ဖြေရှင်းဆောင်ရွက်ပေးမှုများ

                စားသုံးသူရေးရာဦးစီးဌာန၊မိတ္ထီလာခရိုင်ရုံးအနေဖြင့်၂၀၂၂ခုနှစ်၊ ဇူလိုင်လအတွင်း ဆက်သွယ်ရေးဝန်ဆောင်မှုတစ်ခုအား စားသုံးသူပြည်သူတစ်ဦးမှတိုင်ကြားခဲ့မှုအား ဖြေရှင်းဆောင်ရွက်ပြီးစီးခဲ့ပါသည်။

        မန္တလေးတိုင်းဒေသကြီး၊ မိတ္ထီလာမြို့နေ၊ စားသုံးသူပြည်သူတစ်ဦးသည် ခဲအကုန်မခြစ်မိသော ငွေဖြည့်ကဒ်ကိုဖြေရှင်းဆောင်ရွက်ပေးပါရန် MPTသို့ အကြောင်းကြားသော်လည်း ဖြေရှင်းဆောင်ရွက်ပေးခြင်းမရှိ၍ စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးသို့ Websiteမှတဆင့် ဆက်သွယ်တိုင်ကြားလာခဲ့ပါသည်။

          စားသုံးသူရေးရာဦးစီးဌာနမှတိုင်ကြားသူအား ဆက်သွယ်ခဲ့ရာ ၎င်းသည် ငွေဖြည့်ကဒ်ဝယ်၍ မရသော နေရာသို့ ရောက်ရှိနေခဲ့သဖြင့် ၎င်း၏သူငယ်ချင်းဖြစ်သူအား ဖုန်းငွေဖြည့်ကဒ်ဝယ်ယူ၍ Onlineမှ တဆင့် ဓာတ်ပုံရိုက်ပေးပို့ရန်အကူအညီတောင်းခဲ့ရာ သူငယ်ချင်းမှ ငွေဖြည့်ကဒ်အားဓာတ်ပုံ ရိုက်ကာပေးပို့ခဲ့ပြီး ၎င်းငွေဖြည့်ကဒ်များအား လွှင့်ပစ်ခဲ့ကြောင်းသိရှိရပါသည်။ စားသုံးသူမှချက်ချင်း မထည့်သေးဘဲ မိမိအားလပ်သောအချိန်တွင် ဘေလ်ဖြည့်ကြည့်ရာ နောက်ဂဏန်း(၃)လုံးခဲခြစ်ရန် လိုအပ်‌နေကြောင်း တွေ့ရှိရသဖြင့် မိမိတွင် ဖုန်းဘေလ်ကဒ်လက်ခံ မရှိသောကြောင့် Call Centre သို့ ဆက်သွယ်ခဲ့ရာဖြေရှင်းပေးခြင်းမရှိသောကြောင့် တိုင်ကြားရခြင်းဖြစ်ကြောင်းသိရှိရပါသည်။      

ဆက်သွယ်ရေးတာဝန်ခံရုံး (အော်တိုအိတ်ချိန်း)သို့ ဆက်သွယ်မေးမြန်းခဲ့ရာ ခရိုင်ဆက်သွယ်ရေး ရုံး၊တာဝန်ခံအင်ဂျင်နီယာမှ စားသုံးသူ၏ လက်ဝယ်တွင် ငွေဖြည့်ကဒ်လက်ခံရှိပါက ခဲခြစ်၍ ဘေလ်ဖြည့်နိုင်ကြောင်း၊ QRကုဒ်အား Scanဖတ်၍ ဖြည့်၍ရကြောင်းပြောကြားခဲ့ပါသည်။ စားသုံးသူ၏ လက်ဝယ်တွင် ငွေဖြည့်ကဒ်မရှိတော့သည့်အတွက် MPT Call Centre 106 သို့ ဆက်သွယ်၍ ၎င်းငွေဖြည့်ကဒ် နှင့်အချက်အလက်များအား စစ်ဆေး၍ စားသုံးသူမှအသုံးပြုပြီးခြင်း ရှိ/မရှိစိစစ်၍ ဖြေရှင်းဆောင်ရွက် ပေးမည်ဖြစ်ပါ‌ကြောင်း စားသုံးသူရေးရာဦးစီးဌာန ၊ ခရိုင်ဦးစီးမှူးနှင့် လာရောက်‌တွေ့ဆုံဖြေရှင်း ဆွေးနွေးခဲ့ပါသည်။

          ၎င်းနောက် Call Center သို့ ဆက်သွယ်ခဲ့ရာ တိုင်ကြားသူသည် လက်ရှိအချိန်ထိ ငွေဖြည့်ကဒ်ကို အသုံးပြုထားခြင်းမရှိ‌သေးကြောင်း စစ်ဆေးတွေ့ရှိရ၍ ဘေလ်(၂၀၀၀)ကျပ်အား စားသုံးသူ၏ ဖုန်းနံပါတ်သို့ ဖြည့်ပေးခဲ့ကြောင်း စားသုံးသူမှ ပြန်လည်တင်ပြလာခဲ့ပါသည်။ စားသုံးသူကာကွယ်ပေး ရေးဥပဒေတွင် စားသုံးသူအခွင့်အရေး (၈)ချက်ရှိသကဲ့သို့ စားသုံးသူများလိုက်နာရမည့် စားသုံးသူများ လိုက်နာရမည့် တာဝန်များကိုလည်း စားသုံးသူများမှလိုက်နာရန်လိုအပ်ကြောင်း လုပ်ငန်းရှင်များအနေ ဖြင့်လည်း မိမိတို့ဝန်ဆောင်မှုများကို အကောင်းဆုံးဖြည့်ဆည်းပေးခြင်းဖြင့် တာဝန်များ လေးစား လိုက်နာရန် လိုအပ်ပါကြောင်းကို ခရိုင်ဦးစီးမှူးမှ အကျယ်တဝင့်ဆွေးနွေး ပြောကြားခဲ့ကြောင်း သိရှိရပါသည်။

DOCA(မန္တလေး)

           ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)နေ တိုင်ကြားသူတစ်ဦးက “ * * * ” အင်တာနက်ဝန်ဆောင်မှုအား ဝယ်ယူအသုံးပြုနေပြီး ၉-၅-၂၀၂၂ ရက်နေ့တွင် အင်တာနက် လိုင်းပြတ်တောက်သွားသဖြင့် “ * * * ”  Customer Service သို့ ပြုပြင်ပေးရန် အကြောင်း ကြားသော်လည်း ပြင်ဆင်ပေးခြင်းမရှိသောကြောင့် တိုင်ကြားလာမှုအပေါ် တိုင်းဒေသကြီး ဦးစီးမှူးမှ တာဝန်ရှိသူများက “ * * * ” သို့ အကြောင်းကြား ဆောင်ရွက်ခဲ့ရာ “ * * * ” Operation Center က တိုင်ကြားသူ၏ အင်တာနက်လိုင်းအား စစ်ဆေးပေးခဲ့ပါကြောင်း၊ တိုင်ကြားသူအိမ်အနီး တပ်ဆင်ထားသော “ * * * ”  Wifi ပုံးမှာ Site Down ဖြစ်နေ၍ အင်တာနက်လိုင်း ပြတ်တောက်နေခြင်းကို သက်ဆိုင်ရာ အင်ဂျင်နီယာများမှ သွားရောက် စစ်ဆေးပြီး ပြုပြင်ပေးခဲ့ကြောင်း၊ မေလအတွင်း အင်တာနက်လိုင်း အသုံးမပြုရခြင်းအတွက် လည်း ၅၀ % လျှော့ပေးမည်ဖြစ်ကြောင်းတို့ကို တိုင်ကြားသူအား ရှင်းပြခဲ့ရာ လက်ခံ သဘောတူပြီး လက်ရှိတွင်အင်တာနက်လိုင်းအား ကောင်းမွန်စွာအသုံးပြုနေပြီဖြစ်ကြောင်းကို  ၁၀-၅-၂၀၂၂ ရက်နေ့တွင် အကြောင်းပြန်ကြားလာသဖြင့် တိုင်းဒေသကြီးဦးစီးမှူးရုံးမှ တာဝန်ရှိသူများက တိုင်ကြားသူသို့ ဆက်သွယ်မေးမြန်းရာ ကျေနပ်မှုရှိသည့်အတွက် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။

          စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနရုံးသည် စားသုံးသူကာကွယ်ရေးဥပဒေအရ ကုန်စည်(သို့)ဝန်ဆောင်မှုလုပ်ငန်းများနှင့်စပ်လျဉ်း၍ စားသုံးသူနစ်နာဆုံးရှုံးမှုများအပေါ် တိုင်ကြားလာ၍သော်လည်းကောင်း၊ စားသုံးသူများဘေးအန္တရာယ်ရှိသည်ဟု ထင်မြင်ယူဆရသောကုန်စည် (သို့) ဝန်ဆောင်မှုများနှင့်စပ်လျဉ်း၍သော်လည်းကောင်း စားသုံးသူကာကွယ်ရေးဥပဒေနှင့်အညီ အရေးယူဆောင်ရွက်လျက်ရှိပါသည်။

          မန္တလေးတိုင်းဒေသကြီး၊ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးသို့ စာဖြင့် တိုင်ကြားလာသည့် ရမည်းသင်းခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ ရမည်းသင်းခရိုင်ရုံးတွင် CCTV(၄)လုံးအား မိတ္ထီလာမြို့ရှိ CCTV အရောင်းဆိုင်မှ လုပ်ငန်းရှင်ကိုယ်တိုင် တာဝန်ယူလာရောက်တပ်ဆင်ပေးခဲ့ပြီး (၃)လဖမ်းယူကြည့်ရှုနိုင်ခဲ့ပြီး (၁/၂၀၂၂)လမှစတင်၍ ဖမ်းယူကြည့်ရှုမရပါသဖြင့် တယ်လီဖုန်းဖြင့်ဆက်သွယ်ခေါ်ယူခဲ့ရာ လုပ်ငန်းရှင်မှရက်ချိန်းများပေးပြီး လာရောက်ပြုပြင်ပေးမှုမရှိခြင်း၊ အားကစားနှင့်ကာယပညာဦးစီးဌာနတွင် CCTV(၃)လုံးအား (၁.၃.၂၀၂၂)ရက်နေ့တွင် ၎င်းဆိုင်မှပင်တာဝန်ယူ၍ လာရောက်တပ်ဆင်ခဲ့ပြီး CCTV (၁)လုံးမှာ Error ဖြစ်နေပါသဖြင့် တပ်ဆင်ပြီး (၃)ရက်အကြာ(၄.၃.၂၀၂၂)ရက်နေ့တွင် တာဝန်ယူတပ်ဆင်ခဲ့သော လုပ်ငန်းရှင်အား တယ်လီဖုန်းဖြင့်ဆက်သွယ်၍ အကျိုးအကြောင်းပြောကြားခဲ့ရာ တစ်ပတ်အတွင်း လာရောက်ပြုပြင်ပေးမည်ဖြစ်ကြောင်း ပြောကြားခဲ့သော်လည်း လာရောက်ပြုပြင်ပေးခြင်း မရှိသည့်ကိစ္စနှင့်ပတ်သက်၍ စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံးမှ လုပ်ငန်းရှင်အား ဆက်သွယ်၍ ဖြေရှင်းခဲ့ရာ လုပ်ငန်းရှင်မှ နေ့ချင်းပြီးသွားရောက်ပြင်ဆင်ပေးခဲ့ကြောင်းနှင့် စားသုံးသူအနေဖြင့်လည်း စားသုံးသူရေးရာဦးစီးဌာနမှ ဖြေရှင်းပေးမှုအား စိတ်ကျေနပ်မှု အပြည့်အဝရရှိသည့်အတွက် တိုင်ကြားထားသည့်အမှုအား အမှုပိတ်သိမ်းပေးရန် တင်ပြခဲ့ကြောင်းသိရှိရပါသည်။ မိတ္ထီလာခရိုင် စားသုံးသူသတင်းပြန်ကြားရေးနှင့်တိုင်ကြားမှု လက်ခံဆောင်ရွက်ရေးစင်တာ(CICC)ရုံးအနေဖြင့် နေ့စဉ်ဖွင့်လှစ်၍ တိုင်ကြားမှုများအား နေ့စဉ်လက်ခံဆောင်ရွက်လျှက်ရှိကြောင်း သိရှိရပါသည်။

DOCA(မန္တလေး)

             ရန်ကုန်တိုင်းဒေသကြီး၊ ကမာရွတ်မြို့နယ်နေ တိုင်ကြားသူသည် “ * * * ” အီလက်ထရွန်းနစ် အရောင်းဆိုင်မှ ၈-၃-၂၀၂၂ ရက်နေ့တွင် 1000W ရှိသည့် Inverter အား (၂)သိန်းကျပ်ဖြင့် ဝယ်ယူခဲ့ပြီးနောက် ၁၀-၃-၂၀၂၂ ရက်နေ့တွင် ပျက်စီးသွားပါသဖြင့် ဆိုင်သို့ပြန်လည် ပြသရာ တွင် တာဝန်ယူပေးမှုမရှိသည့်အတွက် အရေးယူပေးပါရန် စားသုံးသူရေးရာဦးစီးဌာနသို့  Email ဖြင့် တိုင်ကြားလာမှုအပေါ် ၄-၅-၂၀၂၂ ရက်နေ့တွင် တိုင်ကြားသူနှင့် တိုင်ကြားခံရသူ တို့အား တိုင်းဒေသကြီးဦးစီးမှူးရုံးသို့ခေါ်ယူ၍ စေ့စပ်ညှိနှိုင်းမှုဆောင်ရွက်ရာတွင်  “ * * * ”  အီလက်ထရွန်းနစ်မှ တာဝန်ရှိသူက ယခုဖြစ်စဉ်အတွက် တာဝန်ယူ ဆောင်ရွက်ပေးမည် ဖြစ်ပါကြောင်းနှင့် တိုင်ကြားသူစိတ်တိုင်းကျ ဆောင်ရွက်ပေးသွားပါမည်ဟု ဆွေးနွေးတင်ပြ သောကြောင့် တိုင်ကြားသူမှ Inverter စက်ဖိုးငွေ (၂)သိန်းကျပ်အား ပြန်လည်တောင်းခံသည့် အတွက် တိုင်းဒေသကြီးဦးစီးမှူးရုံးရှိ သက်ဆိုင်ရာအရာရှိများ ရှေ့မှောက်တွင် စက်ဖိုး‌ငွေ (၂) သိန်းကျပ်အား ပြန်လည်ပေးအပ်ခဲ့ပြီး တိုင်ကြားသူမှလည်း ကျေနပ်မှုရှိပါသောကြောင့် တိုင်ကြားမှုအား ပိတ်သိမ်းဆောင်ရွက်ခဲ့ပါသည်။

                   စစ်ကိုင်းတိုင်းဒေသကြီးတွင် သီးနှံမျိုးစေ့ဝယ်ယူစိုက်ပျိုးပြီး နစ်နာဆုံးရှုံးမှုကြောင့် တိုင်ကြားခဲ့သော အမှုကိစ္စများ ရှိခဲ့ပါသည်။ စားသုံးသူကာကွယ်‌ရေးဥပဒေအရ စားသုံးသူဆိုသည်မှာ ကုန်စည် သို့မဟုတ် ဝန်ဆောင်မှုကို ကုန်သွယ်ရောင်းဝယ်မှုအတွက်သော်လည်းကောင်း၊ အခြားသူ အတွက်သော်လည်းကောင်း ရည်ရွယ်၍ ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်း ပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုသည်။ သို့ဖြစ်ပါ၍ သီးနှံမျိုးစေ့ ဝယ်ယူစိုက်ပျိုးသော တောင်သူ/လယ်သမားအနေဖြင့် စားသုံးသူဥပဒေအရ စားသုံးသူ၏ အဓိပ္ပါယ် ဖွင့်ဆိုချက်တွင် အကျုံးမဝင်ပေ။ သို့သော် တောင်သူ/လယ်သမားအနေဖြင့် သီးနှံမျိုးစေ့ဝယ်ယူပြီး စိုက်ပျိုးသည့်အခါ မျိုးစေ့ကုမ္ပက အာမခံထားသည့်အတိုင်း အပင်ပေါက်နှုန်းအပါအဝင် အခြား အချက်များနှင့် ကိုက်ညီမှုမရှိပါက နစ်နာသည့် End User ဖြစ်ပြီး ၎င်းတို့အနေဖြင့် ကုစားခွင့် ရရှိသင့်ပေသည်။ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် သီးနှံမျိုးစေ့ ဝယ်ယူခြင်းနှင့်ပတ်သက်၍  တိုင်ကြားမှုအား စိုက်ပျိုးရေးဦးစီးဌာနနှင့် ပေါင်းစပ်ညှိနှိုင်း၍ ကုစားခွင့်ရရှိရေး ဆောင်ရွက်ပေးခဲ့ရသည့် တိုင်ကြားမှု(၂)ခု ရှိခဲ့ပါသည်။

                  ပထမတိုင်ကြားမှုမှာ စပါးစိုက်သော ဒေသမှ တောင်သူများသည် ကုမ္ပဏီတစ်ခုမှ မျိုးစပါး ဝယ်ယူစိုက်ပျိုးပြီးနောက် စပါးပင်များ မဖြစ်ထွန်းသဖြင့် ဖြစ်စဉ်တူညီသည့်တောင်သူများ စုစည်းပြီး စိုက်ပျိုးရေးဦးစီးဌာနထံသို့ တိုင်ကြားခြင်းဖြစ်ပါသည်။ စိုက်ပျိုးရေးဦးစီးဌာနက တာဝန်ယူ ဆောင်ရွက်လျက်ရှိသော  မျိုးစေ့ဥပဒေတွင်   " မျိုးစေ့ဝယ်ယူအသုံးပြုသူများသည် မျိုးစေ့၏ အရည်အသွေးညံ့ဖျင်းမှုကြောင့် ဆုံးရှုံးနစ်နာမှု တစ်စုံတစ်ရာပေါ်ပေါက်လျှင် မျိုးစေ့တန်ဖိုးအပါအဝင် စိုက်ပျိုးထုတ်လုပ်မှု ကုန်ကျစရိတ်နှင့် အကျိုးအမြတ်ငွေဆုံးရှုံးမှုအတွက် သက်ဆိုင်ရာဥပဒေနှင့် အညီ မျိုးစေ့ဖြန့်ဖြူး ရောင်းချသူများထံ လျော်ကြေးတောင်းခံပိုင်ခွင့်ရှိသည်" ဟုပါရှိပါသည်။ သို့ဖြစ်ပါ၍ သက်ဆိုင်ရာ ဌာနဆိုင်ရာတာဝန်ရှိသူများ ပါဝင်သည့် စစ်ဆေးရေးအဖွဲ့ဖြင့် ကွင်းဆင်း စစ်ဆေး ပြီးနောက် တိုင်ကြားခံရသည့် ကုမ္ပဏီက တောင်သူများသို့  စိုက်ဧကအလိုက် သတ်မှတ် လျော်ကြေးပေးအပ်စေရေး ပူးပေါင်းဆောင်ရွက်ပေးခဲ့ပါသည်။

                ဒုတိယတိုင်ကြားမှုမှာ ဟင်းသီးဟင်းရွက်စိုက်ပျိုးသော ဒေသမှ တောင်သူ(၂)ဦး ဦးဆောင်၍  စားသုံးသူရေးရာဦးစီးဌာနသို့ တိုင်ကြားလာသောကိစ္စ ဖြစ်ပါသည်။ ပန်းဂေါ်ဖီမျိုးစေ့အမျိုးအစားတူ ဝယ်ယူစိုက်ပျိုးခဲ့သော တောင်သူ(၆)ဦး၏စိုက်ခင်းတွင် ပန်းဂေါ်ဖီများအပွင့် ဖြစ်ထွန်းပြီးမှ အရောင်ပြာသွားသဖြင့် ရောင်းချမရတော့ဘဲ နစ်နာဆုံးရှုံးရသဖြင့် မျိုးမကောင်းသောကြောင့်ဖြစ်ရသည်ဟု ယူဆ၍ မျိုးစေ့ဖြန့်ဖြူးသည့် ကုမ္ပဏီအား တိုင်ကြားခြင်းဖြစ်ပါသည်။ စိုက်ပျိုးရေးဦးစီးဌာနမှ ဖြေရှင်းပေးရမည်ဖြစ်သော်လည်း ၎င်းတို့အနေဖြင့် စားသုံးသူရေးရာဦးစီးဌာနက နစ်နာမှုများကို ညှိနှိုင်းဖြေရှင်းပေးနေကြောင်း ကြားသိရသဖြင့် ညှိနှိုင်းပေးပါရန် တိုင်ကြားလာခြင်း ဖြစ်ပါသည်။ စစ်ကိုင်းတိုင်းဒေသကြီး၊ စားသုံးသူရေးရာဦးစီးမှူးရုံးအနေဖြင့် စိုက်ပျိုးရေးဦးစီးဌာနသို့ ညှိနှိုင်း၍ ပူးပေါင်းဆောင်ရွက်ရာ မျိုးကြောင့်သာမဟုတ်ဘဲ   စိုက်ပျိုးချိန်စောသွားခြင်းကြောင့်လည်း  ထိုသို့ ဖြစ်ပွားရခြင်းဖြစ်ကြောင်း စိစစ်တွေ့ရှိခဲ့ပါသည်။ ထို့ကြောင့် မျိုးဖြန့်ဖြူးသည့် ကုမ္ပဏီအနေဖြင့် စိုက်ရမည့်အချိန်ကို သေချာသိရှိစေရေး သတင်းအချက်အလက်ဖော်ပြရန်နှင့် စိုက်ပျိုးမည့်သူများအား သတင်းအချက်အလက်ပြည့်စုံစွာပေးရန် ပျက်ကွက်မှု၊ အပင်ပေါက်နှုန်းကောင်းမည် ဟူသော အာမခံချက်မရှိသကဲ့သို့ သဘောသက်ရောက်နေခြင်းတို့ကြောင့် မျိုးဖြန့်ဖြူးသည့် ကုမ္ပဏီဘက်က တာဝန်ယူပေးရန် ညှိနှိုင်းဆောင်ရွက်ခဲ့ရာ နစ်နာသည့် သီးနှံစိုက်ပျိုးသူများသို့ မျိုးစေ့အစားထိုး ပြန်ပေးခြင်းနှင့် ပိုးသတ်ဆေး၊ မြေဆီထောက်ပံ့ပေးခြင်းတို့ ဆောင်ရွက်ပေးခြင်းဖြင့် ဖြေရှင်းဆောင်ရွက်ပေးခဲ့ပါသည်။

DOCA(စစ်ကိုင်း)