HighLight News

       ညောင်တုန်းမြို့နယ်အတွင်း ဆန်၊ စပါးလက်ကျန်အခြေအနေများကို တိကျမှန်ကန်စွာ စာရင်းကောက်ယူနိုင်ရေးနှင့် စားနပ်ရိက္ခာဖူလုံမှုအခြေအနေများကို စဉ်ဆက်မပြတ် စောင့်ကြည့်နိုင်ရေးအတွက် MyRo စနစ်ဖြင့် မှတ်ပုံတင်ထားသည့် လုပ်ငန်းရှင်များ၏ ဖြည့်သွင်းထားသော စာရင်းများကို မြို့နယ်စားသုံးသူရေးရာဦးစီးဌာနက လစဉ် ကြပ်မတ်ဆောင်ရွက်လျက်ရှိကြောင်း သိရသည်။

       (၃၁-၇-၂၀၂၆) ရက်နေ့အထိ MyRo စနစ်၌ ဖြည့်သွင်းထားသော စာရင်းများအရ တောင်သူများထံတွင် စပါး ၁,၆၃၄,၀၈၀ တင်းနှင့် ဆန် ၁,၇၀၀ အိတ်၊ စက်ပိုင်များထံတွင် စပါး ၃၇၉,၈၂၃ တင်းနှင့် ဆန် ၂၈၀,၄၃၃ အိတ်၊ ကုန်သည်များထံတွင် စပါး ၁၀၀,၂၀၀ တင်းနှင့် ဆန် ၁,၃၀၀ အိတ်၊ ဆန်ဆိုင်များတွင် ဆန် ၅,၂၀၀ အိတ်ရှိကြောင်း စာရင်းများအရ သိရသည်။

       ထို့ကြောင့် ညောင်တုန်းမြို့နယ်အတွင်း စုစုပေါင်း စပါး ၂,၁၁၄,၁၀၃ တင်းနှင့် ဆန် ၂၈၈,၆၃၃ အိတ် လက်ကျန်ရှိကြောင်း MyRo မှတ်ပုံတင်လုပ်ငန်းရှင်များ၏ (၃၁-၇-၂၀၂၆) ရက်စွဲဖြင့် ဖြည့်သွင်းထားသည့် စာရင်းများအရ ဖော်ပြထားကြောင်း သိရသည်။

         မြို့နယ်စားသုံးသူရေးရာဦးစီးဌာနအနေဖြင့် MyRo စနစ်တွင် လုပ်ငန်းရှင်များက စာရင်းများကို အချိန်နှင့်တစ်ပြေးညီ မှန်ကန်စွာဖြည့်သွင်းနိုင်ရေး၊ ဆန်နှင့် စပါးလက်ကျန်အခြေအနေများကို စဉ်ဆက်မပြတ် စောင့်ကြည့်နိုင်ရေးနှင့် လစဉ်စာရင်းများကို တိကျမှန်ကန်စွာ ပြုစုတင်ပြနိုင်ရေးအတွက် သက်ဆိုင်ရာလုပ်ငန်းရှင်များအား ကြပ်မတ်လမ်းညွှန် ဆောင်ရွက်လျက်ရှိကြောင်း သိရှိရပါသည်။

DOCA(ဧရာဝတီ)

      အထက်ဌာန၏ ညွှန်ကြားချက်အရ (၄-၈-၂၀၂၆) ရက်နေ့တွင် မအူပင်ခရိုင် စားသုံးသူရေးရာဦးစီးဌာနက အရေးကြီးကုန်စည်နှင့် ဝန်ဆောင်မှုဆိုင်ရာဥပဒေနှင့်အညီ ဆေးဝါးရရှိမှုနှင့် ရောင်းချမှု အခြေအနေများကို ကွင်းဆင်းစစ်ဆေးခဲ့ကြောင်း သိရသည်။

         မအူပင်မြို့နယ်ရှိ လက်ကားဆေးဆိုင်ကြီးများဖြစ်သည့် ဦးကျားဗိုလ်၊ မြမြနှင့် ဒေါ်သိန်းညွှန့် ဆေးဆိုင်များတွင် စစ်ဆေးရာ နှလုံးအားဖြည့်ဆေး Hepalucky နှင့် လေဆေး Air-X တို့မှာ ယခင်က ရောင်းချခဲ့သော်လည်း ကုမ္ပဏီမှ မှာယူမရရှိသဖြင့် (၁) လခန့် ပြတ်လပ်နေကြောင်း သိရသည်။ Hepalucky နှလုံးအားဖြည့်ဆေး၏ ရောင်းဈေးမှာ တစ်ကပ်လျှင် ၆,၂၀၀ ကျပ် ဖြစ်ပြီး Air-X လေဆေးမှာ တစ်ကပ်လျှင် ၂,၆၀၀ ကျပ် ဖြင့် ရောင်းချခဲ့ကြောင်း၊ လက်ရှိတွင် ကုမ္ပဏီမှ ဆေးဝါးအနည်းငယ် ပြန်လည်ရရှိလာသဖြင့် ပြန်လည်ဖြန့်ဖြူးရောင်းချလျက်ရှိကြောင်း စစ်ဆေးသိရှိရသည်။

         ထို့အပြင် ဓနုဖြူမြို့နယ် မြို့မဈေးကြီးအတွင်းရှိ မိဘမေတ္တာ၊ သိန်းကမ္ဘာ၊ ဦးတင်အေး၊ ရွှေတြဂံနှင့် စွမ်းထက် ဆေးဆိုင်များတွင်လည်း ကွင်းဆင်းစစ်ဆေးရာ Hepalucky နှလုံးအားဖြည့်ဆေးမှာ (၂) လခန့် ပြတ်လပ်နေသဖြင့် လက်ရှိရောင်းချနိုင်ခြင်း မရှိကြောင်း၊ Air-X လေဆေးကိုသာ ရောင်းချလျက်ရှိကြောင်း သိရသည်။ Air-X လေဆေးအား ကုမ္ပဏီခွဲမှ တိုက်ရိုက်မရရှိသဖြင့် ရန်ကုန်မြို့မှ ပြင်ပဈေးကွက်အတွင်း တစ်ကပ်လျှင် ၃,၅၀၀ ကျပ် ဖြင့် ဝယ်ယူရရှိပြီး ရောင်းချလျက်ရှိကြောင်း၊ ယခင်ရောင်းဈေးမှာ တစ်ကပ်လျှင်  ၂,၅၀၀ ကျပ် ဖြစ်ကြောင်း စစ်ဆေးသိရှိရသည်။

           ကွင်းဆင်းစစ်ဆေးစဉ် ဆေးဆိုင်များ၏ ဆေးဝါးဝယ်ယူရရှိမှု ဘောင်ချာများ၊ အရောင်းအဝယ်မှတ်တမ်းများနှင့် ဆေးဝါးရရှိမှုအခြေအနေများကို စိစစ်စစ်ဆေးခဲ့ပြီး၊ အရေးကြီးကုန်စည်နှင့် ဝန်ဆောင်မှုဆိုင်ရာ စည်းမျဉ်းစည်းကမ်းများနှင့်အညီ ရောင်းချဆောင်ရွက်ရေး၊ ဈေးနှုန်းများကို ပွင့်လင်းမြင်သာစွာ ဖော်ပြရောင်းချရေးနှင့် ဆေးဝါးရရှိမှုပြတ်လပ်မှုအခြေအနေများကို သက်ဆိုင်ရာဌာနများသို့ အချိန်နှင့်တစ်ပြေးညီ တင်ပြဆောင်ရွက်ရေးတို့ကို လမ်းညွှန်မှာကြားခဲ့ကြောင်း သိရှိရပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ ပန်းတနော်မြို့နယ်တွင် စားအုန်းဆီဖြန့်ဖြူးရောင်းချမှုလုပ်ငန်းများကို စနစ်တကျ ဆောင်ရွက်နိုင်ရေးအတွက် မြို့နယ်ဆီအသင်းနှင့် ကိုယ်စားလှယ်များက ယာယီမြို့နယ် အုပ်ချုပ်ရေးမှူးအား တွေ့ဆုံ၍ မြို့နယ်စားသုံးသူရေးရာဦးစီးဌာန မြို့နယ်တာဝန်ခံမှ စားအုန်းဆီ ဖြန့်ဖြူးရောင်းချနေမှု အခြေအနေများကို ၂၀၂၆ခုနှစ် ဩဂုတ်လ ၁ရက်နေ့က  ရှင်းလင်းတင်ပြ ဆွေးနွေးခဲ့ကြောင်း သိရသည်။

         ထိုသို့ တင်ပြရာတွင် စားအုန်းဆီရရှိမှု၊ ခွဲဝေဖြန့်ဖြူးရောင်းချနေမှုအခြေအနေ၊ ပြည်သူများထံ သတ်မှတ်စနစ်ဖြင့် ဖြန့်ဖြူးရောင်းချပေးနေမှုနှင့် လက်ရှိဆောင်ရွက်နေသည့် လုပ်ငန်းအခြေအနေများကို အသေးစိတ်ရှင်းလင်းတင်ပြခဲ့ကြောင်း သိရသည်။

       ယင်းနောက် ယာယီမြို့နယ်အုပ်ချုပ်ရေးမှူးက သဘာဝဘေးအန္တရာယ်များ ဖြစ်ပေါ်လာနိုင်သည့် အခြေအနေများအတွက် ကြိုတင်ပြင်ဆင်ထားနိုင်ရေး၊ စားအုန်းဆီပြတ်လပ်မှု မဖြစ်ပေါ်စေရေးနှင့် အရေးပေါ်လိုအပ်ချိန်တွင် ပြည်သူများအား ဆက်လက်ဖြန့်ဖြူးပေးနိုင်ရေးအတွက် သင့်တော်သော အရံစားအုန်းဆီ ထားရှိဆောင်ရွက်ရန် လမ်းညွှန်မှာကြားခဲ့ကြောင်း သိရသည်။

        ထို့ပြင် သတ်မှတ်ရည်ညွှန်းဈေးနှုန်းအတိုင်း စနစ်တကျဖြန့်ဖြူးရောင်းချရေး၊ စာရင်းဇယားများ တိကျမှန်ကန်စွာ ပြုစုထားရှိရေးနှင့် ပြည်သူများ အဆင်ပြေချောမွေ့စွာ ဝယ်ယူနိုင်ရေးကိုလည်း အလေးထားဆောင်ရွက်ကြရန် မှာကြားခဲ့ကြောင်း သိရပြီး တက်ရောက်သူ ၉ဦးရှိကြောင်း သိရှိရပါသည်။

DOCA(ဧရာဝတီ)

        စားသုံးသူရေးရာဦးစီးဌာန၊ ရန်ကုန်အနောက်ပိုင်းခရိုင်ဦးစီးမှူးရုံးမှ စစ်ဆေးရေးအရာရှိ(၂)ဦး နှင့် ဝန်ထမ်း(၂) ဦးတို့သည် ကြည့်မြင်တိုင်မြို့နယ် ညဈေးအတွင်းရှိ ဦးဝင်းနိုင်(ဆီဆိုင်) နှင့် ဦးကြည်ဝင်း (ကုန်စုံဆိုင်) တို့အား ဈေးတာဝန်ခံတို့နှင့်ပူးပေါင်းပြီး ဆီရောင်းချမှုအခြေအနေများအား ကွင်းဆင်းစစ်ဆေး အသိပညာပေးမှုအား ၄.၈.၂၀၂၆ ရက်နေ့တွင် သွားရောက်၍ ကွင်းဆင်းအသိပညာပေးမှုများအား ဆောင်ရွက်ခဲ့ကြောင်း သိရှိရပါသည်။

       ထိုသို့ ကွင်းဆင်းအသိပညာပေးရာတွင် ဆီဆိုင်များမှရောင်းချနေသော ဆီများသည် သတ်မှတ်ထားသော ရည်ညွှန်းဈေးနှုန်းများအတိုင်း ရောင်းချခြင်း ရှိ/ မရှိနှင့် ဆီဈေးနှုန်းကြီးမြင့်မှု မဖြစ်ပေါ်စေရန် စစ်ဆေးခဲ့ကြပြီး ရောင်းချနေသော ဆီကိုယ်စားလှယ်များအား ဈေးတင်ရောင်းချပါက အရေးယူခံရမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သိရှိရပါသည်။

DOCA(ရန်ကုန်)

        ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊  မြောင်းမြခရိုင်၊  ဝါးခယ်မမြို့နယ်တာဝန်ခံ ဦးအောင်မိုးနှင့် ဝန်ထမ်းများသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍(၂၄.၇.၂၀၂၆)ရက်နေ့ နေ့လယ်(၁၂၀၀)နာရီအချိန်တွင် ဝါးးခယ်မမြို့၊ မြို့မဈေးရှိ  ကုန်စုံဆိုင်များအားကုလားလေးနှင့် မြန်မာရနံ့အမှတ်တံဆိပ် ဟင်းခတ်အမွှေးအကြိုင်များတွင် ကုန်အညွှန်းအမှတ်အသား ပြည့်စုံမှု ရှိ/ မရှိ ကွင်းဆင်းစစ်ဆေး ဆောင်ရွက်ခဲ့ကြောင်း သိရပါသည်။

          ထိုသို့ကွင်းဆင်းဆောင်ရွက်ရာတွင် မြို့နယ်တာဝန်ခံဦးအောင်မိုးမှ ဝါးခယ်မမြို့၊ မြို့မဈေးရှိကုန်စုံဆိုင်များတွင် ရောင်းချနေသောကုလားလေးနှင့်မြန်မာရနံ့အမှတ်တံဆိပ် ဟင်းခတ်အမွှေးအကြိုင်ထုပ်များတွင် ကုန်အညွှန်းအမှတ်အသား ပြည့်စုံမှု ရှိ/ မရှိ စစ်ဆေးခဲ့ပြီးဆိုင်ပိုင်ရှင်များအား စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော ဥပဒေ၂၀၁၉ပါ ပြဌာန်းချက်များမှ တားမြစ်ချက်များ၊ ပြစ်မှုပြစ်ဒဏ်များ၊ ဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆိုပုဒ်မ(၄၁)ပုဒ်မခွဲ(ခ)နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာတစ်ခု (သို့)တစ်ခုထက်ပို၍တွဲ လျှက်ဖြစ်စေရေးသားဖော်ပြရမည်ဖြစ်ပြီး၊ စီးပွားရေးလုပ်ငန်းရှင်များအနေဖြင့် ကုန်စည်အမျိုးအစားအလိုက် သတ်မှတ်ထားသည့် ဥပဒေညွှန်ကြားချက်များနှင့် အညီ လိုက်နာဆောင်ရွက်ကြရန် ဈေးကွက်အတွင်းရောင်းချနေသော ကုန်စည်များတွင် ကုန်အညွှန်းအမှတ်အသား ပြည့်စုံစွာဖော်ပြထားမှုရှိ/ မရှိ၊ ဌာနမှဈေးကွက်စောင့်ကြည့်စစ်ဆေးမှုအား စဉ်ဆက်မပြတ်ဆောင်ရွက်သွားမည်ဖြစ်ကြောင်း အသိပေးပြောကြားခဲ့ကြောင်း သိရှိရပါသည်။

DOCA(ဧရာဝတီ)