စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့်ဝန်ထမ်းများသည် ဆန်ကုန်သည်အသင်းနှင့် ပူးပေါင်း၍ ၁၅.၁၀.၂၀၂၆ ရက်နေ့ နေ့လယ် (၀၁:၀၀) နာရီအချိန်တွင် မုံရွာမြို့အောင်မင်္ဂလာရပ်ကွက်အတွင်းရှိ (My RO) တွင် မှတ်ပုံတင်ထားသော ဆန်စပါးသိုလှောင်ရုံများအား ကွင်းဆင်းခြင်းလုပ်ငန်းများ ဆောင်ရွက်ခဲ့ကြောင်း သိရသည်။

       ထိုသို့ကွင်းဆင်းစစ်ဆေးရာတွင် လက်ရှိ ဆန်စပါးဈေးနှုန်းဈေးကွက် အခြေအနေများ၊ ဆန်စပါးလက်ကျန် အခြေအနေများအား မေးမြန်းစုံစမ်းခဲ့ပြီး MyRO တွင် ကုန်ရ၊ ကုန်ထုတ်နှင့် ကုန်လက်ကျန်စာရင်းများကို လစဉ် လဆန်း (၁) ရက်နေ့မှ (၇) ရက်နေ့အတွင်း အချိန်မီ ပြည့်စုံမှန်ကန်စွာ မပျက်မကွက်ရေးသွင်းကြရန် အသိပေးဆွေးနွေးခဲ့ကြောင်း သိရသည်။

      ထို့အပြင် ဆန်စပါးသိုလှောင်ရုံ လုပ်ငန်းရှင်များအနေဖြင့် MyRO ၌ လစဉ်စာရင်းများ စနစ်တကျ ရေးသွင်းခြင်းဖြင့် ဆန်စပါးသိုလှောင်မှုနှင့် ဖြန့်ဖြူးမှုအခြေအနေများကို တိကျမှန်ကန်စွာ စောင့်ကြည့်နိုင်မည်ဖြစ်ကြောင်း၊ ဆန်ဈေးနှုန်း ကြီးမြှင့်မှု မဖြစ်ပေါ်စေရေးအတွက် ဈေးကစားရန်အလို့ငှာ ဆန်များသိုလှောင်ထားခြင်း မပြုရန်နှင့် လိုက်နာမှုမရှိပါက ဥပဒေအရ အရေးယူခံရမည်ဖြစ်ကြောင်း  အသိပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

    (၁၄.၁၀.၂၀၂၆) ရက်နေ့တွင် ကလေးဝမြို့ပေါ်ရှိ ဓာတ်မြေဩဇာ အမျိုးအစားအလိုက် ပစ္စည်းပြတ်လပ်မှုရှိ/ မရှိနှင့် ပစ္စည်းလက်ကျန်အခြေအနေတို့အား စားသုံးသူရေးရာဦးစီးဌာနမှ ဦးဆောင်၍ ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်း သိရသည်။

       ကလေးဝမြို့ပေါ်ရှိ ဓါတ်မြေဩဇာနှင့် ပိုးသတ်ဆေး ဖြန့်ဖြူးရောင်းလျက်ရှိသော အရောင်းဆိုင်များသို့ စစ်ဆေးခဲ့ရာတွင် ဓာတ်မြေဩဇာအမျိုးအစားအလိုက် ဈေးနှုန်းများအား သက်ဆိုင်ရာဌာနများမှ သတ်မှတ်ထားသော ရည်ညွှန်းဈေးနှုန်းအတိုင်း ဖြန့်ဖြူးရောင်းချစေရေး၊ ဈေးနှုန်းအဆမတန်မြှင့်တင်ရောင်းချခြင်းများမပြုလုပ်ကြရန်၊ ဈေးနှုန်းမြှင့်တင်၍ ရောင်းချခြင်းမပြုရန်နှင့် ဈေးကစားရန်ရည်ရွယ်ချက်ဖြင့် သိုလှောင်ထားခြင်းများ မပြုလုပ်ကြရန် အသိပညာပေး ဆွေးနွေးပြောကြားခဲ့ပြီး ဓာတ်မြေဩဇာအမျိုးအစားအလိုက် ယခင်ဈေးနှုန်း၊ ယခုဈေးနှုန်းနှင့် ပစ္စည်းလက်ကျန်အခြေအနေနှင့် ပစ္စည်းပြတ်လပ်မှုရှိ/ မရှိ အခြေအနေတို့အား စာရင်းကောက်ယူ ကွင်းဆင်းစစ်ဆေးခဲ့ကြောင်း သိရှိရပါသည်။

DOCA(စစ်ကိုင်း)

       (၁၄.၁၀.၂၀၂၆) ရက်နေ့တွင်  ကလေးမြို့ပေါ်ရှိ မုန့်တိုက်များသို့ စားသုံးသူရေးရာဦးစီးဌာန ဒေါ်သန်းသန်းဝင်း ( ခရိုင်ဦးစီးမှူး )  ဦးဆောင်၍ ဝန်ထမ်းများသည် အသေးစားစက်မှုလက်မှု လုပ်ငန်းဦးစီးဌာနတို့ ပူးပေါင်း၍ ဒေသထွက်ကုန်များတွင် ကုန်အညွှန်းအမှတ်အသားဆိုင်ရာသတ်မှတ်ချက်များဖြစ်သော ထုတ်လုပ်သည့်ရက်စွဲ သက်တမ်းကုန်ဆည်းသည့် ရက်စွဲများ ကပ်နှိပ်နိုင်စေရေး ကွင်းဆင်းအသိပညာပေးခြင်း လုပ်ငန်းများ ဆောင်ရွက်ခဲ့ကြောင်း သိရှိရပါသည်။

      ဒေသထွက်ကုန်များဖြစ်သည့် ကိတ်မုန့်၊ ပေါင်မုန့်  ထုတ်လုပ်ဖြန့်ဖြူးရောင်းချနေသော မုန့်တိုက်များအနေဖြင့် မြန်မာနိုင်ငံစားသုံးသူကာကွယ်ရေးကော်မရှင်၏ ( ၂/၂၀၁၉ )ပါ ကုန်အညွှန်းအမှတ်အသားသတ်မှတ်ချက်များနှင့် စပ်လျဉ်း၍ ပြည့်စုံစွာဖော်ပြနိုင်စေရန်နှင့် ထုတ်လုပ်သည့် ရက်စွဲနှင့် သတ်တမ်းကုန်ဆုံးသည့်ရက်စွဲများကို ကုန်စည်တွင်‌‌‌‌ဖော်ပြရာ၌ ထပ်ပိုးလွှာ၊ ထပ်ပိုးကပ်လွှာ ( Sticker ) ဖြင့် ကပ်နှိပ်ဖော်ပြရန် သီးခြားခွင့်ပြုထားခြင်းမရှိကြောင်း၊ ကုန်စည်တွင်တိုက်ရိုက်ကပ်နှိပ်ခြင်း (သို့မဟုတ်) ပုံသွင်းခြင်းဖြင့်သာဖော်ပြရန်ဖြစ်ကြောင်း၊ ၂၀၂၆ ခုနှစ်၊ နိုဝင်ဘာလ ၃၀ ရက်အထိ အသိပညာပေးကာလအဖြစ်သတ်မှတ်ထားကြောင်း၊ နိုဝင်ဘာလ ၃၀ ရက်နောက်ပိုင်းတွင် လိုက်နာဆောင်ရွက်ရန်အားနည်းသော သို့မဟုတ် လိုက်နာရန်ပျက်ကွက်သော ကုန်စည်နှင့် စပ်လျဉ်း၍ သက်ဆိုင်ရာစီးပွားရေးလုပ်ငန်းရှင်ကို ထိရောက်စွာအရေးယူဆောင်ရွက်သွားမည်ဖြစ်ကြောင်း အသိပညာပေးခြင်းလုပ်ငန်းများ ဆောင်ရွက်ခဲ့ပြီး  အသေးစားစက်မှုလက်မှု လုပ်ငန်းဦးစီးဌာနမှ ခရိုင်ဦးစီးမှူး ဒေါက်တာထန်လမ်းဒိမ်မှ အိမ်တွင်းစက်မှုလက်မှုလုပ်ငန်း မှတ်ပုံတင် သမ်းတမ်းတိုးဆောင်ရွက်ရန်အတွက် လိုအပ်သည့်အထောက်အထားများနှင့် ဓါတ်ခွဲစမ်းသပ်ရန်အတွက် ကုန်ပစ္စည်းနမူနာများ ပေးပို့ဆောင်ရွက်ခြင်းကိစ္စရပ်များကို အသေးစိတ်ရှင်းလင်း ပြောကြားခဲ့ကြောင်း သိရှိရပါသည်။

DOCA(စစ်ကိုင်း)

     (၁၄.၁၀.၂၀၂၆) ရက်နေ့တွင် စားသုံးသူရေးရာဦးစီးဌာနမှ ဦးဆောင်၍ ပူးပေါင်းအဖွဲ့များဖြစ်သည့် မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ၊ စည်ပင်သာယာရေးကော်မတီ၊ ပြည်သူ့ကျန်းမာရေးဦးစီးဌာန၊ မြန်မာနိုင်ငံရဲတပ်ဖွဲ့၊ မီးသတ်တပ်ဖွဲ့၊ ပြန်ကြားရေးနှင့် ပြည်သူ့ ဆက်ဆံရေးဦးစီးဌာနနှင့် စိုက်ပျိုးရေးဦးစီးဌာနတို့ ပူးပေါင်း၍ စည်ပင်သာယာဈေးအတွင်းရှိ ဆန်/ စပါး အရောင်းဆိုင်များသို့ ဆန်/ စပါး ဈေးနှုန်းတည်ငြိမ်စေရေးအတွက် ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြပါသည်။

        ကွင်းဆင်းစစ်ဆေးရာတွင် စားသုံးသူရေးရာဦးစီးဌာနမှ ဦးကျော်ကျော်မိုး ( မြို့နယ်တာဝန်ခံ ) က  ဆန်ရောင်းဝယ်ရေးလုပ်ငန်းရှင်များအား စားသုံးသူများနစ်နာဆုံးရှုံးမှုမရှိစေရေးအတွက် ရောင်းချသည့်ဆန်အိတ်များ အလေးချိန် အချင်အတွယ် မှန်ကန်စေရေး၊ ဈေးနှုန်းအနေဖြင့်လည်း ဖြစ်သင့်ဖြစ်ထိုက်သောဈေးနှုန်းဖြင့်သာ ရောင်းချစေ‌ရေး၊ ဈေးကစားရန် ရည်ရွယ်၍ သိုလှောင်မှုမရှိစေ‌ရေး အလေးထားလိုက်နာ ဆောင်ရွက် သွားရန်နှင့် ဈေးနှုန်းမြှင့်တင်ရောင်းချခြင်းများ မပြုလုပ်ကြရန်နှင့် ရောင်းနှုန်းမြှင့်တင်၍ ရောင်းချမည်ဆိုပါက အရေးကြီးကုန်စည်နှင့်ဝန်ဆောင်မှု ဥပဒေအရ  အရေးယူသွားမည်ဖြစ်ကြောင်း ပြောကြားခဲ့ပြီး  ဆန်တန်ချိန် ( ၂၅ ) တန်နှင့်အထက်  ( သို့မဟုတ် ) စပါးတင်း (၂၅၀၀) နှင့်အထက် သိုလှောင်ထားရှိသော ဆန်စပါးသိုလှောင်ရုံ ပိုင်ရှင်များ သည် မြန်မာဆန်စပါး အွန်လိုင်း (MyRO) www.myro.com.mm တွင် ဆန်စပါးသိုလှောင်ရုံ မှတ်ပုံတင်လက်မှတ် လျှောက်ထားရ ယူရန်လိုအပ်ကြောင်း  လုပ်ငန်းရှင်များအား အသိပေးခဲ့ကြောင်း သတင်းရရှိပါသည်။

DOCA(စစ်ကိုင်း)

        အန်နီညိုသဘာဝမှကာကွယ်ရန် မိဘပြည်သူများ စားရေးရိက္ခာကြိုတင်စုဆောင်းထားရှိမှု အခြေအနေကို စစ်ကိုင်းခရိုင်/ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဌ၊ စီမံကိန်းဦးစီးဌာန၊ စည်ပင်သာယာရေးအဖွဲ့၊ ခရိုင်ကျေးလက်လမ်းဦးစီးဌာန၊ လျှပ်စစ်ဓာတ်အားဖြန့်ဖြူးရေးလုပ်ငန်းဌာန၊ စားသုံးသူရေးရာဦးစီးဌာနတို့ပူးပေါင်း၍ ၂၀၂၆ခုနှစ်၊ အောက်တိုဘာလ ၁၁ရက်နေ့ နံနက်(၀၈း၀၀) နာရီအချိန်တွင် စစ်ကိုင်းမြို့နယ်အတွင်းရှိ ဆန်စက်၊ ဆီစက်၊ ပဲခွဲစက်၊ ရေပေးဝေရာတွင် လုံလောက်စွာပေးဝေနိုင်မှုအခြေအနေ၊ အပူရှောင်စခန်းထားရှိမှုအခြေအနေ၊ ကုတင်၃၀၀ဆံ့ ပြည်သူ့ဆေးရုံကြီးတွင် ဆေးဝါးသိုလှောင်ထားရှိမှုအခြေအနေကို မြေပြင်ကွင်းဆင်းစစ်ဆေးခဲ့ကြောင့် သိရှိရပါသည်။

      ထိုသို့မြေပြင်ကွင်းဆင်းစစ်ဆေးခဲ့ရာတွင် ဆန်စက်၊ ဆီစက်၊ ပဲခွဲစက်များရှိ ဆန်၊ ဆီ၊ ပဲများ လုံလောက်စွာထားရှိခြင်း၊ သက်ကြီးရွယ်အိုနှင့်ကလေးများအား အစားသောက်နှင့် ဆေးဝါးများ လုံလောက်စွာထားရှိခြင်း၊ သောက်သုံးရေ လုံလောက်စွာ ဝယ်ယူထားရှိခြင်း၊ အပူရှောင်စခန်းများ ကြိုတင်ပြင်ဆင်ထားရှိမှုကို စစ်ဆေးတွေ့ရှိရကြောင်း သိရှိရပါသည်။

DOCA(စစ်ကိုင်း)