ဖြေရှင်းဆောင်ရွက်ပေးမှုများ

Powered by Drupal

ငွေရေးကြေးရေးဝန်ဆောင်မှုကိစ္စနှင့်ပါတ်သက်၍ တိုင်ကြားလာခြင်း

ဖြေရှင်းဆောင်ရွက်ပေးမှုများ

     မကွေးတိုင်းဒေသကြီး၊ ဆိပ်ဖြူမြို့နယ်၊ xxxxxx ကျေးရွာနေ မ xxxxxxသည် ငွေထုတ်၊ ငွေလွှဲဝန်ဆောင်မှုလုပ်ငန်းလုပ်ဆောင်နေသူတစ်ဦးဖြစ်ပြီး (၂.၉.၂၀၂၃)ရက်နေ့ နံနက်ပိုင်းမှစ၍ xxxxxx accountမှာ ငွေလွှဲ/ ငွေထုတ်ပြုလုပ်၍ မရတော့ပါသဖြင့် xxxxxx centerသို့ ဆက်သွယ်ပြောကြားခဲ့ပါသည်။ သို့သော်လည်း ပြန်လည်စိစစ်ပေးခြင်းမရှိသည့်အတွက် စားသုံးသူရေးရာဦးစီးဌာန၊ မကွေးတိုင်းဒေသကြီးဦးစီးမှူးရုံးသို့ ဆက်သွယ်တိုင်ကြားလာပါသည်။

   တိုင်ကြားလာမှုနှင့်ပတ်သက်၍ ဌာနမှစိစစ်မှုများပြုလုပ်၍ အမှုအားလက်ခံခဲ့ပြီး (၅.၉.၂၀၂၃) ရက်နေ့တွင် တိုင်ကြားသူထံ ဆက်သွယ်၍ ဖြစ်စဉ်နှင့်ပတ်သက်ပြီး အသေးစိတ်မေးမြန်းခြင်း၊ တိုင်ကြားစာပုံစံ(၂)ကို ပေးပို့၍ ဖြည့်သွင်းစေခြင်းများ ဆောင်ရွက်ခဲ့ပါသည်။ (၇.၉.၂၀၂၃)ရက်နေ့ ညနေပိုင်းတွင် တိုင်ကြားမှုအား ညှိနှိုင်းဆောင်ရွက်ပေးနိုင်ရေး xxxxxx ၏ email သို့အကြောင်း ကြားစာပေးပို့ခဲ့ပါသည်။ (၈.၉.၂၀၂၃)ရက်နေ့တွင် တိုင်ကြားသူမှ ဌာနသို့ ဖုန်းဖြင့်ဆက်သွယ်လာ၍ မိမိ၏ accountမှာ ပြန်လည်အသုံးပြုနိုင်ပြီဖြစ်၍ မကွေးတိုင်းဒေသကြီး၊ စားသုံးသူရေးရာဦးစီးဌာန၏ ဖြေရှင်းပေးမှုအပေါ်ကျေးဇူးတင်ရှိပြီး  စိတ်ကျေနပ်ပါသဖြင့် အမှုအားပိတ်သိမ်းပါကြောင်း message ပေးပို့လာပါသဖြင့် အမှုပိတ်သိမ်းခဲ့သည့် ငွေကြေးဝန်ဆောင်မှု တိုင်ကြားလာခြင်းအား တင်ပြလိုက်ရပါသည်။

DOCA(မကွေး)

ဧရာဝတီတိုင်းဒေသကြီး၊ စားသုံးသူရေးရာဦးစီးဌာနမှ xxxကုမ္ပဏီတွင် အာမခံထားသည့် မော်တော်ယာဉ် 1X/xxxx ကားကိစ္စကို ဖြေရှင်းဆောင်ရွက်

ဖြေရှင်းဆောင်ရွက်ပေးမှုများ

    ဧရာဝတီတိုင်းဒေသကြီး၊ စားသုံးသူရေးရာဦးစီးဌာန CICC သို့ နစ်နာသူ အဖွဲ့အစည်းမှ မန်နေဂျင်းဒါရိုက်တာနှင့် အဖွဲ့ဝင်(၂)ဦးလိုက်ပါလာသော မော်တော်ယာဉ် 1X/xxxx မှာ ရန်ကုန်မြို့၊ xxx အာမခံကုမ္ပဏီရုံးချုပ်တွင် ၂၀၁၈ခုနှစ်မှစတင်၍ အလုံးစုံအာမခံထားရှိပြီး ၂၀၂၃ခုနှစ်၊ ဩဂုတ်လ ၂၈ရက်နေ့၊ ရန်ကုန်-နေပြည်တော် အမြန်လမ်းမကြီး၊ မိုင်တိုင် (၁၀၂/၄) တွင် မိုးရွာထားသဖြင့် လမ်းချော်ပြီး Accident ဖြစ်၍ တိမ်းမှောက်သွားရာ မော်တော်ယာဉ်ပျက်စီးမှုအပေါ် ပြန်လည်ပြုပြင်ပေးရန် xxx အာမခံကုမ္ပဏီ (ရုံးချုပ်) သို့ အကြောင်းကြားခဲ့ရာ အဆိုပါကုမ္ပဏီမှ တောင်းဆိုချက်များကို အလေးထားဆောင်ရွက်ပေးခြင်းမရှိဘဲ အကြောင်းအမျိုးမျိုးပြပြောဆိုခြင်းအပေါ်  ကျေနပ်မှုမရှိ၍ စားသုံးသူသတင်းပြန်ကြားရေးနှင့်လက်ခံဆောင်ရွက်ရေးစင်တာ (CICC) သို့ လာရောက်တိုင်ကြားခဲ့ပါသည်၊၊

       နစ်နာသူ အဖွဲ့အစည်းမှ တိုင်ကြားလာမှုအား ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ စားသုံးသူသတင်းပြန်ကြားရေးနှင့်လက်ခံဆောင်ရွက်ရေးစင်တာ (CICC) မှ ရန်ကုန်မြို့ရှိ xxx အာမခံကုမ္ပဏီမှ တာဝန်ရှိသူအား ခေါ်ယူတွေ့ဆုံ၍ ညှိနှိုင်းဆောင်ရွက်ပေးခဲ့ရာ နှစ်ဦးနှစ်ဖက်သဘောတူညီမှုဖြင့် xxx ကုမ္ပဏီမှ အလုံးစုံမော်တော်ယာဉ်အာမခံလျော်ကြေးငွေ ကျပ်သိန်းတစ်ရာရှစ်ဆယ်တိတိကို စက်တင်ဘာလ ၂၈ရက်နေ့၊ နံနက်ပိုင်းအချိန်တွင် စားသုံးသူရေးရာဦးစီးဌာန၊ ဒု-တိုင်းဦးစီးမှူး ဦးထွန်းထွန်း၊ ဌာနခွဲမှူး ဦးကျော်ဦးစိုးရီတို့ရှေ့မှောက်တွင် xxx ကုမ္ပဏီမှ တိုင်ကြားသူအား ပေးအပ်ခဲ့ကြောင်းသိရှိရပါသည်၊၊

DOCA(ဧရာဝတီ)

စားသောက်ဆိုင်မှ ညှော်နံ့ထွက်သဖြင့်တိုင်ကြားလာမှုအပေါ်ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

    စစ်ကိုင်းတိုင်းဒေသကြီး၊ မုံရွာမြို့နေ တိုင်ကြားသူသည် နေအိမ်အနီးရှိ စားသောက်ဆိုင်တစ်ဆိုင်မှ ညှော်နံ့များကြောင့် ပတ်ဝန်းကျင်တွင် နေထိုင်သူများ၏ ကျန်းမာရေး ဆိုးဝါးစွာ ထိခိုက် လျက်ရှိသဖြင့် ဖြေရှင်းဆောင်ရွက်ပေးပါရန် စားသုံးသူရေးရာဦးစီးဌာနသို့ ဆက်သွယ် တိုင်ကြားလာ ခြင်းဖြစ်ပါ သည်။ တိုင်ကြားမှုနှင့်ပတ်သက်၍ စစ်ကိုင်းတိုင်းဒေသကြီး ဦးစီးမှူးရုံးမှ တာ၀န်ရှိသူများက တိုင်ကြားမှုသည် စားသုံးသူနစ်နာမှုမဟုတ်သည့်အတွက် စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်နိုင်ခြင်းမရှိသဖြင့် တိုင်းဒေသကြီး စည်ပင်သာယာရေးအဖွဲ့၊ မုံရွာမြို့သို့ စည်ပင်သာယာရေးအဖွဲ့၏ လုပ်ထုံးလုပ်နည်းများနှင့်အညီ အရေးယူဆောင်ရွက်ပေးနိုင်ပါရန် ညှိနှိုင်း အကြောင်းကြားခဲ့ပါသည်။ မုံရွာမြို့နယ် စည်ပင်သာယာရေးအဖွဲ့မှ ၂၁-၇-၂၀၂၃ ရက်နေ့တွင် တိုင် ကြားခံရသည့် စားသောက်ဆိုင်အား ကွင်းဆင်းစစ်ဆေးရာ ဖွင့်လှစ်ရောင်းချ နေသည့် ဆိုင်ခန်းသည် လူနေအိမ်များနှင့် နီးကပ်လျက်ရှိခြင်းကြောင့် ဆိုင်ခန်းအတွင်းရှိ မီးဖိုခန်းတွင် အစားအသောက်များ ချက်ပြုတ်ရာမှထွက်ရှိသောအနံ့ဆိုးများ၊ ညှော်နံ့များအားစနစ်တကျထုတ်လွှင့်ရန် မီးခိုးခေါင်းတိုင်များ ညှော်စုပ်ဆက်များ တပ်ဆင်ထားမှုမရှိကြောင်း စစ်ဆေးတွေ့ရှိရသဖြင့် ၎င်းဆိုင်မှထွက်ရှိသည့် အနံ့ဆိုးများ၊ ညှော်နံ့များကြောင့် ပတ်ဝန်းကျင်နေထိုင်သူများ ကျန်းမာရေးထိခိုက်မှုမရှိစေရန်အတွက် မီးခိုးခေါင်းတိုင်နှင့် ညှော်စုပ်ဆက်အား ၁၅-၈-၂၀၂၃ ရက်နေ့အပြီး တပ်ဆင်ဆောင်ရွက်သွားရန်နှင့် ဆောင်ရွက်မှုမရှိပါက စည်ပင်သာယာရေး ဥပဒေနှင့်အညီ တရားစွဲဆိုအရေးယူဆောင်ရွက်သွားမည်ဖြစ်ကြောင်း ဝန်ခံကတိပြု လက်မှတ်ရေးထိုးစေခဲ့ပါသည်။ ၁၆-၈-၂၀၂၃ ရက်နေ့တွင် မြို့နယ်စည်ပင်သာယာရေးအဖွဲ့မှ တိုင်ကြားခံရသည့် စားသောက်ဆိုင်အား ကွင်းဆင်းစစ်ဆေးရာ ဝန်ခံကတိပြုထားသည့်အတိုင်း ဆောင်ရွက်ပြီးဖြစ်ပါကြောင်း ဓါတ်ပုံမှတ်တမ်းများနှင့်တကွ ပေးပို့အကြောင်းကြားလာမှုအပေါ် စားသုံးသူရေးရာဦးစီးဌာနမှ တာဝန်ရှိသူများက တိုင်ကြားသူထံ ဆက်သွယ်ရှင်းလင်းပြောကြားခဲ့ရာ ကျေနပ်မှုရှိပါကြောင်း ပြန်လည်ပြောကြားခဲ့သဖြင့် တိုင်ကြားမှုကို ပိတ်သိမ်းခဲ့ပါသည်။

 

 

 

 

ဟိုတယ်ဝန်ဆောင်ခပေးချေရာတွင် ၂ ရာခိုင်နှုန်း အပိုဆောင်းတောင်းခံသဖြင့် တိုင်ကြားလာမှုအပေါ်ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

     ရန်ကုန်တိုင်းဒေသကြီး၊ ဗဟန်းမြို့နယ်နေ တိုင်ကြားသူသည် ဟိုတယ်တစ်ခုတွင် တစ်ညအိပ် ၆၀,၀၀၀ ကျပ်ဖြင့် တည်းခိုခဲ့ပြီး ဟိုတယ်အခန်းခများ ပေးချေရာ တွင် Kpay ဖြင့် ပေးချေလျှင် ၂ ရာခိုင်နှုန်း အပိုဆောင်း တောင်းခံသဖြင့် ကျေနပ်မှုမရှိသောကြောင့် စားသုံးသူရေးရာဦးစီးဌာနသို့ ဆက်သွယ်တိုင်ကြားလာခြင်းဖြစ်ပါသည်။ တိုင်ကြားမှုနှင့်ပတ်သက်၍ မန္တလေးတိုင်းဒေသကြီး ဦးစီးမှူးရုံးမှ ဟိုတယ်တာဝန်ရှိသူများထံ  ဆက်သွယ်ဆောင်ရွက်ခဲ့ရာ ဟိုတယ်တာဝန်ခံမှ K pay ဖြင့်ပေးချေမှုများအား ၂ ရာခိုင်နှုန်း  ထပ်ဆောင်းယူသည်မှာ  မှန်ကန်ပါကြောင်း၊  မိမိတို့ Hotel အနေဖြင့်လည်း K pay ရှိ ပိုက်ဆံများ ထုတ်ယူလိုပါက ရာခိုင်နှုန်းပေးဆောင်ရသည့်အတွက် ရာခိုင်နှုန်းထပ်ဆောင်း တောင်းခံရခြင်းဖြစ်ပါကြောင်း၊ K pay ဖြင့်ပေးချေပါက ရာခိုင်နှုန်းထပ်ဆောင်းပေးရခြင်းအပေါ် မပေးမီနှုတ်ဖြင့် ရှင်းပြသော်လည်း ကြိုတင်သိရှိနိုင်မည့်အနေအထားမျိုး ဆောင်ရွက်ထားခြင်းမရှိကြောင်း ပြောကြားလာပါသည်။ စားသုံးသူရေးရာဦးစီးဌာန၊ စစ်ဆေးရေးအရာရှိများက စားသုံးသူကာကွယ်ရေးဥပဒေ ၂၀၁၉ အရ ဝန်ဆောင်မှုနှင့်စပ်လျဉ်း၍ သတင်းအချက်အလက်များကို စားသုံးသူသိရှိစေရန် ကြိုတင်အသိပေးခြင်းသည် စီးပွားရေးလုပ်ငန်းရှင်၏ တာဝန်ဖြစ်ပါကြောင်း ရှင်းလင်းဆွေးနွေးခဲ့ပြီး K pay ဖြင့်ပေးချေ လိုလျှင် အပိုဆောင်းပေးရမည့် ရာခိုင်နှုန်းကို စားသုံးသူများ မြင်သာမည့်နေရာတွင် ဗွီနိုင်းဖြင့် ချိတ်ဆွဲထားရန် ရှင်းလင်းပြောကြားခဲ့ရာ ဟိုတယ်မှ တာဝန်ရှိသူများက လိုက်နာဆောင်ရွက်သွားမည်ဖြစ်ပါ ကြောင်းနှင့် K pay ဖြင့် ငွေလွှဲထုတ်ရာတွင် အပိုဆောင်းပေးရသည့် ၂ ရာခိုင်နှုန်းအစား K pay မှ ငွေထုတ်လျှင် ကောက်ခံသည့်နှုန်းထားအတိုင်း ၀.၈ ရာခိုင်နှုန်းသာ ကောက်ခံသွားမည်ဖြစ်ပါကြောင်း ပြောကြားခဲ့ပါသဖြင့် တိုင်ကြားသူထံသို့ ဖုန်းဖြင့် ဆက်သွယ်ရှင်းလင်းခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

ဈေးဝယ်စင်တာမှ TV ဝယ်ယူခြင်းနှင့်ပတ်သက်၍ တိုင်ကြားလာမှုအပေါ် ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

    နေပြည်တော်၊ ဇမ္ဇူသီရိမြို့နယ်နေ တိုင် ကြားသူသည်*** ဈေးဝယ်စင်တာတွင် ရောင်းချနေသော *** Smart TV 43”(LED) တစ်လုံးကို ၂၉-၈-၂၀၂၂ ရက်နေ့တွင် ဝယ်ယူခဲ့ရာ အာမခံ သက်တမ်းမှာ(၂)နှစ်ဖြစ်ပြီး ၆-၅-၂၀၂၃ ရက်နေ့တွင် Display အစင်းကြောင်းပေါ်သဖြင့် ဝယ်ယူသည့်နေရာသို့ ဆက်သွယ်ပြောကြားခဲ့သော်လည်း ၎င်းဆိုင်မှ ရန်ကုန်မြို့ရှိ *** Center သို့ပို့ခဲ့ပြီး Center မှ  မှန်ကွဲ၍ ဒေါင်လိုက်အစင်းထင်ကြောင်းနှင့် ပြင်ဆင်ပါက ၄၉၆,၀၀၀/-ကျပ် ပေးရမည်ဖြစ်ကြောင်း ပြောကြားသဖြင့် ကျေနပ်မှုမရှိသောကြောင့် စားသုံးသူရေးရာဦးစီးဌာနသို့ လူကိုယ်တိုင် လာရောက်တိုင်ကြားလာပါသည်။ တိုင်ကြားမှုနှင့်ပတ်သက်၍ နေပြည်တော်ဦးစီးမှူးရုံးမှ၊  တာဝန်ရှိသူများက ၂၆-၇-၂၀၂၃ ရက်နေ့တွင် *** ဈေးဝယ်စင်တာမှ အရောင်းမန်နေဂျာအား ခေါ်ယူပြီး ဖြေရှင်းပေးနိုင်မည့်အခြေအနေ မေးမြန်းခဲ့ပါသည်။ ၂၈-၇-၂၀၂၃ ရက်နေ့တွင် တိုင်ကြားသူနှင့် *** ဈေးဝယ်စင်တာ တာဝန်ခံတို့အား တွေ့ဆုံဆွေးနွေးပေးခဲ့ရာတွင် ပစ္စည်းတင်သွင်း(Supplier)သည့် “***” ကုမ္ပဏီတွင် တာဝန်ရှိကြောင်းနှင့် ၎င်း “***” ကုမ္ပဏီမှလာ ရောက်ဖြေရှင်းရန် ၇-၈-၂၀၂၃ ရက်နေ့တွင် ချိန်းဆိုသဘောတူညီခဲ့ကြပါသည်။ *** ကုမ္ပဏီမှ ဝယ်ယူသူ၏ အမှားကြောင့် ဖြစ်ရခြင်းဖြစ်သဖြင့် တာဝန်ယူဆောင်ရွက်ပေးရန်မဖြစ်နိုင်ကြောင်း ပြောကြားလာမှုအပေါ် နေပြည်တော် ဦးစီးမှူးရုံးက *** ဈေးဝယ်စင်တာသို့ အပြည့်အဝ တာဝန်ယူရန် စီမံခန့်ခွဲရေးဆိုင်ရာ အမိန့်(ပုံစံ၁၀) ကိုချမှတ်လိုက်ပြီး *** ဈေးဝယ်စင်တာသို့ အကြောင်းကြားခဲ့ရာ *** ဈေးဝယ်စင်တာမှ တိုင်ကြားသူ နစ်နာမှုအတွက် ငွေကျပ် ၅၀၀,၀၀၀/- သို့မဟုတ် ငွေကျပ် (၅) သိန်းတန် City Gift ပေး၍ ကြိုက်နှစ်သက်ရာ ဝယ်ယူနိုင်ကြောင်း ပြန်ကြားလာခဲ့ပါသည်။ တိုင်ကြားသူမှ 32”Smart  (Samsung ) TV (၁)လုံးအား *** ဈေးဝယ်စင်တာမှ အစားထိုးဝယ်ယူလိုက်သဖြင့် နှစ်ဦးနှစ်ဖက် ကျေနပ်မှုရှိပါသောကြောင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

 

Pay အကောင့်ပိတ်ခံရ၍တိုင်ကြားလာခြင်းအပေါ် ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

      ရန်ကုန်တိုင်းဒေသကြီး၊ လှိုင်မြို့နယ်နေ တိုင်ကြားသူတစ်ဦးမှ ၎င်း၏ အသုံးပြုနေသော Pay အကောင့်အား ကြိုတင်အကြောင်းကြားမှုမရှိဘဲ အကောင့်အပိတ်ခံရသဖြင့် ဖြေရှင်းဆောင်ရွက်ပေးပါရန် စားသုံးသူရေးရာဦးစီးဌာနသို့  ဆက်သွယ်တိုင်ကြားလာပါသည်။ တိုင်ကြားမှုနှင့် ပတ်သက်၍ ဌာနမှတာဝန်ရှိသူများက သက်ဆိုင်ရာဘဏ်သို့ အကြောင်းကြားဆောင်ရွက်ခဲ့ပါသည်။ ဘဏ်၏ စိစစ်ချက်အရ ဈေးဝယ်သူတစ်ဦးသည် ၃၁-၇-၂၀၂၃ ရက်နေ့တွင် *** Jade & Jewellery Co., Ltd မှ Online Live Sale တွင် ရောင်းချသော ကျောက်စိမ်းလက်စွပ်ကိုဝယ်ယူခဲ့ပြီး ပစ္စည်း၏ အရည်အသွေးမှာ ပေးရသည့်ဈေးနှုန်းနှင့်မတန်ဟု ထင်မြင်ခဲ့သည့်အတွက် ပစ္စည်းပိုင်ရှင်နှင့် ငွေပြန်ပေးရန် ညှိနှိုင်းခဲ့ရာ သဘောမတူသဖြင့်  မိုးကုတ်မြို့မရဲစခန်းတွင် (ပ) ၅၅/၂၀၂၃ ရာဇသတ်ကြီးပုဒ်မ ၄၂၀ ဖြင့် အမှုဖွင့်၍ *** pay Call Center သို့ အကြောင်းကြားလာပါကြောင်း၊ မိုးကုတ်မြို့မရဲစခန်း၏ အကြောင်းကြားစာအရ အမှုအား စစ်ဆေးနေစဉ်ကာလအတွင်း ဆက်စပ်မှုရှိသော အကောင့်များကို ယာယီတားမြစ်ခဲ့ရာ၌ တိုင်ကြားသူ၏ အကောင့်လည်းပါဝင်နေကြောင်း၊ အမှုအား စစ်ဆေးပြီးနောက် တိုင်ကြားသူ၏ pay အကောင့်သည် အမှုဖြစ်စဉ်တွင် သက်ဆိုင်ခြင်းမရှိသည့်အတွက်  ပုံမှန်အသုံးပြု၍ရစေရန် ပြန်လည် ဖွင့်လှစ်ပေးပြီးဖြစ်ကြောင်း သက်ဆိုင်ရာဘဏ်မှ အကြောင်းပြန်ကြားလာသဖြင့် ဌာနမှ တာဝန်ရှိသူက တိုင်ကြားသူထံ ဖုန်းဖြင့်ဆက်သွယ် မေးမြန်းရာ အကောင့်ပြန်လည်ဖွင့်လှစ်ပေးပြီ ဖြစ်သောကြောင့် ကျေနပ်မှုရှိကြောင်း အကြောင်းပြန်ကြားခဲ့သဖြင့်  တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

 

အီလက်ထရောနစ်ပစ္စည်း အရောင်းဆိုင်မှ ဖုန်းဝယ်ယူခြင်းနှင့်ပတ်သက်၍ တိုင်ကြားမှုအပေါ် ဖြေရှင်းဆောင်ရွက်မှုအခြေအနေ

ဖြေရှင်းဆောင်ရွက်ပေးမှုများ

     မကွေးတိုင်းဒေသကြီး၊ မကွေးမြို့နေ တိုင်ကြားသူ သည် အီလက်ထရောနစ်ပစ္စည်း အရောင်းဆိုင်မှ ဖုန်းဝယ်ယူရာတွင် Oppo Reno 8 T အမျိုးအစားကို ဝယ်ယူရန် တိုက်တွန်းခဲ့ပြီး ဖုန်း Setting အားလည်း သေချာစွာ နားလည်အောင် ရှင်းပြခဲ့ခြင်းမရှိသည့်အတွက် သုံးစွဲ၍ အဆင်မပြေသောကြောင့် ငွေပြန်လည်အမ်းပေးစေလို ကြောင်းနှင့် ငွေပြန်လည်အမ်းပေးရန် အဆင်မပြေပါက အခြားဖုန်းအမျိုးအစားထဲမှ ငွေကြေးအလိုက် ပေး၍လဲလှယ်ပေးရန်တောင်းဆိုမှုအပေါ် ဆောင်ရွက်ပေးမှုမရှိသဖြင့် စားသုံးသူရေးရာဦးစီးဌာနသို့ တိုင်ကြားလာပါသည်။ တိုင်ကြားမှုနှင့်ပတ်သက်၍ မကွေးတိုင်းဒေသကြီးဦးစီးမှူးရုံးမှ တာဝန်ရှိသူများက အီလက်ထရောနစ်ပစ္စည်းအရောင်းဆိုင်နှင့် ဆက်သွယ်ညှိနှိုင်းဆောင်ရွက်ခဲ့ရာ ဆိုင်မှတာဝန်ရှိသူက ဝယ်ယူသူသို့ အဆင်ပြေအောင် ဖြေရှင်းပေးမည်ဖြစ်ကြောင်း ပြောကြား လာသည့်အတွက် တိုင်ကြားသူကိုယ်တိုင် အီလက်ထရောနစ်ပစ္စည်းအရောင်းဆိုင်သို့ သွားရောက်၍ငွေကျပ် ၈၉၉,၉၀၀/- ဖြင့် ဝယ်ယူခဲ့သည့် ဖုန်းအား ပြန်လည်ပေးအပ်ကာ ငွေကျပ်၂,၄၀၀,၀၀၀/-သိန်း တန်ဖိုးရှိ i Phone အမျိုးအစားဖြင့် ငွေကြေးအလိုက်ပေး၍ လဲလှယ်ဝယ်ယူခဲ့ပါသောကြောင့် နှစ်ဦးနှစ်ဖက် ကျေနပ်မှုရရှိသဖြင့် တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

 

 

 

အိမ်ရာတိုက်ခန်း ဝန်ဆောင်မှုများနှင့်ပတ်သက်၍ တိုင်ကြားလာခြင်းအပေါ် ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

ရန်ကုန်တိုင်းဒေသကြီးနေ တိုင်ကြားသူများသည် အိမ်ရာတိုက်ခန်းများ ဝယ်ယူမှု၊ ဝန်ဆောင်မှုများနှင့်ပတ်သက်၍ အာမခံထားသည့်ကာလအတွင်း ဆောက်လုပ်ပြီးစီးမှုမရှိခြင်း၊ စာချုပ်ပါ စည်းကမ်းချက်အတိုင်း ဆောင်ရွက်ပေးမှုမရှိခြင်း၊ ကြော်ငြာတွင် ဖော်ပြထားသည့် ဝန်ဆောင်မှုများအား ဆောင်ရွက်ပေးမှုမရှိခြင်း၊ အခွန်အခများ ပိုမိုကောက်ခံနေခြင်းတို့ကြောင့် ဖြေရှင်းဆောင်ရွက်ပေးပါရန် စားသုံးသူရေးရာဦးစီးဌာနသို့ ဆက် သွယ်တိုင်ကြားလာပါသည်။ တိုင်ကြားမှုနှင့်ပတ်သက်၍ ရန်ကုန်တိုင်းဒေသကြီး ဦးစီးမှူးရုံးမှ တာဝန်ရှိသူများက စေ့စပ်ညှိနှိုင်းမှုများ ဆောင်ရွက်ပေးခဲ့သော်လည်း ပြေလည်မှုမရရှိခဲ့သဖြင့် စားသုံးသူရေးရာကော်မတီသို့ တင်ပြခဲ့ရာ အိမ်ရာတိုင်ကြားမှုများနှင့် ပတ်သက်၍ ထိရောက်စွာ အရေးယူဆောင်ရွက်နိုင်ရန် အထွေထွေအုပ်ချုပ်ရေးဦးစီးဌာနမှ အဖွဲ့ခေါင်းဆောင်အဖြစ်ပါဝင်သည့် “အိမ်ရာစီမံကိန်းများ၊ တိုက်ခန်းများနှင့်ပတ်သက်၍ တိုင်ကြားမှုများအတွက် စုံစမ်းစစ်ဆေးရေးအဖွဲ့” အား ဖွဲ့စည်းခဲ့ပြီး တိုင်ကြားမှုများကို စုံစမ်းစစ်ဆေးခြင်း၊ ခေါ်ယူညှိနှိုင်းခြင်းများ ဆောင်ရွက်ခဲ့ပါသည်။

စုံစမ်းစစ်ဆေးရေးအဖွဲ့သည် အိမ်ရာတိုင်ကြားမှု(၁၅)မှုအား ဥပဒေလုပ်ထုံးလုပ်နည်းများဖြင့် ဖြေရှင်း ခြင်းထက် သက်ဆိုင်ရာ တရားရုံးတွင် တရားမကြောင်းအရ တရားစွဲဆို၍ ဖြေရှင်းဆောင်ရွက်ခြင်းက ပိုမိုသင့်တော်ကြောင်းကို ၉-၁၂-၂၀၂၂ ရက်နေ့ ကျင်းပပြုလုပ်သည့် စားသုံးသူရေးရာကော်မတီ အစည်းအဝေး(၂/၂၀၂၂)သို့ တင်ပြခဲ့ရာ တိုင်ကြားသူများ၏ နစ်နာဆုံးရှုံးမှုများကို ငဲ့ညာသောအားဖြင့် တိုင်းဒေသကြီးအစိုးရအဖွဲ့ထံသို့ တင်ပြ၍ ဖြေရှင်းဆောင်ရွက်သွားရန် ဆုံးဖြတ်ခဲ့သည့်အတွက် တိုင်း ဒေသကြီးအစိုးရအဖွဲ့သို့ တင်ပြဆောင်ရွက်ခဲ့ပါသည်။ တိုင်းဒေသကြီးအစိုးရအဖွဲ့ အစည်းအဝေး အမှတ်စဉ်(၄/၂၀၂၃)တွင် “အိမ်ရာတိုင်ကြားမှု (၁၅)မှုအား စုပေါင်း အဆောက်အဦပိုင်ဥပဒေအရ ဆုံးဖြတ်ဆောင်ရွက်သွားရန်” ဟု ဆုံးဖြတ်ချက်ချခဲ့သဖြင့်  အဆိုပါတိုင်ကြားမှုအား စုပေါင်းအဆောက် အဦပိုင်ဥပဒေအရ ဆုံးဖြတ်ဆောင်ရွက်နိုင်ရန်အတွက် ယင်းဥပဒေအား အဓိကကိုင်တွယ် ကျင့်သုံးနေ သည့် ရန်ကုန်တိုင်းဒေသကြီး မြို့ပြနှင့်အိမ်ရာဖွံ့ဖြိုးရေးဦးစီးဌာနထံသို့ အမှုလွှဲပြောင်း ပေးပို့ခဲ့ပြီး တိုင် ကြားမှုကို ၃-၈-၂၀၂၃ ရက်နေ့တွင် ပိတ်သိမ်းခဲ့ပါသည်။

DOCA (Consumer)

EV ကားများအားသွင်းသည့် CCS2 Charger များအသုံးပြု၍မရသဖြင့် တိုင်ကြားမှုအပေါ် ဖြေရှင်းဆောင်ရွက်မှုအခြေအနေ

ဖြေရှင်းဆောင်ရွက်ပေးမှုများ

ရန်ကုန်တိုင်းဒေသကြီး၊ တိုင်ကြားသူ (၂) ဦးသည် ၃-၆-၂၀၂၃ ရက်နေ့တွင် ရန်ကုန်မှ နေပြည်တော်သို့ MG ZS EV (4s2095) ကားဖြင့်လည်းကောင်း၊ ၄-၆-၂၀၂၃ ရက်နေ့ တွင် ရန်ကုန်မှ မန္တလေးသို့ MG4 EV (4S-63 88) ကားဖြင့်လည်းကောင်း အသီးသီး ခရီး ထွက်လာခဲ့ရာ လျှပ်စစ်ကားများဖြင့် ခရီးသွားရာတွင် အားသွင်းရန်အတွက် အဓိကမိုင်တိုင်များ ဖြစ်သည့် (0) မိုင်နှင့် (115) မိုင်တို့ရှိ Charging Station များတွင် EV  ကားများ ဝင်ရောက်အားသွင်းရာ CCS2 Charger များ မှာအသုံးပြု၍မရဘဲ ချို့ယွင်းနေသည့်အတွက် အမြန်ဆုံး စစ်ဆေးပြင် ဆင်ပေးပါရန် Email မှတဆင့် ၂၇-၆-၂၀၂၃ ရက်နေ့တွင်တိုင်ကြားလာပါသည်။

တိုင်ကြားမှုနှင့် ပတ်သက်၍ စားသုံးသူရေးရာဦးစီးဌာန(ရုံးချုပ်)က ဥက္ကဌ၊ လျှပ်စစ်သုံးယာဉ်နှင့် ဆက်စပ်လုပ်ငန်းများ ရင်းနှီးမြှုပ်နှံမှုနှင့် တင်သွင်း၊ တင်ပို့၊ တပ်ဆင်၊ ထုတ်လုပ်မှုမြှင့်တင်ရေးလုပ်ငန်း ကော်မတီသို့ သက်ဆိုင်ရာ ကုမ္ပဏီများသို့ အမြန်ပြင်ဆင်ပေးနိုင်ရေး ညွှန်ကြားပေးနိုင်ပါရန် တင်ပြဆောင်ရွက်ခဲ့ပါ သည်။ ရန်ကုန်တိုင်းဒေသကြီး ဦးစီးမှူးရုံးမှ စစ်ဆေးရေးမှူးများက 0 မိုင်ရှိ Charging Station များအား မြေပြင်ကွင်းဆင်း စစ်ဆေးမှုများ ပြုလုပ်ခဲ့ရာ  0 မိုင် Charging Station ရှိ CCS2 Charger များမှာ ဇွန်လ ဆန်းပိုင်းမှစ၍ အားသွင်းမှုစနစ် ချို့ယွင်းနေခြင်းဖြစ်ကြောင်း စိစစ်တွေ့ရှိ ရသဖြင့် အမြန် ပြန်လည်ပြင်ဆင်ပေးရန် Earth Renewable Energy Co.,Ltd သို့ ဆက်သွယ် ဆောင်ရွက် ခဲ့ပါသည်။  ကုမ္ပဏီမှစိစစ်ရာတွင် 0 မိုင်၊ ၁၁၅ မိုင်တို့ရှိ  Charger များတွင် MG ZS Model တံဆိပ်ကားများမှာ အားသွင်းမှုမရသည့် Software စနစ်ချို့ယွင်း နေခဲ့ကြောင်း၊ တိုင်ကြားမှု ဖြစ်ပွားခဲ့သည့် ကားများမှာလည်း MG ZS Model တံဆိပ်ကားများ ဖြစ်ကြောင်း တွေ့ရှိရသည့်အတွက် ချို့ယွင်းမှုဖြစ်ပေါ်နေ သည့် 0 မိုင်၊ ၁၁၅ မိုင်နှင့် ၂၀၁ မိုင်ရှိ Charging Station များတွင် တပ်ဆင်ထားသည့် Grasen Brand  60 KW CCS2 Chargers များအား နိုင်ငံခြားသားပညာရှင်များနှင့် ဆက်သွယ်၍ EV Chargers များ၏ Software များအား Upgrade ပြုလုပ်ပြီးဖြစ်သောကြောင့် MG ZS Model တံဆိပ် ကားများ အားသွင်းနိုင်ပြီ ဖြစ်ကြောင်း၊ ယခုတပ်ဆင်ထားသော Charger များထက် အဆင့်မြင့်အမျိုးအစား ဖြစ်သည့် Autel Digital Power Co., Ltd မှ ထုတ်လုပ်သည့် Autel Brand 60 KW CCS2 Dual Gun Chargers (2 Units) နှင့် Autel Brand 120 KW CCS2 Dual Gun Charger (1 Units)များကို အစားထိုး လဲလှယ်နိုင်ရေး ဆောင်ရွက် နေကြောင်း၊ အစားထိုးလဲလှယ်မည့် CCS2 Autel Chargers များအား တပ်ဆင်နိုင်ရန်မှာယူ တင်သွင်းမှု ဆောင်ရွက်နေစဉ်ကာလအတွင်း ယခုအသုံးပြုနေသော CCS2  Chargers များနှင့် အားသွင်းမရသောကားများ ရှိလာပါက အရေးပေါ် အားသွင်းပေးနိုင် ရန် CCS2 11 KW AC Level 2 Chargers များကို 0 မိုင်၊ ၁၁၅ မိုင်နှင့် ၂၀၁ မိုင်တို့ရှိ Charging Station များတွင် တပ်ဆင်ဆောင်ရွက်ပြီး ဖြစ်ကြောင်း အကြောင်းပြန်ကြားလာပါသည်။ စားသုံးသူရေးရာ ဦးစီးဌာနမှ တာဝန်ရှိသူများက တိုင်ကြားသူများသို့ ဆောင်ရွက်ထားရှိမှု အခြေအနေများကို အသိပေး ရှင်းလင်း ပြန်ကြားခဲ့ပြီး တိုင်ကြားမှုကို ပိတ်သိမ်းဆောင်ရွက်ခဲ့ပါသည်။

DOCA (Consumer)

ဆိုင်ကယ်အရောင်းဆိုင်နှင့်ပတ်သက်၍ တိုင်ကြားမှုအပေါ် ဖြေရှင်းဆောင်ရွက်ပေးမှုအခြေအနေ

ဖြေရှင်းဆောင်ရွက်ပေးမှုများ

      ကယားပြည်နယ်၊ လွိုင်ကော်မြို့နယ်နေ(ယခင်) တိုင်ကြားသူတစ်ဦးသည် ဆိုင်ကယ်အရောင်းဆိုင်တစ်ခုမှ ၁-၁၁-၂၀၂၀ ရက်နေ့တွင် Supernova 125 စိမ်း ယာယီ E xxxx ကို ငွေကျပ် ၉၈၀၀၀၀/- ငွေအကြေပေးဝယ်ယူခဲ့ပြီး ရောင်းချသော ဆိုင်ကယ်အရောင်းဆိုင်သို့ ဆိုင်ကယ်နှင့် ပတ်သက်သော စာရွက်စာတမ်းများကို အကြိမ်ကြိမ် သွားရောက်ညှိနှိုင်းတောင်းခံသော်လည်း လက်ဝယ်သို့ ပေးအပ်ခြင်းမရှိပါသဖြင့် ၂၇-၇-၂၀၂၃ ရက်နေ့တွင် ကယားပြည်နယ် ဦးစီးမှူးရုံး (CICC)သို့ လူထုဆက်သွယ်ရေးနည်းလမ်း (Viber)မှ တဆင့်တိုင်ကြားလာပါသည်။

    တိုင်ကြားမှုနှင့်စပ်လျဉ်း၍ စားသုံးသူရေးရာဦးစီးဌာန၊ ကယား ပြည်နယ်(CICC)တာဝန်ခံမှ ဆိုင်ကယ်အရောင်းဆိုင်ပိုင်ရှင်ထံသို့ (၂-၈-၂၀၂၃)ရက်နေ့၊ နံနက် (၁၀;၄၆) အချိန်တွင် ဆက်သွယ်ဆောင်ရွက်ရာ ဆက်သွယ်၍ မရသည့်အတွက် အကြောင်းကြား စာပေးပို့ခဲ့ပြီး နံနက် (၁၁;၂၃) အချိန်တွင် လုပ်ငန်းရှင်မှ ပြန်လည်ဆက်သွယ်လာပြီး နိုင်ငံရေးအခြေအနေအရ စစ်ရှောင်ရင်း ဆိုင်ကယ် Owner Book များ ပျောက်ဆုံးသွားရခြင်းဖြစ်ပါကြောင်း၊  မိမိတို့ ကုမ္ပဏီအနေဖြင့် မဟုတ်ဘဲ ကြားခံကုမ္ပဏီတစ်ခုဖြင့် ဆိုင်ကယ်များ တင်သွင်းခြင်းဖြစ်သည့် အတွက် အစီးရေများ၍ အချိန်ကြန့်ကြာရခြင်း ဖြစ်ပါကြောင်းနှင့်  ပျောက်ဆုံးသွားသည့် ဆိုင်ကယ်  Owner Book ပိုင်ရှင်များအား တောင်းပန်ထားပါကြောင်း၊ အဆိုပါ ဆိုင်ကယ် နံပါတ်များရရှိရေးကို မိမိတို့ ကုမ္ပဏီအနေဖြင့် ကုန်သွယ်ရေးဦးစီးဌာနတွင် ပြန်လည်လျှောက်ထားပြီး ကုန်းလမ်း ပို့ဆောင်ညွှန်ကြားမှုဦးစီးဌာန (လွိုင်ကော်ရုံး)ဖြင့် ချိတ်ဆက်ဆောင်ရွက်ထားပါကြောင်း၊ မိမိတို့အနေဖြင့် တိုင်ကြားသူ စိတ်ကျေနပ်မှုရသည်အထိ ဆောင်ရွက်ပေးသွားမည်ဖြစ်ပါကြောင်း ၊ ၂၀၂၃ခုနှစ်၊ စက်တင်ဘာလ ၃၀ ရက်နေ့မတိုင်မီ ဆိုင်ကယ်  Owner Book များရရှိရေး အာမခံဆောင်ရွက်ပေးသွားမည်ဖြစ်ပါကြောင်း၊ ဆိုင်ကယ်ဝယ်ယူသည့် နေ့ရက်မှ ယနေ့ အချိန်ထိ သက်တမ်းတိုး(၄)နှစ်စာအား တာဝန်ယူ  ဆောင်ရွက်ပေးသွားမည်ဖြစ်ကြောင်း ညှိနှိုင်းရရှိခဲ့ပါ သည်။

    (၃-၈-၂၀၂၃)ရက်နေ့၊ နံနက်(၁၀;၃၀)အချိန်တွင် တိုင်ကြားသူထံသို့ ထပ်မံဆက်သွယ်ခဲ့ရာ ဆက်သွယ်မှုရရှိခဲ့ပြီး ဆိုင်ကယ်  Owner Book များ ရရှိရေးကိစ္စနှင့် စပ်လျဉ်း၍ ဆိုင်ကယ်အရောင်းဆိုင်ပိုင်ရှင်မှ ဆောင်ရွက်ပေးမည့် အခြေအနေအား ပြောကြားခဲ့ရာ တိုင်ကြားသူမှ စိတ်ကျေနပ်လက်ခံမှုရှိပါကြောင်း ပြောကြားခဲ့သဖြင့် စားသုံးသူနှင့်လုပ်ငန်းရှင်အား ပြေလည်အောင် ဖြေရှင်းဆောင်ရွက်ပေးခဲ့ကြောင်းနှင့် သဘောတူညီချက်ရရှိထားသည့်အတိုင်း အမှန်တကယ်ဆောင်ရွက်ပေးမှုရှိ/မရှိတို့ကို စက်တင်ဘာလ ၃၀ ရက်နေ့မတိုင်မီအထိ စောင့်ကြည့် စစ်ဆေးပြီးမှသာ တိုင်ကြားမှုများကို ပိတ်သိမ်းဆောင်ရွက်သွားမည်ဖြစ်ပါကြောင်း သိရှိရပါသည်။

DOCA(ကယား)

 

Pages

Subscribe to RSS - ဖြေရှင်းဆောင်ရွက်ပေးမှုများ