ပြည်တွင်းကုန်သွယ်မှုသတင်း

     ကရင်ပြည်နယ် ၊ဘားအံမြို့အနီးတဝိုက်ကျေးရွာများတွင် ကျောက်ဖရုံသီးကို တပိုင်တနိုင် စိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြသည်။ ဘားအံမြို့ဈေးများရှိ ကျောက်ဖရုံသီးများသည် ဒေသထွက်ကျောက်ဖရုံသီးရှိသလို မိတ္ထီလာဘက်မှဝင်ရောက်လာသည့် ကျောက်ဖရုံသီးများလည်းရှိကြောင်း သိရသည်။

    ဘားအံမြို့အနီးတဝိုက်ကျေးရွာများရှိ ဒေသထွက်ကျောက်ဖရုံသီးများကို ဘားအံမြို့ပေါ်ဈေးများတို့ အဓိကထားကာလာရောက်ရောင်းချကြသည်။ ကျောက်ဖရုံသီးသည် လူတို့၏ခန္ဓာကိုယ်ရှိ ရေဓာတ်ကို ထိန်းညှိပြီး ဆီးရွှင်စေရုံသာမက ဆီးကျောက်တည်ခြင်းကိုလည်း ကာကွယ်ပေးပါသည်။ ကျောက်ဖရုံသီး များကို ရောင်းချဝယ်ယူရာတွင် အရွယ်အစားလိုက်ပြီး ဈေးနှုန်းကွာဟမှုရှိသည်။ ကျောက်ဖရုံသီး အလုံးကြီး တစ်ပိဿာလျှင် (၅၀၀၀)ကျပ်၊ ကျောက်ဖရုံသီး အလုံသေး တစ်ပိဿာလျှင် (၃၅၀၀)ကျပ်နှင့် ကျောက်ဖရုံသီး တစ်စိတ်လျှင်(၁၀၀၀၊၁၅၀၀)ကျပ်တို့ဖြင့် အရောင်းအဝယ်ဖြစ်လျက်ရှိကြောင်းနှင့် ယခင်လ ကျောက်ဖရုံသီးဈေးနှုန်းနှင့် ယခုလ ကျောက်ဖရုံသီးဈေးနှုန်းမှာ အနည်းငယ်မျှသာ ကွာဟမှုရှိပြီး ယခုလိုကွာဟရခြင်းမှာ မိုးရာသီ ဝါတွင်းကာလဖြစ်ခြင်းတို့ကြောင့်ဖြစ်ကြောင်း သိရသည်။

DOCA(ကရင်)

   မိုးရာသီသို့ရောက်ရှိလာသည့် ပန်းတိမ်မနိုင်ပန်းများ စတင်၍ ဈေးကွက် သို့ ရောက်ရှိလာပြီ ဖြစ်ပါသည်။ ပန်းအလှကို ပန်းထိမ်ဆရာများ လက်မှိုင်ချရသည်အထိ တင်စားခေါ်ဆိုသော ပန်းထိမ်ငို ပန်းသည် သုံးရာသီရှိသော မြန်မာ့ရေမြေတွင် မိုးကာလတွင်ပွင့်လန်းသည့် ပန်းတစ်မျိုး ဖြစ်သည်။ ဘုရားပန်းအဖြစ်သာမက အခမ်းအနားများတွင် တန်ဖိုးထား အလှဆင်သော ပန်းတစ်မျိုးလည်း ဖြစ်ပါသည်။ ပန်းတိမ်မနိုင်ပန်းများကို ၊ တောင်ကြီး၊ မေမြို့များတွင် စီးပွားဖြစ် စိုက်ပျိုးကြပါ  သည်။ ယခင်နှစ်များက ပန်းတိမ်မနိုင်ပန်းကို အဖြူးရောင်တစ်မျိုးသာ စိုက်ပျိုးကြပြီး ယခုအခါ တောင်ကြီးမြို့နယ်ကျေးရွာများတွင် ခရမ်းရောင် ပန်းတိမ်မနိုင်ပန်းစိုက်ပျိုးကြပြီး ဈေးကွက်ထဲတွင် ရောင်းချနေပြီ ဖြစ်ပါသည်။

   ပန်းတိမ်မနိုင်ပန်းသည် အခက်အကြီး/အသေးပေါ်တွင် မူတည်ကာ (တာ)ဟုခေါ်သော ပန်းခြင်း ဖြင့် ဝယ်ယူရပြီး လက်ကားဈေး ၁တာတွင် အခက်အကြီး/အသေးပေါ် မူတည်ပြီး (၃၀/၃၅)စီး ပါရှိပြီး ဈေးနှုန်းအနေဖြင့် (၄၀၀၀ဝိ/-မှ ၆၀၀၀ဝိ/-)ဈေးဖြင့် ဝယ်ယူရပြီး၊ အခက်အကြီးပေါ်မူတည်၍ဥ ရောင်းချကြပြီး၊အခက်ကြီး ၁၀ခက်ပါ ၁စည်းကို (၅၀၀ဝိ/- မှ ၇၀ဝဝိ/-)ဈေး ဖြင့် လည်းကောင်း၊ အခက်သေး ၁၀ခက်ပါ ၁စည်းကို (၂၀၀ဝိ/- မှ ၂၈ဝဝိ/-)ဈေးရောင်းချနေကြောင်း သိရှိရပါသည်။

( DOCA ဧရာဝတီ)

      ဧရာဝတီတိုင်းဒေသကြီး၊ ပုသိမ်ခရိုင်၊ ကန်ကြီးထောင့်မြို့နယ်အတွင်း ဩဂုတ်လပထမပတ် တွင်ဖြစ်ပေါ်နေသော မြို့မဈေးသစ်အတွင်း နေ့စဉ်လက်လီ ရောင်းဝယ်နေသော ကြက်ဥ/ဘဲဥ အရောင်းဈေးနှုန်းများမှာ ကြက်ဥ (အကြီး) တစ်လုံးလျှင် (၅၀၀) ကျပ်၊ (အသေး) တစ်လုံးလျှင် (၄၅၀) ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

            ဘဲဥဈေးနှုန်းများမှာ (အကြီး) တစ်လုံးလျှင် (၆၀၀) ကျပ်၊ (အသေး) တစ်လုံးလျှင် (၅၅၀) ကျပ်တို့ဖြင့်ရောင်းချလျက်ရှိပါသည်။

( DOCA ဧရာဝတီ)

      မင်းကွတ်သီးများစားပြီးရင် အခွံတွေကို မစွန့်ပစ်လိုက်ပါနဲ့။ မင်းကွတ်ခွံကို အခြောက ်လှန်းပြီး သိမ်းထားပါ။ အရေပြားရောဂါ၊ ပွေး၊ ဝဲ၊ ညှင်း၊ ယားနာ၊ အဖုအပိမ့်ထွက်ခြင်း၊ ရေယုန်၊ ပြည်တည်နာ၊ ရေကျောက်တို့ကို ကုသရာတွင် အလွန်ထိရောက်ပါတယ်။ အသုံးပြုနည်းကတော့ မှည့်နေသော မင်းကွတ်သီး၏ အခြောက်လှန်းထားသောအခွံကို ထုံးရေကြည်နှင့်ရော၍ ပျစ်လာ အောင် သွေးပြီး အရည်ကြည်ဖုများ၊ ပြည်တည်နာများ သို့မဟုတ် ပွေးများပေါ်တွင် တစ်နေ့လျှင် ၂-၃ ကြိမ် လိမ်းပေးပါက သက်သာလာပါမည်။ အခြောက်လှန်းထားသော မင်းကွတ်ခွံ တစ်ခုနှစ်ခုကို ရေ ၁ လီတာဖြင့်ပြုတ်ပြီး အနာများကို တစ်နေ့လျှင် ၃-၄ ကြိမ် ဆေးကြောပေးနိုင်ပါသည်။ မင်းကွတ်ခွံကို ပြုတ်ပြီး ပါးစပ်ဆေးရန်အတွက်လည်း အသုံးပြုနိုင်ပါသည်။ ၎င်းတွင် ပါးစပ်အတွင်းရှိ ဘက်တီးရီးယားများကို သေစေနိုင်သော ဂုဏ်သတ္တိနှင့် မှိုများကို တိုက်ဖျက်နိုင်သော ဂုဏ်သတ္တိ များရှိပြီး ပါးစပ်အတွင်း အနာများဖြစ်ပေါ်သည့်အခါ အထူးကောင်းမွန်ပါသည်။ မင်းကွတ်သီး အမှည့်၏ အခွံကို အခြောက်လှန်းထားပြီး ဝမ်းပျက်ဝမ်းလျှော၊ နာတာရှည်ဝမ်းလျှောခြင်း၊ သွေးဝမ်းသွားခြင်းတို့ကို ကုသရန်အတွက် အသုံးပြုနိုင်ပါသည်။ မင်းကွတ်ခွံခြောက် ၁ ခုကို ရေဖြင့် ၅-၁၀ မိနစ်ခန့် ပြုတ်ပြီး တစ်ခါသောက်လျှင် ထမင်းစားဇွန်း ၁ ဇွန်းနှုန်းဖြင့် ၄ နာရီခြားတစ်ခါ သောက်သုံးနိုင်ပါသည်။ သို့မဟုတ် မင်းကွတ်ခွံခြောက် တစ်ခြမ်းကို မီးအနည်းငယ်ဖြင့် ကင်ပြီး အမှုန့်ပြုလုပ်ကာ ရေတစ်ဝက်ခွက်တွင် ဖျော်၍ ၂ နာရီခြားတစ်ခါ သောက်သုံးပါက ရောဂါလက္ခဏာ များ သက်သာလာမည် ဖြစ်ကြောင်း ဖတ်မှတ်ခဲ့ရပါသည်။ မြင်းခြံဈေးကွက်တွင် ရောင်းချသော မင်းကွတ်သီးများကို ရှမ်းပြည်နယ်တောင်ပိုင်း အောင်ပန်းမြို့၊မန္တလေးမြို့တို့မှ တင်သွင်းပြီး ဒေသတွင်း ဖြန့်ဖြူးရောင်းချကြောင်း၊ ၂၀၂၅ခုနှစ်၊ဇူလိုင်နောက်ဆုံးပတ်တွင် မင်းကွတ် သီးတစ်လုံး လျှင် (၃၀၀-၄၀၀)ကျပ် ပေါက်ဈေးများရှိကြောင်း၊ အသီးလတ်ဆက်ပါက ဈေးနှုန်းများ ပြောင်းလဲကြောင်း မင်းကွတ်သီးသည် အတွင်းမှအသားကို စားသုံး၍ အခွံကိုဆေးအဖြစ်လည်း အသုံးပြု၍ ရကြောင်းသိရှိရသည်။

    DOCA (မန္တလေး)

      မြင်းခြံခရိုင်အတွင်းရှိ ကျေးရွာများဖြစ်သော တလုပ်ရွာ၊ တောပု၊ နနွင်းတော်ဘိုး၊ကံဆွယ်၊ ကံဆင့်၊ လက်ဝဲနှင့် မြင်းနီကျေးရွာတို့သည် ဆောင်းကြက်သွန်နီများကို စီးပွားဖြစ်စိုက်ပျိုးကြ ကြောင်း၊  ၎င်းကျေးရွာမှ ထွက်ရှိသော ဆောင်းကြက်သွန်နီများသည် အရည်အသွေးကောင်ပြီး၊ သိုလှောင်ခံ၍  ပထမတန်းစား ကြက်သွန်နီဖြစ်ပြီး ဈေးကွက်တွင် ဈေးကောင်းလည်းရရှိကြောင်း၊ ဆောင်းကြက်သွန်နီ များကို ဧပြီလမှ စက်တင်ဘာလ အထိသိုလှောင်ကြပြီး၊ သိုလှောင်ကာလ (၆)လ ကြာသိုလှောင် နိုင်ကြောင်းသိရှိရသည်။

            မြင်းခြံမြို့ရှိ ပွဲရုံများတွင် ၂၀၂၅ခုနှစ် ဇူလိုင်လ နောက်ဆုံးပတ်၌ ကြက်သွန်နီ ကြီးစတစ်ပိဿာလျှင်(၁၂၀၀-၁၃၀၀)ကျပ်၊ အလတ်စ တစ်ပိဿာလျှင် (၉၀၀-၁၁၀၀)ကျပ်ခန့် ၊အသေးစတစ်ပိဿာလျှင် (၅၀၀-၇၀၀)ကျပ် ပေါက်ဈေးများဖြင့် အရောင်းအဝယ်ဖြစ် လျက်ရှိ ကြောင်း၊ ယခင်ဇွန်လနောက်ဆုံးပတ်တွင် ရောင်းချနေသော ဈေးနှုန်း များအတိုင်း ပြောင်းလဲမှု မရှိကြောင်း၊ ပုံမှန်အတိုင်း အရောင်းအဝယ်ဖြစ်လျက်ရှိကြောင်း သိရှိရသည်။ စိုက်ပျိုးထွက်ရှိရာ ကျေးရွာများမှ မြို့ပေါ်ရှိပွဲရုံများသို့  နေ့စဉ်ကုန်ချိန် (၆၀၀၀၀-၈၀၀၀၀) ပိဿာခန့် တောင်သူများ ကိုယ်တိုင် လာရောက်ရောင်းချကြောင်း၊ ထိုပွဲရုံများမှတဆင့် မန္တလေး၊ ရန်ကုန်၊ နေပြည်တော်နှင့် မော်လမြိုင်မြို့များသို့ အပတ်စဉ်ကုန်ချိန် (၂၀၀၀၀၀) ပိဿာခန့်၊ တန်ချိန် (၃၂၆)တန် တင်ပို့ ကြောင်း၊ မြင်းခြံကံဆင့်ကြက်သွန်နီသည် အရည်အသွေးကောင်းပြီး၊ သိုလှောင်ခံသောကြောင့် ဝယ်လက်များကြိုက်နှစ်သက်ကြောင်း၊ ရန်ကုန်ဘုရင့်နောင် ဈေးကွက် တွင် အမြင့်ဈေးရရှိကြောင်း ကြက်သွန်အရောင်းအဝယ် လုပ်ကိုင်သူ ကုန်သည်တစ်ဦး၏ ပြောပြချက်အရသိရှိရသည်။

    DOCA (မန္တလေး)