ပြည်တွင်းကုန်သွယ်မှုသတင်း

     ကယားပြည်နယ်၊ လွိုင်ကော်မြို့တွင် စားဖိုဆောင်သီးနှံဈေးနှုန်းများမှာ ဩဂုတ်လ တတိယပတ်တွင် ငရုတ်သီးခြောက်(အပု) တစ်ပိဿာလျှင်(၄၀၀၀၀)ကျပ်၊ ငရုတ်သီးခြောက် (အရှည်) တစ်ပိဿာလျှင် (၁၇၀၀၀)ကျပ်၊ ကြက်သွန်နီ တစ်ပိဿာလျှင် (၂၀၀၀)ကျပ်၊ ကြက်သွန်ဖြူ(ရှမ်းစ) တစ်ပိဿာလျှင်(၇၀၀၀)ကျပ်၊ ကြက်သွန်ဖြူ(ကြူကုတ်စ) တစ်ပိဿာ လျှင် (၁၆၀၀၀)ကျပ်၊ နနွင်းတက် တစ်ပိဿာလျှင်(၄၀၀၀)ကျပ်၊ ချင်း တစ်ပိဿာလျှင် (၃၀၀၀)ကျပ်၊ ကုလားပဲတစ်ပိဿာလျှင်(၇၀၀၀)ကျပ်၊ မန်ကျည်းသီးတစ်ပိဿာလျှင်(၅၀၀၀) ကျပ်၊ အာလူး တစ်ပိဿာလျှင်(၄၅၀၀)ကျပ်၊ ဆား တစ်ပိဿာလျှင် (၃၀၀၀)ကျပ်၊ သကြား တစ်ပိဿာလျှင်(၆၀၀၀)ကျပ်၊ ကန်စွန်းရွက် တစ်စည်းလျှင် (၅၀၀)ကျပ်၊ ဂေါ်ဖီထုပ် တစ်ထုပ် လျှင်(၂၀၀၀)ကျပ်၊ ပန်းဂေါ်ဖီတစ်ပွင့်လျှင် (၂၀၀၀)ကျပ်၊ ခရမ်းချဉ်သီး တစ်ပိဿာလျှင် (၂၅၀၀)ကျပ်၊ ပဲသီး(ခ)ပဲတောင့်ရှည် တစ်စည်းလျှင်(၅၀၀)ကျပ်ရှိကြောင်း သိရှိရပါသည်။

      ယခင်တစ်ပတ်ဈေးနှုန်းများနှင့်နှိုင်းယှဉ်ကြည့်လျှင် မန်ကျည်းသီးတစ်ပိဿာလျှင်(၁၀၀၀) ကျပ်ဈေးနှုန်းကျဆင်းသွားပြီး၊ သကြားတစ်ပိဿာလျှင်(၄၀၀)ကျပ်၊ ဂေါ်ဖီထုပ် တစ်ထုပ်လျှင် (၅၀၀)ကျပ် ဈေးနှုန်းတက်သွားကြောင်းနှင့် ကျန်စားဖိုဆောင်သီးနှံဈေးနှုန်းများ တည်ငြိမ်လျက် ရှိကြောင်း၊ ဈေးနှုန်းများ ပြောင်းလဲသွားရခြင်းမှာ သယ်ယူစရိတ်နှင့် တစ်ဆင့်ခံ ဝယ်ယူရသည့် ဈေးနှုန်းများကြောင့်ဖြစ်ကြောင်း သီရိမင်္ဂလာဈေးအတွင်းရှိ ဈေးသည်များထံမှ သိရှိရပါသည်။

DOCA(ကယား)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို အများအပြားလုပ်ကိုင်ကြကြောင်းသိရပါသည်။ စိုက်ပျိုးသီးနှံများဖြစ်သည့် သခွားသီး၊ ခရမ်းသီး၊ ကန်စွန်းရွက်၊ ချဉ်ပေါင်ရွက်၊ ကင်ပွန်းချဉ်ရွက်၊ ရုံးပတီသီး၊ ဘူးသီး၊ ငရုတ်သီး စသည့်သီးနှံများကို စိုက်ပျိုးကြသည့်အပြင် သင်္ဘောသီးစိမ်းနှင့် ရွှေဖရုံသီးများကိုလည်း တစ်နိုင်တစ်ပိုင်စိုက်ပျိုး‌ကြပြီး ကန့်ဘလူမြို့မဈေးသို့ လာရောက်ရောင်းချကြကြောင်း သိရှိရသည်။

          ၂၀၂၅ခုနှစ်၊ ဩဂုတ်လ တတိယပတ်အတွင်း ရောင်းချလျက်ရှိသော သင်္ဘောသီးစိမ်းဈေးနှုန်းမှာ သင်္ဘောသီးစိမ်း(၁)လုံးလျှင် (၇၀၀)ကျပ်၊ (၃)လုံးလျှင် (၂၀၀၀)ကျပ်နှင့် ရွှေဖရုံသီး(၁)ပိဿာလျှင်  (၂၈၀၀)ကျပ်၊ ရွှေဖရုံသီး(၁)စိတ်လျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း ကုန်စိမ်းရောင်းချသူထံမှ သိရှိရပါသည်။

DOCA(စစ်ကိုင်း)

        Maiza (or) Corn ဟုခေါ်ကြသည့် ပြောင်းဖူးများကို ကမ္ဘာတစ်ဝန်းလုံး လူမျိုးဘာသာမရွေး၊ ကလေးလူကြီးမရွေး စားသောက်ကြသော အသီးအနှံတစ်မျိုးဖြစ်ပါသည်။ ပြောင်းဖူးများတွင် ကျန်းမာရေးအတွက် အထောက်အကူဖြစ်စေမည့် အာဟာရဓာတ်စုံလင်စွာပါရှိပါသည်။ ထို့ကြောင့် ပြောင်းဖူးစားသုံးခြင်းဖြင့် နှလုံးသွေးကြောကျဉ်းရောဂါကို ကာကွယ်ပေးခြင်း၊ ရောင်ရမ်းမှုကို သက်သာစေခြင်း၊ ကင်ဆာရောဂါကိုကာကွယ်ပေးခြင်း၊ မှတ်ဉာဏ်အားကောင်းစေခြင်း စသည်ဖြင့် ရောဂါအများစုကို ကာကွယ်ပေးနိုင်ပါသည်။

    ပြောင်းဖူးများကို ကြော်၍သော်လည်းကောင်း၊ ပြုတ်၍သော်လည်းကောင်း၊ ဖုတ်၍သော်လည်းကောင်း၊ သရေစာအဖြစ်စားသောက်ကြသည့်အပြင် အခြားအသီးအရွက်၊ အသား၊ ငါးများနှင့်ရော၍ ဟင်းတစ်မျိုးအဖြစ်လည်း ချက်ပြုတ်စားသောက်ကြပါသည်။

     ကယားပြည်နယ်၊ လွိုင်ကော်မြို့၊ သီရိမင်္ဂလာဈေးအတွင်း (၂၂-၈-၂၀၂၅)ရက်နေ့တွင် ဖြစ်ပေါ်နေသော ဖူးစားပြောင်းဈေးနှုန်းများမှာ သကြားပြောင်း(အစိမ်း) တစ်ဖူးလျင် (၈၀၀ မှ ၁၀၀၀) ကျပ်၊ သကြားပြောင်းဖူး(အပြုတ် )တစ်ဖူးလျင် (၁၂၀၀ မှ ၁၅၀၀)ကျပ်၊ ရှမ်းပြောင်း(အစိမ်း) တစ်ဖူးလျင် (၅၀၀ မှ ၇၀၀)ကျပ်၊ ရှမ်းပြောင်းဖူး(အပြုတ်) တစ်ဖူးလျင်(၈၀၀ မှ ၁၀၀၀)ကျပ်ခန့်ဖြင့် အရောင်းအဝယ်ဖြစ်လျက်ရှိပါသည်။ ဖူးစားပြောင်းများကို ကယားပြည်နယ်၊ လောပိတ၊ လောဓလေးတို့တွင် အများဆုံးစိုက်ပျိုးရောင်းချကြပြီး လွိုင်ကော်မြို့အတွင်း တစ်နိုင်တစ်ပိုင် စိုက်ပျိုးစားသောက်ကြကြောင်း ပြောင်းဖူးရောင်းသူတစ်ဦးထံမှ သိရှိရပါသည်။

DOCA(ကယား)

      ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်များ ပုံမှန်ပြန်လည်ဖွင့်လှစ် ရောင်းချနေကြပြီး ၂၀၂၅ခုနှစ်၊ ဩဂုတ်လ (၂၂)ရက်နေ့တွင် ဖြစ်ပေါ်နေသော စက်သုံးဆီဈေးနှုန်း များမှာ Octane(92) တစ်လီတာလျှင် (၃၇၈၀)ကျပ်၊ Octane(95) တစ်လီတာလျှင် (၃၈၅၅)ကျပ်၊ ပရိမီယမ်ဒီဇယ် တစ်လီတာလျှင် (၄၀၀၅)ကျပ်၊ ရိုးရိုးဒီဇယ် တစ်လီတာလျှင် (၃၄၀၀) ကျပ်ဖြင့် ရောင်းချနေကြောင်း သိရပါသည်။

     ယခင်တစ်ပတ်ဈေးနှုန်းများမှာ Octane(92) တစ်လီတာလျှင် (၃၇၆၀)ကျပ်၊ Octane(95) တစ်လီတာလျှင် (၃၈၂၀)ကျပ်၊ ပရိမီယမ်ဒီဇယ် တစ်လီတာလျှင် (၄၁၀၀)ကျပ်၊ ရိုးရိုးဒီဇယ် တစ်လီတာလျှင် (၃၄၇၅) ကျပ်ဖြင့် ရောင်းချခဲ့ကြပြီး ဈေးနှုန်းများနှိုင်းယှဉ်ကြည့်လျှင် Octane(92) တစ်လီတာလျှင် (၂၀)ကျပ်၊ Octane(95)တစ်လီတာလျှင်(၃၅)ကျပ် ဈေးနှုန်းမြှင့်တက်လာကြောင်း၊  ပရီမီယမ်ဒီဇယ် တစ်လီတာလျှင်(၉၅)ကျပ်၊ရိုးရိုးဒီဇယ် တစ်လီတာလျှင် (၇၅) ကျပ်ဖြင့် ဈေးနှုန်းကျဆင်းလာကြောင်း စက်သုံးဆီရောင်းချသူများထံမှ သိရှိရပါသည်။

DOCA(ကယား)

          စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ရာသီပေါ်သီးနှံများကို စိုက်ပျိုး ရောင်းချလျက်ရှိရာ ယခုအခါ ပူစီနံနံပင်နှင့် တရုတ်နံနံပင်များကို  နေအိမ်ခြံဝင်းများတွင်လည်းကောင်း၊ ယာတော၊ လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ ရောင်းချလျက်ရှိကြောင်း သိရသည်။  

          ယခုအခါ ကန့်ဘလူမြို့မဈေးတွင် ကုန်စိမ်းရောင်းချသူတစ်ဦး၏ ပြောပြချက်အရ ပူစီနံနံရွက်နှင့် တရုတ်နံနံများကို ကန့်ဘလူမြို့ပေါ်နှင့် နတ်ပေးကျေးရွာ၊ နတ်အင်းကျေးရွာများမှလည်းကောင်း ဝယ်ယူရောင်းချလျက်ရှိကြောင်း ပူစီနံနံရွက်နှင့်တရုတ်နံနံများကို အစည်းလေးများစည်း၍ ရောင်းချရာ(၁)စည်းလျှင် (၂၀၀)ကျပ်၊ (၃)စည်းလျှင် (၅၀၀)ကျပ်၊ (၇)စည်းလျှင် (၁၀၀၀)ကျပ်နှင့် တရုတ်နံနံ (၁)စည်းလျှင်(၃၀၀)ကျပ်၊ (၂)စည်းလျှင်(၅၀၀)ကျပ်ဖြင့် ရောင်းချလျက်ရှိကြောင်း၊ တရုတ်နံနံကို အိမ်ရှင်မများဟင်းချက်ရာတွင် ဟင်းခတ်အမွှေးအကြိုင်အဖြစ်အသုံးပြုကြကြောင်း၊ ပူစီနံနံရွက်များ ကိုဒံပေါက်ဆိုင်များနှင့် ထမင်းဆိုင်များမှဝယ်ယူသည့်အတွက် နေ့စဉ်အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)