ပြည်တွင်းကုန်သွယ်မှုသတင်း

   ကျွန်းလှမြို့နယ်ရှိ ကျေးရွာများတွင် စိုက်ပျိုးရေးလုပ်ငန်းများကို လုပ်ကိုင်လျက်ရှိရာ စားဖို ဆောင်သီးနှံ ဖြစ်သည့် ပဲတောင့်ရှည်သီး၊ ချဉ်ပေါင်ရွက်၊ ကင်ပွန်းချဉ်ပင်၊ ရုံးပတီသီး၊ ခရမ်းသီးနှင့် ကန်ဇွန်းရွက်များကို စိုက်ပျိုးလျက်ရှိသည့်အနက် ကင်ပွန်းချဉ်ရွက်ကိုလည်း တစ်ပိုင်တစ်နိုင် စိုက်ပျိုးလျက်ရှိပြီး ကျွန်းလှမြို့၊ သစ်ရာမြိုင်ဈေးသို့ လာရောက် ပို့ဆောင်ကာ အရောင်းအဝယ်ဖြစ်လျက်ရှိ ကြောင်းသိရသည်။

   ၂၀၂၅ ခုနှစ်၊ စက်တင်ဘာလ တတိယပတ်အတွင်း ပိတောက်မြိုင်ဈေးတွင် ရောင်းချနေသော ကင်ပွန်းချဉ်ရွက် ဈေးနှုန်းများမှာ ကင်ပွန်းချဉ်ရွက် တစ်စီးလျှင်(၂၅၀)ကျပ်၊ (၂)စီးလျှင် (၅၀၀)ကျပ် နှင့် (၁၀)စီးတစ်ထုံးလျှင်(၂၃၀၀)ကျပ် ဈေးနှုန်းတို့ဖြင့် လည်းကောင်း၊  ချဉ်ပေါင်ရွက် ဈေးနှုန်းများမှာ ချဉ်ပေါင်ရွက်(၁)ပိဿာလျှင်(၁၀၀၀)ကျပ်၊ ချဉ်ပေါင်ရွက်(၅၀)ကျပ်သားလျှင်(၅၀၀)ကျပ် နှင့် (၂၅)သားလျှင်(၃၀၀)ကျပ်တို့ဖြင့် ရောင်းချလျက်ရှိပြီး မန်ကျည်းသီးစိမ်းပေါသည့်အချိန်ဖြစ်သည့်အတွက်  ချဉ်ပေါင်ရွက်ဈေးနှုန်းကျဆင်းလျက်ရှိကြောင်း သိရသည်။

DOCA(စစ်ကိုင်း)

    တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့ရှိ ရှမ်းချောင်းကုန်စိမ်းဈေးတွင် အသီးအနှံများနှင့် ဟင်းသီးဟင်းရွက်များ ရောင်းချလျက်ရှိရာ ငရုတ်သီးစိမ်း‌ဈေးနှုန်းမှာ ယခင်စက်တင်ဘာလ ဒုတိယအပတ်တွင် တစ်ပိဿာလျှင် ၃၀၀၀၀ကျပ် မှ ၃၅၀၀၀ကျပ် ထိဈေးနှုန်းရှိခဲ့သော်လည်း ယခုစက်တင်ဘာလ တတိယအပတ်တွင် (၁)ပိဿာလျှင် ၂၀၀၀၀ကျပ် မှ ၂၃၀၀၀ကျပ် သာရှိပြီး၊ ငရုတ်သီးဈေးနှုန်းမှာ ၁၅၀၀၀ကျပ်ထိ ဈေးနှုန်းကျဆင်းသွားပါသည်။ ခရမ်းချဉ်သီးဈေးနှုန်း အနေ ဖြင့် အလုံးအသေး၊ အလတ်၊ အကြီး အရွယ်အစားပေါ်မူတည်၍ စက်တင်ဘာလဒုတိယအပတ် တွင် တစ်ပိဿာ ၇၀၀၀ ကျပ် မှ ၇၅၀၀ ကျပ် ထိရှိပြီး ယခုစက်တင်ဘာလ တတိယအပတ်တွင် တစ်ပိဿာ ၄၅၀၀ ကျပ် မှ ၅၀၀၀ ကျပ်ထိသာ ရှိပြိး တစ်ပိဿာလျှင် ဈေးနှုန်း ၂၀၀၀ကျပ်ခန့် ကျဆင်းသွားကြောင်းသိရပါသည်။ ဂေါ်ဖီဈေးနှုန်းအနေဖြင့် ယခင်စက်တင်ဘာလ ဒုတိယအပတ် တွင် တစ်ပိဿာလျှင် ၇၀၀၀ကျပ်မှ ယခုစက်တင်ဘာလ တတိယအပတ်တွင် တစ်ပိဿာလျှင် ၄၀၀၀ကျပ်သာရှိပြီး တစ်ပိဿာလျှင် ၃၀၀၀ကျပ်ခန့် ကျဆင်းသွားကြောင်း ရောင်းချသည့် ဈေးသည်များထံမှ သတင်းရရှိပါသည်။

DOCA(တနင်္သာရီ)

        မြင်းခြံမြို့နယ်သည်  ဟင်းသီးဟင်းရွက်မျိုးစုံနှင့် သစ်သီးဝလံများကိုစိုက်ပျိုးလျက်ရှိရာ မိုးရာသီကာလ၌ ခရမ်းချဉ်သီးပင်များ စိုက်ပျိုးဖြစ်ထွန်းမှုမရှိကြောင်း၊ ဒေသတွင်းစားသုံးရန်အတွက် ခရမ်းချဉ်သီးများကို ရှမ်းပြည်နယ်တောင်ပိုင်း အောင်းပန်းမြို့ရှိပွဲရုံများမှ မှာယူရောင်းချကြောင်း၊ ၂၀၂၅ ခုနှစ်၊ စက်တင်ဘာလဒုတိယပတ်တွင် ရောင်းချနေသော ခရမ်းချဉ်သီးအသေးတစ်ပိဿာလျှင် (၂၀၀၀) ကျပ်၊ ခရမ်းချဉ်သီးအလတ်တစ်ပိဿာလျှင် (၂၅၀၀) ကျပ်၊ ခရမ်းချဉ်သီးအကြီး တစ်ပိဿာ လျှင် (၃၀၀၀) ကျပ်ခန့် ပေါက်ဈေးများဖြင့် အရောင်းအဝယ်ဖြစ်လျက်ရှိကြောင်း၊ ယခင်လဩဂုတ်လ ဒုတိယပတ်တွင်ခရမ်းချဉ်သီးအသေးတစ်ပိဿာလျှင် (၁၈၀၀) ကျပ်၊ ခရမ်းချဉ်သီးအလတ် တစ်ပိဿာလျှင် (၂၂၀၀) ကျပ်၊ ခရမ်းချဉ်သီးအကြီး တစ်ပိဿာ လျှင် (၂၈၀၀) ကျပ်ခန့် ပေါက်ဈေး များဖြင့်အရောင်းအဝယ်ဖြစ်ခဲ့ကြောင်း၊ ကာလတူနှိုင်းယှဉ်ပါက ယခုလစက်တင်ဘာဒုတိယပတ်တွင် ခရမ်းချဉ်သီးတစ်ပိဿာလျှင် (၂၀၀-၃၀၀)ကျပ်ခန့်ဈေးနှုန်းအနည်းငယ်မြင့်တက်ခဲ့ကြောင်း၊ ရှမ်းတောင်တွင်မိုးများ၍ လမ်းခရီးနှောင့်နှေးကြန့်ကြာပြီး ကုန်အဝင်နည်းသောကြောင့် ဈေးနှုန်းအနည်းငယ်မြင့်တက်ခဲ့ကြောင်း၊ ခရမ်းချဉ်သီးသီးနှံသည် နေ့စဉ်ဟင်းလျာများတွင် ကြော်ချက်စားသုံးကြသောကြောင့် စားသုံးမှုများပြီး အရောင်းအဝယ်ကောင်းကြောင်း၊ နေ့စဉ်လက်လီလက်ကား ဝယ်ယူများသောကြောင့် နေ့စဉ်ကုန်ချိန်ပိဿာ (၁၀၀-၂၀၀) ပိဿာခန့်   ရောင်းချရကြောင်း ကုန်စိမ်းရောင်းချသူ၏ ပြောပြချက်အရ သိရှိရပါသည်။

DOCA(မန္တလေး)

           မြင်းခြံမြို့ရှိ အေးမြသီတာဈေးတွင် လူသုံးကုန်ပစ္စည်းအမျိုးမျိုး၊ ကုန်ခြောက်ပစ္စည်းအမျိုးမျိုးနှင့် အသားငါးမျိုးစုံများ ရောင်းချလျက်ရှိရာ ဈေးရောင်းသူဝယ်သူများဖြင့် စည်ကားလျက်ရှိကြောင်း၊ ၂၀၂၅ ခုနှစ်၊ စက်တင်ဘာလဒုတိယပတ်တွင် အသားငါးတန်းဈေးများ၌ ရောင်းချနေသော အမဲသား(အသားသန့်)တစ်ပိဿာလျှင် (၃၀၀၀၀) ကျပ်၊ အမဲသားပေါင်သားတစ်ပိဿာလျှင် (၂၇၀၀၀) ကျပ်၊ အသားအကြောပါတစ်ပိဿာလျှင် (၂၄၀၀၀)ကျပ်၊ အမဲသားအတိုအစ တစ်ပိဿာလျှင် (၂၀၀၀၀)ကျပ်၊ အမဲသားအသည်း တစ်ပိဿာ လျှင်  (၃၀၀၀၀) ကျပ်၊ အမဲဝမ်းတွင်းသားတစ်ပိဿာလျှင် (၂၀၀၀၀) ကျပ်၊ အမဲအူ တစ်ပိဿာလျှင် (၂၀၀၀၀)နှင့် အမဲရိုးတစ်ပိဿာလျှင် (၆၀၀၀) ကျပ်ပေါက်ဈေးများဖြင့် ရောင်းချလျက်ရှိကြောင်း၊ အမဲသားသည် အာဟာရပြည့်ဝပြီး လူကြိုက်များသောကြောင့် စားသုံးမှုများပြီး ဈေးကွက်တွင်အရောင်း အဝယ်သွက်လျက်ရှိကြောင်း၊ နေ့စဉ်အမဲသားအချိန်  (၃၀-၄၀) ပိဿာ ခန့်ရောင်းချရကြောင်း၊ ထမင်းဆိုင်များနှင့် ဟင်းချက်အရောင်းဆိုင်များမှလည်း နေ့စဉ်ဝယ်ယူမှုရှိကြောင်း၊ ပရိုတင်းဓာတ် ကြွယ်ဝသောကြောင့် စားသုံးမှုများ၍အရောင်းအဝယ်ကောင်းကြောင်း အမဲသားရောင်းချသူတစ်ဦး၏ ပြောပြချက်အရသိရှိရသည်။ အမဲသားသည် အသားတွေထဲမှာ စားလို့အကောင်းဆုံး အားအရှိဆုံးနှင့် ပရိုတင်းဓာတ်ကြွယ်ဝသောအသားဖြစ်ပြီး အားအင်ပြည့်စေဖို့ အကောင်းဆုံးအသားဖြစ်ကြောင်း သိရှိရပါသည်။

DOCA(မန္တလေး)

    စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်အနေဖြင့် ဒေသတွင်း စိုက်ပျိုးထွက်ရှိသည့် သီးနှံဈေးနှုန်းများ၊ ရာသီပေါ်အစားအစာများ၏ ဈေးနှုန်း၊ဈေးကွက်အခြေအနေ တို့အား ရေးသားတင်ပြလျက်ရှိရာ ယခုအခါ ကန့်ဘလူမြို့ပေါ်ရှိ ကုန်စုံဆိုင်များတွင်ရောင်းချလျက် ရှိသည့် ဒေသထွက်သောက်ရေအိုးများကို ကန့်ဘလူမြို့နယ်မှထွက်ရှိသလို ကျွန်းလှမြို့နယ်နှင့် တန့်ဆည်မြို့နယ်မှ ဝယ်ယူရောင်းချကြောင်း သိရသည်။

    ယခုအခါ ရေကိုအေးအောင် ရေခဲသေတ္ထာများ၊ Water Coolerများ အသုံးပြု ကြသော်လည်း မြန်မာလူမျိုးတို့သည် ရှေးယခင်ကတည်းက သောက်ရေအိုး(မြေအိုး)များကို အစဉ်အဆက်အသုံးပြု လာကြသည်မှာ ယနေ့ထိပင်ဖြစ်ကြောင်း၊ ကန့်ဘလူဒေသထွက် သောက်ရေအိုး (မြေအိုး)ဈေးနှုန်းမှာ အကြီး(၁)လုံးလျှင် (၆၀၀၀)ကျပ်၊ အလတ်(၁)လုံးလျှင် (၄၀၀၀)ကျပ်နှင့် အသေး (၁)လုံးလျှင် (၃၀၀၀)ကျပ်နှင့် ကျွန်းလှမြို့နယ်ထွက် သောက်ရေအိုး(မြေအိုး)(၁)လုံးလျှင် (၃၅၀၀မှ ၅၅၀၀)ကျပ် ဖြင့်ရောင်းချလျက်ရှိကြောင်း၊ သောက်ရေအိုး(မြေအိုး)တွင် ထည့်ထားသည့်ရေသည် သဘာဝ အတိုင်း အအေးဓာတ်ကိုပေးသည့်အတွက် ကျန်းမာရေးနှင့် ပိုမိုညီညွတ်သည့်အတွက် ယခုတိုင် အသုံးပြုလျက်ရှိကာ ပုံမှန်အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)