ဓနုဖြူမြို့နယ်တွင် ရပ်ကွက်/ကျေးရွာအုပ်ချုပ်ရေးမှူးများအား စားအုန်းဆီဖြန့်ဖြူးရောင်းချမှုဆိုင်ရာ ရှင်းလင်းဆွေးနွေး
ဓနုဖြူမြို့နယ်၌ ရပ်ကွက်/ကျေးရွာအုပ်ချုပ်ရေးမှူးများ လုပ်ငန်းစွမ်းဆောင်ရည်မြင့်မားရေး သင်တန်းဖွင့်ပွဲအခမ်းအနားကို (၁၀-၈-၂၀၂၆) ရက်နေ့ နံနက် (၁၀:၀၀) နာရီအချိန်တွင် ကျင်းပပြုလုပ်ခဲ့ရာ မြို့နယ်စားသုံးသူရေးရာဦးစီးဌာနမှ တာဝန်ရှိသူများ တက်ရောက်ခဲ့ကြောင်း သိရသည်။
အဆိုပါ အခမ်းအနားတွင် မြို့နယ်စားသုံးသူရေးရာဦးစီးဌာနမှ တာဝန်ရှိသူက ရပ်ကွက် /ကျေးရွာ အုပ်ချုပ်ရေးမှူးများအား စားအုန်းဆီဖြန့်ခွဲရောင်းချမှုနှင့် စပ်လျဉ်း၍ ရှင်းလင်းဆွေးနွေးခဲ့သည်။ ရှင်းလင်း ဆွေးနွေးရာတွင် ပြည်သူများ စားအုန်းဆီကို သတ်မှတ်ပမာဏအတိုင်း အပြည့်အဝရရှိနိုင်ရေးကို ဦးစားပေးဆောင်ရွက်သွားမည်ဖြစ်ပြီး အိမ်ထောင်စုစာရင်းအလိုက် စားအုန်းဆီထုတ်ယူခွင့် စာအုပ်အသုံးပြု၍သာ စနစ်တကျ ဖြန့်ဖြူးရောင်းချပေးသွားမည်ဖြစ်ကြောင်း သိရသည်။ တစ်အိမ်ထောင်စုလျှင် တစ်လအတွင်း စားအုန်းဆီ (၁) ပိဿာနှင့် (၅၀) ကျပ်သား အပြည့်အဝရရှိနိုင်ရေးကို ဦးစားပေးဆောင်ရွက်သွားမည်ဖြစ်ကြောင်း ရှင်းလင်းပြောကြားခဲ့ကြောင်း သိရသည်။
ထို့အပြင် စားအုန်းဆီများ ဖြန့်ဖြူးရာတွင် အလေအလွင့်မဖြစ်ပေါ်စေရေး၊ သတ်မှတ်အကျိုး ခံစားခွင့်ရှိသူများထံ မှန်ကန်စွာရောက်ရှိစေရေးနှင့် စာရင်းဇယားများ တိကျမှန်ကန်စွာ ရှိစေရေးတို့အတွက် ဆီထုတ်ယူခွင့်စာအုပ်ဖြင့်သာ ဖြန့်ဖြူးရောင်းချသွားမည်ဖြစ်ကြောင်း အသိပေးဆွေးနွေးခဲ့ကြောင်း သိရသည်။
အဆိုပါ လုပ်ငန်းစဉ်များကို အထက်ဌာန၏ လမ်းညွှန်ချက်များနှင့်အညီ သက်ဆိုင်ရာ မြို့နယ်စီမံ အုပ်ချုပ်ရေးကော်မတီက မြို့နယ်အတွင်းရှိ အိမ်ထောင်စုစာရင်းနှင့် လူဦးရေစာရင်းများကို စိစစ်၍ အမှန်တကယ်အကျိုးခံစားခွင့်ရှိသူများထံ စနစ်တကျ ဖြန့်ဖြူးရောင်းချပေးနိုင်ရေး ဆောင်ရွက်သွားမည်ဖြစ်ကြောင်း သိရသည်။
ထို့သို့ ရပ်ကွက်/ကျေးရွာအုပ်ချုပ်ရေးမှူးများအား စားအုန်းဆီဖြန့်ဖြူးရောင်းချမှုဆိုင်ရာ လုပ်ငန်းစဉ်များကို ကြိုတင်ရှင်းလင်းပေးခြင်းဖြင့် ပြည်သူများထံ စားအုန်းဆီများ မျှတစွာနှင့် စနစ်တကျရောက်ရှိနိုင်ရေးအတွက် ဆောင်ရွက်သွားမည်ဖြစ်ကြောင်းကို ထည့်သွင်းဆွေးနွေးခဲ့ ကြောင်း သိရှိရပါသည်။
DOCA(ဧရာဝတီ)
