သတင်းနှင့် လှုပ်ရှားမှုများ

         စားသုံးသူရေးရာဦးစီးဌာန၊ စစ်ကိုင်းမြို့နယ်တာဝန်ခံသည် စစ်ကိုင်းတိုင်းဒေသကြီး၊ အစားအသောက်နှင့် ဆေးဝါးကွပ်ကဲရေးဦးစီးဌာနမှဦးဆောင်၍ ခရိုင်ပြည်သူ့ကျန်းမာရေးဦးစီးဌာန၊ ခရိုင်/ မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍  ၂၀၂၆ခုနှစ်၊ ဇွန်လ ၁၁ရက်နေ့ နံနက် (၀၈း၀၀)နာရီအချိန်တွင် စစ်ကိုင်းမြို့၊ မြို့မဈေးအတွင်းရှိ  ရောင်းချလျက်ရှိသော စားသောက်ကုန်နှင့်အလှကုန်ပစ္စည်း အရောင်းဆိုင်(၁၀) ဆိုင်အား ကွင်းဆင်းစစ်ဆေးခဲ့ကြောင်း သိရှိရပါသည်။

           ထိုသို့ စစ်ဆေးရာတွင်  ရောင်းချလျက်ရှိသော လက်ဖက်၊ ခေါက်ဆွဲ၊ ကြာဇံ၊ ကြက်အူချောင်း၊ ဝက်အူချောင်း စားသောက်ကုန်များတွင် ခွင့်မပြုဓာတုဆိုးဆေး၊ တာရှည်ခံပစ္စည်း (Formalin) အသုံးပြုထားခြင်း ရှိ/မရှိ နမူနာကောက်ယူပြီး စစ်ဆေးခဲ့ရာ အဆိုပါ စားသောက်ကုန်ပစ္စည်းများသည် ခွင့်မပြုဓာတုဆိုးဆေး၊ တာရှည်ခံပစ္စည်း (Formalin) အသုံးပြုထားခြင်းမရှိကြောင်း စစ်ဆေးတွေ့ရှိရသည်။ စစ်ဆေးရေးအဖွဲ့မှ တာဝန်ရှိသူမျာက ကုန်အညွှန်းအမှတ်အသား၊ ပြည့်စုံစွာဖော်ပြထားသော ကုန်စည်များ ရွေးချယ်ဝယ်ယူရောင်းချရန်၊ ဓါတုဆိုးဆေးလွန်ကဲစွာ အသုံးပြု ထားသော ကုန်ပစ္စည်းများ၊ သက်တမ်းလွန်ကုန်ပစ္စည်းများ၊ အန္တရာယ်ရှိသော အရည်အသွေးနိမ့်ကုန်စ္စည်းများ ဝယ်ယူရောင်းချခြင်းမပြုရေး သတိထားဆောင်ရွက်ကြရန်  အသိပညာပေးဆွေးနွေးခဲ့ကြောင်း သိရှိရပါသည်။

DOCA(စစ်ကိုင်း)

         စားသုံးသူရေးရာဦးစီးဌာန စစ်ကိုင်းတိုင်းဒေသကြီး ကန့်ဘလူခရိုင် ကန့်ဘလူမြို့နယ်တာဝန် ခံဦးမျိုးဝင်းသန်းသည် ၂၀၂၆ ခုနှစ်၊ ဇွန်လ ၁၁ ရက် မွန်းလွဲပိုင်းအချိန်တွင် ကန့်ဘလူမြို့နယ်ဆီ ကိုယ်စားလှယ်မှ အမှတ်(၁)ရပ်ကွက်ရှိ၊ စားသုံးသူပြည်သူများအား စားအုန်းဆီလက်လီ ရောင်းချပေးနေမှုအား ကွင်းဆင်းစစ်ဆေးခဲ့ကြောင်း သိရှိရပါသည်။

              မြို့နယ်တာဝန်ခံမှ စားအုန်းဆီ လက်လီအရောင်းဆိုင်များအား  ကွင်းဆင်းစစ်ဆေးရာတွင် အချိန်အတွယ်မှန်ကန်မှုရှိ/ မရှိ၊ ရည်ညွှန်းဈေးနှုန်းဖြင့် ရောင်းချခြင်းရှိ/ မရှိနှင့် စားအုန်းဆီအရည် အသွေးတို့အား စစ်ဆေးခဲ့ကြောင်း၊ ကန့်ဘလူမြို့နယ် ဆီကိုယ်စားလှယ်က ခွဲတမ်းရရှိလာသော စားအုန်းဆီများကို ရည်ညွှန်းဈေး၊ သယ်ယူပို့ဆောင်ခ ကုန်ကျစရိတ်နှင့် ၂%အမြတ်တို့ဖြင့် လက်လီအရောင်းဆိုင်များမှတဆင့်  စားသုံးသူပြည်သူတစ်ဦးလျှင် (၁)ပိဿာနှုန်းဖြင့် ရောင်းချပေးခဲ့ကြောင်း စားအုန်းဆီလက်လီရောင်းချသည့် လုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)

          ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်ဈေးကွက်အတွင်းရှိ ဈေးဆိုင်များတွင် ဆရာဝန်ညွှန်ကြားချက်မလိုသော အိမ်သုံးဆေးဝါးသောက်ဆေးအမျိုုးမျိုးတို့အား ကုန်အညွှန်းအမှတ်အသား ပြည့်စုံစွာဖော်ပြပါရှိခြင်းရှိ/ မရှိကို ဇွန်လ (၁၁)ရက်နေ့၊ နံနက်(၀၉:၃၀)နာရီ အချိန်တွင် မြို့နယ်စည်ပင်သာယာမြို့မဈေးကြီးအတွင်း/ အပြင်ရှိ ဈေးဆိုင်များသို့ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရသည်။

          ထိုသို့ ကွင်းဆင်းစစ်ဆေးခဲ့ရာတွင် မြို့နယ်စားသုံးသူရေးရာဦးစီးဌာနမှ မြို့နယ်တာဝန်ခံနှင့် ဝန်ထမ်းများ၊ မြို့နယ်ကျန်းမာရေးဦးစီးဌာနမှ တာဝန်ရှိသူများ၊ မြို့နယ်စည်ပင်သာယာရေးအဖွဲ့မှ မြို့မဈေးတာဝန်ခံနှင့်ဝန်ထမ်းများ ပူးပေါင်းအဖွဲ့ဖြင့် ကော့မှူးမြို့နယ်စည်ပင်သာယာမြို့မဈေး ကြီးအတွင်း/ အပြင်ရှိ ဆေးဆိုင်များတွင် ဖြန့်ဖြူးရောင်းချလျက်ရှိသော ဆရာဝန်ညွှန်ကြားချက်မလိုသော အိမ်သုံးဆေးဝါးသောက်ဆေးအမျိုးမျိုးတို့တွင် သက်ဆိုင်ရာဌာနများမှ သတ်မှတ်ထားသော ကုန်အညွှန်းအမှတ်အသားများဖြစ်သော အစားအသောက်နှင့် ဆေးဝါးကွပ်ကဲရေးဦးစီးဌာန၏ ထောက်ခံချက်၊ တိုင်းရင်းဆေးဝါးမှတ်ပုံတင်အမှတ်၊ စားသုံးသူရေးရာဦးစီးဌာနမှ ကုန်စည်အမျိုးအစားအလိုက် သတ်မှတ်ထားသော ကုန်အညွှန်းအမှတ်အသားဖော်ပြချက်များ ပြည့်စုံစွာဖော်ပြပါရှိခြင်းရှိ/ မရှိ ဈေးကွက်အတွင်း ကွင်းဆင်းစစ်ဆေးခဲ့ပြီး ဆိုင်ပိုင်ရှင်စီးပွားရေးလုပ်ငန်းရှင်များအနေဖြင့်လည်း သက်ဆိုင်ရာ အစိုးရဌာနများမှ သတ်မှတ်ထားသော အထောက်အထားမှတ် ပုံတင်အမှတ်၊ ခွင့်ပြုချက်များနှင့် ကုန်အညွှန်းအမှတ်အသားပြည့်စုံစွာဖော်ပြပါရှိသော ကုန်ပစ္စည်းများကိုသာ ဝယ်ယူဖြန့်ဖြူးရောင်းချပေးကြရန် စားသုံးသူကာကွယ်ရေး အသိပညာပေးဆွေးနွေး ပြောကြားခဲ့ကြောင်း သိရှိရပါသည်။

DOCA(ရန်ကုန်)

        စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးမှ ဒေါ်သစ္စာဖူး( ဦးစီးအရာရှိ ) ဦးဆောင်၍  ၂၀၂၆ ခုနှစ်၊ ဇွန်လ( ၁၅ ) ရက်၊  နေ့လယ် ( ၁၃:၀၀ )နာရီ အချိန်တွင် လွိုင်ကော်မြို့၊ နမ့်ဘော်ဝမ်ရပ်ကွက်ရှိ  ကိတ်မုန့်၊ ပေါင်မုန့်များ ထုတ်လုပ် ဖြန့်ဖြူးရောင်းချနေသော အမှတ်တရ၊ Diamond၊ ရွှေလင်းယုန်၊ ဆန်းသစ် မုန့်ဖိုများနှင့် သောက်ရေသန့်ထုတ်လုပ်ဖြန့်ဖြူးရောင်းချနေသော  LK Fresh သောက်ရေသန့်စက်ရုံသို့ ဈေးကွက်မရောက်မီ ကုန်အညွှန်းအမှတ်အသားသတ်မှတ် ချက်များနှင့် ပတ်သက်၍ သက်ဆိုင်ရာမိတ်ဖက်ဌာနများနှင့် ပူးပေါင်းပြီး ကွင်းဆင်းစစ်ဆေးရာတွင် “အမှတ်တရ” မုန့်ဖို၌ ထုတ်လုပ်ဖြန့်ဖြူးရောင်းချသည့် မုန့်များတွင် ဖော်ပြထားသော ကုန်အမှတ်တံဆိပ်သည် မြန်မာနိုင်ငံစားသုံးသူကာကွယ်ရေး ကော်မရှင်၏( ၂/၂၀၁၉ )ပါ ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုရှိကြောင်း စစ်ဆေးတွေ့ရှိရပြီး Diamond၊ ရွှေလင်းယုန်၊ ဆန်းသစ် မုန့်ဖိုများနှင့် LK Fresh သောက်ရေသန့်စက်ရုံသို့ ကွင်းဆင်းစစ်ဆေးရာတွင် မုန့်ဖိုများနှင့် သောက်ရေသန့်စက်ရုံမှ ထုတ်လုပ်ဖြန့်ဖြူးရောင်းချသည့် ကုန်စည်များတွင် ဖော်ပြထား သော ကုန်အမှတ်တံဆိပ်သည် မြန်မာနိုင်ငံစားသုံးသူကာကွယ်ရေးကော်မရှင်၏( ၂/၂၀၁၉ )ပါ ကုန်အညွှန်းအမှတ်အသားသတ်မှတ်ချက်များနှင့် ကိုက်ညီမှုမရှိကြောင်း စစ်ဆေးတွေ့ရှိရ၍ ပြန်လည် ပြင်ဆင်ဖြည့်စွက်ပြီးသော ကုန်အညွှန်းအမှတ်အသားဖော်ပြချက်များအား စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးသို့ အမြန်ဆုံး ပြန်လည်တင်ပြသွားရန်နှင့် စီးပွားရေးလုပ်ကိုင်ရာတွင် စီးပွားရေးကျင့်ဝတ်၊  စည်းကမ်းများနှင့်အညီ ဖြောင့်မတ်မှန်ကန်စွာဆောင်ရွက်ကြရန် အသိပညာပေး ဈေးကွက်စောင့်ကြည့် စစ်ဆေးဆောင်ရွက်ခဲ့မှုအား သတင်းရရှိပါသည်။

DOCA(ကယား)

          စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ ဦးတင်စိုးနိုင် (စစ်ဆေးရေးအရာရှိ) နှင့် ဝန်ထမ်းတို့သည် (၁၅.၆.၂၀၂၆)ရက်နေ့ ၊ နံနက်(၁၀:၃၀)နာရီ အချိန်တွင် ဥတ္တရသီရိမြို့နယ်၊  အခြေခံပညာအထက်တန်းကျောင်း (မင်းကုန်း) တွင်  စားသုံးသူကာကွယ်ရေး အသိပညာပေးဟောပြောဆွေးနွေးပွဲများ ပြုလုပ်ခဲ့ရာ ကျောင်းသား၊ ကျောင်းသူများနှင့် ဆရာ၊ ဆရာမများ စုစုပေါင်း (၆၈)ဦး တက်ရောက်ခဲ့ကြပါသည်။

            စားသုံးသူကာကွယ်ရေးအကြောင်း အသိပညာပေးရာတွင် စားသုံးသူကာကွယ်ရေးဥပဒေစတင် အာဏာတည်သည့်နေ့၊ စားသုံးသူအဓိပွါယ်၊ စားသုံးသူတာဝန်များ၊ စားသုံးသူအခွင့်အရေး(၈) ချက်၊ နေစဉ်စားသောက်နေသော အစားအသောက်များတွင် ကုန်အညွှန်းအမှတ်အသားများ ပြည့်စုံမှုရှိသော စားသောက်ကုန်များအား ရွေးချယ်စားသောက်ရန်၊ ဆေးဝါးများဝယ်ယူရာတွင် စပ်ဆေးများမသုံး စွဲရန်နှင့် ဆရာဝန်ညွှန် ကြားသောဆေးဝါးများအား ဝယ်ယူသောက်သုံးစေရန်၊ အလှကုန်များသုံးစွဲရာ တွင်လည်း တစ်ခြားသူများသုံးစွဲသောအလှကုန်များအား စမ်းသပ်သုံးစွဲခြင်းမပြုစေရန်၊ တစ်ကိုယ် ရည်သန့်ရှင်းရေးအား အထူးဂရုပြုရန် ကျောင်းသား/ကျောင်းသူ များအား အသိပညာပေးဆွေးနွေးခဲ့ကြောင်း သိရှိရပါသည်။

DOCA(ပြည်ထောင်စုနယ်မြေ)