သတင်းနှင့် လှုပ်ရှားမှုများ

                       စားသုံးသူရေးရာဦးစီးဌာန၊ ဓနုကိုယ်ပိုင်အုပ်ချုပ်ခွင့်ရဒေသ၊ ဒေသဦးစီးမှူးရုံးမှ ဦးဝင်းလှိုင်ဦး (ဒေသဦးစီးမှူး)သည် ၂၂.၉.၂၀၂၆ရက်နေ့တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဓနု ကိုယ်ပိုင်အုပ်ချုပ်ခွင့်ရဒေသအဆင့်ရုံး နှင့် ပူးပေါင်း၍ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ဓနုကိုယ်ပိုင်အုပ်ချုပ်ခွင့်ရဒေသအဆင့်ရုံး၌ကုန်အညွှန်းအမှတ်အသားဖော်ပြခြင်းအသိပညာပေး Talk Show ကို ကျင်းပပြုလုပ်ခဲ့ပါသည်။ ၎င်း Talk Show တွင် ဒေသဦးစီးမှူး ဦးဝင်းလှိုင်ဦးက ၂၀၁၉ ခုနှစ်၊ စားသုံးသူကာကွယ်ရေးဥပဒေပါ စားသုံးသူ၏အဓိပ္ပါယ်၊ စီးပွားရေးလုပ်ငန်းရှင်၏ အဓိပ္ပါယ်၊ ကုန်အညွှန်းအမှတ်အသား၏အဓိပ္ပါယ်၊ စီးပွားရေးလုပ်ငန်းရှင်က ကုန်အညွှန်းအမှတ်အသားဖော်ပြ ခြင်းနှင့်ပတ်သက်၍ ကုန်စည်အမျိုးအစားအလိုက် သတ်မှတ်ချက်များနှင့်အညီ သိသာထင်ရှားစွာ ဖော်ပြရမည့်အချက်များကို ကျယ်ကျယ်ပြန့်ပြန့် အသိပညာ ပေးခဲ့ကြောင်း သိရှိရပါသည်။

DOCA(ရှမ်း)

      စားသုံးသူရေးရာဦးစီးဌာန၊လွိုင်လင်ခရိုင်ဦးစီးမှူးရုံးမှ ခရိုင်ဦးစီးမှူး(ဦးသန်းတိုး)နှင့်ဝန်ထမ်း များသည် (၈.၉.၂၀၂၆) ရက်နေ့၊ နေ့လည်(၁၃:၀0)နာရီ အချိန်တွင် ဒေါ်စိန်ညို ဆီအရောင်းဆိုင်အား မြေပြင်ကွင်းဆင်း စစ်ဆေးခဲ့ ပါသည်။

          ထိုသို့ကွင်းဆင်းစစ်ဆေးရာတွင် စားအုန်းဆီအရောင်းဆိုင်များအနေဖြင့် သတ်မှတ်ရည်ညွှန်းဈေး နှုန်းအတိုင်း ဗီနိုင်းချိတ်ဆွဲ၍ ဖြန့်ဖြူးရောင်းချခြင်း ရှိ/မရှိ အလေးချိန်မှန်ကန်မှု ရှိ/မရှိ နှင့် ဆီစာအုပ်များ ကိုစနစ်တကျ ထုတ်ပေးခြင်း၊ ခွဲတမ်းရရှိသော ဆီပိဿာအား သတ်မှတ်ထားသော အလေးချိန်မှန်ကန်စွာ ဖြင့်ပြည်သူများအပေါ် အမှန်တကယ်ရောင်းချခြင်းရှိ/မရှိ၊ ဈေးနှုန်းမြှင့်တင်ရောင်းချခြင်း ရှိ/မရှိ တို့အား ကွင်းဆင်းစစ်ဆေးခဲ့ပြီး ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ထားခြင်းရှိပါက အရေးယူခံရမည်ဖြစ်ကြောင်း အသိပေးဆောင်ရွက်ခဲ့ပါသည်။DOCA(ရှမ်း)

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်းဒေသကြီး ဦးစီးမှူးရုံး၊ ထုတ်ကုန်လုံခြုံစိတ်ချရမှုဌာနခွဲမှ စစ်ဆေးရေးအရာရှိများသည် ၁၅-၉-၂၀၂၆ ရက်နေ့၊ နံနက်(၁၁:၀၀)နာရီအချိန်တွင်ပြည်ကြီးတံခွန်မြို့နယ်ရှိ စားသောက်ကုန်အသင်းအစည်းအဝေးခန်းမ၌ စားသောက်ကုန်အသင်းဝင်လုပ်ငန်းရှင်များနှင့် တွေ့ဆုံ၍ ကုန်စည်များတွင်ကုန်အညွှန်းအမှတ်အသား ဖော်ပြခြင်းနှင့်စပ်လျဉ်း၍ သိရှိလိုက်နာဆောင်ရွက်နိုင်စေရေး အသိပညာပေး ဟောပြောဆွေးနွေး ခဲ့ပါသည်။

          ထိုသို့ အသိပညာပေးဟောပြောဆွေးနွေးရာတွင် မိမိတို့ဦးစီးဌာနအနေဖြင့် ကုန်စည်များတွင် ကုန်အညွှန်းအမှတ်အသားဖော်ပြခြင်း ရှိ/မရှိ စောင့်ကြည့်စစ်ဆေးခြင်းကိစ္စရပ်များ ဆောင်ရွက်ရာတွင် စားသုံးသူကာကွယ်ရေးဥပဒေ ပုဒ်မ ၄၁၊ ၄၂ နှင့် ၄၃ တို့အရ လည်းကောင်း၊ ဥပဒေအရထုတ်ပြန်ထားသော မြန်မာနိုင်ငံစားသုံးသူကာကွယ်ရေးကော်မရှင်၏ ၂၀၁၉ ခုနှစ်၊ ဒီဇင်ဘာလ ၃ ရက် ရက်စွဲပါ ညွှန်ကြားချက်အမှတ်(၂/၂၀၁၉)အရ လည်းကောင်း၊ စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၏ ၂၀၂၁ ခုနှစ်၊ ဒီဇင်ဘာလ ၂၀ ရက် ရက်စွဲပါ ညွှန်ကြားချက်အမှတ်(၁/၂၀၂၁)အရ လည်းကောင်း သတ်မှတ်ပြဋ္ဌာန်းချက်များနှင့် ကိုက်ညီမှု ရှိ/မရှိ စစ်ဆေးဆောင်ရွက်လျက်ရှိရာ မန္တလေးတိုင်းဒေသကြီး၊ စားသုံးသူရေးရာဦးစီးဌာန အနေဖြင့် ၂၀၁၉-၂၀၂၀ ဘဏ္ဍာရေးနှစ်မှစ၍ ၂၀၂၆-၂၀၂၇ ဘဏ္ဍာရေးနှစ်၊ ဩဂုတ်လ အထိ လုပ်ငန်းရှင်(၁၀၁၉)ဦး ကုန်ပစ္စည်းအမျိုးအစား ပေါင်း(၃၇၁၃)မျိုးအား ကုန်အညွှန်းအမှတ်အသားနှင့်စပ်လျဉ်း၍ စိစစ်ဆောင်ရွက်ပေးပြီး ဖြစ်ကြောင်း၊ ဆက်လက်၍လည်း ၂၀၂၅-၂၀၂၆ ဘဏ္ဍာရေးနှစ်မှစတင်၍ စက်မှုကြီးကြပ်စစ်ဆေးရေးဦးစီးဌာနနှင့် အသေးစားစက်မှုလက်မှုလုပ်ငန်းဦးစီးဌာန တို့တွင် ပူးပေါင်း၍ ၎င်းတို့ဌာနတွင် မှတ်ပုံတင်ထားသည့် လုပ်ငန်းရှင်တို့အား မိမိတို့ဌာနသို့ ခေါ်ယူ၍လည်းကောင်း၊ ဈေးကွက်မရောက်မီစောင့်ကြည့် စစ်ဆေးခြင်းဖြင့်လည်းကောင်း မိမိတို့ထုတ်လုပ်သည့် ကုန်စည်များပေါ်တွင် ကုန်အညွှန်းအမှတ် အသားဖော်ပြချက်များနှင့်အညီ ကိုက်ညီမှုရှိစေရေးအတွက် အရှိန်အဟုန်ဖြင့် စိစစ်ဆောင်ရွက် ပေးလျက်ရှိကြောင်း၊  ထိုသို့ အရှိန်အဟုန်ဖြင့် ဆောင်ရွက်နေရခြင်း၏ ရည်ရွယ်ချက်မှာ စားသုံးသူများ အနေဖြင့် ကုန်စည်နှင့်စပ်လျဉ်း၍ လိုအပ်သော သတင်းအချက်အလက်များ သိရှိနိုင်ရန်လည်ကောင်း၊ စားသုံးသူများအနေဖြင့်၎င်းတို့အသုံးပြုမည့် ကုန်စည်များအားရွေးချယ်ဝယ်ယူနိုင်စေရန် လည်းကောင်း၊ လုပ်ငန်းရှင်များအနေဖြင့် ၎င်းတို့ထုတ်လုပ်သည့် ကုန်စည်များအပေါ် တာဝန်ယူမှု၊ တာဝန်ခံမှု ရှိစေရန်လည်းကောင်း၊ စားသုံးသူများအား လုံခြုံစိတ်ချရမှုရှိသည့် ကုန်စည်များ အသုံးပြုစေရန် ရည်ရွယ်ခြင်းဖြစ်ကြောင်းနှင့်လက်ရှိအချိန်တွင်စီးပွားရေးလုပ်ငန်းရှင်များအနေဖြင့် စားသုံးသူကာကွယ် ရေးဥပဒေအရ ကုန်အညွှန်းအမှတ်အသားဆိုင်ရာ သတ်မှတ်ချက်ဖြစ်သော ထုတ်လုပ်သည့်ရက်စွဲနှင့် သက်တမ်းကုန်ဆုံးသည့် ရက်စွဲကို ပြည်ပမှ တင်သွင်းလာသော ကုန်စည်များတွင်သာမက ပြည်တွင်း၌ ထုတ်လုပ်သော ကုန်စည်များတွင်ပါ ထပ်ပိုးလွှာ၊ ထပ်ပိုးလွှာ(Sticker)ဖြင့် ကပ်နှိပ်ဖော်ပြ၍ ဈေးကွက်အတွင်း ဖြန့်ဖြူး ရောင်းချလျက်ရှိကြောင်း စိစစ်တွေ့ရှိနေရသည့်အတွက် ကုန်အညွှန်း အမှတ်အသား ဖော်ပြရန် အားနည်းနေသေးသော ကုန်စည်များနှင့် စပ်လျဉ်း၍ ထုတ်လုပ်သည့် ရက်စွဲနှင့် သက်တမ်းကုန်ဆုံးသည့် ရက်စွဲများကို ကုန်စည်တွင် ဖော်ပြရာ၌ ထပ်ပိုးလွှာ၊ ထပ်ပိုး ကပ်လွှာ(Sticker)ဖြင့် ကပ်နှိပ် ဖော်ပြရန် သီးခြားခွင့်ပြုထားခြင်း မရှိကြောင်းနှင့် ကုန်စည်တွင် တိုက်ရိုက်ရိုက်နှိပ်ခြင်း သို့မဟုတ် ပုံသွင်းခြင်းဖြင့်သာ ဖော်ပြရန် ဖြစ်ကြောင်း ၂၀၂၆ ခုနှစ်၊ နိုဝင်ဘာလ ၃၀ ရက်နေ့အထိ အသိပညာပေးကာလအနေဖြင့် ဆောင်ရွက်သွားမည်ဖြစ်ကြောင်းနှင့် ၎င်းကာလ နောက်ပိုင်းတွင် ယင်းနှင့်အညီ လိုက်နာဆောင်ရွက်ရန်အားနည်းသော သို့မဟုတ် လိုက်နာရန် ပျက်ကွက်သော ကုန်စည်နှင့်စပ်လျဉ်း၍ သက်ဆိုင်ရာ စီးပွားရေးလုပ်ငန်းရှင်ကို ထိရောက်စွာ အရေးယူဆောင်ရွက် သွားမည်ဖြစ်ကြောင်းနှင့် မိမိတို့ဌာနအနေဖြင့် ဈေးကွက်စောင့်ကြည့် စစ်ဆေး ခြင်းလုပ်ငန်းများအနေဖြင့် ဈေးကွက်ရောက်ရှိပြီးကုန်စည်များနှင့် ဈေးကွက်မရောက်မီ ကုန်စည်များအား စောင့်ကြည့်စစ်ဆေးခြင်းများအနေဖြင့် စောင့်ကြည့်စစ်ဆေးလျက်ရှိရာတွင် ကုန်စည်များ၌ ကုန်အညွှန်းအမှတ် အသားဖော်ပြထားခြင်းနှင့်စပ်လျဉ်း၍ ထုတ်လုပ်သည့်ရက်စွဲနှင့် သက်တမ်း ကုန်ဆုံးသည့် ရက်စွဲများ ပြည့်စုံစွာပါရှိစေရေး အထူးကြပ်မတ်၍ အလေးပေးစစ်ဆေး ဆောင်ရွက် လျက် ရှိကြောင်းနှင့် လိုက်နာရန် ပျက်ကွက်သော ကုန်စည်နှင့်စပ်လျဉ်း၍ သက်ဆိုင်ရာ စီးပွားရေး လုပ်ငန်းရှင်ကို စားသုံးသူကာကွယ်ရေးဥပဒေပုဒ်မ ၇၃ အရ နှစ်နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း ၂၀၀ ထက်မပိုသော ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ခံရမည်ဖြစ်ကြောင်း စီးပွားရေးလုပ်ငန်းရှင်များအနေဖြင့် ဥပဒေပါပြဋ္ဌာန်းချက်များကိုလည်း သိရှိလိုက်နာဆောင်ရွက်ရန် လိုအပ်ကြောင်း အသိပညာပေးဟောပြောဆွေးနွေးခဲ့ကြောင်း သတင်းရရှိပါသည်။

DOCA(မန္တလေး)

     စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်တာဝန်ခံ ဦးစီးအရာရှိ ဦးဇော်နေလင်း ဦးဆောင်သော ဝန်ထမ်းများအဖွဲ့သည် (၂၁.၉.၂၀၂၆)ရက်နေ့၊ နံနက် (၀၉:၀၀)နာရီအချိန်တွင် စားသုံးသူများ ဘေးကင်းလုံခြုံစိတ်ချရမှုရှိစေရေး၊ ကျောင်းနေအရွယ် ကလေးများ ကျန်းမာဖွံ့ဖြိုးစေရေးအတွက် ဆိပ်ဖြူမြို့နယ်၊ ရေလယ်ကျွန်း ကျေးရွာအခြေခံပညာ မူလတန်းကျောင်း၌ စားသုံးသူကာကွယ်ရေးအသိပညာပေး ဟောပြောပွဲ ပြုလုပ်ပါသည်။

    အဆိုပါ ဟောပြောပွဲတွင် မြို့နယ်တာဝန်ခံက စားသုံးသူကာကွယ်ရေးဥပဒေ ပြဌါန်းထားရှိမှု အခြေနေများ၊ ဥပဒေပြဌါန်းချက်ပါ ရည်ရွယ်ချက်များ၊ ကမ္ဘာ့စားသုံးသူအခွင့်အရေးများနေ့ ပေါ်ပေါက် လာပုံအဆင့်ဆင့်နှင့် ကုန်စည်၊ ဝန်ဆောင်မှု၊ စားသုံးသူ၏အဓိပ္ပာယ်နှင့် စီးပွားရေးလုပ်ငန်းရှင်၏ တာဝန်များကို အသေးစိတ်ရှင်းလင်းဆွေးနွေးခြင်း၊ ဆက်လက်ပြီး ဒု-ဦးစီးမှူး ဒေါ်မြင့်မြင့်သန်းက စားသုံးသူ၏အခွင့်အရေးနှင့်တာဝန်များ၊ စားသုံးသူများအနေဖြင့် ကုန်စည်၊ ဝန်ဆောင်မှုနှင့်စပ်လျဉ်း ၍ နစ်နာဆုံးရှုံးမှုများဖြစ်ပေါ်လာပါက တိုင်ကြားနိုင်သည့်နည်းလမ်းများ၊ Consumer Call Center (1535)သို့လည်း ဖုန်းခေါ်ဆို၍ သိလိုသည်များမေးမြန်းနိုင်ကြောင်း အသေးစိတ်ရှင်းလင်းပြီး ကျောင်းသား / ကျောင်းသူများမှ Call Center (1535)သို့ ဖုန်းခေါ်ဆိုပြီး စားသုံးသူအခွင့်အရေးနှင့် တာဝန်များကို မေးမြန်းခဲ့ပါသည်။

          ဒု-ဦးစီးမှူး ဒေါ်တင်မာရီက ကုန်အညွှန်းအမှတ်အသားနှင့် စပ်လျဉ်း၍ သိကောင်းစရာများကို အသေးစိတ်ရှင်းလင်းဆွေးနွေးခဲ့ပြီး စားသုံးသူကာကွယ်ရေးဆိုင်ရာ အသိပညာပေး လက်ကမ်း စာ စောင်များဖြန့်ဝေခဲ့ပါသည်။ ဟောပြောပွဲသို့ ကျောင်းအုပ်ဆရာမကြီးနှင့် ဆရာ/ဆရာမ(၅)ဦး၊ ကျောင်းသား/ကျောင်းသူ(၅၀)ဦး ၊ စုစုပေါင်း(၅၅)ဦးတက်ရောက်ခဲ့ကြောင်း သိရှိရပါသည်။

DOCA(မကွေး)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် မင်းဘူးခရိုင်၊ စလင်းမြို့နယ်တာဝန်ခံရုံးမှ တာဝန်ခံနှင့် ဝန်ထမ်းတို့သည် မြို့နယ်စည်ပင်သာယာရေး အဖွဲ့နှင့်အတူပူးပေါင်း၍ (၁၇.၉.၂၀၂၆)ရက်နေ့၊ နံနက်(၁၁:၀၀)အချိန်တွင် ဆင်ဖြူကျွန်းမြို့ရှိ  “ဒေါ်မိမိအေး”(ကုန်စုံဆိုင်)သို့သွားရောက်၍  ရောင်းချနေသော ဘူးသွပ်ဆီဘူးများတွင် ကုန်အညွှန်း အမှတ်အသားဖော်ပြချက်နှင့် ပတ်သက်၍ ပြည့်စုံမှုရှိ/ မရှိ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

          ထိုသို့ ဈေးကွက်စောင့်ကြည့်စစ်ဆေးရာတွင် စလင်းမြို့နယ်တာဝန်ခံမှ အခြေခံစားသောက် ကုန်ပစ္စည်းအမျိုးမျိုးတို့အား ဖြန့်ဖြူးရောင်းချလျက်ရှိသော “ဒေါ်မိမိအေး” ကုန်စုံဆိုင်ရှိ " ရွှေဗမာ " မြေပဲဘူးသွပ်ဆီများတွင် ကုန်အညွှန်းအမှတ်အသားဖော်ပြချက် ပြည့်စုံမှုရှိ/မရှိစစ်ဆေးခဲ့ပြီး ဆိုင်ပိုင်ရှင် အား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော ၂၀၁၉ ပါ ဥပဒေ ပြဌာန်း ချက်များမှ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့် စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု(သို့) တစ်ခု ထက်ပို၍တွဲလျှက်ဖြစ်‌စေ၊ ရေးသားဖော်ပြရမည်ဖြစ်ကြောင်း၊ စီးပွားရေးလုပ်ငန်းရှင်များ လိုက်နာဆောင်ရွက်ရန် ညွှန်ကြားချက် ၂/၂၀၁၉ကို လိုက်နာဆောင်ရွက်ခြင်းရှိ/မရှိ၊ ဌာနမှထုတ်ပြန်ထား သော ဥပဒေညွှန်ကြားချက်များအား လိုက်နာဆောင်ရွက်ကြရန် ဈေးကွက်အတွင်း ရောင်းချနေသော ကုန်စည်အမျိုးအစားအလိုက်  ကုန် အညွှန်းအမှတ်အသားပြည့်စုံစွာ ဖော်ပြထားခြင်းရှိ/မရှိကိုလည်း စဉ်ဆက်မပြတ်စစ်ဆေး ဆောင်ရွက် သွားမည်ဟု ဆွေးနွေးမှာကြားခဲ့ကြောင်း သိရှိရပါသည်။

DOCA(မကွေး)