သတင်းနှင့် လှုပ်ရှားမှုများ

          ပဲခူးတိုင်းဒေသကြီး၊  သာယာဝတီခရိုင် စားသုံးသူရေးရာဦးစီးဌာနရုံး ခရိုင်ဦးစီးမှူး၏ လမ်းညွှန် ချက်၊အုတ်ဖိုမြို့နယ်အထွေထွေအုပ်ချုပ်ရေးအဖွဲ့၏ စီမံမှုများနှင့်အညီ အုတ်ဖိုမြို့နယ် စားသုံးသူ  ရေးရာဦးစီးဌာန မြို့နယ်တာဝန်ခံနှင့်ဝန်ထမ်းများသည် မြို့နယ်ဆန်စက်ပိုင်ရှင်နှင့် ဆန်ကုန်သည် ကြီးများ၊ အုတ်ဖိုမြို့နယ်ဆီကုန်သည်နှင့် ဆီစက်ပိုင်ရှင်ကြီးများအသင်းနှင့်ပူးပေါင်းလျက် အုတ်ဖိုမြို့ နယ်ကိုယ်တိုင်စိုက်ပျိုး ရောင်းချသူများသက်သာဈေးဆိုင်နှင့်အေးမြသာယာစိုက်ပျိုး မွေးမြူရေးသိပ္ပံ အထက်တန်းကျောင်းတို့တွင် အပတ်စဉ်တနင်္လာ၊အင်္ဂါ၊ဗုဒ္ဓဟူးနေ့များတွင် သက်သာသောနှုန်းထား ဖြင့် ဆန်၊စားအုန်းဆီ၊ကြက်ဥနှင့်အသား၊ငါး၊ ဟင်းသီးဟင်းရွက်များကို ရောင်းချပေးလျက်ရှိပါသည်။

          ထိုသို့ရောင်းချရာတွင် မြို့နယ်စည်ပင်သာယာရေးအဖွဲ့ ငါးလုပ်ငန်းဦးစီးဌာန စိုက်ပျိုးရေး ဦးစီးဌာန၊မွေးမြူရေးနှင့်ကုသရေးဦးစီးဌာနတို့မှ ပူးပေါင်းပါဝင်ပြီး ဧည့်မထဆန်တစ်ပြည်လျှင် ၃၀၀၀ ကျပ်၊စားအုန်းဆီ ၅၀ ကျပ်သားလျှင် ၄၀၀၀ ကျပ်၊ငါးတစ်ပိဿာလျှင် ၆၀၀၀ကျပ်၊ကြက်ဥတစ်လုံး လျှင် ၃၅၀ ကျပ်၊ပန်းဂေါ်ဖီတစ်ပွင့်(အလတ်)လျှင် ၇၀၀ ကျပ်တို့ဖြင့် သက်သာစွာရောင်းချပေးလျက် ရှိပြီးစားသုံးသူရေးရာဦးစီးဌာနအနေဖြင့် တစ်ရက်လျှင် ဆန်(၃)အိတ်နှင့်ဆီ(၁၁၀)ပိဿာရောင်းချ လျက်ရှိပါသည်။

DOCA(ပဲခူး)

စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ ပြည်ခရိုင်ဦးစီးမှူးရုံးအနေဖြင့် ရပ်ကွက်/ ကျေးရွာနေ စားသုံးသူပြည်သူများနှင့် တိုင်းပြည်၏ အနာဂတ် မျိုးဆက်သစ်များဖြစ်သော ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာ အသိပညာများ ကျယ်ကျယ် ပြန့်ပြန့်သိရှိနိုင်စေရေး ရည်ရွယ်၍ ခရိုင်အတွင်း မြို့နယ်များရှိ ရပ်ကွက်/ ကျေးရွာများနှင့် အခြေခံပညာ ကျောင်းများတွင် အသိပညာပေးဟောပြောဆွေးနွေးခြင်းများကို အင်တိုက်အားတိုက် လုပ်ဆောင်လျှက်ရှိရာ ပြည်ခရိုင်အတွင်း ၂၀၂၅ ခုနှစ်၊ ဇန်နဝါရီလ (၁၅)ရက်မှ(၃၀)ရက် အတွင်း ပြည်ခရိုင်၊ ပြည်မြို့နယ်ရှိ ငါးရွာအုပ်စု၊ ထန်းပေါက်ကျေးရွာသို့လည်းကောင်း၊ ရွှေတောင်မြို့နယ်တွင် အ.မ.က (ဖိုးခေါင်)၊ အ.ထ.က(ကြာနီကန်)၊ အ.ထ.က(ရွှေတောင်)သို့လည်းကောင်း၊  ပန်းတောင်း မြို့တွင် အ.မ.က (သစ်စိမ့်ပင်)သို့လည်းကောင်း၊ ပေါက်ခေါင်းမြို့တွင် မြို့နယ်ပြန်ဆက်ရုံး နှင့်ပူးပေါင်း၍ စားသုံးသူ အသိပညာပေး (Talk Show) ပွဲပြုလုပ်ခြင်း၊ မူလွန်(ရွာထောင်)ကျောင်းသို့ လည်းကောင်း၊ မြို့နယ်တာဝန်ခံများနှင့် ဝန်ထမ်းများသည် စားသုံးသူကာကွယ်ရေး ဆိုင်ရာ အသိပညာပေး ဟောပြောခြင်း များဆောင်ရွက်ခဲ့ပါသည်။

အဆိုပါ အသိပညာပေး ဟောပြောခြင်းများ ဆောင်ရွက်ရာတွင် သက်ဆိုင်ရာ မြို့နယ် တာဝန်ခံများမှ စားသုံးသူ အခွင့်အရေးများနေ့ဖြစ်ပေါ်လာပုံ၊ စားသုံးသူအခွင့်အရေးနှင့်တာဝန်များ၊ ကုန်အညွှန်းအမှတ်အသားဖေါ်ပြခြင်းဆိုင်ရာ အချက်များ၊ နစ်နာဆုံးရှုံးမှုရှိပါက တိုင်ကြားနိုင်သည့် ပုဂ္ဂိုလ်များနှင့် နည်းလမ်းများ တိုင်ကြား နိုင်မည့် ဖုန်းနံပါတ်နှင့်လိပ်စာ၊ စားသုံးသူကာကွယ်ရေး ဥပဒေပါ ပြစ်မှုပြစ်ဒဏ်များအကြောင်း၊ သက်ဆိုင်ရာဌာနများက စားသုံးရန်မသင့်ဟု တားမြစ် ထုတ်ပြန်ထားသော ကုန်စည်များအား ရွေးချယ်ဝယ်ယူခြင်းမပြုရန် ကုန်အညွှန်းအမှတ်အသား ပြည့်စုံစွာ ပါဝင်သော ကုန်စည်များကိုသာ ရွေးချယ်ဝယ်ယူကြရန် အသိပညာပေးဟောပြောခြင်းများ ဆောင်ရွက်ခဲ့ ကြောင်းသိရပါသည်။

DOCA(ပဲခူး)

          စားသုံးသူရေးရာဦးစီးဌာန၊ မကွေး/ချောက်ခရိုင်ဦးစီးမှူးနှင့်ဝန်ထမ်းများသည် မကွေးမြို့နယ်ရှိ ဆီစက်များမှ ဒေသတွင်းဖူလုံမှုအပြင် ပိုလျှံသည်အထိ ကြိတ်ခွဲထုတ်လုပ်နိုင်ရေး၊ ပြည်တွင်း၌ ဆီထွက်သီးနှံများ ပိုမိုစိုက်ပျိုးထုတ်လုပ်လာစေရေးနှင့် ဆီစက်လုပ်ငန်းများ ဖွံ့ဖြိုး တိုးတက်စေရန် ရည်ရွယ်၍ (၁.၂.၂၀၂၅)ရက်နေ့၊ နံနက်(၁၀:၀၀)နာရီအချိန်တွင် မကွေးမြို့ပေါ်ရှိ ဆီစက်များအား ကွင်းဆင်းလေ့လာခဲ့ကြောင်း သိရသည်။

             ထိုသို့ ကွင်းဆင်းလေ့လာရာတွင် ဆီစက်လုပ်ငန်းရှင်များ လုပ်ငန်းလိုင်ရှိ/မရှိ၊ ဆီစက်များ အမှန်တကယ် လည်ပတ်ကြိတ်ခွဲမှုရှိ/မရှိနှင့် မိမိတို့ထုတ်လုပ်သည့် ကုန်ချော မြေပဲဆီ၊ နှမ်းဆီများ အပေါ် အာမခံပေးနိုင်မှုတို့အား ဆွေးနွေးခဲ့ပြီး လုပ်ငန်းရှင်များမှ ကုန်ကြမ်း (မြေပဲ/ နှမ်း)(၁၀၀) ပိဿာ ကြိတ်ခွဲမှုအပေါ် ကုန်ချော (၄၀)ပိဿာ (၄၀%)ပြန်လည်ရရှိပါကြောင်းနှင့် ထွက်ရှိလာသော ကုန်ချော မြေပဲဆီ/ နှမ်းဆီများ၏ (၇၅%) ကို အခြားတိုင်း/ ပြည်နယ်များသို့ ဖြန့်ချိရောင်းချလျှက် ရှိ ပြီး (၂၅%)ကိုသာ ဒေသတွင်းရှိ ပြည်သူများ ဝယ်ယူစားသုံးလျှက်ရှိကြောင်း၊ လက်ရှိကုန်ကြမ်း မြေပဲနီဆံ (၁)ပိဿာ (၈၄၀၀- ၈၅၀၀)ကျပ်နှင့် နှမ်းနီ (၁)ပိဿာ (၇၀၀၀)ကျပ်နှုန်းတို့ဖြင့် ဝယ်ယူရ ပြီး ကုန်ချော မြေပဲ/ နှမ်းဆီ (၁)ပိဿာလျှင် (၁၄၈၀၀-၁၅၀၀၀)ကျပ်တို့ဖြင့် ပြန်လည်ရောင်းချရပြီး ပဲဖက် (၁)ပိဿာ လျှင် (၆၅၀၀-၆၆၀၀)ကျပ်နှင့် နှမ်းဖက် (၁)ပိဿာလျှင် (၄၆၀၀)ကျပ်တို့ဖြင့် ပြန်လည်ရောင်းချရကြောင်း သိရှိရပါသည်။

DOCA(မကွေး)

            မကွေးတိုင်းဒေသကြီး၊ မကွေးခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စားသုံးသူ ရေးရာဦးစီးဌာနတို့ ပူးပေါင်း၍ အွန်လိုင်းစနစ်ဖြင့်ရောင်းချသည့် လုပ်ငန်းရှင်များအား Online Sales Registrution ပြုလုပ်နိုင်ရေး အသိပညာပေး Talk Show ကို (၃၀. ၁. ၂၀၂၅)ရက်နေ့၊ နေ့လယ် (၁၄:၀၀) နာရီအချိန်တွင် မကွေးခရိုင်ပြန်ကြားရေးနှင့်ပြည်သူ့ဆက်ဆံရေးရုံး၊ လူထုအခြေပြုဗဟိုဌာန Community Centre ခန်းမ၌ ကျင်းပပြုလုပ်ခဲ့ကြောင်း သိရသည်။

           အဆိုပါ Talk Show တွင် မကွေးခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ခရိုင်ဦးစီးမှူးမှ Talk Show ကျင်းပရခြင်း၏ ရည်ရွယ်ချက်အား ရှင်းလင်းဆွေးနွေးခဲ့ပြီး စားသုံးသူရေးရာ ဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်၏ တာဝန်များ၊ တားမြစ်ချက်များ၊ ကုန်စည်နှင့်ဝန်ဆောင်မှုအပေါ် အာမခံချက် ပေးရမည့်အချက်များနှင့် ပတ်သက်၍ မေးမြန်းဆွေးနွေးချက်များအပေါ် စားသုံးသူရေးရာဦးစီးဌာန၊ မကွေးမြို့နယ်ဦးစီးမှူးက အသေးစိတ်ပြန်လည်ရှင်းလင်းဆွေးနွေးခဲ့ကြောင်း၊ ထို့နောက် Online စနစ်ဖြင့်ရောင်းချသည့် လုပ်ငန်းရှင်များအနေဖြင့် စီးပွားရေးနှင့်ကူးသန်း ရောင်းဝယ်ရေးဝန်ကြီးဌာနမှ အမိန့်ကြော်ငြာစာအမှတ် (၅၁/၂၀၂၃) ဖြင့် Online System ဖြင့် ရောင်းချခြင်းလုပ်ငန်း မှတ်ပုံတင်ခြင်းဆိုင်ရာ အမိန့်ကိုထုတ်ပြန်ခဲ့ပြီးဖြစ်၍ မဖြစ်မနေ မှတ်ပုံတင်လျှောက်ထားရမည်ဖြစ်ကြောင်း မှတ်ပုံတင်လျှောက်ထားရန် www.Ecomreg. gov.mm သို့ ဝင်ရောက်၍ မှတ်ပုံတင်ပုံနှင့် မှတ်ပုံတင်လျှောက်ထားရန် လိုအပ်သောအချက်အလက်များအား ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

          မွန်ပြည်နယ်၊ စားသုံးသူရေးရာဦးစီးဌာန၊ သထုံခရိုင်၊ ဘီးလင်းမြို့နယ်တာဝန်ခံ ဦးစီးမှူး ဒေါ်ဇင်ဖြူဝင်းနှင့် ဝန်ထမ်းများသည် (၁.၂.၂၀၂၅) ရက်နေ့ နံနက် (၇:၂၀) နာရီတွင် ဘီးလင်းမြို့နယ်ရှိ ဆီကိုယ်စားလှယ်များထံသို့ ရန်ကုန်မြို့ရှိ Kaung Hlyan New Asia ကုမ္ပဏီမှ(ယာဉ်အမှတ် 4G-2351) မော်တော်ယာဉ်ဖြင့် စားအုန်းဆီ(၂၃)ပေပါ ရောက်ရှိလာ ခဲ့ကြောင်း သိရှိရပါသည်။

အဆိုပါ စားအုန်းဆီများကို သထုံခရိုင်၊ ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ်တာဝန်ခံနှင့် စားအုန်းဆီများအား သတ်မှတ်ရည်ညွှန်းဈေးအတိုင်း ရောင်းချခြင်း ရှိ/မရှိ ကွင်းဆင်းစစ်ဆေး‌ရေးအဖွဲ့တို့မှ သွားရောက်စစ်ဆေးခဲ့ပြီး ခွဲတမ်းရရှိသောစားအုန်းဆီများကို ရည်ညွှန်းဈေး၊ သယ်ယူပို့ဆောင်ကုန်ကျစရိတ်နှင့် ၂%အမြတ်တို့ဖြင့် ဘီးလင်းမြို့နယ်အတွင်းရှိ ရပ်ကွက်နှင့်ကျေးရွာများရှိ လက်လီ/လက်ကားဆိုင်ခွဲများသို့ ခွဲဝေရောင်းချပေးသွားမည် ဖြစ်ကြောင်းနှင့် လက်လီ/လက်ကား ဆိုင်များအနေဖြင့်လည်း စားသုံးသူပြည်သူ့များထံသို့ ၂%အမြတ်ဖြင့်ပြန်လည်ရောင်းချနေခြင်းအား သတ်မှတ်ရည်ညွှန်းဈေးအတိုင်း ရောင်းချခြင်း ရှိ/မရှိ၊ အလေးချိန် ပြည့်/မပြည့်၊ သတ်မှတ်ခွဲတမ်းများအား ပြည့်ဝစွာရောင်းချခြင်း ရှိ/မရှိ တို့ကို ကွင်းဆင်းစစ်ဆေးရေးအဖွဲ့တို့မှ သွားရောက်စစ်ဆေးခဲ့ကြောင်း သိရှိရပါသည်။

DOCA(မွန်)