ပြည်တွင်းကုန်သွယ်မှုသတင်း

     တိုက်ကြီးမြို့နယ်တွင် ကျေးလက်ဒေသမိသားစုစားဝတ်နေရေးအတွက် တစ်နိုင်တစ်ပိုင်စီးပွားရေးတစ်ရပ်အနေဖြင့်လည်း တံမြက်စည်းလုပ်ငန်းကို လုပ်ကိုင်ကြပြီး မြေရိုင်းများမှပေါက်သော ကိုင်းရိုးကိုအသုံးပြု၍ ထုတ်လုပ်ရပါသည်။ ကိုင်းရိုး (၁)ပိဿာလျှင် (၃၅၀၀)ကျပ်၊ ကြိမ်(၈) လုံးပါ (၁)စည်းလျှင် (၂၅၀၀)ကျပ်၊ ကြိုးတစ်ခွေလျှင် (၁၀၀၀)ကျပ်ဖြင့်ဝယ်ယူ၍ တံမြက်စည်းကိုင်းရိုး (၁)ပိဿာလျှင် တံမြက်စည်း (၁၀)ချောင်းခန့်ထွက်ရှိပြီး တံမြက်စည်း(၁၀)ချောင်းလျှင် ကြိုးဖိုး (၈၀၀)ကျပ်၊ ကြိမ်ဖိုး (၁၂၀၀မှ ၁၅၀၀)ကျပ်ခန့်ကုန်ကျခဲ့ရာ မိသားစုများမအားပါက လက်ခအနေဖြင့် တစ်ချောင်းလျှင် (၁၀၀)ကျပ်ဖြင့် လူငှားဖြစ်လုပ်ဆောင်ခဲ့ပြီး ကိုင်းရိုးတံဖြင့်လုပ်သော တံမြက်စည်းကို (၁၀၀၀)ကျပ်ဖြင့်သာရောင်းချရပြီး ဝါးလုံးဖြင့်ပြုလုပ်သော တံမြက်စည်းမှာ ဝါးတစ်လုံးလျှင် (၅၀)ကျပ်ဖြင့် ဝယ်ယူလုပ်ဆောင်ရ၍ ဝါးလုံးဖြင့်ပြုလုပ်သော တံမြက်စည်းကို (၁၂၀၀)ကျပ်ဈေးနှုန်းဖြင့်ရောင်းချပါသည်။ ကိုင်းရိုးတံဖြင့်ပြုလုပ်သော တံမြက်စည်းထက် ဝါးလုံးဖြင့်ပြုလုပ်သောတံမြက်စည်းမှာ ဈေးနှုန်းအနည်းငယ်ပိုပြီး တိုက်ကြီးမြို့ပေါ်တွင် တိုက်ကြီးတံမြက်စည်းကို နာမည်ကြီးပြီး ပိုမိုခိုင်ခံ့သေသပ်သော ဈေးကွက်ဝင်လူသုံးကုန်ပစ္စည်းတစ်ခုအဖြစ် ထင်ရှားစွာလုပ်ကိုင်ဆောင်ရွက်လျက်ရှိကြောင်းသိရှိရပါသည်။

DOCA(ရန်ကုန်)

  စားသုံးသူရေးရာဦးစီးဌာန၊ ရန်ကုန်တိုင်းဒေသကြီးဦးစီးမှူးရုံးအနေဖြင့် (၂၈-၁၁-၂၀၂၃) ရက်နေ့၊ နံနက်(၉:၃၀)နာရီအချိန်တွင် ပိတောက်မြိုင်ဈေးသို့သွားရောက်၍ အခြေခံစားသောက်ကုန်ဈေးနှုန်းများကိုကောက်ယူခဲ့ပါသည်။

 ထိုသို့ဆောင်ရွက်ခဲ့ရာတွင် ပိတောက်မြိုင်ဈေးအတွင်းရှိ ကုန်ခြောက်ဆိုင်များတွင်ရောင်းချနေသော (၁)ပိဿာဈေးနှုန်းများမှာ ကြက်သွန်နီ (၃၈၀၀မှ ၄၀၀၀)ကျပ်၊ ကြက်သွန်ဖြူ (ဗမာ) (၁၈၀၀၀မှ ၂၀၀၀၀)ကျပ်၊ ကြက်သွန်ဖြူ(ကြူကုတ်) (၁၈၀၀၀မှ ၂၀၀၀၀)ကျပ်၊ ငရုတ်သီးခြောက် (ရှည်) (၁၅၀၀၀မှ ၁၇၀၀၀)ကျပ်၊ ငရုတ်ခြောက်(ပု) (၂၂၀၀၀မှ ၂၃၀၀၀)ကျပ်၊ အာလူး (၃၅၀၀မှ ၄၀၀၀)ကျပ်၊ ကုလားပဲ ၅၅၀၀ကျပ်နှင့် သကြား ၄၅၀၀ကျပ်အတွင်း စသည်ဖြင့် ဈေးနှုန်းသီးသီးရှိကြပြီး သား/ငါးဈေးနှုန်းများကို ဆက်လက်စုံစမ်းရာတွင် ငါးကြင်း ၁၅၀၀၀ကျပ်၊ ငါးမြစ်ချင်း ၁၂၀၀၀ကျပ်နှင့် ငါးသလောက် (၁၀၀၀၀မှ ၁၃၀၀၀)ကျပ်ဖြစ်ကာ ငါးသလောက်မှာ ဆောင်းရာသီ၌ ပေါ်ချိန်ဖြစ်၍ ကုန်အဝင်များသောကြောင့် ယခင်ထက်ဈေးကျလာကြောင်း၊ ဟင်းသီးဟင်းရွက်ဈေးနှုန်းများမှာလည်း ထန်းတပင်မြို့နယ်ဘက်မှ အဝင်ရှိသောကြောင့် အခြားမြို့နယ်များထက် ဈေးနှုန်းသက်သာခဲ့ပြီး လှိုင်သာယာမြို့နယ်သည် အခြေခံလူတန်းစားအများအပြားနေထိုင်သောကြောင့် ကုန်ပစ္စည်းရောင်းချသူများအနေဖြင့်လည်း မိမိတို့ကုန်ပစ္စည်းများကို ရက်ကြာကြာမရောင်းရဘဲ ဝယ်လိုအားများကြောင်း သုံးသပ်တင်ပြလိုက်ရပါသည်။

DOCA(ရန်ကုန်)

    အင်းစိန်မြို့နယ်ရှိ တညင်းကုန်းလက်ကားဈေးကြီးအတွင်းသို့ ၂၀၂၃ခုနှစ်၊ နိုဝင်ဘာလ(၂၂) ရက်နေ့မှ နိုဝင်ဘာလ(၂၈)ရက်နေ့အတွင်း ညောင်တုန်း၊ မှော်ဘီ၊သာရဝေါ၊ ညောင်နှစ်ပင်ကျေးရွာ၊ ကြာကန်စုကျေးရွာ၊ နေပြည်တော်၊ တပ်ကုန်း၊ ရွှေဒါး၊  မင်္ဂလာဒုံ၊ အင်းစိန်၊ ခရမ်း၊ သုံးခွ၊ ပြည်၊ လက်ပံတန်း၊ မင်းလှ၊ ဝါးနက်ချောင်း၊ မော်လမြိုင်၊ မန္တလေး၊ အုတ်ဖိုနှင့် ရှမ်းပြည်နယ်တို့မှ ဟင်းသီးဟင်းရွက်နှင့် သစ်သီးဝလံပန်းမန်များ အများဆုံးဝင်ရောက်ရောင်းချနေကြောင်းသိရှိရပါသည်။ ထိုသို့ဝင်ရောက်ရာတွင် ယခုရက်သတ္တပတ်အတွင်း ခရမ်းချဉ်သီးထိုင်ဝမ်(တစ်ပိဿာ)လျှင် ကျပ် (၁၀၀၀မှ ၁၄၀၀) အတွင်း၊ ဂေါ်ဖီထုပ်(တစ်ထုပ်)လျှင် ကျပ် (၅၀၀မှ ၁၃၀၀) အတွင်း၊ ပန်းဂေါ်ဖီ(တစ်ထုပ်)လျှင် ကျပ် (၇၀၀မှ ၁၈၀၀) အတွင်း၊ အာလူး(တစ်ပိဿာ)လျှင် ကျပ် (၃၆၀၀မှ ၃၈၀၀) အတွင်း၊ မုန့်လာဥနီ(တစ်ပိဿာ)လျှင် ကျပ် (၄၅၀၀မှ ၅၀၀၀) အတွင်း၊ ရွှေဖရုံသီး(တစ်လုံး)လျှင် ကျပ် (၉၀၀မှ ၅၄၀၀) အတွင်း၊ ဘူးသီး(တစ်လုံး)လျှင် ကျပ် (၁၀၀၀မှ ၁၈၀၀) အတွင်း၊ မုန်ညှင်း(ထုပ်)(တစ်ပိဿာ)လျှင် ကျပ် (၂၅၀၀မှ ၃၀၀၀) အတွင်း၊ ကြက်သွန်နီ(ဆိပ်ဖြူ)တစ်ပိဿာလျှင် ကျပ် (၂၄၀၀မှ ၃၈၀၀) အတွင်း၊ ကြက်သွန်ဖြူ(ရှမ်း)(တစ်ပိဿာ)လျှင် ကျပ် (၁၁၀၀၀မှ ၁၄၀၀၀) အတွင်း၊ ကြက်သွန်ဖြူ (ကြူကုတ်) (တစ်ပိဿာ) လျှင် ကျပ် (၁၂၅၀၀မှ ၁၃၀၀၀) အတွင်း၊ ချင်း(တစ်ပိဿာ)လျှင် ကျပ် (၅၀၀၀မှ ၆၀၀၀) အတွင်း၊ ဆလပ်ရွက် (တစ်စည်း) လျှင် ကျပ် (၂၀၀မှ ၃၀၀) အတွင်း၊ ချဉ်ပေါင်ရွက်(တစ်စည်း)လျှင် ကျပ် (၁၀၀မှ ၂၀၀) အတွင်း၊ ခရမ်းသီး  (ရှည်) (တစ်ပိဿာ)လျှင် ကျပ် (၁၃၀၀မှ ၁၈၀၀) အတွင်း၊ သံပရာသီး(တစ်လုံး)လျှင် ကျပ် (၁၀၀မှ ၂၀၀) အတွင်း၊ ငရုတ်သီးစိမ်း (ကျောက်စိမ်း) (တစ်ပိဿာ) လျှင် ကျပ် (၂၅၀၀မှ ၃၈၀၀) အတွင်း၊ ဖရဲသီး (အကြီး၊ အလတ်၊ အသေး)တစ်လုံးလျှင် ကျပ် (၁၅၀၀မှ ၆၀၀၀) အတွင်းဖြစ်ကြောင်းသိရှိရပါသည်။ တညင်းကုန်းလက်ကားဈေးကြီးအတွင်းသို့ ယခုရက်သတ္တပတ်အတွင်း သံပရာသီးအလုံးပေါင်း(၁၅၆၅၂၀၀)ကျော်၊ ခရမ်းသီး(ရှည်) (ပိဿာ) (၃၂၀၅၀)ကျော်၊ ဘူးသီးအလုံးပေါင်း (၁၃၆၇၆)ကျော်၊ ရွှေဖရုံသီးအလုံးပေါင်း(၆၁၀၅)ကျော်၊ ဂေါ်ဖီထုပ်ပေါင်း (၆၉၀၀၀) ကျော်၊ ပန်းဂေါ်ဖီထုပ်ပေါင်း (၂၉၁၁၂)ကျော်၊ မုန်ညှင်းထုပ်(ပိဿာ) ပေါင်း(၉၇၉၅)ကျော်၊ ဖရဲသီးလုံးပေါင်း(၂၄၆၃၇)ကျော် စသည်ဖြင့် အသီးသီးကုန်အဝင်ရှိကြောင်း သိရှိရပါသည်။

DOCA(ရန်ကုန်)

   ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်း မြို့နယ်များနှင့် အခြားတိုင်းဒေသကြီး၏ ပြည်နယ်များရှိ ကိုယ်စားလှယ်များသို့ စားအုန်းဆီများကို နေ့စဉ် ထုတ်ပေးလျက်ရှိပါသည်။ စားအုန်းဆီအား ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားအုန်းဆီတင်သွင်း/ သိုလှောင်/ ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည်ဖြန့်ဖြူးရောင်းချသူများအနေဖြင့် ဒေသအရောက် ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသော ဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေးနှင့် ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက်လည်း ဝန်ထမ်းများက ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၂၀-၁၁-၂၀၂၃)ရက်နေ့မှ (၂၅-၁၁-၂၀၂၃)ရက်နေ့အထိ ဆီကုမ္ပဏီ(၁၃)ခုမှ စားအုန်းဆီကိုယ်စားလှယ် (၇၆၆)ဦးတို့အား စားအုန်းဆီတန်ချိန် (၄၂၅၇.၈၀၁)တန်ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)

    ရန်ကုန်မြို့တော်စည်ပင်သာယာရေးကော်မတီ၏ ကြီးကြပ်ကွက်ကဲမှုအောက်ရှိ ရန်ကုန်အရှေ့ပိုင်းခရိုင်၊ အထက်ပုဇွန်တောင်လမ်း၊ မင်္ဂလာတောင်ညွန့်မြို့နယ်ရှိ ကြက်/ဘဲ ဈေးဒိုင်မှ စားသုံးသူပြည်သူများသို့  နေ့စဉ် ကြက်/ဘဲများကို လက်လီ/လက်ကား ရောင်းချပေးလျက်ရှိကြောင်းသိရှိရပါသည်။

    ရန်ကုန်အရှေ့ပိုင်းခရိုင်၊ စားသုံးသူရေးရာဦးစီးမှူးရုံးမှ ဝန်ထမ်းများသည် မင်္ဂလာတောင်ညွန့်မြို့နယ်ရှိ ကြက်/ဘဲဈေးဒိုင်တွင်ရောင်းချလျက်ရှိသော ကြက်/ဘဲဈေးနှုန်းများကို ဈေးကွက်ဈေးနှုန်းစုံစမ်းခြင်းများပြုလုပ်ခဲ့ရာ (၂၈-၁၁-၂၀၂၃) ရက်နေ့တွင် ကြက်အရှင် အိမ်မွေးကြက် ၁ပိဿာလျှင် (၁၅၀၀၀/၁၆၀၀၀)ကျပ်၊ အသားတိုးကြက် ၁ပိဿာလျှင် (၆၅၀၀/၆၆၀၀) ကျပ်၊ မွေးမြူရေးကြက် (ထီး/မ) ၁ပိဿာလျှင်(၅၀၀၀/၈၀၀၀) ကျပ်၊ ဘဲအရှင် ၁ပိဿာလျှင် (၇၅၀၀/ ၇၆၀၀) ကျပ်၊ ချယ်ရီဘယ်ရီဘဲ ၁ပိဿာလျှင် (၉၀၀၀) ကျပ်တို့ဖြင့်  ကုန်ချိန် (၇၄၅၀၀) ပိဿာခန့်အဝင်ရှိနေကြောင်း ရန်ကုန်တိုင်းဒေသကြီးအတွင်းရှိ မြို့နယ်များမှ ခြံဖမ်းဈေးစနစ်ဖြင့်လည်းကောင်း၊ အခြားတိုင်းနှင့် ပြည်နယ်များမှ အရောက်ပို့စနစ်ဖြင့်လည်းကောင်း တင်ပို့ရောင်းချလျက်ရှိကြောင်းသိရပါသည်။

DOCA(ရန်ကုန်)