ပြည်တွင်းကုန်သွယ်မှုသတင်း

        မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်၊ ရွာသစ်ကျေးရွာတွင် ဒေသခံပြည်သူများသည် စိုက်ပျိုးရေးကို အဓိကထားပြီး သီးနှံမျိုးစုံစိုက်ပျိုးခြင်းဖြင့် ဒေသစီးပွားဖွံ့ဖြိုးလျက်ရှိသည်။ ရွာသစ်ကျေးရွာတွင် နှစ်စဉ် ကုန်စိမ်းသီးနှံ ကြက်သွန်နီ၊ ပဲမျိုးစုံနှင့် ဆီထွက်သီးနှံ မြေပဲ၊ နှမ်း၊ နေကြာတို့ကို အဓိကစိုက်ပျိုးလျက်ရှိပြီး ဆီထွက်သီးနှံ မိုးမြေပဲကို စိုက်ဧက(၃၅)ဧကခန့် ကုန်းယာမြေများတွင် စိုက်ပျိုးထားကြောင်းသိရှိရသည်။

          မိုးမြေပဲကို ဇူလိုင်လတွင် စတင်စိုက်ပျိုးပြီး နိုဝင်ဘာလဆန်းပိုင်းတွင် တူးဖော်၍ လှိုင်လှိုင်ထွက်ပေါ်လျက်ရှိသည်။ မျိုးအနေဖြင့် (၃)လပဲတောင့်သေး လုံးဆန်ဖြူ (S1)မျိုးကိုစိုက်ပျိုးကြောင်း၊ တစ်ဧကစိုက်ပျိုးထုတ်လုပ်မှုကုန်ကျစရိတ်မှာ ငွေကျပ်(၈)သိန်းခန့်ကုန်ကျပြီး အထွက်နှုန်းအနေဖြင့် ယခုနှစ်မြေပဲပွင့်ချိန်တွင် မိုးများစွာရွာသွန်း၍ မြေပဲထွက်ရှိမှုနည်းကြောင်း၊ တောင်သူတစ်ဦးလျှင် ပျမ်းမျှ အထွက်တင်း(၄၅)တင်းခန့်ထွက်ရှိကြောင်း၊ ထွက်ရှိသောမြေပဲများကို အတောင့်ရောင်းချမှုနည်းပြီး မြေပဲတောင့်ခွဲပြီး ထွက်ရှိသောမြေပဲဆန်များကိုသာ ရောင်းချကြောင်း၊ ယခုအချိန်တွင် ဧရာဝတီမြစ်ကမ်းဘေးရှိ ကိုင်ကျွန်းမြေနုများတွင် ဆောင်းမြေပဲသီးနှံများ လှိုင်လှိုင်စိုက်ပျိုးချိန်ဖြစ်၍ မြေပဲမျိုးဆန်များ လှိုင်လှိုင်အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် မျိုးမြေပဲဆန်တစ်ပြည်လျှင် မြေပဲဆန်အရည်အသွေးလိုက်၍ ငွေကျပ်(၈၅၀၀-၁၀၀၀၀)ဈေးဖြင့်အရောင်းအဝယ်ဖြစ်၍ တစ်ဧကလျှင် ငွေကျပ် (၁၀)သိန်းခန့်အကျိုးအမြတ်ရရှိကြောင်း၊ ယခုနှစ်တွင် မြေပဲအထွက်နည်းသော်လည်း သီးနှံပေါ်ချိန်တွင် ဒေသတွင်းဈေးကွက်၌ ယခင်နှစ်ထက် ဈေးကောင်းရရှိသောကြောင့် မိုးမြေပဲစိုက် တောင်သူများ အကျိုးအမြတ်များစွာရရှိကြောင်းသိရှိရပါသည်။

DOCA(မကွေး)

         မကွေးတိုင်းဒေသကြီး၊ ဆိပ်ဖြူကြက်သွန်နီဈေးကွက်၌ ၂၀၂၄ခုနှစ်၊ နိုဝင်ဘာလ (ဒုတိယပတ်)တွင်  ကြက်သွန်နီဈေးနှုန်းကျဆင်းပြီး အရောင်းအဝယ်ဖြစ်လျက်ရှိသည်။ ကြက်သွန်နီ ဈေးကွက်သို့ ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးထွက်ရှိရာဒေသများအပြင် အခြားမြို့နယ်များမှလည်း ဝင်ရောက်အရောင်းအဝယ်ဖြစ်လျက်ရှိကြောင်း၊ ကြက်သွန်နီကုန်ဆုံးရာသီချိန်ရောက်ရှိ၍ ဈေးကွက်သို့ ကုန်ဝင်ရောက်မှုနည်းလာကြောင်း၊ တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ (၃)သောင်း၊ တစ်ပတ်အတွင်း ပိဿာ(၂)သိန်းခန့် ဈေးကွက်သို့ ဝင်ရောက်အရောင်းအဝယ်ဖြစ်ကြောင်းသိရှိရသည်။

          ဈေးနှုန်းအနေဖြင့် နိုဝင်ဘာလ(ဒုတိယပတ်)တွင် ဈေးအနည်းငယ်ကျဆင်းပြီး အရောင်းအဝယ်ဖြစ်ခဲ့ရာ ကြက်သွန်နီအရည်အသွေးနှင့် အရွယ်အစားကိုလိုက်၍ တောဈေး(ဂျွန်) တစ်ပိဿာလျှင် ကျပ်(၃၅၀၀-၂၅၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ ပွဲရုံများမှ ပြန်လည်သန့်စင်ပြီး ဥအကြီး၊ အရွယ်အစား၊ အရောင်အဆင်းလိုက်၍ ကြက်သွန်နီတစ်ပိဿာလျှင် ကျပ်(၄၅၀၀-၂၇၀၀)ဈေးဖြင့် ဒေသတွင်း နေရာအနှံ့အပြားသို့ရောင်းချလျက်ရှိကြောင်း၊ ပြည်တွင်းဈေးကွက်အပြင် ပြည်ပဝယ်လက်နည်း၍ ဈေးကျဆင်းလာကြောင်း၊ (ပထမပတ်)ဈေးနှုန်းနှင့်နှိုင်းယှဉ်ပါက (ဒုတိယပတ်)တွင် ကြက်သွန်နီတစ်ပိဿာလျှင် ကျပ်(၅၀၀)ခန့်ဈေးကျဆင်း၍ အရောင်းအဝယ်ဖြစ်ကြောင်း နေ့စဉ် ကားအစီးရေ (၆)စီးခန့် ပြည်တွင်းဒေသအနှံ့အပြားသို့ တင်ပို့ဖြန့်ဖြူးလျက်ရှိကြောင်း ဈေးကွက်မှသိရှိရသည်။

           ဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ နိုဝင်ဘာလ(ဒုတိယပတ်)တွင် ကြက်သွန်နီကုန်ချိန်ပိဿာ(၂)သိန်း၊ တန်ချိန်အားဖြင့် (၃၂၇)တန်ခန့် ကုန်စည်စီးဆင်းခဲ့ကြောင်း ဈေးကွက်မှသိရှိရပါသည်။

DOCA(မကွေး)

         မကွေးတိုင်းဒေသကြီး၊ မြို့သစ်မြို့နယ်အတွင်းရှိ ဖန်ခါးပင်၊ စစ်တလင်း၊ ကွင်းကျေးရွာများတွင် နှမ်း၊ မြေပဲ၊ ကုလားပဲ၊ ပဲတီစိမ်း၊ ပဲစင်းငုံ၊ စပါး၊ ကြက်သွန်နီ၊ ကြက်သွန်ဖြူ စသည့် သီးနှံများကို ရာသီအလိုက် နှစ်စဉ်စိုက်ပျိုးလျက်ရှိရာ ကုလားပဲသီးနှံစိုက်ဧက (၁၅၀) ဧကခန့်စိုက်ပျိုးထားကြောင်းသိရသည်။

         ကုလားပဲသီးနှံကို အောက်တိုဘာလကုန်တွင် စတင်စိုက်ပျိုးပြီး  ဇန်နဝါရီလဆန်းတွင် ခူးဆွတ်ရကြောင်း၊ မျိုးအနေဖြင့် ကုလားပဲ(ဟော်လန်)မျိုးနှင့် ကုလားပဲ(929)မျိုးတို့ဖြစ်ပြီး တစ်ဧကလျှင် မျိုးစေ့(၁၂)ပြည်ခန့်ကုန်ကျ၍ ထွန်ကြောင်းဆွဲကာ ကြဲပက်စနစ်ဖြင့်စိုက်ပျိုးကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင်  တစ်ဧကလျှင် ငွေကျပ်၇၀၀၀၀၀ခန့်ကုန်ကျကြောင်း၊ ယခင်နှစ်က တစ်ဧကလျှင် ကုလားပဲ (၁၂-၁၆) တင်းခန့်ထွက်ရှိခဲ့ပြီး တစ်တင်းလျှင် ငွေကျပ် ၇၈၀၀၀-၈၂၀၀၀ ဖြင့်အရောင်းအဝယ်ဖြစ်ခဲ့ရာ အကျိုးအမြတ်အနေဖြင့် ငွေကျပ်၆၀၀၀၀၀ကျော်ရရှိကြောင်းသိရသည်။

          ဈေးနှုန်းအနေဖြင့် နိုဝင်ဘာလ ဒုတိယပတ်တွင် ကုလားပဲ(ဟော်လန်) တစ်တင်းလျှင်  ငွေကျပ် ၉၅၀၀၀-၉၆၅၀၀၊  ကုလားပဲ(929) တစ်တင်းလျှင်  ငွေကျပ် ၉၆၀၀၀-၉၇၅၀၀ ဈေးရှိပြီး ကုလားပဲသီးနှံထွက်ပေါ်ရာသီမဟုတ်သည့်အတွက် အရောင်းအဝယ်အေးကြောင်း၊ ဈေးကွက်အနေဖြင့် မကွေးမြို့နှင့် တောင်တွင်းကြီးမြို့ရှိ  သီးနှံပွဲရုံများသို့ တင်ပို့ရောင်းချပြီး ထိုမှတစ်ဆင့် ဒေသတွင်းရှိ ပဲကြော်၊ ပဲလှော်၊ မုန့်လုပ်ငန်းရှင်များက ဝယ်ယူကြကြောင်းနှင့် ရန်ကုန်၊ မန္တလေးမြို့များသို့တင်ပို့ကြောင်း၊ ယခုအချိန်တွင် ကုလားပဲစိုက်ခင်းများ စိမ်းလန်းစိုပြေလျက်ရှိပြီး သီးနှံအထွက်နှုန်းကောင်းမွန်၍ ဈေးကောင်းရရှိပါက အကျိုးအမြတ်များပိုမိုရရှိနိုင်ကြောင်း တောင်သူတစ်ဦးထံမှသိရှိရပါသည်။

DOCA(မကွေး)

             ဧရာဝတီတိုင်းဒေသကြီး၊ မြန်အောင်ခရိုင်၊ အင်္ဂပူမြို့နယ်တွင် မိုးမြေပဲ(၂၉၅၄)ဧက၊ ဆောင်းမြေ ပဲ(၈၃၃၈)ဧက နှစ်စဉ်စိုက်ပျိုးလျက်ရှိပါသည်။ဒေသတွင်းထွက်ရှိသောမြေပဲများကို စားသောက်ကုန်လုပ်ငန်း၊ ရိုးရာမုန့်လုပ်ငန်းများတွင် အသုံးပြုလျက်ရှိပြီး၊ မြေပဲကိုကြိတ်ခွဲ၍ မြေပဲဆီအဖြစ်လည်းထုတ်လုပ်ရောင်းချလျက်ရှိရာ ဒေသအတွင်းမြေပဲများ ပုံမှန်အရောင်းအဝယ်ဖြစ်နေကြောင်း သိရှိရပါသည်။

            ယခုအခါ ဒေသတွင်းမိုးမြေပဲများထွက်ရှိပြီဖြစ်ရာ မြေပဲအရည်အသွေးအပေါ် မူတည်၍ ယခင်နှစ် ‌မြေပဲဆံတစ်ပိဿာလျှင် ၆၀၀၀/-မှ ၇၀၀၀/- ကျပ်ဈေးဖြင့် အရောင်းအဝယ်ရှိခဲ့သော်လည်း ယခုနှစ်မြေပဲဆံတစ်ပိဿာလျှင် ၇၅၀၀/-ကျပ်မှ ၈၀၀၀/-ကျပ်အထိ ဈေးနှုန်းရှိကြောင်း၊ ဒေသတွင်းထွက်ရှိသောမြေပဲများကို ဒေသခံဆီကြိတ်ဆုံများနှင့် မုန့်လုပ်ငန်းများကဝယ်ယူအသုံးပြုခြင်းနှင့် ဒေသတွင်းကုန်သည်များကဝယ်ယူ၍ ပြည်မြို့နှင့် ရန်ကုန်မြို့များသို့ တင်ပို့ရောင်းချကြောင်း သိရှိရပါသည်။

DOCA(ဧရာဝတီ)

               ဧရာဝတီတိုင်းဒေသကြီး  မအူပင်ခရိုင်၊ မအူပင်မြို့နယ်၌ ထောပတ်ပဲ(အပြားကြီး) တစ်တင်းဝင်တစ်အိတ်လျှင် ငွေကျပ် ၇၇၀၀၀ အထိ ဈေးကောင်းရရှိနေကြောင်း မအူပင်မြို့နယ်မှ လယ်ယာထွက်ကုန်ပစ္စည်းရောင်းဝယ်ရေး  ပွဲရုံလုပ်ငန်းလုပ်ကိုင်သူဒေါ်စုစုလှိုင်၏ ပြောပြချက်အရ သိရသည်။

             မအူပင်မြို့နယ်၌ ဇွန်လက ထောပတ်ပဲ (အပြားကြီး) တစ်တင်းဝင်တစ်အိတ်လျှင် ငွေကျပ်  ၆၈၀၀၀ သာဈေးရရှိပြီး   ဇူလိုင်  ၁  ရက်မှ  လက်ရှိအချိန်ထိ  ထောပတ်ပဲ (အပြားကြီး) တစ်တင်းဝင်တစ်အိတ်လျှင် ငွေကျပ် ၇၇၀၀၀ အထိ ဈေးကောင်းရရှိလာခြင်းဖြစ်ကြောင်း၊ အဆိုပါ ထောပတ်ပဲများ ဈေးကောင်းရရှိလာခြင်းသည် ရန်ကုန်မြို့မှ ဝယ်ယူမှုများပြားလာခြင်းကြောင့်ဖြစ်ကြောင်း သိရသည်။

              ပဲကြီးကိုမအူပင်တွင် အနည်းငယ်စိုက်ပျိုးပြီး ဒလ၊ ကျောင်းကုန်း၊ အသုတ်၊ ရေကြည်၊ ငါးသိုင်းချောင်းဘက်တိုကနေဝယ်ယူပြီး ရန်ကုန်သို့တင်ပို့နေကြောင်း၊ ပြည်ပဈေးကွက်ကို ထောပတ်ပဲတင်ပို့၍ ဝယ်လိုအားကောင်းလာခြင်းဖြစ်ကြောင်း လက်ရှိရန်ကုန်မြို့ကို ဇူလိုင်၊ ဩဂုတ်၊ စက်တင်ဘာ၊ အောက်တိုဘာလ အထိ ထောပတ်ပဲ အိတ်ရေ  ၁၀၀  ကျော်အထိ တင်ပို့ရောင်းချနေရတယ်။  ထောပတ်ပဲက လာမယ့် ပဲပေါ်ရာသီမရောက်မီအထိ အရောင်းအဝယ်နဲ့ဈေးပါ အခုထက်ပိုကောင်းလာဖို့ရှိပါတယ်” ဟု ဒေါ်စုစုလှိုင်က ပြောသည်။

              မအူပင်မြို့နယ်မှ ပဲမျိုးစုံရောင်းဝယ်ရေး ပွဲရုံလုပ်ငန်းလုပ်ကိုင်သူများသည် ဒေသထွက်ပဲများကိုဝယ်ယူပြီး   ရန်ကုန်မြို့သို့တင်ပို့ရောင်းချကြကြောင်း၊  ရန်ကုန်မြို့မှတစ်ဆင့် ပြည်ပနိုင်ငံများဖြစ်သည့် အိန္ဒိယ၊တရုတ်နှင့် ထိုင်းနိုင်ငံတို့ကို တင်ပို့ရောင်းချလျက်ရှိကြောင်း သိရှိရပါသည်။ 

DOCA(ဧရာဝတီ)