သတင်းနှင့် လှုပ်ရှားမှုများ

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ မင်းဘူးခရိုင်တာဝန်ခံရုံး၌ ခရိုင်တာဝန်ခံ၏ လမ်းညွန်ချက်အရ (၁၂.၅.၂၀၂၆)ရက်နေ့၊ နေ့လယ်(၁၄:၀၀)နာရီတွင် ဒေါ်ဌေးဌေးဝင်း(ဒု-ဦးစီးမှူး)နှင့် ဝန်ထမ်းများသည် ရွှေလမင်းမြေပဲဆားလှော်လုပ်ငန်းရှင်အား ကုန်အညွှန်းအမှတ်အသားပြည့်စုံစွာ ပါဝင် နိုင်ရေးခေါ်ယူတွေ့ဆုံ ဆွေးနွေးခဲ့ပါသည်။

          ထိုသို့ ဆွေးနွေးရာတွင် စားသုံးသူကာကွယ်ရေးဥပဒေအား ၂၀၁၉ ခုနှစ်၊ မတ်လ(၁၅)ရက်နေ့တွင် စတင်ထုတ်ဝေခဲ့ပြီး အခန်း(၂၅)ခန်း၊ ပုဒ်မပေါင်း(၈၄)ခုအား ပြဌာန်းခဲ့ပြီးဖြစ်ပါသည်။ စားသုံးသူကာကွယ် ရေးဥပဒေ အခန်း(၁၈)၊ ပုဒ်မ(၄၁)အရ ကုန်စည်အမျိုးအစားပေါ်တွင် ကုန်အညွှန်းအမှတ်အသားဖော်ပြ ခြင်းနှင့် စပ်လျဉ်၍ ကုန်စည်အမျိုးအစားအလိုက် ထည့်သွင်းရမည့် အချက်များအား တစ်ခုခြင်း အလိုက် ဆွေးနွေးခြင်း၊ ပုဒ်မ(၄၁) အပိုဒ်ခွဲ (ခ)နှင့်(ဆ)တို့တွင် ပါဝင်သည့် အချက်များအား မြန်မာဘာသာ ဖြင့်ဖြစ်စေ အခြားဘာသာတစ်ခုခုဖြင့် တွဲလျက်ဖြစ်စေ သိသာထင်ရှားစွာဖော်ပြရမည်ဟု ပုဒ်မ(၄၃)တွင် ဖော်ပြထားပါကြောင်း၊ မြန်မာနိုင်ငံစားသုံးသူ ကာကွယ်ရေးကော်မရှင်မှလည်း ကုန်စည်အမျိုးအစား (၈)မျိုးအား ထည့်သွင်းဖော်ပြရမည့် အချက်များကို (၂/၂၀၁၉)ဖြင့် ပြဌာန်းခဲ့ပါကြောင်း ဆွေးနွေးပြော ကြားခဲ့ကြောင်း သိရှိရပါသည်။

DOCA(မကွေး)

             ပဲခူးတိုင်းဒေသကြီး၊ နတ်တလင်းခရိုင်၊ ဇီးကုန်းမြို့နယ်အတွင်းရှိ ဌာနဆိုင်ရာများအား (၁၁.၅.၂၀၂၆)နေ့  နံနက် (၁၀)နာရီတွင် မြို့နယ်ထွေအုပ်ခန်းမ၌ စားသုံးသူရေးရာဦးစီးဌာန မြို့နယ်တာဝန်ခံ ဒေါ်မြင့်မြင့်ခင် (ဦးစီးမှုး)မှ စားသုံးသူကာကွယ်ပေးရေးဆိုင်ရာအသိပညာပေး ဟောပြောခဲ့ပါသည်။

        အဆိုပါဟောပြောပွဲတွင် မြို့နယ်စိုက်ကြပ် အဖွဲ့ဝင်များဖြစ်သည့် အထွေထွေအုပ်ချုပ် ရေးဦးစီးဌာန၊ မြို့နယ်ရဲတပ်ဖွဲ့မှူးရုံး ၊ မြေစာရင်းဦးစီးဌာန ၊စိုက်ပျိုးရေး ဦးစီးဌာန၊ မြန်မာလယ်ယာဖွံ့ဖြိုးရေးဘဏ်၊ မွေးမြူရေးနှင့် ကုသရေးဦးစီးဌာန၊ သမဝါယမဦးစီးဌာန၊ မြန်းမာ့စီးပွားရေးဘဏ်၊ မြို့နယ်ဥပဒေရုံး များမှဝန်ထမ်း ၁၅ဦးအား မြို့နယ်တာဝန်ခံမှ ထုတ်ကုန်များ၏ ကုန်ညွှန်းအမှတ်အသားများ သတင်းအချက်အလက်များအ ရေးကြီးပုံနှင့် ဦးစားပေးကုန်စည်များအလိုက် စျေးကွက်စောင့်ကြည့်စစ်ဆေးပြီး ဘေးအန္တရာယ် ရှိသည်ဟု ထင်မြင်ယူဆရသည့် ကုန်အညွှန်းပြည့်စုံစွာဖော်ပြမှု့မပါရှိသော လူသုံးကုန်၊ သားသောက်ကုန်များ စျေးကွက်မှပပျောက်စေရန် ဆောင်ရွက်ပေးမှု့အပေါ် ဌာနဆိုင်ရာများလည်း သိရှိလိုက်နာ သတိပြုနိုင်ရေး၊ CICC နှင့်စပ်လျဥ်း၍ စားသုံးသူအခွင့်အရေးများအပေါ် သိရှိ တောင်းဆို တိုင်ကြားနိုင်မှု့နှင့် ဝန်ဆောင်မှု့ပေးခြင်း၊ Online ရောင်းဝယ်မှု့ဆိုင်ရာ မှတ်ပုံတင်ထားရှိမှု့များ ရောင်းမှားဝယ်မှား မဖြစ်စေရန် သတိပြုသိရှိစေရေး အသိပညာပေးဟောပြော၍ လက်ကမ်း စာစောင်များဖြန့်ဝေခဲ့ကြောင်းသိရပါသည်။

DOCA(ပဲခူး)

              ပဲခူးတိုင်းဒေသကြီး၊ နတ်တလင်းခရိုင် ၊ သဲကုန်းမြို့နယ်၊ စာသုံးသူရေးရာဦးစီးဌာန မြို့နယ်တာဝန်ခံ ဒုတိယဦးစီးမှူး ဦးထင်ဇော်ထွန်းနှင့် ဝန်ထမ်းများသည် ၁၁-၅-၂၀၂၆ နေ့ နံနက် (၁၀:၀၀) အချိန်တွင် သဲကုန်းမြို့နယ် အတွင်းရှိကုန်စုံဆိုင်များတွင် ရောင်းချလျှက်ရှိသော  သောက်ရေသန့် အမျိုးမျိုးတို့  အားမြေပြင်ကွင်းဆင်းစစ်ဆေးခြင်းပြုလုပ်ခဲ့ပါသည်။

           ထိုသို့ ကွင်းဆင်းစစ်ဆေးရာတွင် မြို့နယ်တာဝန်ခံ ဦးထင်ဇော်ထွန်းက စားသုံးသူများနေ့စဉ်   အသုံးးပြုလျှက်ရှိသော  ကုန်စည်နှင့် ဝန်ဆောင်မှုများကို ဘေးအန္တရာယ် ကင်းရှင်းစွာ အသုံးပြုလျှက်ရှိ  သော ကုန်စည်နှင့် ဝန်ဆောင်မှုများကို ဘေးအန္တရာယ်ကင်းရှင်းစွာ အသုံးပြုနိုင်စေရန် ရည်ရွယ်၍ ဈေးကွက် အတွင်းရောင်းချနေသည့် သောက်ရေသန့် အမျိုးအမျိုးတို့တွင် ကုန်အညွှန်းအမှတ်အသား များကို (၂/၂၀၁၉) နှင့် အညီမြန်မာဘာသာဖြင့် ပြည့်စုံစွာဖော်ပြထားခြင်း ရှိ/မရှိ၊ သက်တမ်းလွန် ကုန်စည်များကို ရောင်းချခြင်းမပြုရန် အသိပညာပေးဟောပြောခဲ့ပြီး ကုန်အညွှန်းအမှတ်အသား     ပြည့်စုံမှန်ကန်မှုရှိစေရေး၊ အသားတင် အလေးချိန်တို့ကိုပါ မြေပြင်ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(ပဲခူး)

            ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့ စည်ပင်သာယာမြို့မဈေးအတွင်း နယ်အတွင်း အစိုးရအခွန်တံဆိပ် အတု အသုံးပြု၍ တရားဝင်မှတ်ပုံတင်ထားခြင်းမရှိသော စီကရက်များ ဖြန့်ဖြူးရောင်းချခြင်း ရှိ/မရှိ ဈေးကွက်စောင့်ကြည့်စစ်ဆေးရန် မြို့နယ်စားသုံးသူရေးရာ ဦးစီး ဌာနမှ မြို့နယ်တာဝန်ခံနှင့် ဌာနဆိုင်ရာတာဝန်ရှိသူများ ပူးပေါင်း၍  ၂၀၂၆ခုနှစ်၊ မေလ ၁၅ရက်နေ့ နံနက် (၉:၃၀) နာရီအချိန်တွင် ကွင်းဆင်းစစ်ဆေးခြင်းပြုလုပ်ခဲ့ပါသည်။

       အစိုးရအခွန်တံဆိပ်အတု အသုံးပြု၍ တရားမဝင်မှတ်ပုံတင်ထားခြင်း မရှိသော Mevius Original Blue အမှတ်တံဆိပ်ဆေးလိပ်များ ရောင်းချခြင်းမရှိစေရေးအတွက် မြို့နယ်အထွေထွေအုပ်ချုပ်ရေးဦးစီးဌာန၊ ဒုတိယဦးစီးမှူး ဦးသန်းထိုက်နှင့်ဝန်ထမ်းများ၊ မြို့နယ်စားသုံးသူရေးရာဦးစီးဌာနမှ မြို့နယ်တာဝန် ခံဒေါ်ရီရီရှိန်နှင့် မြို့မရဲစခန်းမှူး၊ ကျန်းမာရေးဦးစီးဌာန၊ အခွန်ဦးစီးဌာန၊ စည်ပင် သာယာရေးအဖွဲ့၊ အမှုဆောင်အရာရှိနှင့် အဖွဲ့တို့က မြို့နယ်အတွင်း ဆေးလိပ်များ ဖြန့်ဖြူးရောင်းချ လျက်ရှိသော ဈေးဆိုင်များသို့ ကွင်းဆင်း၍ အသိပညာပေးစစ်ဆေးခြင်းများ ပြုလုပ်ပြီး လက်ကမ်း စာစောင်များဖြန့်ဝေခဲ့ပါသည်။

DOCA(ပဲခူး)

           စစ်ကိုင်းတိုင်းဒေသကြီးနှင့်မန္တလေးတိုင်းဒေသကြီးတို့ ပူးပေါင်း၍  ဝန်ထမ်းစွမ်းဆောင်ရည်မြှင့်တင်ရေး အထောက်အကူပြု  Thursday talk အခမ်း အနားကို  ၂၀၂၆ခုနှစ်၊  မေလ (၂၁) ရက်နေ့၊ နံနက် (၁၀:၃၀)နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး၊ အစည်းအဝေးခန်းမ၌ ကျင်းပခဲ့ရာ  စစ်ကိုင်းတိုင်းဒေသကြီးမှ အရာထမ်း၊ အမှုထမ်း (၄၂)ဦး၊ မန္တလေးတိုင်းဒေသကြီးမှ အရာထမ်း၊ အမှုထမ်း ( ၆၀)ဦး၊ စုစုပေါင်း (၁၀၂) ဦးတက်ရောက်ခဲ့ကြောင်း သိရသည်။

      ရှေးဦးစွာ မန္တလေးတိုင်းဒေသကြီးဦးစီးမှူးက အဖွင့်အမှာစကားပြောကြားခဲ့ရာ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့ ပူးပေါင်း၍ Online ဖြင့် Thursday talk  ဆွေးနွေးပွဲ ဆောင်ရွက်သည်မှာ (၄)ကြိမ်ရှိပြီဖြစ်ပါကြောင်း၊  ပူးပေါင်းညှိနှိုင်းမှုသည် အရေးပါသော အခန်းကဏ္ဍတစ်ခုဖြစ်သည့်အတွက်  ဆွေးနွေးပွဲများမှတစ်ဆင့် တိုင်းတစ်တိုင်နှင့် တစ်တိုင်းကြား ပူးပေါင်းဆောင်ရွက်မှုများ ပိုမိုခိုင်မာလာခြင်းသည် နမူနာစံပြတစ်ရပ်အဖြစ်ကြောင်း၊ သတ်မှတ်နိုင်ပါကြောင်း ပြောကြားခဲ့ပါသည်။

            မန္တလေးတိုင်းဒေသကြီးမှ  ဦးမျိုးထွန်း ဦးစီးအရာရှိက    စားသုံးသူကာကွယ်ရေးဥပဒေပါ စစ်ဆေးရေးအရာရှိ၏ တာဝန်၊ နည်းဥပဒေများပါ အခန်းကဏ္ဍနှင့် အသုံးပြုရမည့် ပုံစံများအကြောင်းကို Power point ဖြင့် အသေးစိတ်ရှင်းလင်းဆွေးနွေးခဲ့ပြီး စစ်ကိုင်းတိုင်းဒေသကြီး၊ ကလေးခရိုင်ဦးစီးမှူးရုံးမှ ဒေါ်သန်းသန်းဝင်း ဦးစီးအရာရှိက   ချင်းရိုးရာအသစ်အဆန်းဘိုးဘွား အမွေလက်ယက္ကန်းအကြောင်းတို့ကို  Power point ဖြင့် အသေးစိတ်ရှင်းလင်းဆွေးနွေးခဲ့ပြီး စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့မှ တက်ရောက်လာသူများကလည်း သိရှိလိုသည်များကို အပြန်အလှန်မေးမြန်းခဲ့ကြောင်း သိရသည်။

         ဆက်လက်၍   စစ်ကိုင်းတိုင်းဒေသကြီး၊ ဒုတိယတိုင်းဒေသကြီးဦးစီးမှူးနှင့် မန္တလေးတိုင်းဒေသ ကြီးဦးစီးမှူးတို့က နိဂုံးချုပ်အမှာစကားပြောကြားရာတွင်   ယခုလို ဆွေးနွေးမှုများမှတစ်ဆင့် တိုင်းတစ်တိုင်း၏ အောင်မြင်မှုအတွေ့အကြုံများကို တစ်တိုင်းနှင့် တစ်တိုင်းသင်ယူနိုင်ပြီး Thursday talk   ပူးပေါင်းဆောင်ရွက်ခြင်းသည် မိတ်ဖက်ဆက်ဆံရေးကို တိုးတက်စေသည့်အပြင် စားသုံးသူရေးရာဦးစီးဌာန၏ ပင်မလုပ်ငန်းများ၊ ပြည်တွင်းကုန်သွယ်မှု ဖွံ့ဖြိုးရေးလုပ်ငန်းများကိုလည်း   ပို၍ ဆောင်ရွက်လာနိုင်ပြီး  ဖွံ့ဖြိုးတိုးတက်ရေးအတွက် အရေးပါသောနမူနာစံပြတစ်ရပ်ဖြစ်ကြောင်း၊ နောင်တွင်လည်း ဆက်လက်ဆောင်ရွက်သွားမည်ဖြစ်ပါကြောင်း ပြောကြားပြီး အခမ်းအနားကို မွန်းလွှဲ (၁၂း၀၀)နာရီအချိန်တွင် အောင်မြင်စွာ ရုတ်သိမ်းခဲ့ကြောင်း သိရှိရပါသည်။

DOCA(စစ်ကိုင်း)