သတင်းနှင့် လှုပ်ရှားမှုများ

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး လမ်းညွှန်မှု၊ ပခုက္ကူခရိုင်ဦးစီးမှူး၏ ကြီးကြပ်မှုဖြင့် (၁၁.၃.၂၀၂၅) ရက်နေ့၊ နံနက်(၁၀:၀၀)နာရီအချိန်တွင် ပခုက္ကူခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနရုံး၌ မြိုင်မြို့နယ်တာဝန်ခံသည် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြိုင်မြို့နယ်တာဝန်ခံနှင့် ပူးပေါင်း၍ မတ်လ(၁၅)ရက်နေ့တွင်ကျရောက်မည့် ကမ္ဘာ့စားသုံးသူအခွင့်အရေးများနေ့ကို ဂုဏ်ပြုသောအားဖြင့် အသိပညာပေး” Talk Show  ပွဲ ကျင်းပပြုလုပ်ခဲ့ကြောင်း သိရသည်။      

          Talk Showတွင် မြိုင်မြို့နယ်တာဝန်ခံက မြန်မာနိုင်ငံမှာ စားသုံးသူအခွင့်အရေးများကို စနစ်တကျ ဥပဒေတစ်ရပ်အနေနဲ့ ပြဌာန်းထားရှိပြီး ဥပဒေအရ အကာအကွယ်ပေးထားရှိမှုအကြောင်း၊ ၂၀၁၉ ခုနှစ်တွင် ပြဌာန်းခဲ့သည့် စားသုံးသူကာကွယ်ရေး ဥပဒေတွင် စားသုံးသူအခွင့်အရေးနှင့် တာဝန်များ၊ စားသုံးသူများမှ ကုန်စည်ဝန်ဆောင်မှု အသုံးပြုရာတွင် နစ်နာဆုံးရှုံးမှုများဖြစ်ပေါ်ပါက တိုင်ကြားမှုနှင့် ဖြေရှင်းပေးမှုများအကြောင်း၊ ကမ္ဘာ့စားသုံးသူအခွင့် အရေးများနေ့နှင့်ပတ်သက်ပြီး ဌာနမှအသိပညာပေး ကမ်ပိန်းဆောင်ရွက်မှုများအကြောင်းအား ကျယ်ကျယ်ပြန့်ပြန့်  ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မကွေး)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဆိပ်ဖြူမြို့နယ်တာဝန်ခံသည် ခရိုင်ဦးစီးမှူး၏လမ်းညွှန်မှုဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်းအမှတ်အသားများ ပြည့်စုံစွာ ထည့်သွင်းဖော်ပြထားခြင်းရှိ/မရှိ၊ စားသုံးသူများ နေ့စဉ်အသုံးပြုလျက်ရှိသော ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိစေရေး၊ ကုန်စည်များကို သတ်မှတ်စံချိန်စံညွှန်းများ၊ ညွှန်ကြား ချက်များနှင့်ကိုက်ညီမှု ရှိ/မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိကြောင်း သိရသည်။

           ဆိပ်ဖြူမြို့နယ်တာဝန်ခံသည် မြို့နယ်စည်ပင်သာယာ ရေးအဖွဲ့နှင့်ပူးပေါင်း၍ (၁၇.၃.၂၀၂၅) ရက်နေ့၊ နံနက်(၁၀:၀၀)နာရီအချိန်တွင် ဆိပ်ဖြူမြို့၊ အလယ်ပိုင်းရပ်ကွက်ရှိ ပဲကြော်လုပ်ငန်းသို့ သွားရောက်၍ ကုန်စည်များတွင် ကုန်အညွှန်းအမှတ်အသားများ ပြည့်စုံစွာထည့်သွင်း ဖော်ပြထားခြင်းရှိ/မရှိ၊ ဈေးကွက်စောင့်ကြည့်စစ်ဆေးခြင်း ဆောင်ရွက်ရာ လုပ်ငန်းရှင်မှထုတ်လုပ်သည့် ကုန်စည် (၂)မျိုး၏ ထုတ်ပိုးမှုပေါ်တွင် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်က ထုတ်ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ ကိုက်ညီမှုရှိကြောင်း စိစစ်တွေ့ရှိရပြီး ဆိပ်ဖြူမြို့နယ်တာဝန်ခံမှ စားသုံးသူကာကွယ်ရေးဥပဒေ အခန်း (၁၀)ပါ စီးပွားရေးလုပ်ငန်း ရှင်၏တာဝန်များ၊ အခန်း(၁၁)ပါ ကုန်စည်နှင့်စပ်လျဉ်း၍ အာမခံချက်ပေးခြင်းဆိုင်ရာ အချက်အလက်များအကြောင်းအား ဆွေးနွေးခဲ့ပြီး လုပ်ငန်းရှင်နှင့် အလုပ်သမားများအား စားသုံးသူကာကွယ်ရေး အသိပညာပေး လက်ကမ်းစာစောင်များအား ဖြန့်ဝေခဲ့ကြောင်း သိရှိရပါသည်။

DOCA(မကွေး)

မွန်ပြည်နယ်၊ ပေါင်မြို့နယ်ရှိ မုတ္တမကျွဲခြံကျေးရွာနှင့်အနီးဝန်းကျင်ရှိ ကျေးရွာများတွင် စာဖိုဆောင်သီးနှံဖြစ်သည့် ရုံးပတီသီးနှံအား စီးပွားဖြစ်စိုက်ပျိုးလာကြောင်း သိရသည်။

ရုံးပတီသီးနှံသည် စတင်စိုက်ပျိုးသည်မှ နှစ်လခန့်အကြာတွင် ခူးဆွတ်ရကြောင်း၊ အပင်ပု၊ အပင်လတ်၊ အပင်ရှည် (၃) မျိုးရှိရာ အပင်ရှည်သာ စိုက်ပျိုးမှုများပြီး ဈေးကွက်ရရှိ ကြောင်း၊ တစ်ဧကလျှင် မျိုးစေ့အပါ သွင်းအားစု၊ လုပ်အားခ အပြီး စုစုပေါင်း ငွေကျပ် (၁၀) သိန်းခန့်ကုန်ကျကြောင်း၊ ရုံးပတီသီးနှံအား တစ်ရက်ခြားလျှင် တစ်ကြိမ်ခူးဆွတ်ရပြီး နှစ်လအထိ ခူးဆွတ်နိုင်ကြောင်း၊ မြေအမျိုးအစား၊ သီးနှံမျိုး၊ သွင်းအားစုအပေါ်မူတည်၍ အထွက်နှုန်းနှင့် ဈေးကွက်အခြေအနေကွဲပြားမှုရှိကြောင်း၊ အဆိုပါကျေးရွာရှိ တောင်သူများမှ ခူးဆွတ်ပြီး သီးနှံများကို ပေါင်မြို့နယ်၊ မင်္ဂလာဈေးရှိ ကုန်စိမ်းဒိုင်များနှင့် မော်လမြိုင်မြို့ထိ ရောင်းချကြောင်း သိရသည်။

ရုံးပတီသီးနှံသည် ရာသီမရွေးစိုက်ပျိုးနိုင်သဖြင့် တောင်သူများအနေဖြင့် တစ်ဖက် တစ်လမ်းဝင်ငွေရရှိသည့် သီးနှံတစ်မျိုးလည်းဖြစ်ကြောင်း သိရသည်။

DOCA(မွန်)

၁၈.၃.၂၀၂၅ ရက်နေ့ (၀၈:၀၀) အချိန်တွင် မော်လမြိုင်မြို့၊ မုပွန်ရပ်ကွက်၊ နယ်မြေ (၅)၊ မုပွန်တိုးချဲ့ (၈)လမ်း၊ သံလွင်မြစ်ဘေး၌ မွန်ပြည်နယ် အစိုးရအဖွဲ့၏ ဦးဆောင်လမ်းညွှန်မှုဖြင့် မွန်ပြည်နယ်စည်ပင်သာယာရေးအဖွဲ့နှင့် မြတ်အဏ္ဏဝါမင်းဆောက်လုပ်ရေး ကုမ္ပဏီလီမိတက် တို့ပူးပေါင်းအကောင်အထည်ဖော် ဆောင်ရွက်သည့် မော်လမြိုင်မြို့၊ အဆင့်မြင့်ငါးဈေးသစ် ဖွင့်ပွဲအခမ်းအနားသို့ မွန်ပြည်နယ် ဝန်ကြီချုပ် ဦးအောင်ကြည်သိန်း၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင်ဝန်ကြီးများ၊ ပြည်နယ်ဥပဒေချုပ်၊ မွန်ပြည်နယ် စည်ပင်သာယာရေးအဖွဲ့နှင့် ပြည်နယ်/ ခရိုင်/ မြို့နယ်အဆင့်ဌာနဆိုင်ရာများ၊ ဖိတ်ကြားထား သော ဧည့်သည်တော်များအပါအဝင်စုစုပေါင်း (၂၀၀)ဦး တက်ရောက်ခဲ့ကြောင်း သိရှိရသည်။

အခမ်းအနားတွင် မွန်ရိုးရာယိမ်းအဖွဲ့မှ မွန်ရိုးရာအကနှင့် ကရင်ရိုးရာဒုံးယိမ်းအဖွဲ့မှ ကရင်ဒုံးယိမ်းအကတို့ဖြင့် ဖျော်ဖြေတင်ဆက်ခဲ့ကြပြီး မွန်ပြည်နယ်အစိုးရအဖွဲ့ဝင် သယံဇာတ ရေးရာဝန်ကြီး ဒေါက်တာ အောင်မြတ်ကျော်စိန်မှ မွန်ပြည်နယ်အစိုးရအဖွဲ့၏ ဦးဆောင်လမ်း ညွှန်မှုဖြင့် မွန်ပြည်နယ်စည်ပင်သာယာရေးအဖွဲ့နှင့် မြတ်အဏ္ဏဝါမင်း ဆောက်လုပ်ရေး ကုမ္ပဏီလိမိတတ်တို့ ပူးပေါင်းအကောင်အထည်ဖော်ဆောင်ရွက်သည့်မုပွန်ရပ်ကွက်ရှိ စုစု​ပေါင်း စီမံကိန်းဧရိယာ (၁၀.၇၅၈)ဧက အနက် စီမံကိန်းအပိုင်း(၁)အဖြစ် ဧရိယာ (၄.၀၆)ဧက၌ (၂၄x၃၀x၁၄)ပေရှိ ငါးဈေးဆိုင်ခန်း (၆၀)ခန်း၊ (၁၂x၁၅x၁၂) ပေရှိ ကြက်ဈေးဆိုင်ခန်း (၈)ခန်း အပါအဝင် အဆင့်မြင့်ငါးဈေးသစ် တည်ဆောက်ခြင်းနှင့် ပတ်သက်၍ ရှင်းလင်းတင်ပြခဲ့ ကြောင်း၊ ယင်းနောက် မြတ်အဏ္ဏဝါမင်း ဆောက်လုပ်ရေး ကုမ္ပဏီလီမိတက်မှ မန်နေဂျင်း ဒါရိုက်တာ ဦးအောင်အောင်က လုပ်ငန်းဆိုင်ရာစာရင်းနှင့်အချက်အလက်များအား မွန်ပြည်နယ် စည်ပင်သာယာရေးအဖွဲ့မှ ညွှန်ကြားရေးမှူး ဦးတင်ကိုကိုထံ လွှဲပြောင်းပေးအပ်ခဲ့ပြီး မွန်ပြည်နယ်အစိုးရအဖွဲ့ ပြည်နယ်ဝန်ကြီးချုပ် ဦးအောင်ကြည်သိန်းက ဘင်ခရာ၊ ပန်းပွားနှင့် တိုင်းရင်းသားအကအဖွဲ့များအား ဂုဏ်ပြုချီးမြှင့်ငွေပေးအပ်ခဲ့ကြောင်း၊ ယင်းနောက် ပြည်နယ် ဝန်ကြီးချုပ်၊ ပြည်နယ်တရားလွှတ်တော် တရားသူကြီးချုပ်နှင့် ပြည်နယ်အစိုးရအဖွဲ့ဝင်များက မော်လမြိုင်မြို့၊ အဆင့်မြင့်ငါးဈေးသစ်ကို ဖဲကြိုးဖြတ်ဖွင့်လှစ်ပေးခဲ့ပြီး အမှတ်တရ မှတ်တမ်း တင်ဓါတ်ပုံရိုက်ကူးကာ အဆင့်မြင့်ငါးဈေးသစ်အတွင်းသို့ လှည့်လည်ကြည့်ရှုခဲ့ကြောင်း သိရှိရပါသည်။

DOCA(မွန်)

၁၉.၃.၂၀၂၅ ရက်နေ့တွင် ဘီးလင်းမြို့နယ်၊ စားသုံးသူရေးရာဦးစီးဌာန၊ မြို့နယ် တာဝန်ခံ ဒေါ်ဇင်ဖြူဝင်းသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်မီးသတ် ဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ဘီးလင်းမြို့၊ ဘိုးလှကြီး ရပ်ကွက်ရှိ Moon Teen (သောက်ရေသန့်စက်ရုံ) သို့သွားရောက်၍ ဈေးကွက်စောင့်ကြည့် စစ်ဆေးခဲ့ကြောင်း သိရသည်။

ထိုသို့ ဈေးကွက်စောင့်ကြည့်စစ်ဆေးရာ စားသုံးသူရေးရာဦးစီးဌာန၊ မြို့နယ်တာဝန်ခံ မှ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ် (၂/၂၀၁၉) ပါ ကုန်စည်အုပ်စုအလိုက် ပါဝင်ရမည့် အခြေခံအချက်များအရ သောက်ရေသန့်ကုန်စည်တွင် ပါဝင်ဖော်ပြရမည့်အချက်များကို ရှင်းလင်းဆွေးနွေးပြီး ဈေးကွက်မရောက်မီ ကုန်စည်များအား ဘေးအန္တရာယ်ကင်းစေရေး အသိပညာပေးပြီးနောက် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်မီးသတ်ဦးစီး ဌာန၊ မြို့နယ်စည်ပင်သာယာရေးအဖွဲ့တို့မှ ဌာနဆိုင်ရာလုပ်ထုံး/လုပ်နည်း၊ စည်းမျဉ်း/ စည်းကမ်းတို့အား လိုက်နာဆောင်ရွက်သွားရန် ရှင်းလင်းဆွေးနွေးခဲ့ကြောင်း သိရှိရပါသည်။

DOCA(မွန်)