သတင်းနှင့် လှုပ်ရှားမှုများ

     မြိတ်ခရိုင်စားသုံးသူရေးရာဦးစီးဌာနမှ ဦးဆောင်မှုဖြင့် ခရိုင်ပြည်သူ့ကျန်းမာရေးဦးစီးဌာန၊ ခရိုင်စိုက်ပျိုးရေးဦးစီးဌာန၊ ခရိုင်စည်ပင်သာယာရေးစသောမိတ်ဖက်ဌာနများဖြင့် ၂၀၂၆ခုနှစ်၊ ဧပြီလ (၂၁)ရက်နေ့တွင် မြိတ်မြို့၊ သာကေတရပ်ရှိ Market Garden ကုန်တိုက်တွင်ရောင်းချနေသော စည်သွပ်အစားအစာများအား ကုန်အညွှန်းအမှတ်အသားပါရှိစေရေး စျေးကွက်စောင့်ကြည့် စစ်ဆေး ခဲ့ကြကြောင်း သိရှိရပါသည်။

    စျေးကွက်စောင့်ကြည့်စစ်ဆေးရာတွင် Market Garden ကုန်တိုက်တွင် ရောင်းချနေသော စည်သွပ်အစားအစာများအား ဘေးအန္တရာယ်ကင်းရှင်းစေရန် မြန်မာဘာသာဖြင့် ကုန်အညွှန်းအမှတ် အသားဖော်ပြရမည့်အကြောင်း၊ ကုန်အညွှန်းအမှတ်အသားနှင့်ပတ်သက်၍ ဖော်ပြရမည့်အချက်များ အားရှင်းလင်းပြောကြားခဲ့ပြီး လက်ကမ်းစာစောင်များဖြန့်ဝေပေးခဲ့ကြောင်း သိရှိရပါသည်။

DOCA(တနင်္သာရီ)

     ၂၀၂၆ခုနှစ်၊ ဧပြီလ ၂၃ ရက်နေ့၊ နံနက် ၁၀:၀၀ နာရီအချိန်၌ စားသုံးသူရေးရာဦးစီးဌာန၊ ပြည်ထောင်စုနယ်မြေ၊ နေပြည်တော်ဦးစီးမှူးရုံးမှ ဦးနိုင်မိုးကို(လ/ထ ညွှန်ကြားရေးမှူး) နှင့်ဝန်ထမ်း (၃) ဦးတို့သည် အထွေထွေအုပ်ချုပ်ရေးဦးစီးဌာန၊ စည်ပင်သာယာ (ဈေးများဌာန) တို့နှင့်ပူးပေါင်း၍ တပ်ကုန်းမြို့နယ်အတွင်းရှိ  မြို့မဈေးတွင်  စားသုံးသူများ နေ့စဉ်အသုံးပြုလျက်ရှိသော ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရရှိစေရေးအတွက် ဈေးကွက်စောင့်ကြည့်စစ်ဆေးခြင်းလုပ်ငန်းများ ဆောင်ရွက်ခဲ့ပါသည်။

      ကွင်းဆင်းစစ်ဆေးရာ၌ ဈေးကွက်အတွင်းရောင်းချနေသောကုန်စည်နှင့်ဝန်ဆောင်မှုများတွင် စားသုံးသူမိဘပြည်သူများ ဘေးအန္တရာယ်ကင်းရှင်းစေရန်အတွက်   မြန်မာနိုင်ငံစားသုံးသူကာကွယ်ရေး ကော်မရှင်မှ ထုတ်ပြန်ကြော်ငြာထားသော ညွှန်ကြားချက်အမှတ် (၂/၂၀၁၉) နှင့်အညီ  မြန်မာဘာသာ ဖြင့် ပြည်စုံစွာဖော်ပြထားသော ကုန်စည်များကိုသာရောင်းချရန်နှင့်  စီးပွားရေးလုပ်ငန်းရှင်များအနေ ဖြင့် ထုတ်ပြန်ကြေညာထားသောညွှန်ကြားချက်များအတိုင်းလိုက်နာဆောင်ရွက်ရန်၊        ကုန်စည်နှင့်စပ်လျဉ်း၍အာမခံချက်ပေးရာတွင်  စားသုံးသူများ စိတ်ကျေနပ်မှုရှိစေရေးနှင့် သတ်မှတ်အရည်အသွေးပြည့်မီသောကုန်စည်များကိုသာ ရောင်းချရန် ဆွေးနွေးပြောကြား၍ ဈေးကွက်စောင့်ကြည့် စစ်ဆေးခဲ့ကြောင်း သတင်းရရှိပါသည်။

DOCA (ပြည်ထောင်စုနယ်မြေ)

          ၂၃.၄.၂၀၂၆ ရက်နေ့တွင် မွန်ပြည်နယ်၊ ကျိုက်ထိုမြို့နယ်အတွင်းရှိ ယိုမျိုးစုံ ရောင်းချသည့်ဆိုင်များသို့ ကျိုက်ထိုမြို့နယ်၊ စားသုံးသူရေးရာဦးစီးဌာနမှ ကျိုက်ထို ခရိုင်တာဝန်ခံနှင့် မြို့နယ်တာဝန်ခံတို့သည် ပူးပေါင်းအဖွဲ့ဖြင့် ကျိုက်ထိုမြို့တွင်းရှိ ယိုမျိုးစုံရောင်းချသည့် ဆိုင်များသို့ သွားရောက်ကာ ဈေးကွက်ကွင်းဆင်း စစ်ဆေးခဲ့ကြောင်း သိရပါသည်။

          ထိုသို့ကွင်းဆင်းစစ်ဆေးရာတွင် ကျိုက်ထိုခရိုင်တာဝန်ခံမှ ရောင်းချနေသည့် ယိုမျိုးစုံများတွင် ကုန်အညွှန်းအမှတ်အသားပြည့်စုံမှု ရှိ/မရှိ၊ ကြိုတင်သတိပေးချက် ပါဝင်မှု ရှိ/မရှိ၊ ဘေးအန္တရာယ်ဖြစ်စေနိုင်မှု ရှိ/မရှိနှင့် စားသုံးသူပြည်သူများအတွက် လုံခြုံစိတ်ချ ရသော ကုန်စည် ဟုတ်/မဟုတ် စသည်တို့ကို စစ်ဆေးခဲ့ကြောင်း သိရပါသည်။

          ထို့ပြင် ကျိုက်ထိုမြို့နယ်တာဝန်ခံမှလည်း ယိုမျိုးစုံရောင်းချနေသည့် လုပ်ငန်းရှင်များ အား ကျိုက်ထိုမြို့နယ်ရှိ ယိုမျိုးစုံဈေးကွက်သည် ဒေသထွက်ကုန်ဈေးကွက် တစ်ခုဖြစ်ပြီး အနယ်နယ်အရပ်ရပ်မှ ခရီးသွားပြည်သူများ၏ စိတ်ဝင်စားမှုကို ရရှိနေသော ဈေးကွက် တစ်ခုဖြစ်သည်နှင့်အညီ လုပ်ငန်းရှင်များအနေဖြင့် မိမိတို့၏ ထုတ်ကုန်ပစ္စည်းများကို စံအရည်အသွေးနှင့်အညီ ဆက်လက်ထုတ်လုပ်ပြီး ရှိရင်းစွဲ ပကတိ ထုတ်ကုန် အရည်အသွေးကို ဆက်လက်ထိန်းသိမ်းသွားကြရန်နှင့် ပြည့်စုံမှန်ကန်မှုမရှိသေးသော ထုန်ကုန်များဖြစ်ပါကလည်း ကုန်အညွှန်းအမှတ်အသား ပြည့်စုံမှန်ကန်မှုရှိစေရန် စားသုံးသူရေးရာဦးစီးဌာနမှ ချမှတ်လမ်းညွှန်ထားသော ကုန်အညွှန်းအမှတ်အသားဆိုင်ရာ အချက်များကို ဂရုတစိုက်လိုက်နာကာ ထုတ်ကုန်များ ထုတ်လုပ်ကြရန်များကို ပြောကြားခဲ့ကြောင်း သိရပါသည်။

          လုပ်ငန်းရှင်များအနေဖြင့်လည်း ကျိုက်ထိုမြို့နယ်၊ စားသုံးသူရေးရာဦးစီးဌာနမှ ခရိုင်တာဝန်ခံနှင့် မြို့နယ်တာဝန်ခံတို့၏ ပြောကြားချက်များကို ဂရုတစိုက် လိုက်နာမှတ်သားကာ ယိုမျိူးစုံထုတ်ကုန်များကိုလည်း ရှိရင်းစွဲအရည်အသွေးကို ဆက်လက်ထိန်းသိမ်းကာ ပိုမို ကောင်းမွန်သည့် ထုတ်ကုန်ပစ္စည်းများ တိုးမြှင့်ထုတ်လုပ်သွားမည်ဖြစ်ကြောင်းကိုလည်း သိရပါသည်။

     DOCA (မွန်)

           စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင် ဦးစီးမှူးရုံးသည် တိုင်းဒေသကြီးဦးစီးမှူး၏လမ်းညွှန်မှု၊ ခရိုင်ဦးစီးမှူး၏ကြီးကြပ်မှုတို့ဖြင့် စားသုံးသူ ကာကွယ်ရေးအသိပညာပေးဟောပြောပွဲများ၊ လုပ်ငန်းရှင်တွေ့ဆုံခြင်းနှင့် ဈေးကွက်စောင့်ကြည့် စစ်ဆေးခြင်းများဆောင်ရွက်လျက်ရှိရာ ၂၀၂၆ ခုနှစ်၊ ဧပြီလ ၂၀ ရက် နံနက် ၀၉:၄၅ နာရီအချိန်တွင် စားသုံးသူရေးရာဦးစီးဌာန၊ ကန့်ဘလူမြို့နယ်တာဝန်ခံဦးမျိုးဝင်းသန်းနှင့် ဒေါ်အိမွန်ကျော် (အကြီး တန်းစာရေး)တို့သည့် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်ကျန်းမာရေးဦးစီးဌာန၊ မြို့နယ်စည်ပင်သာယာရေးအဖွဲ့ တာဝန်ရှိသူ များနှင့်ပူးပေါင်း၍ ကန့်ဘလူမြို့ အမှတ်(၃)ရပ်ကွက်ရှိ “ဒေါ်သူဇာအောင်”ကုန်စုံဆိုင်တွင် ရောင်းချလျက်ရှိသော စားသောက်ကုန်နှင့် လူသုံးကုန်ပစ္စည်းများ ကို ဈေးကွက်စောင့်ကြည့်စစ်ဆေးခဲ့ကြောင်း သိရသည်။

            ထိုသို့စစ်ဆေးရာတွင် ကုန်စည်များပေါ်တွင် ကုန်အညွှန်းအမှတ်အသားပြည့်စုံစွာဖော်ပြထား ခြင်းရှိ/မရှိ စစ်ဆေးခဲ့ကြောင်း၊ သက်ဆိုင်ရာဌာန၏ ထောက်ခံချက်ရှိ/မရှိနှင့် သက်တမ်းလွန်ခြင်း ရှိ/မရှိစစ်ဆေးခဲ့ကြပြီး လုပ်ငန်းရှင်များအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်(၂/၂၀၁၉)နှင့် ကိုက်ညီမှုမရှိသော ကုန်ပစ္စည်းများကို ရောင်းချခြင်းမပြုရန် အသိပညာပေးပြောကြားခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရသည်။

DOCA(စစ်ကိုင်း)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊ လပွတ္တာမြို့နယ်တာဝန်ခံဦးမြင့်ဌေးသည် (၂၁.၄.၂၀၂၆)ရက်နေ့၊နေ့လယ်   (၁၄း၀၀)နာရီအချိန်တွင် စားသုံးသူရေးရာဦးစီးဌာန၊   လပွတ္တာခရိုင်တာဝန်ခံရုံးတွင်   အမှတ်(၁) ရပ်ကွက်၊ စားအုံးဆီလက်လီလက်ကားလုပ်ငန်းရှင်များအား စားသုံးသူအသိပညာပေး ဟောပြောပွဲ ပြုလုပ်ဆောင်ရွက်ခဲ့ကြောင်း သိရသည်။

          ထိုသို့ဆွေးနွေးရာတွင် စားသုံးသူရေးရာဦးစီးဌာန  လပွတ္တာမြို့နယ်တာဝန်ခံမှ  တက်ရောက်လာသော  စားသုံးဆီလုပ်ငန်းရှင်များအား  မိတ်ဆက်စကားပြောကြားပြီး၊ ဌာန၏လုပ်ငန်းတာဝန်များ၊ ရှေ့ဆက်ဆောင်ရွက်ရမည့် လုပ်ငန်းတာဝန်များအား ရှင်းလင်းပြောကြားခဲ့ပြီး၊  မြို့နယ်တာဝန်ခံမှ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေးဥပဒေ ၂၀၁၉ ပါ ပြဌာန်းချက်များမှ စားသုံးသူ၏အခွင့်အရေးနှင့်တာဝန်များ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များ၊ ပြစ်မှုပြစ်ဒဏ်များ၊ ညွှန်ကြားချက်များအား အသေးစိတ်ရှင်းလင်းပြောကြားခဲ့ပြီး စားသုံးဆီများအားဈေးကွက်အတွင်း သတ်မှတ်ရည်ညွှန်းဈေးဖြင့် ရောင်းချရန် ဈေးနှုန်းမြှင့်တင် ရောင်းချနေခြင်း စစ်ဆေးတွေ့ရှိပါက ဥပဒေများအတိုင်း ဆောင်ရွက်သွားမည်ဖြစ်ကြောင်း အသိပေးဆွေးနွေးခဲ့ပါသည်၊၊ ထို့နောက်စားသုံးဆီလုပ်ငန်းရှင်များမှ သိရှိလိုသည့် မေးမြန်းဆွေးနွေးချက်များအား ပြန်လည်ရှင်းလင်း ဆွေးနွေးခဲ့ပါသည်၊၊ ဆွေးနွေးပွဲသို့ လုပ်ငန်းရှင်(၃၅)ဦးတက်ရောက်ခဲ့ကြောင်း သိရှိရပါသည်။

DOCA (ဧရာဝတီ)