ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ အနောက်ပိုင်းရွာသစ်ရပ်ကွက်နှင့် ကိုးတောင့်၊ ရေလယ်ကျွန်း၊ သံဇလုံ၊ အောက်ဆိပ်၊ ချဉ်တောင်၊ မြင့်ကဝ၊ ချောင်းမန်ကျည်း၊ တူရွင်းမျှော၊ ဂွေးပင်ကျေးရွာများတွင် မိသားစုအပိုဝင်ငွေရရှိစေရန် ကုန်စိမ်းသီးနှံ၊ ဟင်းသီးဟင်းရွက်များ စိုက်ပျိုးကြကြောင်း၊ ဆောင်းသီးနှံစိုက်ပျိုးမှုများပြီး နွေသီးနှံပင်ထောင်ခရမ်းချဉ်များကို စိုက်ပျိုးမှု နည်း၍ဈေးကွက်လိုအပ်ချက်အရ ဒေသတွင်းခရမ်းချဉ်သီးအပြင် ရှမ်းပြည်အောင်ပန်းနှင့် ပုပ္ပါးဒေသထွက် ခရမ်းချဉ်သီးများ ဝင်ရောက်အရောင်းအဝယ်ဖြစ်လျက်ရှိကြောင်းသိရှိရပါသည်။

 ဈေးနှုန်းဈေးကွက်အနေဖြင့် ၂၀၂၄ခုနှစ်၊ ဇွန်လ(တတိယပတ်)တွင် ခရမ်းချဉ်သီး (ထိုင်ဝမ်)တစ်ပိဿာလျှင် လက်ကားကျပ်(၅၀၀၀)၊ လက်လီ ကျပ်(၆၀၀၀)ဈေးဖြင့် အရောင်း အဝယ်ဖြစ်ပြီး ယခင်မေလ(တတိယပတ်)တွင် ခရမ်းချဉ်သီးတစ်ပိဿာလျှင် လက်ကားဈေး ကျပ် (၂၀၀၀)၊ လက်လီဈေး ကျပ်(၂၈၀၀)ဈေးဖြင့် အရောင်းအဝယ်ဖြစ်ခဲ့၍ တစ်လအတွင်းခရမ်းချဉ်သီး တစ်ပိဿာ ကျပ်(၃၀၀၀)ခန့် ဈေးတက်ပြီး အရောင်းအဝယ်ဖြစ်လျက်ရှိကြောင်း၊ ဈေးနှုန်းမြင့်တက်ရခြင်းမှာ ဒေသတွင်းခရမ်းချဉ်သီးထွက်ရှိမှုနည်းပြီး နယ်မြေအခြေအနေအရဈေးကွက်သို့ ခရမ်းချဉ်သီးဝင်ရောက်မှုနည်းခြင်းကြောင့် ဈေးနှုန်းမြင့်တက်ကြောင်း ကုန်စိမ်းသီးနှံရောင်းဝယ်ရေး လုပ်ငန်းရှင်တစ်ဦးထံမှ သိရှိရသည်။

DOCA(မကွေး)

လူအများနေ့စဉ်စားသုံးရာတွင် ဆန်ပြီးလျှင် စားသုံးဆီသည်လည်း ဒုတိယအရေးပါသော အခြေခံစားကုန်တစ်မျိုးဖြစ်ပါသည်။  ပြည်ခရိုင်တွင် နှစ်အလိုက်ဖြစ်ပေါ်ခဲ့သော စားသုံးဆီ ဈေးနှုန်း များကို လေ့လာသုံးသပ်တင်ပြအပ်ပါသည်။

စဉ်      ခုနှစ်             အမျိုးအမည်             ရေတွက်ပုံ                           ဈေးနှုန်း

                                                                                        နိမ့်               မြင့်

၁။      ၂၀၂၀            မြေပဲဆီ                   ပိဿာ                    ၄၅၀၀           ၆၈၀၀

                             နှမ်းဆီ                    ပိဿာ                    ၆၅၀၀           ၈၁၀၀                                        စားအုန်းဆီ              ပိဿာ                    ၁၄၅၀           ၂၁၆၀           

၂။       ၂၀၂၁            မြေပဲဆီ                   ပိဿာ                    ၆၈၀၀           ၈၅၀၀

                             နှမ်းဆီ                    ပိဿာ                    ၆၅၀၀           ၇၅၀၀                                        စားအုန်းဆီ              ပိဿာ                    ၆၄၀၀           ၇၅၀၀

၃။      ၂၀၂၂            မြေပဲဆီ                   ပိဿာ                    ၈၀၀၀           ၁၃၀၀၀

                             နှမ်းဆီ                    ပိဿာ                    ၇၀၀၀           ၁၂၀၀၀                                      စားအုန်းဆီ              ပိဿာ                    ၅၂၀၀            ၉၇၀၀

၄။      ၂၀၂၃            မြေပဲဆီ                   ပိဿာ                    ၁၃၀၀၀         ၁၄၀၀၀

                             နှမ်းဆီ                    ပိဿာ                    ၁၂၀၀၀          ၁၃၀၀၀                                      စားအုန်းဆီ              ပိဿာ                    ၅၀၀၀           ၇၆၀၀

၅။      ၂၀၂၄            မြေပဲဆီ                   ပိဿာ                    ၁၃၅၀၀         ၁၅၀၀၀

          မေလ            နှမ်းဆီ                    ပိဿာ                    ၁၂၅၀၀          ၁၄၀၀၀                   ကုန်ထိ          စားအုန်းဆီ              ပိဿာ                    ၅၃၅၀           ၆၀၀၀ 

          ပြည်ဈေးကွက်ရှိ ဆီဈေးနှုန်းများမှာ နှစ်အလိုက်တစ်နှစ်ပြီးတစ်နှစ် မြင့်တက်လာခဲ့သည်ကို တွေ့ရပါသည်။ နှမ်းသီးနှံဈေးနှင့် မြေပဲသီးနှံဈေးများမှာလည်း နှစ်အလိုက်မြင့်တက်လာကြသဖြင့် ဆီဈေးနှုန်းများလည်းမြင့်တက်လာခဲ့သည်ဟု သိရပါသည်။ လွန်ခဲ့သော (၅)နှစ်ခန့်ကဖြစ်သော ၂၀၂၀ခုနှစ်တွင် မြေပဲဆီတစ်ပိဿာလျှင် အမြင့်ဆုံး ၆၈၀၀ကျပ်မှ အနိမ့်ဆုံး ၄၅၀၀ကျပ်ဖြင့် အရောင်းအဝယ်ဖြစ်ခဲ့ပြီး ယခု ၂၀၂၄ ခုနှစ် (မေ)လအထိတွင် မြေပဲဆီတစ်ပိဿာလျှင် အမြင့်ဆုံး ၁၅၀၀၀ကျပ် နှင့် အနိမ့်ဆုံး ၁၃၅၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ထိုအတူ နှမ်းဆီ ဈေးမှာလည်း ၂၀၂၀ခုနှစ်တွင် အမြင့်ဆုံး တစ်ပိဿာလျှင် ၈၁၀၀ကျပ်နှင့် အနိမ့်ဆုံး တစ်ပိဿာလျှင် ၆၅၀၀ကျပ်ဖြင့် အရောင်းအဝယ်ဖြစ်ခဲ့ပြီး ယခုနှစ်ဖြစ်သော ၂၀၂၄ခုနှစ် (မေလ) အထိတွင် နှမ်းဆီအမြင့်ဆုံးတစ်ပိဿာလျှင် ၁၄၀၀၀ကျပ်၊ အနိမ့်ဆုံးတစ်ပိဿာလျှင် ၁၂၅၀၀ကျပ်ဖြင့် အရောင်းအဝယ်ဖြစ်လျက်ရှိသလို စားအုန်းဆီဈေးမှာလည်း ၂၀၂၀ခုနှစ်တွင် အမြင့်ဆုံးတစ်ပိဿာ လျှင် ၂၁၆၀ကျပ်၊ အနိမ့်ဆုံးတစ်ပိဿာ ၁၄၅၀ကျပ်ဖြင့် ရောင်းချခဲ့ကြပြီး ယခုနှစ် ၂၀၂၄ခုနှစ် (မေလ)အထိတွင် အမြင့်ဆုံး တစ်ပိဿာလျှင် ၆၀၀၀ကျပ် မှ အနိမ့်ဆုံးတစ်ပိဿာလျှင် ၅၃၅၀ကျပ် ဖြင့် ရောင်းချကြောင်း သိရပါသည်။

          ယခုအပတ်ဖြစ်သော ဇွန်လတတိယပတ်တွင် မြေပဲဆီဈေးမှာ တစ်ပိဿာလျှင် ၁၅၀၀၀ကျပ်၊ နှမ်းဆီတစ်ပိဿာလျှင် ၁၆၀၀၀-၁၆၄၀၀ကျပ်နှင့် စားအုန်းဆီ အခြားအမှတ်တံဆိပ် ဗုံးဆီ တစ်ပိဿာလျှင် ၉၅၀၀-၁၀၀၀၀ကျပ်ဖြင့် ဈေးကွက်များ၊ ဆီဆိုင်များတွင် ရောင်းချလျက်ရှိ ကြောင်းသိရပါသည်။

DOCA(ပဲခူး)

              တောင်ငူခရိုင် ဖြူးမြို့သို့ စစ်တောင်းမြစ်အရှေ့ဘက်ရှိ ကျောက်ကြီးမြို့နယ်မှထွက်ရှိသော ဒူးရင်းသီးများ နှစ်စဉ်ဝင်ရောက်လျက်ရှိရာ ယခုနှစ်တွင်လည်း မေလမှစတင်၍ဝင်ရောက်လာကာ ဒူးရင်းသီးအရောင်းဆိုင်များ၍ ရောင်းအားကောင်းကြောင်းသိရပါသည်။ ဒူးရင်းသီးသည် အနံမွှေး၍ အရသာဆိမ့်သဖြင့် လူကြိုက်များသော အသီးတစ်မျိုးဖြစ်ပါသည်။

              ဖြူးမြို့တွင်း ရန်ကုန်-မန္တလေးလမ်းဘေးတွင် ဒူးရင်းသီးဆိုင်များရှိပြီး အရွယ်အစား အလိုက် တစ်လုံးလျှင် အနိမ့်ဆုံး ၅၀၀၀ ကျပ်မှ အမြင့်ဆုံး ၂၅၀၀၀ ကျပ်အထိရှိပါသည်။ ဒေသတွင်းမှ ဝယ်ယူစားသုံးကြသကဲ့သို့ ရပ်ဝေးမှဆွေမျိုးမိတ်ဆွေများထံ လက်ဆောင်ပေးပို့ခြင်း၊ ဖြူးမြို့ကို ဖြတ်သန်းသည့် ယာဉ်များမှခရီးသည်များက လက်ဆောင်ဝယ်သွားခြင်းဖြင့် အရောင်းအဝယ် ကောင်းလျက်ရှိပါသည်။

              ဖြူးမြို့မှ ဒူးရင်းသီးဆိုင်များသည် ယခင်နှစ်တွင် မေလမှ အောက်တိုဘာလအထိ ရောင်းရ ကြောင်း၊ မကွေး၊ မန္တလေး၊ တောင်ကြီး၊ လားရှိုးဒေသများသို့ တင်ပို့ရောင်းချရကြောင်း၊ ယခုနှစ်တွင် ဒူးရင်းသီးဈေးမြင့်သော်လည်း အရောင်းအဝယ်မှာ ကျဆင်းသွားခြင်းမရှိဘဲ ပုံမှန်အတိုင်းရှိကြောင်း ဒူးရင်းသီးရောင်းချသူတစ်ဦးထံမှ သိရပါသည်။

              ထို့အပြင် တောင်ငူခရိုင်၊ ဖြူးမြို့နယ်မှ ဒေသထွက်ကုန်တစ်မျိုးဖြစ်သော သံပုရာသီးမှာ နွေရာသီ တွင် ဈေးကောင်းရရှိပြီး အရောင်းအဝယ်ကောင်းခဲ့ပါသည်။ သံပုရာသီးတစ်လုံးလျှင် ၂၀၀ ကျပ်မှ ၃၅၀ ကျပ် အထိ ရှိခဲ့ပါသည်။      ၂၀၂၄ခုနှစ် ဇွန်လတတိယအပတ်တွင် သံပုရာသီးများ လှိုင်လှိုင်ပေါ်လာပြီဖြစ်သဖြင့် ဈေးနှုန်းမှာလည်း တစ်လုံးလျှင် ၅၀ ကျပ်မှ ၂၀၀ ကျပ်အထိ ကျဆင်းခဲ့ပါသည်။ ယခုနှစ်တွင် ယခင်နှစ်များကထက် သံပုရာသီးဈေးကောင်းသော်လည်း မိုးဦးကျ ကာလတွင် လေပြင်းတိုက်ခတ်မှု ကြောင့် သံပုရာပွင့်များကြွေ၍ ထင်သလောက် အသီး မတင်ကြောင်း ဖြူးမြို့မှ သံပုရာတပိုင်တနိုင် စိုက်ပျိုးသူတစ်ဦးထံမှ သိရပါသည်။

DOCA(ပဲခူး)

         မိုးဦးကာလရာသီအချိန်တွင် ရာသီပေါ်ဟင်းသီးဟင်းရွက်များ ဈေးကွက်အတွင်း ရောင်းဝယ် လျက်ရှိရာ ရာသီပေါ်ဟင်းသီးဟင်းရွက်ရောင်းချနေသူများအနေဖြင့် အရောင်းသွက်လျက်ရှိနေပါ သည်။ ရာသီစာထဲမှာ အင်ဥ၊ မျှစ်စို့ပေါက်များနှင့် ဂွေးသီးများသည် အဝယ်လိုက်၍ လူစားများသော ရာသီစာများဖြစ်ကြပါသည်။ ရာသီစာများနှင့်အတူ တွဲဖက်စားသုံးရာသော ကင်းပုံရွက်၊ ဆူးပုတ်ရွက် များမှာလည်း အရောင်းသွက်ကြောင်း သိရပါသည်။ ဝယ်ယူစားသုံးရသော ဈေးနှုန်းများမှာ အင်ဥ နို့ဆီဘူးတစ်ဘူးလျှင် ပေါ်ခါစရှားချိန်တွင် ၄၀၀၀ကျပ်ရှိပြီး ၂၀၂၄ခုနှစ် ဇွန်လတိယအပတ်တွင် ၂၅၀၀ကျပ်၊ မျှစ်စို့ပေါက်ကလေးများမှာ တစ်ပိဿာလျှင် ၁၀၀၀၀ကျပ်၊ ဂွေးသီးမှာ ၁၀လုံးလျှင် ၃၀၀ကျပ်၊ ကင်းပုံရွက်တစ်စည်းလျှင် ၂၀၀ကျပ်နှင့် ဆူးပုတ်ရွက် တစ်စည်းလျှင် ၃၀၀ကျပ်ဈေးရှိပါသည်။ ရာသီပေါ်ဟင်းသီးဟင်းရွက်မှာ ဒေသထွက်များရှိသလို အခြားမြို့နယ်များမှလည်း ဝင်ရောက်လျက်ရှိပါသည်။

DOCA(ပဲခူး)

    မကွေးတိုင်းဒေသကြီး၊ မင်းဘူးခရိုင်၊ စလင်းမြို့နယ်၊ ဝန်ရအုပ်စုရှိ ကံကုန်းကျေးရွာတွင် မိုးနှမ်းကိုကျဲပက်စနစ်ဖြင့် တန်ခူးလတွင်တောင်သူ(၇၀)ဦးမှ စိုက်ဧက(၁၅၀)ဧကစိုက်ပျိုးထားရာ ဝါဆိုလတွင်ရိတ်သိမ်းမည်ဖြစ်ကြောင်း သိရှိရပါသည်။

   နှမ်းနက်စမုံမျိုးကို အများဆုံးစိုက်ပျိုးပြီး (၁)ဧကလျှင် မျိုး(၅)ပြည်ခန့်ကုန်ကျကြောင်း၊ ၎င်းအနေဖြင့် နှမ်းနက်စမုန်မျိုး(၅)ဧကခန့်စိုက်ပျိုးထားကြောင်း၊ မျိုးကို(၁)ပြည်လျှင် ကျပ်(၁၁၀၀၀)ဖြင့် စလင်းမြို့မှဝယ်ယူပါကြောင်း၊ ယခင်နှစ်က (၁)ဧကလျှင် ကျပ်(၂၅၀၀၀၀) သာကုန်ကျသော်လည်း ယခုနှစ်တွင် သွင်းအားစုစရိတ်မြင့်တက်လာ၍ မြေပြုပြင်ခ၊ လုပ်အားခနှင့် မျိုးဖိုးအပါအဝင် စုစုပေါင်း ကျပ်(၃၀၀၀၀၀)ခန့်ကုန်ကျပါကြောင်း၊ ယခင်နှစ်က (၁) ဧကလျှင် (၁၀)တင်း မှ(၂၀)တင်းထိထွက်ရှိပြီး ဈေးနှုန်းမှာ (၁)တင်းလျှင် ကျပ်(၁၄၀၀၀၀)ထိရရှိခဲ့ပါကြောင်း၊ ဈေးကွက်အနေဖြင့် စလင်းမြို့ပေါ်ရှိ ပွဲရုံများသို့တင်ပို့ရောင်းချကြောင်း ကံကုန်းကျေးရွာနေ မိုးနှမ်းစိုက်တောင်သူဦးမြင့်စိုးထံမှ သိရှိရပါသည်။

DOCA(မကွေး)