ပြည်ပကုန်သွယ်မှုသတင်းများ

          အိန္ဒိယအစိုးရသည် စက်တင်ဘာလ ၂၄ ရက်နေ့မှစ၍ လာမည့်နှစ် ၂၀၂၆ ခုနှစ်မတ်လ ၃၁ ရက် နေ့အထိ နိုင်ငံအတွင်းသို့ ငွေလက်ဝတ်ရတနာများ တင်သွင်းမှုကို တားမြစ်ထားကြောင်း အမိန့်ကြေငြာစာ အရသိရပါသည်။ အဆိုပါပိတ်ပင်မှုသည် လွတ်လပ်သောကုန်သွယ်မှု သဘော တူညီချက် (FTAs) ကို အလွဲသုံးစားလုပ်ခြင်းမှ တားဆီးရန်နှင့် လက်ဝတ်ရတနာ အချောထည် များအဖြစ် ငွေအများအပြား တင်သွင်းမှုများကို ဖြေရှင်းရန် ရည်ရွယ်ခြင်းဖြစ်ကြောင်းသိရပါသည်။

          ကန့်သတ်ထားသည့် ကုန်ပစ္စည်းများတင်သွင်းရန် အစိုးရထံမှ လိုင်စင်လိုအပ်ပြီး အကောက်ခွန် ကင်းလွတ်မှုများ အောက်မှ ငွေလက်ဝတ်ရတနာများ တင်သွင်းမှု ကန်သတ်ချက်များသည် ၂၀၂၄-၂၅ ဘဏ္ဍာနှစ်၏ ဧပြီ-ဇွန် မှ ၂၀၂၅-၂၆ ဘဏ္ဍာနှစ်၏ ဧပြီ-ဇွန် အထိတိုးမြင့်လာခြင်းဖြစ်သည်။ FTA ပါ ပြဌာန်းချက်များကို ရှောင်တိမ်းသည့် သွင်းကုန်များသည် ပြည်တွင်းထုတ်လုပ်သူများကို ဆိုးဆိုးရွားရွား ထိခိုက်စေပြီး ကျောက်မျက်ရတနာကဏ္ဍတွင် အလုပ်အကိုင်ရရှိရေးအတွက် စိန်ခေါ်မှု တစ်ရပ်ဖြစ်လာကြောင်း တာဝန်ရှိသူတစ်ဦးက ပြောကြားခဲ့သည်။ အဆိုပါဆုံးဖြတ်ချက်သည် အိန္ဒိယ၏ လက်ဝတ်ရတနာ ထုတ်လုပ်သူများ အတွက် ‌စျေးကွက်များ ပိုမိုကျယ်ပြန့်စေပြီး အသေးစားနှင့် အလတ်စားစီးပွားရေး လုပ်ငန်းများ၏ အကျိုးစီးပွားကို ကာကွယ်ကာ ကဏ္ဍအတွင်းရှိ အလုပ်သမားများအတွက် အသက်မွေးဝမ်းကြောင်းအခွင့်အလမ်းများ ပိုမိုလုံခြုံစေမည်ဟု အစိုးရမှ ယုံကြည်ထားကြောင်းသိရပါသည်။Source : indiatoday  

DOCA(ရန်ကုန်)

          တရုတ်နိုင်ငံသည် ဝန်ဆောင်မှုပို့ကုန်များ မြှင့်တင်ရန်နှင့် ဝန်ဆောင်မှုကုန်သွယ်မှုကို အရည်အသွေးမြင့်မားစွာ ဖွံ့ဖြိုးတိုးတက်ရေးကို မြှင့်တင်ရန် ရည်ရွယ်သည့် အစီအစဉ်များကို ထုတ်ပြန်ခဲ့ပါသည်။ ထိုအစီအမံများတွင် ၁၃ ချက်ပါဝင်ပြီး ဝန်ဆောင်မှုကုန်သွယ်မှုကိုအရှိန်မြှင့်ရန်၊ မြှင့်မားသော စံချိန်စံညွှန်များဖြင့် ပွင့်လင်းစွာချဲ့ထွင်ရန်နှင့် နိုင်ငံခြားကုန်သွယ်မှု ကြီးထွားမှုအတွက် အရှိန်ဟုန်သစ်များ‌ မွေးမြူရန် ရည်ရွယ်ကြောင်းသိရပါသည်။

          ဆောင်ရွက်ချက်များတွင် ဗဟိုနှင့် ဒေသဆိုင်ရာ အစိုးရများ၏ ရရှိနိုင်သော ရန်ပုံငွေ လမ်းကြောင်းများကို အပြည့်အဝအသုံးပြု၍ ဒီဂျစ်တယ်ဝန်ဆောင်မှုများ၊ အဆင့်မြင့်ဒီဇိုင်း၊ သုတေသနနှင့် ဖွံဖြိုးတိုးတက်မှု (R&D)၊ ထောက်ပံ့ရေးကွင်းဆက်များနှင့် စွမ်းအင်ခြွေတာရေး၊ သယံဇာတ ပြန်လည်အသုံးပြုခြင်း၊ ပတ်ဝန်းကျင်စီမံခန့်ခွဲမှုနှင့် အကြံပြုခြင်းတို့ပါဝင်သည့် ဝန်ဆောင်မှုပုံစံသစ်များ ပါဝင်မည်ဖြစ်ကြောင်း သိရှိရပါသည်။

          အဆိုပါ ဆောင်ရွက်ချက်များတွင် ဝန်ဆောင်မှုကုန်သွယ်မှုများအတွက် နယ်စပ်ဖြတ်ကျော် ငွေပေးချေမှုများကို လွယ်ကူချော မွေ့စေရန် ကြိုးပမ်းမှုများလည်း ပါဝင်မည်ဖြစ်ပြီး သက်ဆိုင်ရာ လုပ်ငန်းများတွင် ယုံကြည်စိတ်ချရပြီး စည်းကမ်းလိုက်နာသော ကုမ္ပဏီများအတွက် ငွေပေးချေမှုပိုမို လွယ်ကူပြီး ထိရောက်အောင် ဘဏ်များကိုတိုက်တွန်ခြင်းများလည်း ပါဝင်ကြောင်း သိရှိရပါသည်။Source : Xinhua                                         

              DOCA (ရန်ကုန်)

          ကမ္ဘောဒီးယားနိုင်ငံ၊ ခရီးသွားလာရေး ၀န်ကြီး Huot Hak နှင့် ဂျပန်နိုင်ငံ Nagoya မြို့တော်ဝန် Hirosawa Ichiro တို့သည် ခရီးသွားလုပ်ငန်း ပူးပေါင်းဆောင်ရွက်မှု တိုးမြှင့်ရန်၊ ကမ္ဘာ့အမွေအနှစ်နေရာများအား အသုံးချခြင်းနှင့် သံတမန်ဆက်ဆံရေးကို မြှင့်တင်ရန် ၂၄-၉-၂၀၂၅ ရက်နေ့တွင် ဆွေးနွေးခဲ့ကြသည်။ အဆိုပါအစည်းအဝေးကို ဂျပန်နိုင်ငံ နာဂိုယာမြို့၌ ကျင်းပပြုလုပ်ခဲ့ပြီး ကမ္ဘောဒီးယားနိုင်ငံမှ အကြီးတန်းခေါင်းဆောင်များနှင့် ကမ္ဘောဒီးယား ပုဂ္ဂလိက ကဏ္ဍမှ ကိုယ်စားလှယ်များ တက်ရောက်ခဲ့ကြသည်။

             အဆိုပါအစည်းအဝေးတွင် ပူးတွဲစျေးကွက်ရှာဖွေရေးလှုပ်ရှားမှုများ၊ ခရီးသွားကဏ္ဍတွင် ပညာရှင်များဖလှယ်ရေးအတွက် အစီအစဉ်များနှင့် Angkor Wat အပါအဝင် ကမ္ဘောဒီးယားနိုင်ငံ၏ ကမ္ဘာ့အမွေအနှစ်နေရာများကို ဂျပန်ခရီးသွားများထံ မြှင့်တင်ရေးတို့ကို အဓိကထားဆွေးနွေးခဲ့ကြသည်။ အဆိုပါ ပူးပေါင်းဆောင်ရွက်မှုသည် ဟိုတယ်များ၊ ခရီးသွားလုပ်ငန်းရှင်များ၊ စားသောက်ဆိုင်များနှင့် ဒေသခံလက်မှုပညာသမားများအတွက် စီးပွားရေးအကျိုးခံစားခွင့်များ ပေးဆောင်ရန် ဂျပန် ပြည်ပခရီးသွားဈေးကွက်တွင် ကမ္ဘောဒီးယား၏တည်ရှိမှုကို အားကောင်းစေရန် ရည်ရွယ်ခြင်း ဖြစ်သည်။ MoT ၏ ထုတ်ပြန်ချက်အရ ခရီးသွားလုပ်ငန်းဗျူဟာများကို ချိန်ညှိကာ ယဉ်ကျေးမှုနှင့် အမွေအနှစ်ပစ္စည်းများကို အသုံးချခြင်းဖြင့် ကမ္ဘောဒီးယားနှင့် ဂျပန်နှစ်နိုင်ငံစလုံးသည် ဧည့်သည်အရေအတွက်များ စဉ်ဆက်မပြတ် တိုးပွားလာစေရန်၊ ပြည်တွင်းစီးပွားရေးလုပ်ငန်း များကို ပံ့ပိုးပေးကာ နှစ်နိုင်ငံစီးပွားရေးဆက်ဆံမှု တိုးမြှင့်ရန် မျှော်လင့်ထားသည်။ Source: Khmer Times                          
DOCA (ရန်ကုန်)          

    ဥရောပသမဂ္ဂ (EU) သည် Just Energy Transition Partnership (JETP) လက်အောက်ရှိ ဗီယက်နမ်၏ အဓိကကျသော ပရောဂျက်တစ်ခုဖြစ်သည့် Bac Ai pumped-storage ရေအားလျှပ်စစ်စီမံကိန်းကို တိုးတက်လာစေရန်အတွက် ယူရိုသန်း ၄၃၀ (အမေရိကန်ဒေါ်လာ ၄၉၇.၇ သန်း နီးပါး) တန်ဖိုးရှိ ထောက်ပံ့မှုအစီအစဉ်ကို ကြေညာခဲ့သည်။

     အောက်တိုဘာ ၉ ရက်မှ ၁၀ ရက်အထိ ဘယ်လ်ဂျီယံနိုင်ငံ ဘရပ်ဆဲလ်မြို့တွင် ကျင်းပသည့် ဒုတိယအကြိမ် Global Gateway ဖိုရမ်တွင် အဆိုပါ ကြေညာချက်ကို အီးယူ စွမ်းအင်ဆိုင်ရာ ကော်မရှင်နာ Jozef Síkela က ပြောကြားရာတွင် Bac Ai စီမံကိန်းသည် ဗီယက်နမ်နှင့် EU ၏ စိမ်းလန်းသော၊ တည်ငြိမ်ပြီး ရေရှည်တည်တံ့သော စွမ်းအင်စနစ် တည်ဆောက်ရန် အတွက် အဓိက အခြေခံအုတ်မြစ်ဖြစ်ကြောင်း ပြောကြားခဲ့ပါသည်။ Global Gateway ပဏာမခြေလှမ်းအားဖြင့် EU သည် ၎င်း၏ ကတိကဝတ်များကို ခိုင်မာသော လုပ်ဆောင်ချက်များအဖြစ် လူများ၊ ကမ္ဘာမြေနှင့် မျှဝေသာယာဝပြောရေးတို့အဖြစ် ပြောင်းလဲနေကြောင်း ၎င်းက အခိုင်အမာ ပြောကြားခဲ့သည်။

     အဆိုပါ စီမံကိန်းသည် နိုင်ငံတော်၏ ဓာတ်အားစနစ်၏ တည်ငြိမ်မှုကို မြှင့်တင်ရန်၊ ပြန်လည်ပြည့်ဖြိုးမြဲစွမ်းအင် ဖွံ့ဖြိုးတိုးတက်မှုကို ချဲ့ထွင်ရာတွင် လွယ်ကူချောမွေ့စေရန်နှင့် ဗီယက်နမ်၏ ကာဗွန်ထုတ်လွှတ်မှု လျှော့ချရေးနှင့် ရေရှည်တည်တံ့သော ဖွံ့ဖြိုးတိုးတက်ရေးဆိုင်ရာ ပန်းတိုင်များသို့ အထောက်အကူဖြစ်စေရန် မျှော်လင့်ပါသည်။

     ယူရိုငွေ သန်း ၄၃၀ ထောက်ပံ့ရေး ပက်ကေ့ချ်သည် EU၊ ၎င်း၏အဖွဲ့ဝင်နိုင်ငံများနှင့် ပြင်သစ်ဖွံ့ဖြိုးတိုးတက်ရေးအေဂျင်စီ (AFD)၊ ဥရောပရင်းနှီးမြှုပ်နှံမှုဘဏ် (EIB)၊ ဂျာမနီနိုင်ငံ KfW ဖွံ့ဖြိုးတိုးတက်ရေးဘဏ် (KfW)၊ အီတလီနိုင်ငံတော် ဖွံ့ဖြိုးတိုးတက်ရေးဘဏ် (Cassa Depositi e Prestiti – CDP AF ဘဏ္ဍာရေးဆိုင်ရာ ဌာနခွဲများ) တို့ပါ၀င်သည့် Team Europe Initiatives ၏ တစ်စိတ်တစ်ပိုင်းဖြစ်သည်။

      ၂၀၂၁ - ၂၀၂၇ ကာလအတွင်း EU သည် ဗီယက်နမ်ကို အနည်းဆုံး ယူရို ၂၉၃ သန်း ပေးအပ် ရန် ကတိပြုထားပြီး JETP အတွက် ဥရောပမိတ်ဖက်များထံမှ စုစုပေါင်း အလှူငွေ ယူရို ၂.၈ ဘီလီယံ ကျော် ရှိနေပါသည်။ ဤရင်းနှီးမြှုပ်နှံမှုသည် အစိမ်းရောင်အခြေခံအဆောက်အအုံ ဖွံ့ဖြိုးတိုးတက် ရေးနှင့် ရေရှည်တည်တံ့ခိုင်မြဲသော စွမ်းအင်အကူးအပြောင်းကို မြှင့်တင်ရန်နှင့် အာဆီယံအတွင်း ဒေသတွင်း လျှပ်စစ်ဓာတ်အား ချိတ်ဆက်မှုကို အားကောင်းစေမည်ဖြစ်သည်။

DOCA(ပြည်ထောင်စုနယ်မြေ)

          ၂၀၂၅ ခုနှစ် ကမ္ဘာ့ကုန်ထုတ်လုပ်ငန်းဆိုင်ရာပြပွဲကို စက်တင်ဘာလ ၂၀ ရက်နေ့မှ ၂၃ ရက်နေ့အထိ တရုတ်နိုင်ငံအ‌ရှေ့ပိုင်း အန်ဟွေးပြည်နယ် မြို့တော် Hefei တွင် ကျင်းပမည်ဖြစ်ပြီး အဆင့်မြင့် ကုန်ထုတ်လုပ်ငန်းများနှင့် ခေတ်မှီနည်းပညာများကို အဓိကထားဆွေးနွေးမည် ဖြစ်ကြောင်းသိရှိရပါ သည်။

          လေးရက်ကြာကျင်းပမည့် အဆိုပါပြပွဲတွင် အစိုးရအရာရှိများ စီးပွားရေးခေါင်းဆောင်များ၊ နိုင်ငံတကာအဖွဲ့အစည်းများ၊ ကုန်သွယ်ရေးအသင်းအဖွဲ့များမှ ခေါင်းဆောင်များ၊ နိုင်ငံ ၄၀ ကျော်မှ ကိုယ်စားလှယ်များ ပါဝင်မည်ဖြစ်ပါသည်။

          ပထမဆုံးအကြိမ်အဖြစ် ပြပွဲတွင် အသိညဏ်ရှိသော စက်ရုပ်ပြပွဲတစ်ခုပါဝင်ပါသည်။ Anhui ပြည်နယ် ယခုနှစ် ပထမနှစ်ဝက်အတွင်း ၎င်း၏ မော်တော်ကားထုတ်လုပ်စွမ်းအင်အသစ် ယာဉ် (NEV) သည် တစ်နိုင်ငံလုံးရှိ မော်တော်ကားထုတ်လုပ်မှုနှင့် တင်ပို့မှု၏ ပထမနေရာတွင် ရပ်တည်လျက်ရှိပါသည်။

          ၎င်းပြည်နယ်သည် ကမ္ဘာ့ဖန်သားပြားထုတ်လုပ်မှု၏ ၁၀ ရာခိုင်နှုန်းခန့် တရုတ်နိုင်ငံ၏ စက်ရုပ်ထုတ်လုပ်မှုများ၏ ၈ ရာခိုင်နှုန်းခန့်၊ နိုင်ငံ၏ NEVs များ၏ ၁၁ ရာခိုင်နှုန်းနှင့် နိုင်ငံ၏ ဆိုလာ ပြားမှန်ထက်ဝက်ကျော်ကို ထုတ်လုပ်နေကြောင်း ပြည်နယ်အစိုးရအဖွဲ့၏ ဒုတိယ အတွင်းရေးမှူးချုပ် chang Yejun က ပြောကြားခဲ့ပါသည်။

          အဆိုပါ ပြပွဲသည် နည်းပညာနယ်ပယ်အသစ်များကိုလည်း ပြသမည်းဖြစ်ပါသည်။ BEST ၏ မော်ဒယ်အသစ်နှင့် နိုင်ငံပေါင်း ၁၆၃ နိုင်ငံနှင့် ဒေသများမှ သုံးစွဲသူများအတွက် ကွန်ပျူတာလုပ်ငန်းပေါင်း ၆၉၀၀၀၀ ဆောင်ရွက်ပြီးစီးခဲ့ပြီး ကမ္ဘာတစ်ဝှမ်းလာရောက်ကြည့်ရှုသူ ပေါင်း ၃၄ သန်းကျော်ရှိ သည့် Origin Wikong quantum ကွန်ပျူတာကိုလည်း ပြသမည်ဖြစ်ကြောင်း သိရှိရပါသည်။

Source : Xinhua 

DOCA(ရန်ကုန်)