ပြည်တွင်းကုန်သွယ်မှုသတင်း

          ပြည်အနီးအနားတွင်စောင်းလျားပင်များအများအပြားတွေ့ရှိရပါသည်။ စောင်းလျားပင်တွင် အချိုသီးနှင့် အချဉ်သီးဟူ၍နှစ်မျိုးရှိပါသည်။ စောင်းလျားသီးသည် ဆေးဖက်ဝင်သောသီးနှံတစ်မျိုး ဖြစ်ပြီး ဗီတာမင်‌အေ၊ သတ္ထုဓာတ်တို့များစွာပါဝင်ပါသည်။ စောင်းလျားသီးကို သကြားနှင့် စားပေး ခြင်းဖြင့် အစာမကြေဖြစ်ခြင်း၊ ရင်ပြည့်ရင်ကယ်ဖြစ်ခြင်းမှ ကင်းဝေးစေပါသည်။ ဟင်းချက်၍လည်း စားသုံးနိုင်ပြီး ငါးပြေမနှင့်ချက်၍စားသုံးလျှင် ကျောက်ကပ်တွင် ကျောက်တည်ခြင်းကို သက်သာစေ ပါသည်။ စောင်းလျားသီးအချိုသီးကို ယိုထိုး၍စားသုံးနိုင်ပြီး အစိမ်းသီးကို လက်ဖက်သားနှင့်နယ်၍ ချဉ်ငံစပ်စားသုံးနိုင်ပါသည်။ ကြယ်ပုံသဏ္ဍန်ရှိသော စောင်းလျားသီးကို စားသုံးပေးခြင်းဖြင့် ကျန်းမာ ရေး နှင့် သင့်တော်ပြီး အသားအရည်ကိုလည်း စိုပြေစေပါသည်။

DOCA(ပဲခူး)

          ပြည်ခရိုင်၊ ရွှေတောင်မြို့နယ်၊ မီးလောင်အုပ်စု၊ ဝါးလည်ကျေးရွာတွင် ရွှေဖရုံသီး (လက်ရိုက်သီး) စိုက်ပျိုးထားရှိသဖြင့် အကျိုးအမြတ်နှင့် ကုန်ကျစရိတ်များအားသိရှိစေရန်အတွက် စားသုံးသူရေးရာဦးစီးဌာန၊ မြို့နယ်တာဝန်ခံနှင့် ဝန်ထမ်းများအဖွဲ့သည် (၂၅.၂.၂၀၂၅)ရက်နေ့တွင် ကွင်းဆင်းလေ့လာခဲ့ပါသည်။

          ထိုသို့ကွင်းဆင်းလေ့လာရာတွင် မီးလောင်အုပ်စုတွင် ရွှေဖရုံသီးစိုက်ပျိုးသူတောင်သူ (၁၂)ဦး ရှိပြီး ဖရုံစင်ပေါင်း ၁၂စင်စိုက်ပျိုးထားရှိကြောင်း သိရပါသည်။ ရွှေဖရုံသီးကို စိုက်ပျိုးသောစင်မှာ (၂)နှစ်အသုံးပြုနိုင်ပြီး ဖရုံသီးတုံးပါက အခြားအနွယ်ပင်များကို ဆက်လက်စိုက်ပျိုးရပါသည်။ စိုက်ပျိုးထားသောမျိုးမှာ ထိုင်ဝမ်မျိုးဖြစ်ပြီး တန်ခူးလဆန်းတွင် စတင်စိုက်ပျိုး၍ ဝါဆိုလဆန်းမှစ၍ ခူးဆွတ်ရောင်းချကြောင်း သိရပါသည်။ ရွှေဖရုံသီးကို ခူးဆွတ်ရာတွင် တစ်ပတ်လျှင်တစ်ကြိမ် ခူးဆွတ်ရပြီး အနည်းဆုံး (၂)လအထိခူးဆွတ်ရ၍ ဖရုံသီးအလုံးရေ ၁၄၀၀ခန့် ခူးဆွတ်ရရှိကြောင်း သိရပါသည်။ ရောင်းချသောဈေးနှုန်းများအနေဖြင့် လက်ကားဈေး (အထိုင်ဈေး) တစ်လုံးလျှင် အလုံးအကြီးအသေးပေါ် မူတည်၍ (၅၀၀/၁၀၀၀)ကျပ်ဖြင့် ရောင်းချ၍ ရောင်းရငွေမှာ (၇)သိန်းကျပ် ခန့်ရရှိပြီးကုန်ကျစရိတ်အနေဖြင့် (၂)သိန်းခန့် ကုန်ကျကြောင်း သိရပါသည်။ တောင်သူအကျိုးအမြတ် အနေဖြင့်(၅)သိန်းခန့် ရရှိကြောင်း သိရပါ သည်။

          ရွှေဖရုံသီးကိုစိုက်ပျိုးလျှင် အရင်းအနှီးသိပ်မများဘဲ အကျိုးအမြတ်များစွာရရှိသဖြင့် ရွှေဖရုံသီး (လက်ရိုက်သီး)အားစိုက်ပျိုးသင့်သော သီးနှံတစ်မျိုးဖြစ်ပါသည်။

DOCA(ပဲခူး)

            မြန်မာလူမျိုးတို့သည် သပြေပန်းကို အခြားသောပန်းများထက် ပိုမိုကြိုက်နှစ်သက်ကြသည်။ သပြေပန်းသည် ယခင်က တောတောင်များ၌သာ တွေ့ရလေ့ရှိကြောင်း၊ ယခုအခါတွင် သပြေပန်းပင် များကို ခြံဖွဲ့၍စိုက်ပျိုးကြပြီး ရောင်းချလျက်ရှိကြောင်း  ပန်းရောင်းချသူများထံမှ သိရသည်။

             သပြေပန်းသည် အပွင့်မျိုးမဟုတ်၊ ရိုးတံအသစ်များမှ အရွက်နုကလေးများသည် ပန်းရောင်း၊ အနီရောင်အဆင်းရှိပြီး လူကြိုက်များကြောင်း၊ သပြေပန်းကို အခက်စည်းနှင့် အငုတ်ဟူ၍(၂)မျိုး ရောင်းချကြောင်း၊ ဖေဖေါ်ဝါရီလ စတုတ္ထပတ်အတွင်း သပြေပန်းခက်တစ်စည်းလျှင်(၁၅၀၀)ကျပ်၊ သပြေငုတ်ကြီး(၁)ငုတ်လျှင်(၄၅၀၀)ကျပ်နှင့် သပြေငုတ်သေး(၁)ငုတ်လျှင် (၃၅၀၀)ကျပ်ဖြင့်ရောင်းချ ကြောင်း လူကြိုက်များသော ပန်းဖြစ်သည့်အတွက် အရောင်းသွက်လျက်ရှိကြောင်း ပန်းရောင်းချသူများထံမှ သိရှိရပါသည်။

DOCA(စစ်ကိုင်း)

          တောင်ငူခရိုင်၊ ဖြူးမြို့တွင် ယခင်လက စပါး တင်း ၁၀၀ လျှင် ၁၈၀၀၀၀၀ ကျပ် ရှိရာမှ ယခုလတွင် ၁၆၀၀၀၀၀ ကျပ်အထိ၊ ဆန်ဈေးမှာ ဧည့်မထ အလတ်စဆန် တစ်အိတ်လျှင် ၇၀၀၀၀ ကျပ်မှ ၆၃၀၀၀ ကျပ်အထိရှိရာ ဈေးနှုန်းကျဆင်းပါသည်။

          ယခင်လက ဆန်ကွဲကြီးတစ်အိတ်လျှင် ၅၈၀၀၀ ကျပ်၊ ဆန်ကွဲသေး တစ်အိတ်လျှင် ၄၆၀၀၀ ကျပ်ရှိရာမှ ယခုအပတ်တွင် ဆန်ကွဲကြီးတစ်အိတ် လျှင် ၅၀၀၀၀ ကျပ်၊ ဆန်ကွဲသေး တစ်အိတ်လျှင် ၄၅၀၀၀ ကျပ်ဖြင့် ဈေးအနည်းငယ်ကျဆင်းပါသည်။ ဖွဲနုမှာ ယခင်လက ၁၇၅၀၀ ကျပ်မှ ယခုလတွင် ၂၂၅၀၀ ကျပ်ရှိသဖြင့် တစ်အိတ်လျှင် ၅၀၀၀ ကျပ် ဈေးတတ်ပါသည်။

          တောင်သူလယ်သမားအများစုမှာ စပါးကိုပွဲစားများထံသို့တိုက်ရိုက်ရောင်းချပြီး တောင်သူ အချို့မှာ စပါးကိုစက်အရောက်သယ်ယူ၍ ကြိတ်ခွဲပြီးမှ ထွက်ရှိလာသော ဆန်နှင့်ဆန်ထွက် ပစ္စည်းများကို ပြန်လည်ရောင်းချခြင်းဖြင့် အကျိုးအမြတ် ပိုရကြောင်းသိရပါသည်။

DOCA(ပဲခူး)

          နွေဦးရာသီတွင် သရက်ဖူးလေးများလှိုင်လှိုင်ပွင့်နေကြပါသည်။ ပူအိုက်လာသော ရာသီဥတု ဖြစ်လာသည်နှင့်အမျှ အစားအသောက်များပျက်လာတက်ကြပါသည်။ အစားအသောက်ပျက်ချိန်တွင် အချိုအချဉ် အရသာများကို ခံတွင်းတွေ့တက်ကြပါသည်။

          သရက်သီးသည် အနံ့၊ အရသာ၊ ၊ အရောင်အဆင်းများနှင့်ပြည့်စုံသည့်အပြင် သရက်သီးကို စားသုံးခြင်းကြောင့် အကျိုးကျေးဇူးများစွာရရှိစေကြောင်း လေ့လာချက်များအရ သိရှိရပါသည်။ သရက်သီးတွင် Vitamin A၊ Vitamin C၊ Vitamin K၊ VitaminE နှင့် Vitamin B တို့ပါဝင်သောကြောင့် ကိုယ်ခံအားကို မြှင့်တင်ပေးနိုင်ပါသည်။ သရက်သီးတွင် ဖောလစ်အက်စစ် ပါဝင်သောကြောင့် ကိုယ်ဝန်ဆောင်မိခင်များအတွက် စားသုံးသင့်သော အသီးတမျိုး ဖြစ်ပါသည်။ သရက်သီးတွင် အမျှင်ဓါတ်နှင့် ရေဓါတ်ပါဝင်သောကြောင့် အူလမ်းကြောင်း ကျန်းမာရေးအတွက်များစွာ အကျိုးရှိစေ နိုင်ပါသည်။ ယခုအခါ သရက်သီး အရွယ်အစားပေါ်မူတည်၍ တစ်ပိဿာလျှင် ၃၅၀၀ ကျပ်မှ ၆၅၀၀ ကျပ်အထိ ဈေးကွက်ဖြစ်ပေါ်နေကြောင်း ညောင်ပင်လေးဈေး အတွင်းရှိ ဈေးသည်များ၏ ပြောကြား ချက်အရသိရှိရပါသည်။

DOCA(ပဲခူး)