ဖြေရှင်းဆောင်ရွက်ပေးမှုများ

     ရန်ကုန်တိုင်းဒေသကြီးနေ တိုင်ကြားသူတစ်ဦးသည်  ဆေးဝါး(၂)မျိုးကို တန်ဖိုးငွေ  (၂)သိန်းကျော်ဖြင့် ရပ်ကွက်အတွင်း ရောင်းချနေသောကြောင့် ၎င်းဆေးဝါးများသည် FDA ခွင့်ပြုချက် ရှိ/မရှိနှင့် တရားဝင်ဆေးဝါးများ ဟုတ်/မဟုတ်ကို အများပြည်သူ သိရှိနိုင်စေရန်အတွက် စစ်ဆေးပေးနိုင်ပါရန် Website Complaint System  မှတစ်ဆင့် တိုင်ကြားလာပါသည်။

   တိုင်ကြားမှုနှင့်ပတ်သက်၍ တိုင်းဒေသကြီးဦးစီးမှူးရုံးမှ တာဝန်ရှိသူများက အစားအသောက်နှင့် ဆေးဝါးကွပ်ကဲရေးဦးစီးဌာနသို့ လိုအပ်သည့် စစ်ဆေးမှုများ ဆောင်ရွက်ပေးပါရန် ညှိနှိုင်းအကြောင်းကြားစာ ပေးပို့ဆောင်ရွက်ခဲ့ရာ တိုင်ကြားစာပါ ဆေးဝါး(၂)မျိုးအနက် တစ်မျိုးမှာ FDA တွင် မှတ်ပုံတင် ဆောင်ရွက်ထားမှုမရှိပါကြောင်းနှင့် ကျန်တစ်မျိုးမှာ အစားအသောက်ဌာနခွဲတွင် သွင်းကုန်ကျန်းမာရေးထောက်ခံချက် ရရှိထားပြီးဖြစ်ပါကြောင်း အစားအသောက်နှင့်ဆေးဝါးကွပ်ကဲရေးဦးစီးဌာနမှ ပြန်လည်အကြောင်းကြားလာသည့်အတွက် ဌာနမှတာဝန်ရှိသူများက တိုင်ကြားသူထံ ဖုန်းဖြင့်ဆက်သွယ် အကြောင်းပြန်ကြားပေးရာတွင် “ဌာနဆိုင်ရာများအနေဖြင့် ပြည်သူများ၏အသံအား နားထောင်ပေးသည့်အတွက် ကျေးဇူးတင်ရှိပါကြောင်းနှင့် FDA ထောက်ခံချက်မရှိဘဲ တင်သွင်းနေမှုများကိုလည်း ဆက်လက်အရေးယူ ဆောင်ရွက်ပေးပါရန်” တိုင်ကြားသူမှ ပြန်လည်ဖြေကြားခဲ့ပါသည်။ တိုင်ကြားလာသော ဆေးဝါးများနှင့် ပတ်သက်၍ ဆက်လက်အရေးယူ ဆောင်ရွက်နိုင်ရေး တိုင်ကြားမှုကို အစားအသောက်နှင့်ဆေးဝါးကွပ်ကဲရေးဦးစီးဌာန(ရန်ကုန်)သို့ အမှုလွှဲပြောင်းပေးပို့ခဲ့ပြီး တိုင်ကြားမှုကို ဖြေရှင်းဆောင်ရွက်ခဲ့ပါသည်။

DOCA(Consumer Affair)

     ပဲခူးတိုင်းဒေသကြီး၊ ပြည်မြို့နေ တိုင်ကြားသူ တစ်ဦးသည် ၄-၅-၂၀၂၃ ရက်နေ့တွင် ပြည်ခရိုင် ဦးစီးမှူးရုံးမှတဆင့် ၁-၅-၂၀၂၃ ရက်နေ့တွင် ပြည်မြို့၊ကားကြီးဝန်းအတွင်းရှိ မော်တော်ယာဉ်လိုင်းဖြင့် ဟင်္သာတမြို့ရှိ မိတ်ဆွေထံသို့ ကုန်ပစ္စည်းတင်ပို့ခဲ့ရာ မော်တော်ယာဉ်ဂိတ်မှ ပစ္စည်းလက်ခံသော စာရေးအနေဖြင့် မိမိအားအများရှေ့တွင် မချေမငံပြောဆို ဆက်ဆံသည့်အတွက် မိမိအနေဖြင့် စိတ်ပိုင်းဆိုင်ရာ ထိခိုက်နစ်နာမှု ဖြစ်ပေါ်ခဲ့သဖြင့် တိုင်ကြားလာပါသည်။ တိုင်ကြားမှုနှင့်ပတ်သက်၍ ပြည်ခရိုင်ဦးစီးမှူးရုံးနှင့် ပြည်ခရိုင် စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာမှ တာဝန်ရှိသူများသည် ၅-၅-၂၀၂၃ ရက်နေ့တွင် ပြည်ခရိုင်ဦးစီးမှူးရုံးသို့ တိုင်ကြားသူနှင့် တိုင်ကြားခံရသူတို့အား ခေါ်ယူတွေ့ဆုံမေးမြန်းရာတွင် တိုင်ကြားသူအနေဖြင့် ဟင်္သာတမြို့ရှိ မိတ်ဆွေထံသို့ ကုန်ပစ္စည်းတင်ပို့ရန်ရှိပါသဖြင့် ပြည်မြို့ ကားကြီးဝန်းရှိ ကားဂိတ်များတွင် စုံစမ်းမေးမြန်းပြီး မော်တော်ယာဉ်လိုင်းဖြင့် ပေးပို့ရန်အတွက် အဆိုပါဂိတ်သို့ ပစ္စည်းအပ်နှံရာတွင် ဂိတ်မှပစ္စည်းလက်ခံသည့် ဝန်ထမ်းမှာအခြားဂိတ်များသို့ လိုက်လံမေးမြန်းခြင်းကို မကျေနပ်သည့်အတွက် မိမိအား လူအများရှေ့တွင် မချေမငံပြောဆိုဆက်ဆံခံရသဖြင့် မိမိအနေဖြင့် စိတ်ပိုင်းဆိုင်ရာထိခိုက်နစ်နာပြီး စိတ်ကြိုက်ရွေးချယ်ပိုင်ခွင့် မရရှိခြင်းတို့ကြောင့် တိုင်ကြားရခြင်းဖြစ်ပါကြောင်း မေးမြန်းသိရှိရသည့်အတွက် မော်တော်ယာဉ်လိုင်း ကုန်ပစ္စည်းလက်ခံဌာန မှ တာဝန်ခံအား မေးမြန်းရာတွင် မိမိအနေဖြင့် အဆိုပါ ဖြစ်စဉ်အား မသိရှိခဲ့ပါကြောင်း၊ ယင်းအချိန်တွင် မိမိအနေဖြင့် ဂိတ်ပြင်ပသို့ ရောက်ရှိနေပါကြောင်း၊ ကုန်လက်ခံရန် တာဝန်ပေးအပ်ထားသည့် ဝန်ထမ်း၏ ပြောဆိုဆက်ဆံမှု အားနည်းခြင်းကြောင့်ဖြစ်ခဲ့ရပါကြောင်း၊ မိမိတို့ဂိတ် အနေဖြင့် နောက်နောင်တွင် ယခုလိုအဖြစ်မျိုးမဖြစ်အောင် စားသုံးသူပြည်သူများအပေါ်လည်း ခွဲခြားဆက်ဆံမှုမရှိဘဲ အလေးထားဆက်ဆံသွားမည်ဖြစ်ပါကြောင်း၊ ဂိတ်မှ ကုန်လက်ခံသည့်ဝန်ထမ်းကိုလည်း သတိပေးဆုံးမသွားမည်ဖြစ်ပါကြောင်း၊ နောက်နောင် ယခုလိုဖြစ်စဉ်မျိုး ဖြစ်ပေါ်လာပါက စားသုံးသူကာကွယ်ရေး ဥပဒေနှင့်အညီ အရေးယူဆောင်ရွက်ခံရမည်ကိုလည်းသိရှိပါကြောင်း၊ ဝန်ခံကတိပြုလက်မှတ်ရေးထိုးပြီး တာဝန်ရှိသူများရှေ့တွင် စိတ်ကျေနပ်မှုရရှိသည်အထိ တောင်းပန်ခဲ့ရာ တိုင်ကြားသူမှလည်း ကျေနပ်မှုရရှိခဲ့သည့်အတွက် စားသုံးသူကာကွယ်ရေးဥပဒေ ပုဒ်မ ၄၆၊ ပုဒ်မခွဲ(င)အရ ညှိနှိုင်းဖြေရှင်းပေးပြီးနောက် တိုင်ကြားမှုကို  ပိတ်သိမ်းဆောင်ရွက်ခဲ့ပါသည်။

DOCA(consumer affairs)

      စစ်ကိုင်းတိုင်းဒေသကြီး၊ ရွှေဘိုခရိုင်၊ ရွှေဘိုမြို့နေ တိုင်ကြားသူသည် Online Shop Facebook Page မှ Honda Giorno 50CC Efi မော်တော်ဆိုင်ကယ်ကို ငွေကျပ်သုံးသိန်းလေးသောင်း(၃၄၀၀၀ဝိ/-)ဖြင့် ဝယ်ယူခဲ့ပြီး ကျသင့်ငွေအား KBZ pay ဖြင့်ငွေပေးချေခဲ့ကြောင်း၊ ငွေလွှဲပြီးသော်လည်း ပစ္စည်းပေးပို့လာခြင်းမရှိသည့်အတွက် ဖုန်းဖြင့်ဆက်သွယ်သော်လည်းမရသဖြင့် နစ်နာမှုအား ဖြေရှင်းဆောင်ရွက်ပေးပါရန် စားသုံးသူရေးရာဦးစီဌာန၏ Facebook စာမျက်နှာသို့ Messenger မှတစ်ဆင့် တိုင်ကြားလာပါသည်။ တိုင်ကြားမှုနှင့်ပတ်သက်၍ တိုင်ကြားခံရသည့် Online Shop ၏လိပ်စာမှာ မြဝတီမြို့ဖြစ်သောကြောင့် စစ်ကိုင်းတိုင်းဒေသကြီးဦးစီးမှူးရုံးအနေဖြင့် ကရင်ပြည်နယ်ဦးစီးမှူးရုံးသို့ချိတ်ဆက်၍ Online Shop ဆိုင်သည် ဖော်ပြပါလိပ်စာတွင် အမှန်တကယ်ရှိ/မရှိနှင့် တိုင်ကြားခံရသူ၏ ဖုန်းနံပါတ်၊ လိပ်စာနှင့်အမည်တို့အား စုံစမ်းခဲ့ပါသည်။    

     ကရင်ပြည်နယ်ဦးစီးမှူးရုံးကလည်း တိုင်ကြားခံရသည့် Online Shop Facebook Page ဖြစ်သော (××××××)ဆိုင်ပါ ဖုန်းနံပါတ်အား ဆက်သွယ်ခဲ့ရာ ဖုန်းမကိုင်ခြင်း၊ ဖုန်းပြန်ချပစ်ခြင်း၊ စက်ပိတ်ထားခြင်း၊ တိုင်ကြားစာတွင် ဖော်ပြထားသည့်ဆိုင်လိပ်စာသို့ မြေပြင်ကွင်းဆင်းစုံစမ်းခဲ့ရာ အဆိုပါ ကုမ္ပဏီမရှိသည့်အပြင် လိပ်စာအနီးတစ်ဝိုက်တွင်လည်း ဆိုင်ကယ်အရောင်းဆိုင်မရှိကြောင်း စုံစမ်း တွေ့ရှိခဲ့ပါသည်။

    ဖြစ်စဉ်နှင့်ပတ်သက်၍ စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူးနှင့် တာဝန်ရှိသူများသည် (၂၂-၅-၂၀၂၃) ရက်နေ့တွင် တိုင်ကြားသူနှင့်တွေ့ဆုံ၍ တိုင်ကြားသည်မှစ၍ အဆင့်ဆင့်စုံစမ်းရရှိမှုအခြေအနေများ၊ လက်ရှိကာလ၌ Online Shop ဖြင့် ရောင်းချမှုများ တွင်ကျယ်လျက်ရှိကြောင်း၊ Online Shop ဖြင့်ဝယ်ယူမည်ဆိုပါက ပစ္စည်းတန်ဖိုးအနည်း/အများမခွဲခြားဘဲ ဝယ်ယူမည့်သူက စိစစ်သုံးသပ်ရမည့်အချက်များရှိပါကြောင်း၊ စားသုံးသူရေးရာဦးစီးဌာန၏ Website နှင့် Facebook Page တို့တွင်သတိပြုရန်အချက်များကို ဖော်ပြထားသဖြင့် လေ့လာနိုင်ပြီး သိရှိလိုက်နာဆောင်ရွက်နိုင်ကြောင်းနှင့် ဌာနကဆောင်ရွက်နေသောလုပ်ငန်းများအကြောင်း အသိပညာပေး ရှင်းလင်းဆွေးနွေးခဲ့ရာ တိုင်ကြားသူကလည်း စိတ်ကျေနပ်မှုရှိပါသောကြောင့် တိုင်ကြားမှုကို ပိတ်သိမ်းခဲ့ပါသည်။

DOCA(စစ်ကိုင်း)

    ရန်ကုန်တိုင်းဒေသကြီးနေ တိုင်ကြားသူတစ်ဦးသည် ၁၃-၂-၂၀၂၃ ရက်နေ့တွင် တိုင်းဒေသကြီးဦးစီးမှူးရုံးမှတဆင့် ကုန်ပစ္စည်းပို့ဆောင်ရေး ဝန်ဆောင်မှုနှင့်ပတ်သက်၍ တိုင်ကြားလာပါသည်။ တိုင်ကြားမှုနှင့်ပတ်သက်၍  တိုင်းဒေသကြီးဦးစီးမှူးရုံးမှ တာဝန်ရှိသူများက ကုန်ပစ္စည်းပို့ဆောင်ရေးဝန်ဆောင်မှုလုပ်ငန်း မှ တာဝန်ရှိသူများနှင့် ဆက်သွယ်ဆောင်ရွက်ခဲ့ရာ ကုန်ပစ္စည်းပို့ဆောင်ရေးဝန်ဆောင်မှုလုပ်ငန်းမှ ၇-၁-၂၀၂၃ ရက်နေ့တွင် ညောင်ရွှေရုံးတွင် Waybill အမှတ် MS xxxxx  နံပါတ်ဖြင့် ရန်ကုန်မြို့ရှိ သင်္ဃန်းကျွန်းမြို့နယ်နေ တိုင်ကြားသူ ထံသို့ Waybill ပါ အကြောင်းအရာတွင် ဘုရား ဆင်းတုဟု ဖော်ပြထားပြီး ပစ္စည်းတန်ဖိုး (Declared Value) ကို ဖော်ပြထားခြင်းမရှိဘဲ ပေးပို့ခဲ့ပါကြောင်း၊ ပါဆယ်ထုပ်သည် ရန်ကုန်မြို့သို့ ၈-၁-၂၀၂၃ ရက်နေ့တွင် ရောက်ရှိခဲ့ပြီး တာဝန်ကျ ဝန်ထမ်းမှ အခြားပါဆယ်များနှင့်အတူ ပစ္စည်းပေးပို့နေစဉ်အတွင်း သင်္ဃန်းကျွန်းမြို့နယ်၊ နှင်းဆီကုန်းရပ်ကွက်၊ ဇေယျသုခကွန်ဒိုအောက်တွင် ပစ္စည်း(၂)ခုအား နှိုက်ယူထွက်ပြေးခံရခြင်း ဖြစ်ပေါ်ခဲ့ရာ အဆိုပါ ပစ္စည်း(၂)ခုအတွင်း တိုင်ကြားသူ၏ ပါဆယ်ထုပ်ပါဝင်ပျောက်ဆုံးခဲ့ပါကြောင်း၊ ပျောက်ဆုံး မှုအတွက် ကုန်ပစ္စည်းပို့ဆောင်ရေးဝန်ဆောင်မှုလုပ်ငန်းမှ ပေးပို့သူများအား အသိပေးကြေငြာထားသည့် စည်းကမ်းချက်အမှတ်စဉ်(၉)ပါအတိုင်း ချောစာထုတ်များ ပျက်ဆီးပျောက်ဆုံးမှုများအတွက် အများဆုံးလျော်ကြေးငွေ ကန့်သတ်ချက်အရ ငွေကျပ် ၂၅၀၀၀၀/- နှင့် တိုင် ကြားသူ၏ ပျက်ဆီးဆုံးရှုံးမှုအား စာနာသဘောပေါက်သည့်အတွက် ငွေကျပ် ၂၅၀၀၀၀/-၊ စုစုပေါင်း ငွေကျပ်  ၅၀၀၀၀၀/- အား ပေးလျော်သွားမည်ဖြစ်ပါကြောင်း တိုင်ကြားသူထံ အကြောင်းကြားခဲ့ရာ တိုင်ကြားသူမှ စားသုံးသူရေးရာဦးစီးဌာန၊ တာဝန်ရှိသူများရှေ့မှောက်တွင် လျော်ကြေးငွေအား လက်ခံလိုကြောင်း ‌အကြောင်းပြန်ကြားလာသဖြင့် ၂၆-၄-၂၀၂၃ ရက်နေ့တွင် စားသုံးသူရေးရာဦးစီးဌာန၊ ရန်ကုန်တိုင်း‌ဒေသကြီးဦးစီးမှူးရုံးမှ  တာဝန်ရှိသူများ ရှေ့မှောက်တွင် ငွေကျပ် ၅၀၀၀၀၀/- အားပေးအပ်ခဲ့ပြီး တိုင်ကြားမှုကို ပိတ်သိမ်းဆောင် ရွက်ခဲ့ပါသည်။

DOCA(ရန်ကုန်)

            မကွေးတိုင်းဒေသကြီး၊ မကွေးမြို့ နည်းပညာတက္ကသိုလ် ကျောင်းသူတစ်ဦးမှ (၁၀.၁၂.၂၀၂၂) ရက်နေ့ နေ့လည် (၁၄:၀၀)နာရီအချိန်တွင် (x x x) စတိုးမှ ကျောပိုးလွယ်အိတ်တစ်လုံးအား တန်ဘိုးကျပ်(၁၇၀၀၀)ဖြင့် ပေးချေ ဝယ်ယူခဲ့ပြီး အိမ်သို့ပြန်ရောက်ချိန်တွင် မိမိဝယ်ယူခဲ့သည့် ကျောပိုးအိတ်ထက်ပိုမို၍ တာရှည်ခံမည့် အိတ်အား ငွေကြေးအလိုက်ပေး၍ လဲလှယ်ဝယ်ယူလိုသောကြောင့် (၁၁.၁၂.၂၀၂၂) ရက်နေ့ နေ့လည် (၁၁:၀၀)နာရီအချိန်တွင် ဆိုင်သို့ထပ်မံသွားရောက်၍ ပြောကြားခဲ့ရာ ဆိုင်ရှင်နှင့် ဝန်ထမ်းများမှ မိမိတို့ဆိုင်သည် တစ်ခွန်းဆိုင်ဖြစ်၍ ဝယ်ပြီးပစ္စည်းအား ပြန်လည်လဲလှယ်ပေးခြင်း မရှိကြောင်း၊ အသစ်တစ်လုံးသာ ထပ်မံဝယ်ယူသင့်ကြောင်းကို ပြေလည်စွာ ပြောဆိုခြင်း မရှိသဖြင့် မကွေးတိုင်းဒေသကြီး၊ စားသုံးသူရေးရာဦးစီးဌာန၊ CICC ရုံးသို့ (၁၂.၁၂.၂၀၂၂) ရက်နေ့တွင် လာရောက်တိုင်ကြားလာပါသည်။

            (၁၂.၁၂.၂၀၂၂)ရက်နေ့တွင် ဌာနမှ တိုင်ကြားလာမှုနှင့်စပ်လျဉ်း၍ (x x x) စတိုးဆိုင်သို့ ဖုန်းဖြင့် ဆက်သွယ်အကြောင်းကြားညှိနှိုင်းခဲ့ရာ လုပ်ငန်းရှင်ဘက်မှ ဝယ်ယူသွားသည့် ကျောပိုးအိတ် တန်ဘိုးငွေ ကျပ်(၁၇၀၀၀)အား ပြန်လည်ပေးအပ်ရန် ညှိနှိုင်းရရှိခဲ့သဖြင့် (၁၃.၁၂.၂၀၂၂)ရက်နေ့ နေ့လည်(၁၄:၀၀) နာရီအချိန်တွင် တိုင်ကြားသူနှင့် (x x x) စတိုးဆိုင်ပိုင်ရှင်တို့အား တိုင်းဒေသကြီးဦးစီးမှူးရုံးသို့ ခေါ်ယူ၍ တာဝန်ရှိသူများရှေ့မှောက်၌ ပစ္စည်း တန်ဘိုးငွေကျပ်(၁၇၀၀၀)အား ပြန်လည်ပေးအပ်စေ၍ နှစ်ဦး နှစ်ဖက်သဘောတူညီမှုဖြင့် ကြေအေးလွှာနှင့် သဘောတူညီချက်များအား လက်မှတ်ရေးထိုးစေလျှက် အမှုအားပိတ်သိမ်းနိုင်ခဲ့ကြောင်း သိရှိရပါသည်။

DOCA(မကွေး)