ပြည်တွင်းကုန်သွယ်မှုသတင်း

   မြင်းခြံမြို့နယ်အတွင်းရှိ လေးအိမ်တန်းကျေးရွာ၊ အင်ကြင်းပင်၊ လှိုင်းတက်နှင့် သဲဖြူဝကျေးရွာ များတွင် သပြေပန်းပင်များကို စီးပွားဖြစ် တစ်နိုင်တစ်ပိုင် စိုက်ပျိုးထားကြောင်း သိရှိရသည်။ စိုက်ခင်းများမှ ထွက်ရှိသော သပြေပန်းများကို ချိုးပြီးတောင်သူများကိုယ်တိုင် အေးမြသီတာဈေးသို့ လာရောက်ရောင်းချကြောင်း၊ ၂၀၂၅ခုနှစ် ဇူလိုင်စတုတ္ထပတ်တွင် ရောင်းချနေသော အာဆီယံ သပြေပန်း (၃) ခက်တစ်စည်းလျှင် (၅၀၀) ကျပ်၊ ရွှေသပြေပန်း (၁၀)ခက်စည်း တစ်စည်းလျှင်(၂၀၀၀) ကျပ်ပေါက်ဈေးများဖြင့်ရောင်းချကြောင်း၊ သပြေပန်းသည် မြန်မာလူမျိုးအများစု ကြိုက်နှစ်သက်သော ရိုးရာသဘာဝရွက်လှပန်းအမျိုးအစားဖြစ်သောကြောင့် ဈေးကွက်တွင် အရောင်းအဝယ်သွက်လျက် ရှိကြောင်း၊ ပန်းစိုက်တောင်သူများအနေဖြင့် ဝင်ငွေရရှိ၍ စားဝတ်နေရေး အဆင်ပြေကြောင်း၊ သပြေပန်းသည် အပူပိုင်းဒေသများတွင် စိုက်ပျိုးဖြစ်ထွန်း၍    နှစ်ရှည်ခံပင်ဖြစ်ကြောင်း၊ နေရောင်ခြည် ကောင်းစွာရရှိ၍ မြေဆီလွှာသင်တင့်ပြီး ရေစီးရေလာကောင်းသောမြေကို နှစ်သက်သဖြင့် စိုက်ပျိုး စရိတ်သက်သာသော သပြေပင်များကို စီးပွားဖြစ်စိုက်ပျိုးသင့်ကြောင်းသိရှိရသည်။

DOCA(မန္တလေး)

   မြင်းခြံမြို့နယ်ရှိ အေးမြသီတာဈေးတွင် ဟင်းသီးဟင်းရွက်မျိုးစုံရောင်းချလျက်ရှိရာ ဂေါ်ရခါးညွန့်များကို ရှမ်းပြည်နယ်တောင်ပိုင်း၊ အောင်ပန်းမြို့နှင့် ပြင်ဦးလွင်မြို့တို့မှ မှာယူရောင်းချ ကြကြောင်းသိရှိရသည်။ ၂၀၂၅ ခုနှစ်၊ ဇူလိုင်လ စတုတ္ထပတ်တွင် ရောင်းချနေသော ဂေါ်ရခါးညွန့် တစ်စည်းလျှင် ၁၀၀၀ ကျပ်ပေါက်ဈေးများဖြင့် ရောင်းချလျက်ရှိကြောင်း၊ အာဟာရဓာတ် ကြွယ်ဝသောကြောင့် ဈေးကွက်တွင် အရောင်းအဝယ်ဖြစ်လျက်ရှိကြောင်း၊ နေ့စဉ် ဂေါ်ရခါးညွန့် အစည်းအရေအတွက် (၅၀-၁၀၀)စည်းခန့်ရောင်းချရကြောင်း၊ ကုန်စိမ်းရောင်းချသူတစ်ဦး၏ ပြောပြ ချက်အရ သိရှိရသည်။ ဂေါ်ရခါးညွန့်တွင် ပါဝင်သော အာဟာရဓာတ်များကြောင့် ဆီးချို၊သွေးချို ထိန်းညှိပေးကြောင်း၊ ဝယ်ယူရလွယ်ကူခြင်းနှင့် ချက်ပြုတ်ရာတွင် လွယ်ကူမြန်ဆန်သဖြင့် စားသုံးမှု များပြားကြောင်း သိရှိရသည်။

DOCA(မန္တလေး)

   ခံသီးပင်သည် အပူပိုင်းဒေသများတွင် ပေါက်ရောက်ကြောင်း၊ တစ်နှစ်လျှင် နှစ်ရာသီ အသီးများထွက်ရှိကြောင်း၊ အသီးထွက်ပေါ်ချိန်မှာ မိုးရာသီတွင် (မေလ-ဇွန်လ-ဇူလိုင်လ) များ ဖြစ်ကြောင်း၊ ဆောင်းဦးကာလတွင် (အောက်တိုဘာလ-နိုဝင်ဘာလ-ဒီဇင်ဘာလ)တို့တွင် အသီးများထွက်ပေါ် ရင့်မှည့်ကြောင်း၊ အရသာမှာ ချိုချဉ်အရသာရှိကြောင်းသိရှိရသည်။

   မြင်းခြံမြို့နယ်အတွင်းရှိ ရပ်ကွက်အချို့နှင့် ကျေးရွာများတွင် မိမိတို့၏ ခြံဝင်းများအတွင်း၌ ခံသီးပင်များကို စီးပွားဖြစ် တစ်နိုင်တစ်ပိုင်စိုက်ပျိုးကြကြောင်း၊ ၂၀၂၅ ခုနှစ် ဇူလိုင်လ စတုတ္ထပတ်တွင် အေးမြသီတားဈေး၌ ရောင်းချနေသော ခံသီးသီးနှံ(၂၅) ကျပ်သားလျှင်(၁၅၀၀-၂၀၀၀) ကျပ်၊ တစ်ပိဿာလျှင်(၅၅၀၀-၇၅၀၀) ကျပ်ပေါက်ဈေး များရှိကြောင်း၊ အသီးအရွယ်အစားနှင့် လတ်ဆတ်မှုအပေါ် မှုတည်၍ ဈေးနှုန်းများ ကွာခြားကြောင်း၊  ဆေးဖက်ဝင်သောကြောင့် ဒေသအတွင်း ဈေးကွက်၌ အရောင်းအဝယ် သွက်လျက်ရှိကြောင်း ခံသီးရောင်းချသူ တစ်ဦးပြောပြချက်အရသိရသည်။ ကျန်းမာရေးအကျိုး‌ကျေးဇူးအနေဖြင့် ခံသီးကိုတစ်နေ့ (၃-၅) လုံး အစိမ်းလိုက် ပုံမှန်စားသုံးပါက အသည်းကင်ဆာ၊ အသည်းခြောက်ခြင်း၊ ဝမ်းချုပ်ခြင်း၊ မျက်လုံးဝါခြင်း၊ ခံတွင်းခါးခြင်းစသည့် လက္ခဏာများသက်သာပျောက်ကင်းကြောင်း၊ ဗီတာမင်စီ ပါဝင်မှုမြင့်မား သောကြောင့် ကိုယ်ခံအား စနစ်ကို မြှင့်တင်ပေးကြောင်း၊ အမျှင်ဓာတ်ကြွယ်ဝသဖြင့် ဝမ်းချုပ်ခြင်းကို ကာကွယ်ပေးပြီး အူလှုပ်ရှား မှု ကိုကောင်းမွန်ကြောင်း၊ စိတ်ဖိစီးမှုနှင့် အိပ်မပျော်ခြင်းကိုသက်သာစေပြီး သဘာဝအိပ်ဆေး အဖြစ် အသုံးပြုကြောင်း၊ ခံသီးပင်သည် အသီးအပြင် အခေါက်၊ အရွက်နှင့် အမြစ်များအားလုံးသည် ပဥ္စငါးပါးအတွက် ဆေးဖက်ဝင်ကြောင်း၊ မြန်မာတိုင်းရင်းဆေးဖော်စပ်ရာတွင် လည်းအသုံး ပြု ကြ ကြောင်းသိရှိရပြီး ဝင်ငွေရ၍ ဆေးဖက်ဝင်သော ခံသီးပင်များအား ပိုမိုစိုက်ပျိုးသင့်ပါကြောင်း သိရှိရပါသည်။

DOCA(မန္တလေး)

 မြင်းခြံမြို့နယ်သည်  ဆည်ရေသောက်အသင့်အတင့်ရှိ၍ ဟင်းသီးဟင်း ရွက်မျိုးစုံစိုက်ပျိုးလျက်ရှိ ကြောင်း၊ အာလူးသီးနှံသည် အေး၍သမရာသီဥတုကို နှစ်သက်သောကြောင့် အပူပိုင်း‌ဒေသဖြစ်သော မြင်းခြံမြို့နယ်တွင် အာလူးသီးသီးနှံ စိုက်ဧကစိုက်ပျိုးမှု မရှိကြောင်းသိရှိရသည်။

     မြင်းခြံမြို့၊ အေးမြသီတာဈေးတွင် ရောင်းချနေသော အာလူးသီးများကို ရှမ်းပြည်နယ်တောင်ပိုင်း ‌အောင်ပန်းမြို့နှင့် မန္တလေးမြို့တို့မှ ဝယ်ယူရောင်းချကြောင်းသိရှိရသည်။ ၂၀၂၅ ခုနှစ်၊ ဇူလိုင်လစတုတ္ထပတ်တွင် ရောင်းချနေသော အာလူသီး မားကစ် S1 တစ်ပိဿာလျှင် (၆၀၀၀)ကျပ်၊မျက်နီ OK တစ်ပိဿာလျှင်(၅၀၀၀) ကျပ်၊ ဂေါ်လီဆိုဒ် တစ်ပိဿာလျှင် (၄၀၀၀) ကျပ် ပေါက်ဈေးများဖြင့်ရောင်းချလျက်ရှိကြောင်း၊  အာလူးသီးများကိုဒေသတွင်း ဟင်းလျာအဖြစ် စားသုံး ကြကြောင်း၊ MSME လုပ်ငန်းဖြစ်သော  အာလူးကြော်ရာတွင် လည်း အသုံး ပြုကြကြောင်း၊ ပွဲရုံများတွင် နေ့စဉ် အာလူးပိဿာကုန်ချိန် (၆၀-၁၂၀) ခန့်အရောင်းအဝယ်ဖြစ်လျက်ရှိကြောင်း ပွဲရုံလုပ်ငန်း လုပ်ကိုင်သူ၏ပြောပြချက်အရ သိရှိရသည်။ အာလူးသီးနှံသည် လူကြိုက်အများဆုံးဟင်းသီးဟင်းရွက် တစ်မျိုးဖြစ်ပြီး အာဟာရကြွယ်ဝ၍ အမျှင်ဓာတ်၊ ကာဗိုဟိုက်ဒရိတ်၊ ပရိုတင်းဓာတ်နှင့် ဗီတာမင်စီတို့ကြွယ်ဝကြောင်း၊ အမျှင်ဓာတ်ကြွယ်ဝသောကြောင့် ဗိုက်ပြည့်စေပြီး အစာစားချင် စိတ်ကိုလျော့ချ၍ ကိုယ်အလေးချိန်ထိန်းချုပ်ရာတွင် စားသုံးကြကြောင်းလည်းသိရှိရသည်။

 DOCA(မန္တလေး)

   စံပယ်ပန်း၏ ရနံ့ကစိတ်ကိုကြည်လင်အေးမြစေပြီး စိတ်ဖိစီးမှုကို လျော့နည်းစေပါသည်။ စံပယ်ပန်း၏ အဓိပ္ပာယ်သည် “ချစ်ခြင်းမေတ္တာ” ကို ကိုယ်စားပြုပါသည်။ ကျေးဇူးတင်ကြောင်း ဖော်ပြရန်နှင့် ကံကောင်းစေဖို့တောင်းဆုပြုရန် စံပယ်ပန်းကိုရွေးချယ်ကြသည်။ စံပယ်ပန်း၏ နှင်းလိုဖြူဆွတ်တဲ့ အရောင်၊ မွှေးပျံ့ချိုမြိ်န်တဲ့ရနံ့၊ လှပတဲ့ ပန်းပွင့်ပုံစံတွေကြောင့် “Jasmine” ဘုရားသခင်ထံမှ လက်ဆောင်တော်ဆု အဓိပ္ပာယ်ရပါသည်။ အဖြူစင်ဆုံးပန်းစံပယ်ကုံးလေးတွေရဲ့ ရနံ့က မွှေးပြန့်သင်းကြိုင်လှပါသည်။ ပန်းလေးတွေက အလွန်လှပတင့်တယ်လှပေသည်။ အဖြူရောင်အဆင်းရှိပြီး ရနံ့မွှေး၍ ဂုဏ်သတင်းကြီးသောပန်းမျိုးဖြစ်ပါသည်။ စံပယ်ကြက်ရုံး၊ စံပယ်အိုးပုတ်၊ အပွင့်ကြီး ဆိတ်စံပယ် ဟူ၍ ရှိပါသည်။ စံပယ်ပန်းသည် တန်ခူးလလောက်ကတည်းက ပန်းစပွင့်တတ်ပြီး (၂)ပြန်(၃)ပြန်ပွင့်သောကြောင့် ယခုအချိန်ထိ  ဈေးကွက်ရှိဆဲဖြစ်ပါသည်။ စံပယ်ပန်းကလေးများကို သီကုံး၍ ဈေးကွက်သို့တင်ပို့ရောင်းချကြပြီး လူကြိုက်များ၍ ဝယ်ယူမှုများသော ပန်းကလေးများဖြစ်ပါသည်။ ဘုရားလှူရန်နှင့် အမျိုးသမီးများ ခေါင်းတွင် ပန်ဆင်ရန်အတွက် အရောင်းသွက်လှပါသည်။ စံပယ်ပန်းပင်သည် တခါစိုက်ထားလျှင် အခါခါခူးယူရသော ကြာရှည်ခံအပင်တစ်မျိုးဖြစ်သည်။ မိမိအိမ်ခြံဝင်းတွင် ပန်းအိုးနှင့် စိုက်ပျိုးကြသလို စီးပွားဖြစ်ခြံနှင့် စိုက်ပျိုးသူများလည်း ရှိပါသည်။ တိုးတက်လာတဲ့ခေတ်နှင့်အညီ ဖုန်းနှင့်တစ်ချက်ဆက်လိုက်ရုံဖြင့်အိမ်တိုင်ရာရောက်ပို့ဆောင်ရောင်းချမှုများလည်း ရှိလာပါသည်။ စံပယ်ပန်းပျိုးပင်တစ်ပင်လျှင် (၁၀၀၀/၂၀၀၀/၃၀၀၀) ကျပ်ဖြင့် ရောင်းချလျှက်ရှိကြောင်း ပန်းပျိုးပင်အရောင်းဆိုင်မှ သိရှိရသည်။

DOCA(မန္တလေး)