မွန်ပြည်နယ်ဝန်ကြီးချုပ် စာဖတ်ရှိန်မြှင့်တင်ရေးလှုပ်ရှားဆောင်ရွက်မှုနှင့် ကျောင်းအပ်နှံမှုအားကြည့်ရှုအားပေး
မွန်ပြည်နယ်အစိုးရအဖွဲ့၏ကြီးကြပ်မှုဖြင့် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် အခြေခံပညာဦးစီးဌာနတို့ပူးပေါင်း၍ စာကြည့်တိုက်များ ရေရှည်ဖွံ့ဖြိုးတိုးတက်စေရေးနှင့် ပြည်သူများ၊ ကျောင်းသား/သူများ စာပေဖတ်ရှုသည့် အလေ့အထဖြစ်ပေါ်စေရန်၊ စာကြည့်တိုက်ယဥ်ကျေးမှုထွန်းကားလာစေရန် ရည်ရွယ်၍ စာဖတ်ရှိန်မြှင့်တင်ရေး လှုပ်ရှားဆောင်ရွက်မှုအား လစဉ်ကျင်းပပြုလုပ်လျက်ရှိရာ ၂၈.၅.၂၀၂၅ ရက်နေ့ နံနက်ပိုင်းက မုဒုံမြို့နယ်၊ ဘဲရမ်းကျေးရွာရှိ ပညာပျိုးခင်း စာကြည့်တိုက်နှင့် မုဒုံမြို့ အမှတ် (၂) အခြေခံ ပညာအထက်တန်းကျောင်းရှိ သုတရတနာစာကြည့်တိုက်တို့၌ ကျင်းပပြုလုပ်ရာ မွန်ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်အစိုးရအဖွဲ့ဝင်ဝန်ကြီးများနှင့် တာဝန်ရှိသူများ တက်ရောက်ခဲ့သည်။
ရှေးဦးစွာ စာဖတ်ရှိန်မြှင့်တင်ရေးလှုပ်ရှားမှုအဖြစ် ဘဲရမ်းကျေးရွာရှိ ပညာပျိုးခင်း စာကြည့်တိုက်၌ ကျောင်းသား/သူများက ဆေးရောင်ခြယ်ပြိုင်ပွဲကို ယှဥ်ပြိုင်ကြရာ ပြည်နယ် ဝန်ကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများနှင့် တာဝန်ရှိသူများက ကြည့်ရှုအားပေးပြီး ပြည်နယ်ဝန်ကြီးချုပ်က ပြိုင်ပွဲဆုရ ကျောင်းသား/သူများအား ဆုများချီးမြှင့်ပေးအပ်ကာ ပြည်နယ်စာကြည့်တိုက်များ ဖောင်ဒေးရှင်းဥက္ကဋ္ဌက စာကြည့်တိုက်အတွက် စာအုပ်များ ပေးအပ်လှူဒါန်းသည်။ ဆက်လက်၍ ပြည်နယ်ဝန်ကြီးချုပ်နှင့်အဖွဲ့သည် မုဒုံမြို့အမှတ် (၂) အခြေခံပညာအထက်တန်းကျောင်းရှိ သုတရတနာ စာကြည့်တိုက်တွင် ကျောင်းသား/သူများက ကံဆိုးမှုကို ငြင်းပယ်ပါ၊ ချမ်းမြေ့မှုကိုရွေးချယ်ပါ၊ လူငယ်တွေကို လျော့မတွက်ပါနဲ့၊ ရည်ရွယ်ချက်အတွက် အချိန်၊ အမှိုက်ထုပ် သီအိုရီ ခေါင်းစဥ်များဖြင့် စာဖတ်ဝိုင်း ဆွေးနွေးခြင်းနှင့် ပန်းချီပြိုင်ပွဲ ကျင်းပနေမှုတို့ကို ကြည့်ရှုအားပေးပြီး ကျောင်းသား/သူများ အား ဆုလက်ဆောင်များ ပေးအပ်၍ ကျောင်းစာကြည့်တိုက်အတွက် ပြည်နယ်စာကြည့်တိုက်များ ဖောင်ဒေးရှင်းက လှူဒါန်းသည့် စာအုပ်စာစောင်များအား ပြည်နယ်ဝန်ကြီးချုပ်က ပေးအပ်ရာ ကျောင်းအုပ်ဆရာမကြီးမှ လက်ခံရယူခဲ့ပြီး စာအုပ်စာစောင်နှင့် အသိပညာပေးနံရံ ကပ်ပိုစတာ ပြသထားမှုများအား ကြည့်ရှုခဲ့သည်။
ယင်းနောက် ပြည်နယ်ဝန်ကြီးချုပ်နှင့်အဖွဲ့သည် အဆိုပါကျောင်း၌ ၂၀၂၅ - ၂၀၂၆ ပညာသင်နှစ်အတွက် ကျောင်းသား/သူများ ကျောင်းအပ်နှံနေမှုကို လှည့်လည်ကြည့်ရှု အားပေးပြီး နိုင်ငံတော်မှ အခမဲ့ပေးအပ်သည့် ကျောင်းသုံးပုံနှိပ်စာအုပ်၊ ဗလာစာအုပ်၊ ခဲတံနှင့် ကျောင်းဝတ်စုံတို့ကို လာရောက်ကျောင်းအပ်နှံသည့် ကျောင်းသား/သူများ အား ပေးအပ်ခဲ့ကြောင်း သိရသည်။
DOCA (မွန်)
