ပြည်တွင်းကုန်သွယ်မှုသတင်း

   မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံစိုက်ပျိုး ဖြစ်ထွန်းလျက်ရှိရာ ၎င်းသီးနှံများအနက် ငရုတ်သီးနှံကို ၂၀၂၅-၂၀၂၆ ဘဏ္ဍာနှစ်တွင် စဉ့်ကိုင်မြို့နယ်တွင် (၁၅၈၄) ဧကစိုက်ပျိုးခဲ့ပြီး(၁၀၁၄) ဧကရိတ်သိမ်းပြီးစီးပြီ ဖြစ်ကြောင်း သက်ဆိုင်ရာဌာန၏ စာရင်းများအရသိရှိရသည် ။ ငရုတ်မျိုးများ အနေဖြင့် သာမို ၊ ဒီမွန် ၊ အက်စတာ၊ ၆၉၂၊ ကျားခေါင်း ငရုတ်မျိုးများကိုစိုက်ပျိုးကြပြီး ၎င်းမျိုးများအနက် ၆၉၂ ငရုတ်မျိုး များကို နိုဝင်ဘာနှင့် ဒီဇင်ဘာလများတွင်စိုက်ပျိုးကြကြောင်း ယခုအချိန်တွင် လှိုင်လှိုင်ထွက်ရှိနေပြီ ဖြစ်ကြောင်း သိရှိရသည်။ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ အပါအဝင် (၁၅၀၀၀၀၀)ကျပ်ခန့် ကုန်ကျကြောင်း၊ အထွက်နှုန်းအနေဖြင့်(၄၀၀-၄၅၀)ပိဿာခန့်ထွက်ရှိကြောင်း၊

   ငရုတ်သီးဈေးနှုန်းအနေဖြင့် ငရုတ်သီးအစို တစ်ပိဿာလျှင် (၄၀၀၀)ကျပ် ၊ ငရုတ်သီးခြောက် အညှာပါတစ်ပိဿာလျှင်(၉၀၀၀)ကျပ်၊ ငရုတ်သီး ခြောက်အညှာခြွေ တစ်ပိဿာလျှင်(၁၀၀၀၀)ကျပ်၊ ဈေးနှုန်းများဖြင့် အရောင်းအဝယ်ဖြစ်နေကြောင်း၊ (၁)ဧက ကကျိုးအမြတ်အနေဖြင့်(၂၁၀၀၀၀၀/-) ကျပ်ဝန်းကျင်မြတ်ကြောင်း ၊ ငရုတ်ပွဲစားများမှ စိုက်ခင်းအထိလာရောက်ဝယ်ယူကြကြောင်း ၊  ပွဲစားများမှတစ်ဆင့် မန္တလေး ၊ ရန်ကုန်မြို့များသို့ တင်ပို့ရောင်းချကြကြောင်း ၊ ငရုတ်စိုက်ပျိုးခြင်း ဖြင့် အပိုဝင်ငွေရရှိသည့်အပြင် မိသားစုစားဝတ်နေရေးပါ ပြေလည်သည့်အတွက် ပိုမိုတိုးချဲ့စိုက်ပျိုး သင့်ပါကြောင်း ငရုတ်စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

    တနင်္သာရီတိုင်းဒေသကြီး၊ မြိတ်မြို့ပေါ်ရှိ စမ်းချောင်းကုန်စိမ်းဈေးကွက်သို့ ၂၀၂၅ခုနှစ် ဇူလိုင်လပထမပတ်တွင် ပန်းဂေါ်ဖီများဝင်ရောက်မှုနည်းပါးသောကြောင့် ဈေးများအနည်းငယ်မြှင့် တက်နေကြောင်းသိရှိရပါသည်။ ရှမ်းပြည်နယ်တောင်ပိုင်းဒေသများမှ ထွက်ရှိသည့် ပန်းဂေါ်ဖီပွင့် ဖြူနှင့် ပန်းဂေါ်ဖီပွင့်စိမ်းများ ဝင်ရောက်လျက်ရှိပြီး အ‌ရောင်းသွက်သည့် ကုန်စိမ်းအမယ်များဖြစ် ကာ ပန်းဂေါ်ဖီစိမ်းများမှာ နူးညံ့မှုပိုသည့်အတွက် ဈေးပိုရကြောင်း သိရှိရပါသည်။

    မြိတ်မြို့ကုန်စိမ်းဈေးကြီးအတွင်း ၂၀၂၅ခုနှစ်၊ ဇူလိုင်လနောက်ဆုံးပတ်များတွင် ပန်းဂေါ်ဖီ စိမ်းများမှာ အရွယ်အစားအလိုက် ဈေးအနည်းငယ်ကာခြားမှုများရှိပြီး တစ်ပွင့်လျှင် (၄၀၀၀)ကျပ် မှ (၅၀၀၀)ကျပ်ရှိကြောင်း ကုန်စိမ်းရောင်းသူများထံမှ သိရှိရပါသည်။

DOCA(တနင်္သာရီ)

       ပုလောပီနံဥများသည် စိုက်ပျိုးရလွယ်ကူပြီး အမြဲဝင်ငွေရရှိနိုင်သော ဒေသထွက်သီးနှံတစ်မျိုး ဖြစ်သည်။  ဂရုတစိုက်ပြုစုပျိုးထောင်ရန်မလိုအပ်ဘဲ စိုက်ပျိုးနိုင်သည့်အတွက် ကုန်ကျစရိတ်နည်း ပါးစွာဖြင့် ကောင်းစွာစိုက်ပျိုးဖြစ်ထွန်းနိုင်သည်။ ယခင်က ပုလောပီနံဥများကို မိရိုးဖလာနည်းဖြင့် စိုက်ပျိုးခဲ့ကြပြီး စိုက်ဘောင်နည်းဖြင့် စနစ်တကျစိုက်ပျိုးထားခြင်းဖြင့် အထွက်နှုန်းများတိုးများလာကြောင်း သိရှိရပါသည်။ ပုလောပီနံဥများကို အပင်ကြီးထွားပြီး ၈လ မှစ၍ တူးဖော်နိုင်ပြီး ၁၄လ၊ ၁၅လ ခန့်ကြာမှ တူးဖော်ပါက ပုလောပီနံဥများရင့်ပြီး စျေးကွက်ဝင်မည်မဟုတ်ကြောင်းသိရှိရပါသည်။ စျေးကွက်တွင် ပုလောပီနံဥကို အချိုမုန့်၊ ပုလောပီနံဥပေါင်း၊ မုန့်များပြုလုပ်၍ ရောင်းချလျက်ရှိကြပါသည်။

   ၂၀၂၅ခုနှစ်၊ ဇူလိုင်လစျေးနှုန်းအရ ပုလောပီနံဥစျေးနှုန်းမှာ တစ်ပိဿာလျှင် ၅၀၀၀ကျပ်ခန့် ရှိနေကြောင်း သိရှိရပါသည်။

DOCA(တနင်္သာရီ)

         မြန်မာလူမျိုးတို့သည် မြန်မာရိုးရာအစားအစာများကို အများဆုံးနှစ်သက်ကြပါသည်။ရိုးရာ အစားအစာဖြစ်သောမုန့်လက်ကောက်ကွင်း ရောင်းချနေသူတစ်ဦးထံမှလေ့လာသိရှိမှုအရ မုန့်လက် ကောက်ကွင်းပြုလုပ်မည်ဆိုလျှင် ထန်လျက်(၅၀)ကျပ်သား၊ ကောက်ညှင်းဆန်(၅)လုံးခွဲ၊ ဘိုကိတ်ပဲ နို့ဆီဘူးတဝက်၊ဆီ(၅၀) ကျပ်သားအပွမှုန့်၊ဆော်တာအနည်းငယ်တို့ ပါဝင်ပါသည့် အချိုးအတိုင်း မုန့်လက်ကောက်ကွင်းပြုလုပ်ရပါသည်။မုန့်လက်ကောက်ကွင်း ပြုလုပ်ပုံအဆင့်ဆင့်မှာ ကောက် ညှင်းဆန်နှင့်ဘိုကိတ်ပဲတို့ကို ရေစိမ်ပြီးမုန့်ကြိတ်စက်နှင့်ကြိတ်ပြီး ပိတ်ပါးနှင့်စစ်ထားရပါသည်။ ရလာသောမုန့်နှစ်များကို ဆော်တာအနည်းငယ်၊ အပွမုန့်တို့ကိုရောနှောပြီး နှဲ့ရပါသည်။ပြီးလျှင် ရောင်းတန်ဝင် မုန့်လက်ကောက်ကွင်းများကို ကွင်းထားရပါသည်။ထန်းလျက်ကိုကျိုပြီး အအေးခံ ထားရပါသည်။ကွင်းထားသော မုန့်လက်ကောက်ကွင်းများကို ဒယ်အိုးထဲသို့ဆီထည့်ပြီး ကြော်ရပါ သည်။ကြော်၍ရလာသော မုန့်လက်ကောက်ကွင်းများကို အအေးခံထားသော ထန်းလျက်ရည်ထဲသို့ ထည့်ပြီးရောင်းချရပါသည်။ရောင်းချသောဈေးနှုန်းများမှာ တစ်ကွင်းလျှင် ၃၅၀ ကျပ်၊သုံးကွင်းဝယ် ယူလျှင် ၁၀၀၀ ကျပ်ဖြင့် ရောင်းချပါသည်။၎င်းအချိုးအတိုင်း မုန့်လက်ကောက်ကွင်းပြုလုပ်မည်ဆို ပါက အကွင်းရေပေါင်း (၅၅)ကွင်းခန့်ရရှိပါသည်။ပြုလုပ်ရန်ကုန်ကျစရိတ်မှာ ထန်းလျက်(၅၀) ကျပ်သား ၃၅၀၀ ကျပ်၊ကောက်ညှင်းဆန်(၅) လုံးခွဲ ၄၀၀၀ ကျပ်၊ဘိုကိတ်ပဲနို့ဆီဘူးတဝက် ၅၀၀ ကျပ်၊ဆီ(၅၀) ကျပ်သား ၆၀၀၀ ကျပ်၊စုစုပေါင်းကုန်ကျစရိတ်မှာ ၁၄၀၀၀ ကျပ် ကုန်ကျပါသည်။ ရောင်းရငွေစုစုပေါင်းမှာ ၂၀၀၀၀ ကျပ်ခန့် ရရှိသဖြင့် အမြတ်ငွေ ၆၀၀၀ ကျပ်ခန့်ရရှိပြီး နေ့တစ်ဝက်အတွင်း ရောင်းချပြီးကြောင်း သိရှိရပါသည်။

DOCA(ပဲခူး)

      ယခုလိုမိုးရာသီအချိန်တွင် တောထဲ၊ တောင်ထဲ၌ မျှစ်(ခေါ်)ဝါးအစို့ပေါက်များ ထွက်ပေါ်လာ နေပြီ ဖြစ်ပါသည်။ ထို့ကြောင့် ပြည်မြို့အနီးတဝိုက်ရှိ ဝါးတောရှိသော ကျေးရွာများတွင် မျှစ်အစို့ပေါက်များ ထွက်ပေါ်လာ၍ ပြည်မြို့ရှိ ဈေးများသို့ လာရောက်ရောင်းချလျက်ရှိပါသည်။ မျှစ်ကို ချက်ချင်းချိုး၍ မျှစ်စပ်၊ မျှစ်ပြုတ်စားသုံးနိုင်သကဲ့သို့ ကြာရှည်ခံအောင် မျှစ်ချဉ်၊ မျှစ်ခြောက်များ ပြုလုပ်၍လည်း စားသုံးကြပါသည်။ ပေါ်ကာစတွင် လူအချို့က ဝယ်ယူစားသုံး ကြသဖြင့် ဈေးနှုန်းများ မြင့်တက်လာခဲ့ ပါသည်။ နောက်ပိုင်း မျှစ်များ အထွက်လှိုင်လာချိန်တွင် ဈေးများပေါ်လာသဖြင့် လူတန်းစားမရွေး ဝယ်ယူစားသုံးကြပါသည်။ ဝါးအမျိုးမျိုးရှိသလို မျှစ်အမျိုးမျိုးလည်းရှိပြီး စားသုံးနိုင်သော မျှစ်မှာ အနည်းငယ်သာရှိပြီး ဝါးပိုးမျှစ်ကို အဓိကထား၍ စီးပွားဖြစ်ထုတ်လုပ်‌ရောင်းချကြပါသည်။ ဝါးပိုးမျှစ်ကို နှစ်စဉ်မိုးရာသီဖြစ်သော မေလမှ စ၍ စက်တင်ဘာလအထိ ထွက်ပေါ်လျက်ရှိပြီး ယခုပြည်ဈေးကွက်သို့ ယခုအချိန် ဇူလှိုင်လလယ်နှင့် နောက်ဆုံးပတ်မှ စ၍ မျှစ်စပ်၊ မျှစ်ချိုများ စတင်ရောင်းချနေပြီဖြစ်ပါသည်။ မျှစ်သည် လူအားအကျိုးပြုယုံသာမက မိသားစုစားသုံးရန် ဖူလုံဖို့အတွက် သဘာဝကဖန်တီးပေးသော ရာသီပေါ် သီးနှံတစ်မျိုးဖြစ်ပါသည်။ မျှစ်တွင် အာဟာရဓါတ်များစွာ ပါဝင်ပါသည်။ မျှစ်ကို အမျိုးမျိုးလုပ်၍ စားသုံးနိုင်ပြီး ငပိရည်နှင့်တို့စားတာ၊ ကြော်စားတာ၊ သုပ်စားတာတို့ ပြုလုပ်ကြပြီး မျှစ်ချဉ်ကိုလည်း ဝက်သား၊ ကြက်သား၊ ငါးတို့နှင့်ရော၍ အရည်သောက်ချက်စားကြသလို မျှစ်ခြောက်ကို အခြောက်လှမ်းထားပြီး စားချင်မှ ရေနွေးဖျော၍ သုပ်စားကြပါသည်။

          ပြည်မြို့ရှိ ဈေးများထဲတွင် ပြည်မြို့အနီးတဝိုက်ရှိ ကျေးရွာများဖြစ်သော မှော်ဇာ၊ တောင်လုံးညို၊ ပျင်းပင်ကိုင်းရွာနှင့် ပြည်မြို့အနောက်ဘက်ကမ်းရှိ ရွာများမှ မျှစ်များချိုးယူ၍ ရောင်းချကြပါသည်။ မျှစ်၏သဘာဝအရောင်းမှာ အဖြူရောင်ဖြစ်ပြီး မျှစ်အစိမ်းကို ပြုတ်လိုက်လျှင် ဝါကျင့်ကျင့်အရောင်ဖြစ်ပြီး စားသုံးသူများအနေဖြင့် သဘာဝအရောင်ကို ရွေးချယ်၍ ဝယ်ယူသုံးစွဲ သင့်ပါသည်။ ‌ရောင်းချသူများအနေဖြင့်လည်း မျှစ်ကို ရောင်းတန်းဝင်အောင် သဘာဝ အရောင် မဟုတ်ဘဲ ဓါတုဆိုးဆေးများကို အသုံးမပြုဘဲရောင်းချလျှင် ကုသိုလ်လည်းရ ဝမ်းလည်းဝမှာ ဘဲဖြစ်ပါသည်။ ယခုအချိန်တွင် ဈေးကွက်တွင်ရောင်းချနေသော မျှစ်အမျိုးအစားများမှာ မျှစ်စပ်နှင့် မျှစ်ချိုများ ဖြစ်ပါသည်။ မျှစ်စပ်ဈေးမှာ တစ်ပိဿာလျှင် (၁၀၀၀၀)ကျပ်နှင့် မျှစ်ချိုမှာ တစ်ပိဿာလျှင် (၅၀၀၀)ကျပ်ဖြင့် ပြည်မြို့ရှိဈေးများတွင်ရောင်းချလျက်ရှိပါသည်။

DOCA(ပဲခူး)