ပြည်တွင်းဝယ်လိုအား ကျဆင်းနေသဖြင့် တရုတ်နိုင်ငံမှ မော်တော်ကားတင်ပို့မှုကို မြှင့်တင်နေ
တရုတ်ကားထုတ်လုပ်ရေးကုမ္ပဏီများသည် ပြည်တွင်းစျေးကွက်တွင် အရောင်းကျဆင်းမှုကို အစားထိုးရန်အတွက် ပြည်ပသို့ တင်ပို့မှုကို မြှင့်တင်နေကြသည်။ တရုတ်နိုင်ငံတွင် မြင့်မားနေသော စက်ရုံထုတ်လုပ်မှုပမာဏနှင့် အားနည်းနေသော ဝယ်လိုအားတို့အကြား ကွာဟချက် ပိုမိုကျယ်ပြန့်လာခြင်းကို ၎င်းနိုင်ငံ၏ မော်တော်ကားလုပ်ငန်းကဏ္ဍတွင် သိသာစွာမြင်တွေ့နေရသည်။ ယခုကဲ့သို့ အခြေအနေမျိုးတွင် မော်တော်ကားများကို ပြည်ပသို့ ပိုမိုတင်ပို့ခြင်းသည် ပြည်တွင်း၌ အရောင်းကျဆင်းမှုကို အစားထိုးကုစားရန် ဖြေရှင်းချက်တစ်ခု ဖြစ်လာသည်။
တရုတ်မော်တော်ကားထုတ်လုပ်သူများအသင်း (CAAM) ၏ အချက်အလက်များအရ ၂၀၂၆ ခု နှစ် ပထမခြောက်လအတွင်း ပြည်တွင်းကားရောင်းအားသည် ၂၁% ကျဆင်းသွားကြောင်း သိရသည်။ ထို့သို့ကျဆင်းသွားသော်လည်း တစ်ဖက်တွင်မူ ထိုကာလအတွင်းမှာပင် တရုတ်နိုင်ငံ၏ မော်တော်ကား ပြည်ပတင်ပို့မှုသည် ၆၅.၃% အထိ ထိုးတက်သွားခဲ့သည်။
Nikkei Asia ၏ ဖော်ပြချက်အရ တရုတ်နိုင်ငံတွင် ပြည်တွင်းကားဝယ်လိုအား ကျဆင်းရခြင်း၏ အဓိကအကြောင်းရင်းတစ်ခုမှာ လျှပ်စစ်ကား (EV) များအတွက် ပေးအပ်ထားသည့် ထောက်ပံ့ကြေးအချို့ သက်တမ်းကုန်ဆုံးသွားခြင်းကြောင့် ဖြစ်သည်။ ထို့အပြင် ဆီစျေးနှုန်းကြီးမြင့်မှုကြောင့် လျှပ်စစ်ကားများဘက်သို့ ကူးပြောင်းမှု ပိုမိုများပြားလာသဖြင့် ဓာတ်ဆီသုံးကားများ၏ ဝယ်လိုအားလည်း ကျဆင်းသွားခဲ့သည်။ ၎င်းအပြင် စီးပွားရေးနှေးကွေးမှုနှင့် ရေရှည်ဖြစ်ပွားနေသော အိမ်ခြံမြေ အကျပ်အတည်းများကလည်း တရုတ်စားသုံးသူများ၏ ဝယ်ယူနိုင်စွမ်းအားကို လျော့ပါးစေခဲ့သည်။
HSBC ၏ အစီရင်ခံစာတစ်ခုတွင် တရုတ်နိုင်ငံ၏ တစ်နှစ်တာလုံးအတွက် ကားဝယ်လိုအား ခန့်မှန်းချက်ကို ယခင်က ပုံမှန်အတိုင်းရှိနေမည်ဟု ခန့်မှန်းခဲ့ရာမှ ယခုအခါ ယမန်နှစ်ထက် ၅% ကျဆင်းသွားမည်ဟု လျှော့ချသတ်မှတ်လိုက်သည်။
ပြည်တွင်းဝယ်လိုအား ဆက်လက်အားနည်းနေခြင်းကြောင့် ပြည်ပတင်ပို့မှုသည် စက်ရုံများ၏ ထုတ်လုပ်မှုစွမ်းအားကို အသုံးချရန်၊ အမြတ်အစွန်းကို ထိန်းသိမ်းရန်နှင့် မော်တော်ကားအမျိုးအစားစုံလင်မှုကို မြှင့်တင်ရန်အတွက် အရေးပါသည့် မဏ္ဍိုင်တစ်ခုဖြစ်ကြောင်း အစီရင်ခံစာတွင် ဖော်ပြထားသည်။
၂၀၂၆ ခုနှစ် ပထမငါးလအတွင်း ဘရာဇီး၊ ဩစတြေးလျ၊ ဗြိတိန်၊ အီတလီနှင့် ထိုင်းနိုင်ငံတို့သည် တရုတ်လျှပ်စစ်ကား တင်ပို့မှုအများဆုံးတိုးတက်ခဲ့သည့် စျေးကွက်များ ဖြစ်ကြသည်။ ထိုအထဲတွင် ဘရာဇီးနိုင်ငံသည် တိုးတက်မှုနှုန်း အမြင့်မားဆုံးဖြင့် ထိပ်ဆုံးက ဦးဆောင်နေသည်။
တရုတ်ကားထုတ်လုပ်သူများသည် ပြည်ပစျေးကွက်များကို ပိုမို၍ မှီခိုလာကြသည်။ Chery နှင့် Great Wall Motor တို့သည် မကြာသေးမီက ၎င်းတို့၏ အရောင်းရဆုံးပမာဏ၏ ထက်ဝက်ကျော်ကို ပြည်ပတင်ပို့မှုမှ ရရှိခဲ့သည်။ ထို့အတူ BYD၊ Geely နှင့် Xpeng တို့သည်လည်း ၂၀၂၆ ခုနှစ်အတွက် ၎င်းတို့၏ ပြည်ပရောင်းအားပန်းတိုင်ကို စုစုပေါင်းရောင်းအား၏ ၁၅%၊ ၁၇% နှင့် ၁၁% အသီးသီးအထိ မြှင့်တင်ထားကြသည်။
တရုတ်နိုင်ငံ၏ အကြီးဆုံးကားတင်ပို့သူဖြစ်သည့် Chery ကုမ္ပဏီသည် ယခုနှစ် ပထမငါးလအတွင်း ကားအစီးရေ ၉၄၀,၀၀၀ ကို ပြည်ပသို့ တင်ပို့ခဲ့ပြီး၊ အရှေ့အလယ်ပိုင်း၊ လက်တင် အမေရိကနှင့် ဥရောပတို့မှ ဝယ်လိုအားကြောင့် ၎င်းတို့၏ စုစုပေါင်းရောင်းအား၏ ၇၀% နီးပါး ရှိခဲ့သည်။ ကုမ္ပဏီသည် ၂၀၂၆ ခုနှစ် တစ်နှစ်လုံးအတွက် မော်တော်ကားအစီးရေ ၁.၅ သန်းကျော် တင်ပို့ရန် ရည်မှန်းထားသည်။
ယခုကဲ့သို့ ပြည်ပတင်ပို့မှု အရှိန်အဟုန်ဖြင့် တိုးတက်နေခြင်းသည် ကုန်သွယ်ရေးအတား အဆီးများနှင့် ပိုမိုရင်ဆိုင်နေရသည်။ ဥရောပကော်မရှင် (EC) က တရုတ်ကားထုတ်လုပ်သူများသည် အစိုးရ၏ ထောက်ပံ့ကြေးများကြောင့် မတရားသောအကျိုးအမြတ်များ ရရှိနေသည်ဟု ဆုံးဖြတ်ပြီးနောက် ၂၀၂၄ ခုနှစ်၊ ဇူလိုင်လ ၄ ရက်နေ့တွင် တရုတ်လျှပ်စစ်ကားများအပေါ် အပိုဆောင်း သွင်းကုန်ခွန်များ ကောက်ခံမည်ဟု ကြေညာခဲ့ကြောင်း သိရသည်။
တူရကီနိုင်ငံသည် ပြီးခဲ့သည့်လက BYD ကုမ္ပဏီအတွက် သွင်းကုန်ခွန်ကင်းလွတ်ခွင့်ကို ဆိုင်းငံ့ခဲ့ပြီး ကုမ္ပဏီအနေဖြင့် ပြည်တွင်းထုတ်လုပ်မှုတွင် ဒေါ်လာ ၁ ဘီလီယံ ရင်းနှီးမြှုပ်နှံရန် ကတိကဝတ်ကို မပြည့်မှီပါက ကင်းလွတ်ခွင့်ရရှိထားသော အခွန်များကို ပြန်လည်ပေးဆောင်ရနိုင်ကြောင်း သတိပေးထားခဲ့ကြောင်း သိရှိရပါသည်။
Source : Vn Economy
DOCA (ရန်ကုန်)
