၂၀၂၀-၂၀၂၁ ဘဏ္ဍာနှစ် အောက်တိုဘာလမှ ဒီဇင်ဘာလအတွင်း တိုင်းဒေသကြီး/ပြည်နယ်/ခရိုင်များ CICC တိုင်ကြားမှု ကိစ္စရပ်များ ဖြေရှင်းဆောင်ရွက်မှုအား တင်ပြအပ်ပါသည်။
သက်ဆိုင်ရာ၏ထောက်ခံချက်မရှိဘဲ ရောင်းချနေကြောင်း တိုင်ကြားလာမှုနှင့်ပတ်သက်၍ ဖြေရှင်းဆောင်ရွက်မှု
မွန်ပြည်နယ်၊ မော်လမြိုင်မြို့နယ်နေ တိုင်ကြားသူတစ်ဦးသည် xxxအမှတ်တံဆိပ် ရှောက်သီးဆေးပြားသည် သက်ဆိုင်ရာ ထောက်ခံချက်မရှိဘဲ ရောင်းချနေကြောင်း တိုင်ကြားလာမှုနှင့်ပတ်သက်၍ ၁၄-၁၂-၂၀၂၀ ရက်နေ့တွင် xxxအမှတ်တံဆိပ် ရှောက်သီးဆေးပြားလုပ်ငန်းရှင်အား ခေါ်ယူ၍ ညှိနှိုင်းဖြေရှင်းရာ ထောက်ခံချက်မရှိဘဲ ဈေးကွက်အတွင်း ဖြန့်ဖြူးရောင်းချနေသော xxxအမှတ်တံဆိပ် ရှောက်သီးဆေးပြားအား မိမိတို့သဘောဆန္ဒအလျောက် ပြန်လည်သိမ်းဆည်းသွားမည်ဖြစ်ပြီး သိမ်းဆည်းဆောင်ရွက်ခြင်းကို ၁၄-၁၂-၂၀၂၀ ရက်နေ့မှ ၃၁-၁၂-၂၀၂၀ ရက်နေ့အထိ ပြီးစီးအောင် ဆောင်ရွက်သွားမည်ဖြစ်ကြောင်း ညှိနှိုင်းဖြေရှင်းခဲ့ပြီးဖြစ်ပါသည်။
မန္တလေးတိုင်းဒေသကြီးနေ တိုင်ကြားသူ (၂) ဦးတို့သည် ၄င်းတို့၏ Account (09-xxxxxxxxx) မှ ငွေ ၁၀၇၁၆၃၅ ကျပ်နှင့် Account (09-xxxxxxxxx) မှ ၁၂၈၄၀ဝဝ ကျပ်တို့ကို ၂၅-၉-၂၀၂၀ ရက် နေ့တွင် အလွဲသုံးစား ထုတ်ယူသုံးစွဲခြင်း ခံရသဖြင့် Call Center များသို့ ဆက်သွယ်ခဲ့ရာ ဆောင်ရွက် ပေးနိုင်ခြင်းမရှိသည့်အတွက် ဖြေရှင်းဆောင်ရွက်ပေးပါရန် စားသုံးသူရေးရာဦးစီးဌာန၏ Website Complaint သို့ ဆက်သွယ်တိုင်ကြားလာပါသည်။ အဆိုပါတိုင်ကြားမှုအပေါ် မန္တလေးတိုင်းဒေသကြီး ဦးစီးမှူးရုံးက အွန်လိုင်းငွေကြေးဝန်ဆောင်မှုလုပ်ငန်းသို့ ယင်းဖြစ်စဉ်နှင့်ပတ်သက်ပြီး အသေးစိတ် ပြန်လည်တင်ပြရန် အကြောင်းကြားခြင်း၊ တိုင်ကြားသူသို့ ဆက်သွယ်၍ ဖြစ်စဉ်အသေးစိတ်အား စုံစမ်းမေးမြန်းခြင်းတို့ကို ဆောင်ရွက်ခဲ့ပြီး နှစ်ဦးနှစ်ဖက် စေ့စပ်ညှိနှိုင်းပေးခဲ့ရာ အွန်လိုင်းငွေကြေး ဝန်ဆောင်မှုလုပ်ငန်းမှ တိုင်ကြားသူတို့ ကိုင်ဆောင်ထားသော Account များထံသို့ ငွေကျပ် ၂၃၆၇၀ဝ၀ တိတိအား ပြန်လည်ထည့်သွင်းပေးခဲ့ပြီးဖြစ်သည့်အတွက် ဌာန၏ စေ့စပ်ညှိနှိုင်းပေးမှု အပေါ် အားရကျေနပ်မှုရှိကြောင်း အကြောင်းပြန်ကြားလာသဖြင့် တိုင်ကြားမှုကို အောင်မြင်စွာ ဖြေရှင်းဆောင်ရွက်နိုင်ခဲ့ကြောင်း သိရှိရပါသည်။
နေပြည်တော်ရှိ xxx မုန့်တိုက်အား စစ်ဆေးရေးအဖွဲ့စုံဖြင့် (၁၀-၁၀-၂၀၁၇) ရက်နေ့တွင် ပထမအကြိမ်သွားရောက်စစ်ဆေးခဲ့ရာတွင် သန့်ရှင်းမှု အားနည်းသဖြင့် သန့်ရှင်းမှုရှိရန်၊ ကျန်းမာရေးနှင့် ညီညွတ်ရန်လိုအပ်ကြောင်းညွှန်ကြားသည့်အပေါ်တွင် ပိုင်ရှင်ဖြစ်သူမှ (၃)လခန့် အချိန်ပေးပါရန်နှင့် ပြုပြင်ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ (၂၄-၁-၂၀၁၈) ရက်နေ့တွင် ထပ်မံစစ်ဆေးရာ အတွင်းကြမ်းခင်း မြေကြီးပေါ်တွင် မုန့်ပြုလုပ်ခြင်း၊ မုန့်နယ် သည့် စက်များဘေးတွင် ကြွက်တွင်းများရှိနေခြင်း ၊ မုန့်လုပ်သားများမှာလည်း အင်္ကျီ ဝတ်ဆင်ခြင်း မပြုဘဲ မုန်နယ်ခြင်း၊ မုန့်ထုတ်ခြင်းနှင့် မုန့်လုပ်သည့်နေရာ တဝိုက်တွင် ညစ်ပတ်၍ အနံ့ မကောင်းခြင်း စသည်တို့ကို တွေ့ရှိရ၍ နေပြည်တော်စားသုံးသူအငြင်းပွားမှု ဖြေရှင်းရေးအဖွဲ့၏ (၁/၂၀၁၈)ကြိမ်မြောက် အစည်းအဝေး၌ တင်ပြခဲ့ရာ စုံစမ်းစစ်ဆေးရေးအဖွဲ့ဖွဲ့စည်း၍ (၁၉-၃-၂၀၁၈)ရက်နေ့တွင် ထပ်မံစစ်ဆေးခဲ့ရာ အသေးစားစက်မှုလက်မှုလုပ်ငန်းတွင် မှတ်ပုံတင်ရန် လျှောက်ထားခြင်းနှင့် စားသုံးရန်သင့် ထောက်ခံချက်ရရှိပြီးဖြစ်ကြောင်းတွေ့ရှိခြင်း၊ မုန့်ဖုတ် အလုပ်ရုံအားစနစ်တကျ ပြန်လည်ပြင်ဆင်ထားခြင်း စိစစ်တွေ့ရှိရသဖြင့် လုပ်ငန်းရှင်မှ စားသုံးသူ အကာအကွယ်ပေးရေး လုပ်ငန်းစဉ်များကို အလေးထားလိုက်နာရန်နှင့် လုပ်ငန်းဆောင်ရွက်ရာ တွင် တာဝန်ယူမှုရှိသော အပြုအမူများဖြစ်ပေါ်စေရေးအတွက် စားသုံးသူ အကာအကွယ်ပေးရေး ဥပဒေပုဒ်မ၁၉၊ ပုဒ်မခွဲ (ခ) အရ ပြင်းထန်စွာသတိပေးခြင်း ဆောင်ရွက်၍ ဝန်ခံကတိလက်မှတ် ရေးထိုးစေခြင်းအား (၁၇-၅-၂၀၁၈)ရက်နေ့တွင်ပြုလုပ်သော စားသုံးသူ အငြင်းပွားမှုဖြေရှင်းရေး အဖွဲ့၏(၂/၂၀၁၈) လုပ်ငန်းညှိနှိုင်း အစည်းအဝေးတွင် မှတ်တမ်းတင်ရန် ဆုံးဖြတ်ခဲ့ပါသည်။
၁၉.၆.၂၀၁၈ ရက်နေ့၌ ရန်ကုန်တောင်ပိုင်းခရိုင်စားသုံးသူရေးရာဦးစီးဌာနမှ ကွင်းဆင်း စစ်ဆေးရာ၌ အစားအသောက်နှင့် ဆေးဝါးကွပ်ကဲရေးဦးစီးဌာနနှင့် ပူးပေါင်းကွင်းဆင်း စစ်ဆေး စဉ်က တားမြစ်ထားသော Super Shine အမှတ်တံဆိပ် ငရုတ်ဆီအား သုံးခွမြို့မစျေးတွင် ပစ္စည်းဖြန့်ဖြူးရောင်းချရန်ကားဖြင့် လာရောက်သည်ကို စစ်ဆေးတွေ့ရှိရ၍ Super Shine အမှတ်တံဆိပ် ငရုတ်ဆီအိပ်(၈၄)လုံးပါဖာ(၁၅၀)ခန့်ပါရှိ၍ အမှတ် တံဆိပ်တွင် သက်တမ်းကုန်ဆုံး ရနှင့် ဖုန်းနံပါတ်သာပါရှိ၍ စားသုံးရန်သင့်/မသင့် ရန်ကုန်တိုင်းလုပ်ငန်း ညှိနှိုင်းအစည်းအဝေး (၆/၂၀၁၈)၏ ဆုံးဖြတ်ချက်အရ စားသုံးသူအကာအကွယ်ပေးရေးဥပဒေ ပုဒ်မ ၁၉၊ ပုဒ်ခွဲ(ဃ)အရ ရန်ကုန်တိုင်းအစားအသောက်နှင့် ဆေးဝါးကွပ်ကဲရေးဦးစီးဌာနခွဲသို့ စားသုံးရန်သင့်/မသင့် စစ်ဆေးပေးရန် ပေးပို့ခဲ့ပါသည်။
ခရိုင်စားသုံးသူအငြင်းပွားမှုဖြေရှင်းရေးအဖွဲ့မှ ကွင်းဆင်းစစ်ဆေးရာတွင်(၁၅.၅.၂၀၁၈) ရက်နေ့တွင် လှိုင်မြို့နယ် လှိုင်ရတနာစျေးအတွင်း xxxကုန်စုံဆိုင်တွင် စိုက်ပျိုးရေးမွေးမြူရေးနှင့် ဆည်မြောင်းဝန်ကြီးဌာန ပိုးသတ်ဆေးမှတ်ပုံတင်အဖွဲ့မှ မသုံးစွဲရန် တားမြစ်ထုတ်ပြန်ထားသော ကျင်းထုံတံဆိပ်ဖြင့် ခြင်ဆေးခွေဗူးပေါ်တွင် ဖော်ပြထားသည့် အမျိုးအစားဓါတုပစ္စည်း၏ ပါဝင်ရာခိုင်နှုန်း ၀.၀၈% ပါဝင်သော ကျင်းထုံခြင်ဆေးဗူးများ စစ်ဆေးတွေ့ရှိ၍ စျေးတာဝန်ခံရုံးတွင် ကွင်းဆင်းအဖွဲ့၏ ညှိနှိုင်းဆောင်ရွက်ချက်ဖြင့် ကွင်းဆင်းအဖွဲ့၏ရှေ့မှောက်တွင် ခြင်ဆေးခွေများ အား ဖျက်ဆီးပြီး ရောင်းချသောဆိုင်ရှင်အားခေါ်ယူပြီးနောက်နောင်တွင် ရောင်းချခြင်း မပြုစေရန် စားသုံးသူအကာအကွယ်ပေးရေးဥပဒေပုဒ်မ ၁၉၊ ပုဒ်မခွဲ(ခ)အရ ဝန်ခံဂတိလက်မှတ်ရေးထိုးစေခဲ့ ပါသည်။
စားသောက်ကုန်နှင့် ပတ်သက်၍တိုင်ကြားမှုတွင် မာရိုးနစ်(mayonnaise) ဝယ်ယူရာတွင် သက်တမ်းလွန်၍ ပြန်လဲခိုင်းရာတွင် ဆိုင်မှရိုင်းပြစွာဆက်ဆံခြင်း၊ ဆိုင်မှရောင်းချနေသော စားသောက်ကုန်များ ကျန်းမာရေးနှင့်ညီညွတ်မှုရှိ/မရှိ၊ သက်တမ်းကုန်ပစ္စည်း ရှိ/မရှိ စစ်ဆေး ပေးရန် တိုင်ကြားလာခဲ့ခြင်းဖြစ်ပါသည်။ ဖြစ်စဉ်နှင့်ပတ်သက်၍ ပူးပေါင်းအဖွဲ့ဖြင့် ကွင်းဆင်း စစ်ဆေး၍ နောင်တွင်သက်တမ်းလွန်ပစ္စည်းများမရောင်းချရန် စားသုံးသူအကာအကွယ်ပေးရေး ဥပဒေပုဒ်မ၁၉၊ ပုဒ်မခွဲ(က)အရ ဝန်ခံကတိပြုလက်မှတ်ရေးထိုးခဲ့ပြီး ရန်ကုန်တိုင်းဒေသကြီး စားသုံးသူအငြင်းပွားမှုဖြေရှင်းရေးအဖွဲ့၏ ၄/၂၀၁၈ကြိမ်မြောက် အစည်းအဝေးဆုံးဖြတ်ချက်အရ တိုင်ကြားခံရသည့် ဆိုင်ကို တရားဝင်သတိပေးစာထုတ်ပြန်သွားရ န်ဆုံးဖြတ်ခဲ့ပါသည်။
