အင်ဒိုနီးရှား စားအုန်းဆီတင်ပို့မှု ၅၉ ရာခိုင်နှုန်းကျော် တက်လာသော်လည်း ကုန်သွယ်မှုပိုငွေ ဆက်လက်ကျဆင်း
အင်ဒိုနီးရှား ဗဟိုစာရင်းအင်းဌာန (BPS) ၏ အဆိုအရ အင်ဒိုနီးရှား စားအုန်းဆီ တင်ပို့သူများသည် ဇန်နဝါရီလအတွင်း တင်ပို့မှုများ အဆမတန် မြင့်တက်ခဲ့ခြင်းကြောင့် ၂၀၂၆ ခုနှစ်ကို အားကောင်းကောင်းဖြင့် စတင်နိုင်ခဲ့ကြသည်။ သို့သော်လည်း ထိုသို့ တိုးတက်လာမှုသည် နိုင်ငံ၏ တဖြည်းဖြည်း လျော့နည်းလာနေသည့် ကုန်သွယ်မှုပိုငွေ (Surplus) ကို ပြန်လည်ဆွဲတင်ပေးနိုင်ရန်အတွက်မူ လုံလောက်သော အနေအထားတွင် မရှိခဲ့ပေ။ ဂျကာတာမြို့တွင် မတ်လ ၂ ရက်နေ့ က ပြုလုပ်သည့် သတင်းစာရှင်းလင်းပွဲ၌ အင်ဒိုနီးရှား ဗဟိုစာရင်းအင်းဌာန (BPS) ၏ ဒုတိယ အကြီးအကဲ Ateng Hartono က ၎င်းတို့၏ စားအုန်းဆီတင်ပို့မှုသည် တစ်နှစ်ထက်တစ်နှစ်နှိုင်း ယှဉ်ချက်အရ ၅၉.၆၃ ရာခိုင်နှုန်း တိုးတက်လာခဲ့သည်ဟု ပြောကြားခဲ့သည်။ အင်ဒိုနီးရှားနိုင်ငံသည် စားအုန်းဆီထောက်ပံ့မှုတွင် ထိပ်ဆုံးမှ ဦးဆောင်နေသည့်နိုင်ငံဖြစ်ပြီး၊ ၂၀၂၆ ခုနှစ် ဇန်နဝါရီလအတွင်း စားအုန်းဆီကုန်ကြမ်း (CPO) နှင့် ၎င်းမှဆင်းသက်လာသော ထုတ်ကုန်များ တင်ပို့မှုတန်ဖိုးမှာ အမေရိကန်ဒေါ်လာ ၂.၂၉ ဘီလီယံအထိ ရှိခဲ့သည်။ နှိုင်းယှဉ်ချက်အနေဖြင့် ၂၀၂၅ ခုနှစ် အလားတူကာလတွင် အဆိုပါ တင်ပို့မှုတန်ဖိုးမှာ အမေရိကန်ဒေါ်လာ ၁.၄၄ ဘီလီယံ သာရှိခဲ့သည်။ တင်ပို့မှုပမာဏမှာလည်း ယခင်နှစ်က တန်ချိန် ၁.၂၇ သန်း ရှိခဲ့ရာမှ ယခုနှစ်တွင် တန်ချိန် ၂.၂၄ သန်းအထိ ရှိလာသဖြင့် ၇၇.၀၇ ရာခိုင်နှုန်းအထိ အဆမတန် မြင့်တက်လာခဲ့သည်။ ဤကဏ္ဍသည် ၂၀၂၆ ခုနှစ်၏ ပထမလအတွင်း အင်ဒိုနီးရှားနိုင်ငံ၏ ရေနံနှင့်သဘာဝဓာတ်ငွေ့ မဟုတ်သော ပို့ကုန်တန်ဖိုး၏ ၁၀.၇၈ ရာခိုင်နှုန်းခန့်ကို ပါဝင်ပံ့ပိုးပေးထားသည်။ အပြည်ပြည်ဆိုင်ရာ ဈေးကွက်တွင် စားအုန်းဆီကုန်ကြမ်း (CPO) ဈေးနှုန်းသည် ဇန်နဝါရီလအတွင်း တစ်တန်လျှင်ပျမ်းမျှ အမေရိကန်ဒေါ်လာ ၉၉၇.၈၂ ရှိခဲ့ပြီး ယခင်လနှင့် နှိုင်းယှဉ်ပါက ၁.၈၁ ရာခိုင်နှုန်း မြင့်တက်လာခဲ့သည်။ သို့သော်လည်း ယခင်နှစ်ကာလတူနှင့် နှိုင်းယှဉ်ပါက ၆.၇၇ ရာခိုင်နှုန်း ဈေးနှုန်းကျဆင်းနေဆဲဖြစ်သည်။ အင်ဒိုနီးရှား စားအုန်းဆီကို မည်သည့်နိုင်ငံများက အဓိက ဝယ်ယူခဲ့သည် ဆိုသည့် အသေးစိတ်အချက်အလက်များကို BPS က ထုတ်ပြန်ခြင်းမရှိသော်လည်း၊ အီရန်နိုင်ငံသို့ အင်ဒိုနီးရှားမှ တင်ပို့သည့် ပစ္စည်းများထဲတွင် ဟင်းသီးဟင်းရွက်ဆီနှင့် အဆီအနှစ်များက အများဆုံးပါဝင်နေသည်။ ဇန်နဝါရီလအတွင်း အီရန်သို့ တင်ပို့ခဲ့သည့် ဟင်းသီးဟင်းရွက်ဆီနှင့် တိရစ္ဆာန်အဆီတန်ဖိုးမှာ အမေရိကန်ဒေါ်လာ ၂.၁ သန်း ရှိခဲ့ပြီး၊ ၎င်းထဲတွင် စားအုန်းဆီအကြမ်းနှင့် အချောထည်များ ပါဝင်သည်။ လက်ရှိရရှိနိုင်သော အချက်အလက်များသည် ဇန်နဝါရီလအထိသာ ဖြစ်သောကြောင့် အရှေ့အလယ်ပိုင်း ပဋိပက္ခ၏ နောက်ဆက်တွဲ သက်ရောက်မှုများကိုမူ ထည့်သွင်းတွက်ချက်ထားခြင်း မရှိကြောင်း သိရသည်။ သို့သော်လည်း စားအုန်းဆီ တင်ပို့မှုသည် ဂဏန်းနှစ်လုံးအထိ (Double-digit) ရာခိုင်နှုန်းများစွာ မြင့်တက်လာခဲ့သော်လည်း အင်ဒိုနီးရှားနိုင်ငံ၏ လျော့နည်းနေသော ကုန်သွယ်မှုပိုငွေကို ပြန်လည်မြှင့်တင်ပေးနိုင်ရန်အတွက်မူ ဆက်လက်ပျက်ကွက်နေဆဲ ဖြစ်ကြောင်း သိရှိရပါသည်။
Source : jarkartarglobe
DOCA(ရန်ကုန်)
