၂၀၂၆ ခုနှစ်အစတွင် အမေရိကန်နှင့် တရုတ်ဈေးကွက်များမှ အပြုသဘောဆောင်သည့် လက္ခဏာများရရှိခဲ့သည့် ဗီယက်နမ်ပုစွန်တင်ပို့မှု
ဗီယက်နမ်နိုင်ငံ၏ ပုစွန်တင်ပို့ရေးကဏ္ဍသည် ၎င်းတို့၏ အကြီးမားဆုံးဈေးကွက်နှစ်ခုဖြစ်သော တရုတ်နှင့် အမေရိကန်တို့ထံမှ အပေါင်းလက္ခဏာဆောင်သည့် ရလဒ်များရရှိလာခြင်းကြောင့် ၂၀၂၆ ခုနှစ်အစပိုင်းတွင် ကဏ္ဍအတွက် အရှိန်အဟုန်တစ်ခုကို ဖန်တီးပေးခဲ့ကြောင်း သိရပါသည်။ နိုင်ငံ၏ ပင်လယ်စာလုပ်ငန်းသည် ယခုနှစ်တွင် ပို့ကုန်ဝင်ငွေ စုစုပေါင်း အမေရိကန် ဒေါ်လာ ၁၁.၅ ဘီလီယံခန့် ရရှိရန် ရည်မှန်းထားပြီး ထိုစုစုပေါင်းတန်ဖိုးထဲတွင် ပုစွန်တင်ပို့မှုက တစ်ဝက်နီးပါးခန့် ပါဝင်မည်ဟု ခန့်မှန်းထားကြောင်း သိရပါသည်။ ဖေဖော်ဝါရီ ၁၅ ရက်အထိ ပင်လယ်စာတင်ပို့မှုမှဝင်ငွေ စုစုပေါင်း အမေရိကန်ဒေါ်လာ ၁.၄၆ ဘီလီယံခန့် ရရှိထားပြီး စိုက်ပျိုးမွေးမြူရေးထုတ်ကုန်တင်ပို့မှုများအတွင်း ထိပ်တန်းသုံးခုအနက် တစ်ခုအဖြစ် ပါဝင်နေကြောင်း သိရပါသည်။ တရုတ်နိုင်ငံသည် အထူးသဖြင့် အရည်အသွေးမြင့်နှင့် အဆင့်မြင့်ထုတ်ကုန်များအပေါ် ဝယ်လိုအားဆက်လက်မြင့်တက်နေကြောင်း သိရပါသည်။ ဇန်နဝါရီလတစ်လတည်းတွင် ဗီယက်နမ်မှ တရုတ်သို့တင်ပို့သော green lobster တန်ဖိုးသည် အမေရိကန်ဒေါ်လာ ၁၀၀ သန်းကျော်တန်ဖိုးရှိခဲ့ပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၆ ရာခိုင်နှုန်း တိုးတက်ခဲ့ကြောင်း သိရပါသည်။ ၂၀၂၅ ခုနှစ်တွင် တရုတ်နိုင်ငံသည် ဗီယက်နမ်၏ အကြီးဆုံး ပုစွန်ဈေးကွက်ဖြစ်လာကာ စုစုပေါင်း တင်သွင်းမှုတန်ဖိုး အမေရိကန်ဒေါ်လာ ၁.၃ ဘီလီယံ ရှိခဲ့ပြီး ၂၀၂၄ ခုနှစ်နှင့် နှိုင်းယှဉ်ပါက ၅၅ ရာခိုင်နှုန်း တိုးတက်ခဲ့ကြောင်း သိရပါသည်။ ထူးခြားသည့်အချက်အနေဖြင့် green lobster ကို တရုတ်သို့ တင်ပို့မှုတန်ဖိုးသည် အမေရိကန်ဒေါ်လာ ၈၄၀ သန်းအထိ ရောက်ရှိခဲ့ပြီး ၁၃၁ ရာခိုင်နှုန်း တိုးတက်ခဲ့ကာ ဗီယက်နမ်သည် ထိုထုတ်ကုန်အတွက် တရုတ်ဈေးကွက်တွင် အကြီးဆုံးရောင်းချသူဖြစ်လာခဲ့ကြောင်း သိရပါသည်။ လုပ်ငန်းနယ်ပယ်ကျွမ်းကျင်သူများ အဆိုအရ တရုတ်ဈေးကွက်သည် အရည်အသွေးမြင့်စားသုံးမှုဘက်သို့ အသွင်ကူးပြောင်းနေပြီး အရည် အသွေးထိန်းချုပ်မှု၊ နောက်ခံအချက်အလက်များကို ခြေရာခံနိုင်မှုနှင့် တန်ဖိုးမြှင့်ပြုပြင်ထုတ်လုပ် မှုလိုအပ်ချက်များကို ဖြည့်ဆည်းနိုင်သည့် ရောင်းချသူများကို ဦးစားပေးလာကြောင်း သိရပါသည်။ အမေရိကန်ဈေးကွက်တွင်လည်း အပြုသဘောဆောင်သည့် အပြောင်းအလဲများ တွေ့မြင်ရကြောင်း သိရပါသည်။ ဗီယက်နမ်ပုစွန်အပေါ် ချမှတ်ထားသည့် anti-dumping အကောက်ခွန်နှုန်းထားကို ယခင်ကြေညာထားသည့် ၃၅.၂၉ ရာခိုင်နှုန်းမှ ၄.၅၈ ရာခိုင်နှုန်းသို့ လျှော့ချမှုကြောင့် တင်သွင်းမှုကုန်ကျစရိတ် လျော့နည်းသွားကာ ပြိုင်ဘက်နိုင်ငံများနှင့် ယှဉ်ပြိုင်နိုင်စွမ်း တိုးတက်လာမည်ဟု ခန့်မှန်းထားကြောင်း သိရပါသည်။ ဗီယက်နမ်ပင်လယ်စာတင်ပို့သူများနှင့် ထုတ်လုပ်သူများအသင်း (VASEP) အဆိုအရ အခွန်နှုန်းလျှော့ချမှုကြောင့် ဗီယက်နမ်ကုမ္ပဏီများသည် ဈေးနှုန်းပိုမိုယှဉ်ပြိုင်နိုင်လာပြီး ရာသီအလိုက် သို့မဟုတ် ရေရှည်စာချုပ်များ ချုပ်ဆိုနိုင်မည်ဖြစ်သကဲ့သို့ အမေရိကန်ဝယ်ယူသူများအတွက် တည်ငြိမ်စွာရောင်းချမှုကိုလည်း ထိန်းသိမ်းနိုင်မည်ဖြစ်ကြောင်း သိရပါသည်။ ထို့ပြင် လုပ်ငန်းကဏ္ဍသည် အရည်အသွေးနှင့် ခြေရာခံနိုင်မှုဆိုင်ရာ စံနှုန်းများကို ဖြည့်ဆည်းနိုင်ရန် မွေးမြူရေးနည်းလမ်းများ တိုးတက်ရန်လုပ်ဆောင်ခြင်း၊ နည်းပညာအထောက်အပံ့ပေးခြင်းနှင့် တန်ဖိုးကွင်းဆက်တိုးချဲ့ခြင်းများကို ဆောင်ရွက်လျက်ရှိကြောင်း သိရပါသည်။ တရုတ်ဈေးကွက်မှ ခိုင်မာသည့် တောင်းဆိုမှုနှင့် အမေရိကန်ဈေးကွက်တွင် ကုန်သွယ်ရေးအခြေအနေ တိုးတက်လာခြင်းတို့ကြောင့် ဗီယက်နမ်၏ ပုစွန်တင်ပို့ရေး ကဏ္ဍသည် ၂၀၂၆ ခုနှစ်အတွင်း ရပ်တည်မှုကို ပိုမိုခိုင်မာစေကာ တင်ပို့မှုတိုးတက်ရေးကို ဆက်လက်ထိန်းသိမ်းနိုင်မည်ဟု မျှော်လင့်ထားကြောင်း သိရှိရပါသည်။
Vietnam Plus
DOCA (ရန်ကုန်)
