ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကြက်သွန်နီကုန်စည်ဒိုင်သို့ ကြက်သွန်နီ စိုက်ပျိုးရာဒေသများဖြစ်သော ရေစကြို၊ ပေါက်၊ ကမ္မ၊ ရေပြာနယ်များမှ ဆောင်စိုက်ပင်စိုက်ကြက်သွန်နီများ အရောင်းအဝယ်ဖြစ်လျက်ရှိနေပါသည်။ ပခုက္ကူမြို့နယ်ကြက်သွန်နီ စိုက်ပျိုးရာဒေသများသာမက အခြားမြို့နယ်များမှလည်း ဝင်ရောက်အရောင်းအဝယ်ဖြစ်နေကြောင်း ကြက်သွန်နီကုန်သည်များထံမှ သိရှိရပါသည်။  ၂၀၂၄ခုနှစ်၊ ဩဂုတ်လ(ပထမပတ်)အတွင်း အရောင်းအဝယ်ဖြစ်ပေါ်ခဲ့သော ကြက်သွန်နီလက်ကားဈေးနှုန်းများမှာယောစ ထိပ်စတစ်ပိဿာလျှင် ကျပ်(၁၇၇၅)၊ အလတ်စ တစ်ပိဿာလျှင် ကျပ် (၁၄၅၀)၊ အနိမ့်စတစ်ပိဿာလျှင် ကျပ်(၁၂၀၀)ဖြစ်ပြီး၊ ပုလဲစထိပ်စ တစ်ပိဿာလျှင် ကျပ်(၁၈၀၀)၊ အလတ်စ တစ်ပိဿာလျှင် ကျပ်(၁၆၀၀)၊ အနိမ့်တစ်ပိဿာလျှင် ကျပ်(၁၃၀၀)ဖြစ်ပြီး နေ့စဉ် အရောင်း အဝယ်ဖြစ်နေကြောင်း ကုန်စည်ဒိုင်မှ သိရှိရပါသည်။

    မြို့မစည်ပင်ဈေး၊အမှတ်(၂)ဈေး နှင့် ပျံကျဈေးတို့တွင် ရောင်းချနေသော ကြက်သွန်နီ လက်ကားဈေးမှာ ထိပ်စတစ်ပိဿာလျှင် ကျပ်(၂၅၀၀)၊ အလတ်စတစ်ပိဿာလျှင် ကျပ်(၂၃၀၀)၊ အနိမ့်တစ်ပိဿာလျှင် ကျပ်(၂၀၀၀)ဈေးတို့ဖြင့်ရောင်းချနေကြောင်း မြို့မဈေးသည်များထံမှ သိရှိရပါသည်။ ကုန်စည်ဒိုင်တွင် အရောင်းအဝယ်ဖြစ်ခဲ့သောနေ့စဉ်ကုန်ချိန်မှာ တစ်နေ့လျှင်ကုန်ချိန်(၂၀၀၀၀မှ ၅၀၀၀၀) ထိ အရောင်းအဝယ်ဖြစ်ပြီး တင်ပို့မှုအနေဖြင့် မြန်မာပြည်အောက်ပိုင်းရန်ကုန်နှင့် မော်လမြိုင်မြို့များသို့ တင်ပို့နေကြောင်း ကုန်သည်များထံမှ သိရှိရပါသည်။

DOCA(မ‌ကွေး)

    မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်အတွင်းရှိ ကျေးရွာများ၌ မုန်းချောင်းရေကို အမှီပြု၍ ရုံးပတီသီးနှင့် အခြားဟင်းသီးဟင်းရွက်များကို ကိုယ်တိုင်စားသုံးရန်နှင့် ရောင်းချရန်အတွက် တစ်ပိုင်တစ်နိုင် စိုက်ပျိုးလျက်ရှိပြီး မျိုးအနေဖြင့် စိုက်ပျိုးရေးဆေးဆိုင်များမှ ဝယ်ယူစိုက်ပျိုးကြကြောင်း သိရသည်။

     ရုံးပတီသီးသည် ရေလုံလောက်စွာရရှိပါက (နွေ၊ မိုး၊ ဆောင်း) တစ်နှစ်ပတ်လုံး စိုက်ပျိုးနိုင်ကြောင်း၊ တစ်ဧကကုန်ကျစရိတ်အနေဖြင့် (သွင်းအားစု၊ လုပ်သားခအပါအဝင်) ငွေကျပ် (၆၀၀၀၀၀)ခန့် ကုန်ကျကြောင်း၊ ရုံးပတီသီး စိုက်ပျိုးပြီး ရက် (၆၀) မှ (၇၀) အကြာတွင် အသီးစတင် ခူးဆွတ်နိုင်ပြီး တစ်ဧကလျှင် ပိဿာ (၁၀၀၀)ကျော် ထွက်ရှိကြောင်း၊ ဈေးနှုန်းအနေဖြင့် ရုံးပတီသီးတစ်ပိဿာလျှင် လက်ကားဈေးနှုန်း ငွေကျပ်(၂၅၀၀)၊ လက်လီဈေးနှုန်း ငွေကျပ် (၂၈၀၀-၃၀၀၀) ဖြင့်လည်းကောင်း၊ ရုံးပတီသီး (၁၀)တောင့်လျှင် ငွေကျပ်(၂၅၀-၃၀၀)ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ အကျိုးအမြတ်အနေဖြင့် ငွေကျပ်(၁၉၀၀၀၀)ခန့် ကျန်ရှိကြောင်း၊ ဈေးကွက်အနေဖြင့် ပွင့်ဖြူမြို့နယ်နှင့် စလင်းမြို့၊ မင်းဘူးမြို့နှင့် မကွေးမြို့ရှိ ဈေးများသို့ တင်ပို့ရောင်းချလျက်ရှိပြီး တောင်သူများဈေးကောင်းရရှိ၍ အကျိုးအမြတ်ရလျက်ရှိကြောင်း သိရသည်။

DOCA(မ‌ကွေး)

    စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့တွင် ကုန်ခြောက်နှင့် ကုန်စိမ်းသီးနှံအစုံ ရောင်းချပြီး မိသားစု စားဝတ်နေရေးအတွက် ဝင်ငွေရှာသည့်လုပ်ငန်းကို  လုပ်ကိုင်ရောင်းချလျက်ရှိကာ ကုန်စိမ်းသီးနှံများအား ရာသီအလိုက် ပေါ်ပင်သီးနှံများကို နေရာဒေသမရွေး ဖောက်သည်ယူ၍ ပေါ်ဦးပေါ်ဖျားမှ သီးနှံတုန်းသည်အထိ ရောင်းချကြောင်းသိရပါသည်။

    ကန့်ဘလူမြို့မ စည်ပင်သာယာဈေးမှာ ကုန်ခြောက်၊ ကုန်စိမ်းသီးနှံများကို မန္တလေးမြို့၊ ဇီးကုန်းမြို့တို့မှ ဖောက်သည်မှာယူပြီး ကန့်ဘလူမြို့မစည်ပင်သာယာဈေးတွင် လက်လီ/လက်ကား ရောင်းချပါကြောင်း ကုန်စိမ်းသီးနှံရောင်းချနေသူ ထံမှ သိရှိရပါသည်။

      ၂၀၂၄ ခုနှစ်၊ ဩဂုတ်လ ပထမပတ်တွင် ကန့်ဘလူမြို့မစည်ပင်သာယာဈေးအတွင်း၌ ရောင်းချနေသော အာလူးသီးများကို မန္တလေးမြို့မှ မှာယူရောင်းချကြောင်း၊  အာလူးသီး၏ ဈေးနှုန်းဈေးကွက်အနေဖြင့် ဇူလိုင်လမှစ၍ အာလူးသီးဈေးနှုန်းများ မြင့်တက်ခဲ့ပြီး ယခုဩဂုတ်လ ပထမပတ်အတွင်း အာလူးသီးဈေးနှုန်းအနေဖြင့် အလုံးအကြီး/အသေးပေါ်မူတည်၍ တစ်ပိဿာလျှင်(၃၃၀၀/၃၅၀၀)ကျပ်တို့ဖြင့် ဖောက်သည်ဝယ်ယူရပြီး ကန့်ဘလူမြို့ စားသုံးသူပြည်သူများထံသို့ ရောင်းချရာတွင် အာလူးသီး အလုံးအကြီး/ အသေးပေါ်မူတည်၍ တစ်ပိဿာလျှင်(၄၂၀၀ / ၆၄၅၀)ကျပ် တို့ဖြင့် အသီးသီးရောင်းချပါကြောင်း ကန့်ဘလူမြို့မစည်ပင်သာယာဈေးကုန်ခြောက်/ ကုန်စိမ်းသီးနှံအစုံရောင်းချသူထံမှ သိရှိရပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံး အနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် အသင်း၊ အစုအဖွဲ့နှင့် ကုန်စည်ဒိုင်များ ဖွဲ့စည်းခြင်း၊ ဖွဲ့စည်းပြီးအသင်းအဖွဲ့များ၊ ကုန်စည်ဒိုင်များ ပိုမိုခိုင်မာအားကောင်းလာစေရေး ပူးပေါင်းဆောင်ရွက်လျက်ရှိသည့်အပြင် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန် စာရင်းတို့ကို အပတ်စဉ်၊ လစဉ်တင်ပြလျက်ရှိပါသည်။

     ပဲတီစိမ်းမှာ မေလ၊ ပထမအပတ်မှစတင်၍ ရွှေဘိုဈေးကွက်တွင် အရောင်းအဝယ်ဖြစ်ခဲ့ကြောင်း၊ ဇူလိုင်လ၊ လကုန်အပတ်တွင် အရောင်းအဝယ်ဖြစ်သည့်ဈေးနှုန်းမှာ ပဲတီစိမ်းတစ်တင်းလျှင် (၇၂၀၀ဝိ/-) ကျပ် ပေါက်ဈေးရှိပြီး အရောင်းအဝယ်ဖြစ်မှုမှာ (၉၀၀)တင်း/ (၂၉)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ ပဲတီစိမ်းတစ်တင်း လျှင်(၇၀၅၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် ပဲတီစိမ်းတစ်တင်းလျှင် (၁၅၀ဝိ/-)ကျပ် ဈေးပိုမိုရရှိခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်နှစ်ကာလတူ၌ ပဲတီစိမ်းတစ်တင်းလျှင် (၅၆၀၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် ပဲတီစိမ်းတစ်တင်းလျှင် (၁၆၀၀ဝိ/-)ကျပ် ဈေးပိုမိုရရှိခဲ့ကြောင်း၊ ယခုအပတ်တွင် ပဲတီစိမ်းဈေးဆက်လက်မြင့်တက်လာသည့်အပြင် ဝင်ရောက်သမျှ အရောင်းအဝယ်ဖြစ် လျက်ရှိကြောင်း ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

       ဧရာဝတီတိုင်းဒေသကြီး၊ မြောင်းမြခရိုင်အတွင်း အများဆုံးစိုက်ပျိုးလျက်ရှိသော ကွမ်သီးအနု(အရည်သောက်) ဈေးနှုန်းမှာ ယခင်နှစ်တစ်ပိဿာလျှင် ကျပ်၃၃၀ဝိ/-ဈေးနှုန်းသာရှိ၍ ယခုနှစ်တွင် တစ်ပိဿာလျှင် ကျပ်၁၀၆၀ဝိ/-ဈေးရရှိသဖြင့် ကွမ်းသီးစိုက်ပျိုးသောတောင်သူများ ဈေးကောင်းရလျက်ရှိကြောင်း ဈေးကွက်မှသိရသည်၊၊

     ကွမ်းသီးအနုထွက်ရှိချိန် မတ်လ၊ ဧပြီလတွင် ဈေးကွက်အတွင်းသို့ စတင်ဝင်ရောက်မှုရှိသော်လည်း ဇွန်လ၊ ဇူလိုင်လများတွင် အသီးလှိုင်လှိုင်ဝင်၍ ဩဂုတ်လရောက်လျှင် ကွမ်းသီးအနုမထွက်ရှိသောကြောင့် အရောင်းအဝယ်ရာသီပြီးဆုံးသွားကြောင်း၊ ကွမ်းသီးအနုထွက်ရှိချိန် တရုတ်ဝယ်လက်များက မြောင်းမြမြို့သို့လာရောက်၍ မြို့ပေါ်တွင် ကိုယ်စားလှယ်ထားရှိပြီး အဝယ်ဒိုင်ဖွင့်လှစ်ဝယ်ယူ၍ ကျေးရွာများရှိ လက်လီဒိုင်ခွဲများမှ  လာရောက်ရောင်းချလျက်ရှိကြောင်းသိရသည်၊၊

      ကွမ်းသီးအနုဝယ်ယူရာတွင် ကွမ်းသီးအဝိုင်းဝယ်ယူမှုမရှိဘဲ ဒေသအခေါ် ဥဘဲချွန်း၊ ကပ်ချွန်း၊ မျှောချွန်းပုံစံရှိပြီး အလေးချိန် ၁၉ဂရမ်နှင့် ၃၇ဂရမ်ကြားရှိသော ကွမ်းသီးအစိမ်းရောင်အနုကိုသာဝယ်ယူပြီး အဝါ‌ရောင်ရှိသောကွမ်းသီးများကို ဝယ်ယူမှုမရှိကြောင်း ကွမ်းသီးအနုအရောင်းအဝယ်ဖြစ်သည့်ကာလများတွင် ကွမ်းပင်တက်သောဒေသခံများမှာ မြောင်းမြမြို့ပေါ်နှင့် ပုသိမ်၊ အခြားမြို့နယ်များသို့ ကွမ်းစိုက်ပျိုးသောတောင်သူများ၏ စိုက်ခင်းများသို့ ဈေးကွက်ဝင်သော ကွမ်းသီးအနုများကို လိုက်လံဝယ်ယူကာ လက်လီအဝယ်ဒိုင်ခွဲများသို့ လာရောက်ရောင်းချလျက် အလုပ်အကိုင်အခွင့်အလမ်းများရရှိပြီး တစ်နေ့ဝင်ငွေ ကျပ်သောင်းဂဏန်းရနေကြောင်းသိရသည်၊၊

       ဧရာဝတီတိုင်းဒေသကြီးအတွင်း ကွမ်းသီးစိုက်ဧက ၂၁၈၆၂ဧကရှိပြီး မြောင်းမြမြို့နယ်တွင် ၃၅၆၉ဧကစိုက်ပျိုးလျက် တရုတ်ဈေးကွက်အတွက် မြောင်းမြကွမ်းသီးမှာ ဝယ်လိုအားရှိ၍ ကြိုက်နှစ်သက်မှုရှိသောကြောင့် မြောင်းမြမြို့မှာ ကွမ်းသီးအဓိကအရောင်းအဝယ်ဖြစ်နေသည့် ဈေးကွက်ဖြစ်ကြောင်း၊ မြောင်းမြဝန်းကျင်ကျေးရွာများတွင် လက်လီအဝယ်ဒိုင်ခွဲ ၃၀ခန့်ရှိပြီး ပျဉ်းမချောင်းကျေးရွာအဝယ်ဒိုင်မှ ဝယ်ယူထားသောကွမ်းသီးအနုများကို တစ်အိတ်လျှင် ပိဿာ ၃၀ထည့်သွင်းပြီး ဇူလိုင်လအတွင်း တစ်နေ့လျှင် အိတ်ရေ (၂၀ /၃၀) နှင့်အထက် မြောင်းမြအဝယ်ဒိုင်သို့တင်ပို့လျက်ရှိကြောင်း ဒိုင်မှဝယ်ယူထားသောကွမ်းသီးများကို ပြည်ပသို့တင်ပို့မှုရှိကြောင်းသိရှိရပါသည်၊၊

DOCA(ဧရာဝတီ)