ဖြေရှင်းဆောင်ရွက်ပေးမှုများ

           ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင် လပွတ္တာမြို့နယ်တာဝန်ခံ ဦးမြင့်ဌေးသည် မြို့နယ်စည်ပင်သာယာရေးအဖွဲ့နှင့်ပူးပေါင်း၍ (၁၂.၁၂.၂၀၂၃)ရက်နေ့ ညနေ (၁၄:၀၀)နာရီက  လပွတ္တာမြို့နယ်၊ အမှတ်(၁)ရပ်ကွက်ဈေးရှိ ကုန်အညွှန်းအမှတ်အသားဖော်ပြချက် ပြည့်စုံမှုရှိမရှိ နယ်မြေဈေးကွက်စောင့်ကြည့် စစ်ဆေးခြင်းဆောင်ရွက်ခဲ့ပါသည်။

            ထိုသို့ကွင်းဆင်းဆောင်ရွက်ရာတွင် မြို့နယ်တာဝန်ခံ ကုန်မျိုးစုံဆိုင်များတွင် ရောင်းချနေသော Max Plus အချိုရည်ဘူးများတွင် ကုန်အညွှန်းအမှတ်အသား ပြည့်စုံစွာဖော်ပြထားမှုရှိ/မရှိ စစ်ဆေးခဲ့ပြီးဆိုင်ပိုင်ရှင်များအား စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော ၂၀၁၉ ပါဥပဒေပြဌာန်းချက်များမှ ဥပဒေ အခန်း အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ)နှင့် (ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြစ်စေ၊ မြန်မာဘာသာ နှင့်အခြား ဘာသာတစ်ခု (သို့) တစ်ခုထက်ပို၍ တွဲလျှက်ဖြစ်စေ ရေးသားဖော်ပြရမည်ဖြစ်ကြောင်း၊ စီးပွားရေး လုပ်ငန်းရှင်များ အနေဖြင့် ဌာနမှထုတ်ပြန်ထားသော  ဥပဒေညွှန်ကြားချက်များအား   လိုက်နာဆောင်ရွက်ကြရန်   ဈေးကွက်အတွင်း ရောင်းချနေသော ကုန်စည်အမျိုးအစားအလိုက် ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/မရှိကိုလည်း ဌာနမှဈေးကွက်အတွင်း စဉ်ဆက်မပြတ်စောင့်ကြည့်စစ်ဆေးသွားမည်ဖြစ်ကြောင်း၊ ဥပဒေညွှန်ကြားချက်များအား လိုက်နာဆောင်ရွက်မှုမရှိပါက ထုတ်ပြန်ထားသောဥပဒေများအတိုင်း အရေးယူဆောင်ရွက်သွားမည်ဖြစ်ကြောင်း သိရှိရပါသည်။

DOCA(ဧရာဝတီ)

     ရှမ်းပြည်နယ်၊ ကျိုင်းတုံမြို့နယ်နေ တိုင်ကြားသူသည် ကျိုင်းတုံမြို့မှ စစ်ကိုင်းမြို့သို့ မော်တော်ယာဉ်လိုင်းတစ်ခုဖြင့် အစားအသောက်ပစ္စည်းများ ပေးပို့ရာတွင်  ဝန်ဆောင်ခကျသင့်ငွေ ၁၅,၀၀၀/-ကျပ်ကို ပေး‌ချေပြီးသော်လည်း ၁၂,၀၀၀/-ကျပ် ထပ်မံတောင်းခံသဖြင့် စားသုံးသူရေးရာဦးစီးဌာနသို့ လူကိုယ်တိုင် လာရောက်တိုင်ကြားခြင်း ဖြစ်ပါသည်။

     တိုင်ကြားမှုနှင့်ပတ်သက်၍ ရှမ်းပြည်နယ်ဦးစီးမှူးရုံးမှ တာဝန်ရှိသူများက မော်တော်ယာဉ်လိုင်းမှ တာဝန်ရှိသူများထံ  ဆက်သွယ်မေးမြန်းရာတွင် ကျိုင်းတုံမြို့မှ စစ်ကိုင်းမြို့သို့ တိုက်ရိုက်ပြေးဆွဲသော ယာဉ်လိုင်းမရှိသည့်အတွက် ကျိုင်းတုံ-တောင်ကြီး-မန္တလေးမှတဆင့် စစ်ကိုင်းမြို့သို့ ပို့ဆောင်ရပါကြောင်း၊ တိုင်ကြားသူ၏ ပစ္စည်းအားပေးပို့ရာတွင် ကျိုင်းတုံမြို့မှ စစ်ကိုင်းမြို့အထိ ပေးပို့သော ပြေစာပေါ်တွင် ငွေရှင်းပြီးဟု ရေးသားထားသော်လည်း တောင်ကြီးမြို့မော်တော်ယာဉ်လိုင်းမှ ပြေစာပေါ်တွင် ငွေတောင်းရန်ဟု ထပ်မံရေးသားထားသောကြောင့် မန္တလေးမော်တော်ယာဉ်လိုင်းက ဝန်ဆောင်ခအား ထပ်မံတောင်းခံခြင်းဖြစ်ကြောင်း ဖြေကြားခဲ့သည့်အတွက် ၁-၁၀-၂၀၂၃ ရက်နေ့တွင် တိုင်ကြားသူနှင့်မော်တော်ယာဉ်လိုင်းမှ တာဝန်ရှိသူတို့အား ခေါ်ယူတွေ့ဆုံပြီး တိုင်ကြားသူထံ ထပ်မံကောက်ခံသော ငွေကျပ် ၁၂,၀၀၀/-အား တာဝန်ရှိသူများရှေ့မှောက်တွင် ပြန်လည်ပေးအပ်ခဲ့သဖြင့် တိုင်ကြားသူမှ ကျေနပ်မှုရရှိပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

      ကရင်ပြည်နယ်၊ ဘားအံမြို့ အမှတ် ၆ ရပ်ကွက်နေ တိုင်ကြားသူသည် XXXX ကုမ္ပဏီမှ အင်တာနက် Wifi အားရယူသုံးစွဲရာတွင် အင်တာနက်လိုင်းပြတ်တောက်ခဲ့ပြီး အင်တာနက်လိုင်း ပြတ်တောက်မှု ပတ်သက်၍ ကုမ္ပဏီဘက်သို့ ဖုန်းဆက်ခေါ်ဆိုရာတွင် ခေါ်ဆိုရခက်ခဲခြင်း၊ နစ်နာမှုနှင့်ပတ်သက်၍ ကုမ္မဏီဘက်မှ ကြေညာထားသော အာမခံမှုအတိုင်းအပြည့်အဝမရရှိခြင်း၊ Call Center မှ ကျေနပ် အောင် ဖြေကြားမှုမရှိခြင်းတို့ကြောင့် ၎င်း၏နစ်နာမှုများအတွက် ကုမ္ပဏီ၏ အာမခံချက်အတိုင်း စားသုံးသူအခွင့်အရေးအပြည့်အဝ ရရှိလိုကြောင်း တင်ပြလာမှုအပေါ် စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးမျိုးဝင်းနိုင် ဦးစီးအရာရှိနှင့်စားသုံးရေးရာဌာနခွဲ တာဝန်ခံတို့သည် အင်တာနက် ဝန်ဆောင်မှုနှင့်ပတ်သက်၍ စားသုံးသူငြင်းပွားတိုင်ကြားလာမှုအပေါ်၁၁-၁၀-၂၀၂၃ ရက် နေ့၊နေ့လယ်(၁၄:၀၀)နာရီအချိန်တွင် ကရင်ပြည်နယ် စားသုံးသူရေးရာဦးစီးဌာန၊ အစည်းအဝေးခန်းမ၌ တိုင်ကြားသူနှင့် ဝန်ဆောင်မှုပေးသူ လုပ်ငန်းရှင်တို့အားခေါ်ယူတွေ့ဆုံ၍ အငြင်းပွားမှုအား ဖြေရှင်း ဆောင်ရွက်ပေးခဲ့ကြောင်းသိရသည်။

     ထိုသို့နှစ်ဦးနှစ်ဘက်ခေါ်ယူတွေ့ဆုံ၍ဖြေရှင်းဆောင်ရွက်ပေးရာတွင် ဝန်ဆောင်မှုပေးသူ XXXX ကုမ္ပဏီကိုယ်စားဘားအံရုံးခွဲတာဝန်ခံမှ စားသုံးသူနစ်နာမှုများအဆင်မပြေမှုများအတွက် တောင်းပန် ပါကြောင်း၊ အင်တာနက်ဝန်ဆောင်မှုပြတ်တောက်ချိန် ကြားကာလရက်များအတွက် ပြန်လည် အစားထိုးပေးနိုင်ရေးအတွက် ကုမ္ပဏီသို့ တင်ပြ၍ အမြန်ဆုံးဆောင်ရွက်ပေးသွားမည် ဖြစ်ပါကြောင်း၊ ထို့အပြင် Wifi မီးနီ၍ လိုင်းမတက်ခြင်းအတွက် ချက်ခြင်းဆောင်ရွက်ပေးသွားမည်ဖြစ်ပါကြောင်း သဘောတူညီမှုများကို ဌာနမှနှစ်ဦးနှစ်ဘက် ညှိနှိုင်းဆွေးနွေးပေးနိုင်ခဲ့သည်။

   ထို့နောက် ၁၁-၁၀-၂၀၂၃ ရက်နေ့ ၁၇၀၀ နာရီအချိန်တွင် ကုမ္ပဏီဘက်မှ စားသုံးသူထံဆောင်ရွက်ပေးမည့် နစ်နာမှုများအတွက် စားသုံးသူ(သုံးစွဲသူ)၏ Wifi ငွေပေးသွင်းပြီး သက်တမ်းကျန် ၁၁ ရက်အတွက် ပြန်လည်သုံးစွဲနိုင်ရန် အစားထိုးရက် ပြည်လည်ပေးအပ်ပြီး ဖြစ်ပါကြောင်း၊  ထို့အပြင် Wifi ပြတ်တောက်သည့်ကာလ ၁ လစာအား အခမဲ့အသုံးပြုခွင့်ကိုလည်း ပေးအပ်ခဲ့ပါကြောင်း၊ စားသုံးသူရေးရာဦးစီးဌာနသို့ တင်ပြခဲ့မှုအပေါ် တိုင်ကြားသူဘက်သို့ ပြန်လည်ဆက်သွယ်မေးမြန်းခဲ့ရာ ဖြေရှင်းဆောင်ရွက်ပေးမှုများအပေါ် ကျေနပ်မှုရှိပါကြောင်း ပြန်ကြားခဲ့သည့်အတွက် အမှုကို ပိတ်သိမ်းခဲ့ကြောင်း သိရသည်။

DOCA(ကရင်)

   မန္တလေးတိုင်းဒေသကြီး၊ မိတ္ထီလာမြို့နယ်နေ တိုင်ကြားသူသည် မိတ္ထီလာမြို့၊ မြို့မဈေးအတွင်းရှိ ငံပြာရည်နှင့် ဆော့စ်အမျိုးမျိုး ရောင်းချသောဆိုင်မှ ၂၄-၆-၂၀၂၃ ရက်နေ့တွင် “***” အမှတ်တံဆိပ်ငံပြာရည်ကို တစ်ပုလင်း ၃,၀၀၀/- ကျပ်ဖြင့်ဝယ်ယူခဲ့ပါကြောင်း၊ ယခင်သုံးစွဲနေကျ “***” အမှတ်တံဆိပ်ငံပြာရည်နှင့် အရသာကွာခြားမှုရှိသော်လည်း ထုတ်ပိုးမှုမှာ မူလအတိုင်းဖြစ်နေ၍ “***” အမှတ်တံဆိပ်ငံပြာရည် အစစ်ဟု ထင်မြင်၍ ဝယ်ယူခဲ့ပါကြောင်း၊ ဝယ်ယူပြီး အနံ့နမ်းကြည့်ရာ ငါး၊ ငါးပိရည် အနံ့မရဘဲ မန်ကျည်းရည်နှင့် ဆားဖျော်ထားသည့် အနံ့သာရှိပြီး အရသာမှာလည်း မန်ကျည်း အရသာဖြစ်နေသဖြင့် ဖြေရှင်းဆောင် ရွက်ပေးပါရန် စားသုံးသူရေးရာဦးစီး ဌာနသို့ ဆက်သွယ်တိုင်ကြားလာပါသည်။

    ဖြေရှင်းဆောင်ရွက်မှုအခြေအနေ။ တိုင်ကြားမှုနှင့်ပတ်သက်၍ မိတ္ထီလာခရိုင်ဦးစီးမှူးရုံးမှ စစ်ဆေးရေးအရာရှိများသည် မိတ္ထီလာမြို့မဈေးရှိ ငံပြာရည်နှင့် ဆော့စ်အမျိုးမျိုး ရောင်းချသောဆိုင်သို့ ကွင်းဆင်းစစ်ဆေးခဲ့ရာ အတုဟုယူဆရသည့် တိုင်ကြားသည့် “***” အမှတ်တံဆိပ် ငံပြာရည် (၁၀)ပုလင်းကို စစ်ဆေးတွေ့ရှိရပြီး ၎င်းငံပြာရည်များသည် ရန်ကုန်မြို့ရှိ “***” ကုမ္ပဏီမှ လာရောက်ဖြန့်ဖြူးခြင်း ဖြစ်ပါကြောင်းနှင့်  ဆိုင်ပိုင်ရှင်မှ တိုင်ကြားသူသို့   ၁၀-၈-၂၀၂၃ ရက်နေ့ မတိုင်မီ “***” အမှတ်တံဆိပ်ငံပြာရည် ဝယ်ယူခဲ့သည့် ငွေတန်ဖိုးနှင့် “***” အမှတ်တံဆိပ်ငံပြာရည် အသစ်တစ်လုံး ပေးလျော်မည်ဟု ညှိနှိုင်း သဘောတူညီမှု ရရှိခဲ့သည့်အတွက် ၂၀၂၃ ခုနှစ်၊ ဩဂုတ်လ ၉ ရက်နေ့တွင် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံး၌ ဝယ်ယူခဲ့စဉ်က ပေးချေခဲ့သော ငံပြာရည်တန်ဖိုးငွေ ၃,၀၀၀/-ကျပ် နှင့် “***” အမှတ်တံဆိပ်ငံပြာရည် အသစ်တစ်လုံးကို တိုင်ကြားသူထံ ပြန်လည်ပေးလျော်ခဲ့ရာ တိုင်ကြား သူကလည်း ကျေနပ်မှုရှိပါသဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

     မကွေးတိုင်းဒေသကြီး၊ xxxxxx မြို့နယ်၊ xxxxxx ကျေးရွာနေ၊ ဦး xxxxxx သည် (၂၇.၆.၂၀၂၃)ရက်နေ့တွင် xxxxxx လက်အိတ်ကို Online Page မှ စိုက်ပျိုးရေးသုံး လက်သည်းနှစ်ဖက်ပါသော လက်အိတ်(၁၀)စုံအား ကျသင့်ငွေကျပ်(၆၉၀၀၀)ပေးချေ၍ မှာယူခဲ့ရာ မှာယူပြီးတစ်ပတ်အကြာတွင် လက်အိတ်များ ရောက်ရှိလာကြောင်း၊ လက်အိတ်(၁)စုံအား ဖွင့်ဖောက်စစ်ဆေးရာ၌ အရောင်းဝန်ထမ်းမှ ရောင်းချစဉ်က ပြောဆိုထားသည့်အတိုင်း လက်သည်းမှာ လက်အိတ်နှစ်ဖက်လုံးတွင်ပါဝင်ခြင်းမရှိဘဲ လက်အိတ်တစ်ဖက်ထဲတွင်သာပါရှိကြောင်း၊ အရောင်း ဝန်ထမ်းထံသို့ ဖုန်းဆက်အကြောင်းကြားခဲ့ရာ ဆက်သွယ်၍မရခဲ့ဘဲ (၄.၇.၂၀၂၃)ရက်နေ့ Online Shop သို့ အဆက်အသွယ်ရရှိချိန်၌ မိမိထံ ရောက်ရှိနေသည့်ပစ္စည်းများမှာ လက်သည်းနှစ်ဖက် မပါရှိ၍ ငွေပြန်လည်အမ်းပေးရန် တောင်းဆိုခဲ့ခြင်းအပေါ် အရောင်းဝန်ထမ်းမှ သဘောတူညီ၍ ပစ္စည်းများပြန်ပို့ပေးရန် ပြောကြားခဲ့ကြောင်း၊ (၈.၇.၂၀၂၃)ရက်နေ့တွင် လက်အိတ်ပစ္စည်းများ ပြန်လည်ပေးပို့ရန်ပြင်ဆင်ချိန်၌ ၎င်း Online Shop မှ ဖုန်းဖြင့်ထပ်မံဆက်သွယ်လာပြီး အချိန်ကြန့်ကြာသွားပြီဖြစ်၍ ငွေပြန်လည်အမ်းပေးနိုင်မည် မဟုတ်ကြောင်း ပြောကြားခဲ့သည့်အတွက်  ၎င်း၏နစ်နာဆုံးရှုံးမှုအတွက် တိုင်ကြားလာခြင်းဖြစ်ပါသည်။  

     တိုင်ကြားမှုနှင့်ပတ်သက်၍ (၁၈.၇.၂၀၂၃)ရက်နေ့တွင် ဖြေရှင်းဆောင်ရွက်ပေးနိုင်ရန်အတွက် လိုအပ်သည့်အချက်အလက်များဖြစ်သော တိုင်ကြားသူဘက်မှ ပြေစာအထောက်အထား၊ ဝယ်ယူစဉ် အခါက လက်သည်းနှစ်ဖက်ပါလက်အိတ် ဝယ်ယူလိုကြောင်း အရောင်းဝန်ထမ်းနှင့် အပြန်အလှန် ပြောဆိုထားသည့်စာ/ အထောက်အထားများအား ဌာနသို့ ပေးပို့တင်ပြရန် အကြောင်းကြားခဲ့ပြီး၊ (၂၀.၇.၂၀၂၃)ရက်နေ့တွင် xxxxxx Online Page သို့ ဆက်သွယ်၍ ညှိနှိုင်းခြင်းများ ဆောင်ရွက်ခဲ့ရာ (၂၅.၇.၂၀၂၃)ရက်နေ့တွင် အဆိုပါ Online Page သို့ တိုင်ကြားလာမှုနှင့်ပတ်သက်၍ ဖြေရှင်း ဆောင်ရွက်ပေးနိုင်ရေး  အကြောင်းကြားစာပေးပို့ခဲ့ပါသည်။ (၁၀.၈.၂၀၂၃) ရက်နေ့တွင်  အရောင်းဝန်ထမ်း၏  ဖုန်းသို့ဆက်သွယ်၍ တိုင်ကြားမှုနှင့်စပ်လျဉ်း၍ အမြန်ဆုံး ဆောင်ရွက်ပေးပါရန် ထပ်မံအကြောင်းကြားခဲ့ပါသည်။ တိုင်ကြားခံရသူမှ  လက်အိတ်သည် လက်သည်းတစ်ဖက်သာပါရှိပြီး ပုံတွင်ပြထားသည့်အတိုင်းသာ ရောင်းချခဲ့ခြင်း ဖြစ်ကြောင်း၊ မှာယူသူသည်ပုံကိုကြည့်ပြီး အော်ဒါတင်ခြင်းဖြစ်ကြောင်း၊ လက်အိတ်မှာ လက်သည်း အဖြုတ်အတပ်ပြုလုပ်လို့ရပြီး လိုသလို အသုံးပြုနိုင်ကြောင်း၊ မိမိတို့အနေဖြင့်လည်း လက်အိတ် ကုမ္ပဏီဖြစ်သည့် xxxxxx နှင့် လက်တွဲဖြုတ်သွားပြီဖြစ်ကြောင်း၊ ကုမ္ပဏီမှလည်း ပြန်လည်အလျော်မပေးနိုင်ကြောင်း ပြောကြားလာသည့်အတွက် မိမိတို့အနေဖြင့် ကိုယ်စားအနူးအညွတ်တောင်းပန်အပ်ပါကြောင်း ဌာန၏ Mail သို့ (၁၃.၈.၂၀၂၃)ရက်နေ့တွင် ပြန်ကြားလာခဲ့ပါသည်။

    တိုင်ကြားသူဘက်မှ ဝယ်ယူခဲ့သည့်ပြေစာ၊ အရောင်းဝန်ထမ်းနှင့် ဝယ်ယူစဉ်ကာလက လက်သည်းနှစ်ဖက်ပါ လက်အိတ်ဝယ်ယူလိုကြောင်း ပြောဆိုထားသည့် အထောက်အထားများ၊ အရောင်း ဝန်ထမ်းမှ လက်သည်းနှစ်ဖက်ပါလက်အိတ် ပေးပို့ပေးမည်ဖြစ်ကြောင်း Online မှ ပြောဆိုခဲ့သည့် အသံဖိုင် (သို့) အထောက်အထားများအား (၃၁.၈.၂၀၂၃)ရက်နေ့အရောက် မကွေးတိုင်းဒေသကြီး၊ စားသုံးသူရေးရာဦးစီးဌာန၏ e-mail သို့ပေးပို့ပေးရန် (၂၄.၈.၂၀၂၃)ရက်နေ့တွင် ဌာနမှ တိုင်ကြားသူ ထံသို့ ထပ်မံအကြောင်းကြားစာပေးပို့ခဲ့ပါသည်။ တိုင်ကြားသူဘက်မှ တစ်စုံတစ်ရာအကြောင်းပြန် ကြားလာခြင်းမရှိပါသဖြင့် (၅.၉.၂၀၂၃)ရက်နေ့တွင် ဌာနမှ တိုင်ကြားသူအား ဖုန်းဖြင့်ဆက်သွယ် မေးမြန်းခဲ့ရာ သက်သေအထောက်အထားများ ပေးပို့တင်ပြရန်မရှိပါကြောင်း ပြောကြားလာခြင်း အပေါ် စားသုံးသူကာကွယ်ရေးဥပဒေအရ စားသုံးသူဘက်မှ ကုန်စည်၊ ဝန်ဆောင်မှုကို ရွေးချယ်ဝယ်ယူအသုံးပြုရာတွင်ပြေစာ (သို့) အထောက်အထားများ ပြည့်စုံစွာတင်ပြနိုင်မှသာ တိုင်ကြားမှုအား ဖြေရှင်းဆောင်ရွက်ပေးနိုင်မည်ဖြစ်ပြီး လိုအပ်သောအထောက်အထားများ တင်ပြနိုင်ခြင်းမရှိ သဖြင့် တိုင်ကြားသူမှ ၎င်း၏တိုင်ကြားမှုအား ဌာနမှပိတ်သိမ်းခြင်းကို လက်ခံပါကြောင်း ပြောကြားခဲ့ပါသည်။

     သို့ဖြစ်ပါ၍ စားသုံးသူများအနေဖြင့် ကုန်စည်(သို) ဝန်ဆောင်မှုကို ဝယ်ယူရာတွင် ဝယ်ယူစဉ်ကပင် ပြေစာ၊ အထောက်အထားများ၊ တောင်းခံထားရန် လိုအပ်ပြီး နစ်နာဆုံးရှုံးမှု တစ်စုံတစ်ရာ ဖြစ်ပေါ်လာ၍ တိုင်တန်းရာတွင် အထောက်အထားပြည့်စုံစွာ တင်ပြနိုင်သည်ဖြစ်၍  နစ်နာဆုံးရှုံးမှုအတွက် ပြန်လည်ကုစားပေးနိုင်မည်ဖြစ်ကြောင်း အသိပေးရေးသား တင်ပြအပ်ပါသည်။

DOCA(မကွေး)