ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ မကွေးခရိုင်၊ မြို့သစ်မြို့နယ်အတွင်းရှိ လင်းလည်၊ အောင်ချမ်းသာ၊ နင်းကြမ်း၊ သဖန်းကုန်း စသည့်ကျေးရွာများတွင် နှမ်း၊ ဆီထွက်သီးနှံနှင့် ပဲမျိုးစုံတို့ကို အဓိကထားစိုက်ပျိုးလျက်ရှိပြီး လင်းလည်ကျေးရွာ၌ မိုးမြေပဲစိုက်ဧက (၃၀)ခန့်စိုက်ပျိုးထားကြောင်းသိရသည်။

      မိုးမြေပဲကို မေလတွင် စတင်စိုက်ပျိုးကြပြီး ဩဂုတ်လကုန်တွင် လှိုင်လှိုင်ထွက်ပေါ်လျက် ရှိကြောင်း၊ မျိုးအနေဖြင့် ဗီယက်နမ်(မြေပဲဆန်ဖြူ)၊ စွန်တာနီ(မြေပဲဆန်နီ)တို့ကို မကွေးမြို့နှင့် တောင်တွင်းကြီးမြို့ပေါ်ရှိ သီးနှံမျိုးစုံရောင်းဝယ်ရေးပွဲရုံများနှင့်  ယခင်နှစ်တွင် (ဆောင်းမြေပဲ) များကို စနစ်တကျ သိုလှောင်၍ ပြန်လည်စိုက်ပျိုးကြကြောင်း၊  တစ်ဧကလျှင် စိုက်ပျိုးထုတ်လုပ်မှုကုန်ကျစရိတ်အနေဖြင့် ငွေကျပ်၉၀၀၀၀၀ခန့်ကုန်ကျပြီး အထွက်တင်း ၆၅တင်း ခန့်ထွက်ရှိကြောင်း၊  ဈေးနှုန်းအနေဖြင့် ၂၀၂၄ခုနှစ်၊ စက်တင်ဘာလ ပထမပတ်တွင် မြေပဲတောင့်တစ်တင်းလျှင် ငွေကျပ် (၂၅၀၀၀-၃၀၀၀၀)  ဈေးနှုန်းများဖြင့် အရောင်းအဝယ်ဖြစ်လျက်ရှိပြီး တစ်ဧကအကျိုးအမြတ်အနေဖြင့် ငွေကျပ်၁၀၀၀၀၀၀ခန့်ရရှိကြောင်း၊ ထွက်ရှိသည့် မိုးမြေပဲများကို မကွေးမြို့နှင့် တောင်တွင်းကြီးမြို့ရှိဈေးကွက်သို့ တင်ပို့ရောင်းချပြီး ထိုမှတစ်ဆင့် ရန်ကုန်မြို့နှင့် မန္တလေးမြို့များသို့လည်းကောင်း၊ ဒေသတွင်းရှိ ဆီစက်လုပ်ငန်းရှင်များနှင့် မြေပဲကို တန်ဖိုးမြှင့်ထုတ်ကုန် (Value Added) ပြုလုပ်၍ ပြန်လည်ရောင်းချသည့် လုပ်ငန်းရှင်များမှလည်းကောင်း ဝယ်ယူကြကြောင်း၊ ယခုနှစ်တွင် မိုးရွာသွန်းမှု နည်းပါးသော်လည်း အထွက်နှုန်းမှာ ထိခိုက်မှုမရှိကြောင်း၊ ဈေးနှုန်းမှာ ယခင်နှစ်ထက် ဈေးကောင်းရရှိသောကြောင့် တောင်သူများအနေဖြင့် အကျိုးအမြတ်များရရှိကြောင်းသိရှိရပါသည်။

DOCA(မကွေး)

     ပြည်ထောင်စုနယ်မြေ၊ နေပြည်တော်အတွင်း မိုးစပါး (၁၃၀၈၉၁) ဧက၊ စိုက်ပျိုးထားရှိပြီး ဖြစ်ပါသည်။ မိုးစပါး စိုက်ပျိုးမှုမှာ အောင်မြင်ဖြစ်ထွန်းမှု အခြေအနေကို တွေ့ရှိနေရပါသည်။ မိုးစပါး စိုက်ပျိုးမှု တစ်လသက်တမ်းခန့်တွင် ရေကြီးမှုကြောင့်  ပျက်စီးမှု အနည်းငယ် ရှိခဲ့ပါသည်။ ရေကြီး နစ်မြုပ်သည့် အနေအထားတွင် ပျိုးပင်များ အစားထိုးစိုက်ပျိုးကြသည်ကို တွေ့ရှိရပါသည်။ ဆန်ကြိတ်ခွဲ ထုတ်လုပ်မှုများလည်း ပုံမှန်အတိုင်း ကြိတ်ခွဲထုတ်လုပ်လျက်ရှိပါသည်။ ဒေသတွင်း ဈေးကွက်များတွင်သာ လှည့်ပတ်မှုရှိနေပါသည်။ စပါးဈေးနှုန်းများလည်း တည်ငြိမ်မှုရှိနေပါသည်။ ယခင်နှစ်တွင် နွေစပါး ကြိတ်ခွဲမှုများ ရန်ကုန်နှင့် ရှမ်း(တောင်)သို့ တင်ပို့မှုများ ရှိခဲ့သော်လည်း ယခုနှစ်တွင် တင်ပို့မှုများ လျော့နည်းနေသည်ကို တွေ့ရှိရပါသည်။

DOCA(ပြည်ထောင်စုနယ်မြေ)

       ၂၀၂၄ ခုနှစ်၊ စက်တင်ဘာလ ၃ ရက်‌နေ့၊ နေ့လယ် (၁၄း၀၀) နာရီအချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ဟိုင်းဝေးစတားယာဉ်ရပ်နားစခန်းသို့  မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းမှ စီစဥ်မှုဖြင့် Mahar Phone Let Yone  ကုမ္ပဏီမှ တင်ပို့ရောင်းချသည့် တစ်ပေပါလျှင် ၁၁၀ ပိဿာပါ စားအုန်းဆီ ၈၄ ပေပါကို ယာဥ်မောင်း ဦးမျိုး‌ဇော်ဝင်း၊ မော်တော်ယာဥ်အမှတ် 7P-7112/ ISUZU အမျိုးအစားမော်တော်ယာဥ်ဖြင့်  ရောက်ရှိလာရာ တိုင်းဒေသကြီးစားသုံးသူရေးရာဦးစီးမှူး ဦးစိုးဦးနှင့် တာဝန်ရှိသူများက သွားရောက်စစ်ဆေးခဲ့ပြီး အဆိုပါ စားအုန်းဆီ ၈၄ ပေပါအား ထားဝယ်မြို့ အနောက်ရပ်၊ ဗိုလ်ချုပ်လမ်းရှိ ဒေါ်သီတာမိုး၏ AAA ကုန်စုံဆိုင် အပါအဝင်အထိုင်ရောင်းချနေသည့် လက်လီဆိုင် ၁၅ ဆိုင်တို့မှ သတ်မှတ်ရည်ညွှန်းဈေးအတိုင်း စားသုံးသူပြည်သူများသို့  ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

      ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန် အခြေအနေများအား အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီနေ့စဉ်ဝင်ရောက်မှု စာရင်းများအရလည်းကောင်း၊ ကြက်သွန်နီ လက်ကျန်အခြေအနေအား နေ့စဉ်စုံစမ်းလျက်ရှိပါသည်။ ဩဂုတ်လ (၂၇) ရက်မှ စက်တင်ဘာလ (၂) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီ ဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ ရွှေဘိုဒေသတို့မှ ကြက်သွန်နီ (၆၃၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့် ပြန်လည်စီးထွက်မှု ရှိကြောင်းသိရှိရပါသည်။ ထို့ကြောင့် ကြက်သွန်နီ လက်ကျန်မှာ (၂၅၂၀၀၀) ကျန်ရှိကြောင်း ကုန်စည်ဒိုင်သတင်းအရ သိရှိရပါသည်။ ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၁၅၀၀၊ အသန့်မှာ တစ်ပိဿာ ကျပ် ၂၁၀၀ ၊ အကြီးမှာ ကျပ် ၂၂၀၀၊ ရှယ်မှာ ကျပ် ၂၃၀၀၊  မြင်းခြံ ကြက်သွန်နီ(အသစ်) အချော တစ်ပိဿာ ကျပ် ၁၄၀၀၊ အသန့်မှာ တစ်ပိဿာ ကျပ် ၁၈၀၀၊ အကြီးမှာ ကျပ် ၁၉၀၀၊ ရှယ်မှာ ကျပ် ၂၀၀၀၊ ရွှေဘို ကြက်သွန်နီ (အသစ်) အချော တစ်ပိဿာ ကျပ် ၁၈၀၀၊ အသန့် မှာ တစ်ပိဿာ ကျပ် ၂၂၀၀ ၊ အကြီးမှာ ကျပ် ၂၄၀၀၊ ရှယ်မှာ ကျပ် ၂၅၀၀  ဈေးတို့အသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

      ယခုဩဂုတ်လနောက်ဆုံးပတ်တွင် ပြည်ဈေးကွက်၌ ဆင်ခရမ်းချဉ်သီးများ ဝင်ရောက်မှုနည်းပါးပြီး ဈေးကောင်းရလျက်ရှိနေပါသည်။ မင်းတုန်း၊ ဥသျှစ်ပင်ဘက်မှ တစ်ပတ်လျှင် တစ်ကြိမ်ခန့်သာ အဝင်ရှိပြီး အလုံး ၃၀/ ၄၀ခန့်သာ ဝင်ရောက်မှုရှိနေပြီး ယခင်မတ်လတွင် အလုံးရေ ၁၀၀၀ခန့် ရက်ခြားအဝင်ရှိခဲ့ပြီး ဈေးနှုန်းမှာလည်း တစ်လုံးလျှင်ကျပ် ၂၅၀ ဝန်းကျင်ခန့် ရောင်းချမှုရှိခဲ့ကြောင်း သိရှိရသဖြင့် ယခုဩဂုတ်လနောက်ဆုံးပတ်တွင် တစ်လုံးလျှင် အကြီး၊ အသေး အပေါ်မူတည်၍ ကျပ် ၄၀၀-၅၀၀နှုန်းဖြင့် အသီးသီးရောင်းချလျက်ရှိကြောင်း သိရှိရပါသည်။

      ပြည်ဈေးကွက်၌ ယခုဩဂုတ်လနောက်ဆုံးပတ်တွင် ဒန့်သလွန်သီးဈေးနှုန်းများ မြင့်တက်လျက်ရှိပြီး ဝင်ရောက်မှုမှာလည်း တစ်ပတ်လျှင်တစ်ကြိမ်ခန့်သာ အဝင်ရှိသဖြင့် မြင့်တက်ရခြင်း ဖြစ်ကြောင်း သိရှိရပါသည်။ ပြည်မြို့အနောက်ဘက်ကမ်းရှိ ဆင်တဲရွာအနီးတဝိုက်မှသာအဝင်ရှိပြီး အတောင့် ၅၀/ ၆၀ခန့်သာ အဝင်ရှိနေပါသည်။ ပေါ်ဦးပေါ်ဖျားရှားပါးချိန်ဖြစ်သည့်အတွက် အဝင်လည်းနည်းကာ ဈေးကောင်းရခဲ့ပြီး ယခင်နှစ်တွင်တစ်တောင့်လျှင် ကျပ် ၃၀၀နှုန်းရှိခဲ့၍ ယခုဩဂုတ်လ နောက်ဆုံးပတ်တွင် အတောင့်အချော၊ အကြီး၊ အသေးပေါ်မူတည်၍ ကျပ် ၄၅၀-၅၀၀နှုန်းဖြင့် အသီးသီး ရောင်းချလျက်ရှိကြောင်း သိရှိရပါသည်။

 DOCA(ပဲခူး)