့် (၁၀) ပေခန့်ရှိပြီး ဆံဝင်အင်အားအနေဖြင့် စပါး (၁၅၀၀၀) ဝင်ဆံ့ပြီး လက်ရှိစပါး လက်ကျန်အနေဖြင့် စပါးတင်း(၄၀၀၀) ခန့် သိုလှောင်ထားရှိပြီး Myro တွင် မှတ်ပုံတင်ထားရှိကြောင်း ကွင်းဆင်းစိစစ်မှုအရ သတင်းရရှိပါသည်။

(Doca ဧရာဝတီ)

      ဧရာဝတီတိုင်းဒေသကြီး၊ ဖျာပုံခရိုင် ၊ ကျိုက်လတ်မြို့နယ် စားသုံးသူရေးရာဦးစီးဌာနမှ မြို့နယ် တာဝန်ခံနှင့် ဝန်ထမ်းတို့သည် (၁၇.၁၁.၂၀၂၅) နံနက် (၇:၀၀) နာရီအချိန်တွင် ကျိုက်လတ်မြို့နယ် ကုန်ဈေးနှုန်းတည်ငြိမ်ရေး ကော်မတီမှ အမှတ်(၃) ရပ်ကွက်၊ (၇) လမ်းရှိ ဒေသခံပြည်သူများသို့ အခြေခံ စားသောက်ကုန်ပစ္စည်းများ ဈေးနှုန်းသက်သာစွာ ရောင်းချပေးခဲ့ပါသည်။

   ထိုသို့ဆောင်ရွက်ရာတွင် အခြေခံစားသောက်ကုန်များ ဖြစ်သည့် ဧည့်မထရက်(၉၀) ဆန်တစ်ပြည် (၂၅၀၀) ကျပ်၊ ကြက်ဥ တစ်လုံးလျှင် (၃၇၀) ကျပ်၊ စားသုံးဆီတစ်ပိဿာလျှင် (၇၁၂၂) ကျပ်၊ ဝက်သားတစ်ပိဿာလျှင် (၂၄၈၀၀) ကျပ်နှုန်းဖြင့် လူတစ်ဦးလျှင် ဆန်တစ်ပြည်၊ ကြက်ဥ(၁၀) လုံး၊ဆီ(၅၀) ကျပ်သား ရောင်းချပေးခဲ့ပါသည်။စုစုပေါင်းရောင်းချမှုအနေဖြင့် ဆန်(၃) အိတ်၊ဆီ(၅၀) ကျပ်သားဘူး(၂၀၀) ၊ ကြက်ဥအလုံးရေ(၆၀၀) လုံးတို့အား ပြည်သူများသို့ သက်သာသော ဈေးနှုန်းဖြင့် ရောင်းချပေးခဲ့ကြောင်း သိရသည်။

(Doca ဧရာဝတီ)