ပဲခူးတိုင်းဒေသကြီး၊ ပြည်ခရိုင်အတွင်းရှိ မြို့သစ်ဈေးတွင် ငုံးသားများ ရောင်းချနေကြောင်း တွေ့ရသည်။ စားသုံးသူများက ငုံးဥများ စားသုံးခြင်းအပြင် ငုံးသားများကိုလည်း ချက်ပြုတ် စားသောက်ကြသည်။ ကမ္ဘာ့နာမည်ကြီး ဟင်းလျာများတွင် ငုံးဥသည် မပါမဖြစ် ပါဝင်ပစ္စည်း တစ်ခုဖြစ်ပြီး ငုံးသားမှာလည်း အလွန်နူးညံ့သောကြောင့် လူကြိုက်များလှသည်။မြန်မာနိုင်ငံသည် ကမ္ဘာပေါ်တွင် ဆဌမမြောက် ငုံးဥ အများဆုံးထုတ်လုပ်သည့် နိုင်ငံဖြစ်ကြောင်း သိရသည်။ ငုံးဥကို သရေစာအဖြစ် စားသုံးခြင်း၊ ဟင်းချက်ရာတွင် ထည့်ခြင်းများပြုလုပ်ပြီး ငုံးကင်နှင့် ငုံးကြော်များလည်း လူအများကြိုက်နှစ်သက်သော အစားအစာဖြစ်သည်။ ငုံးသားတွင် ဗီတာမင် B3 နှင့် B6 များကြွယ်ဝ စွာပါဝင်ကြောင်းသိရသည်။ ငုံးများကို မွေးမြူခြင်းဖြင့် အာဟာရပြည့်ဝသော အသား၊ ဥများရရှိ နိုင်သည့်အပြင် ငုံးချေးများကိုလည်း သဘာဝမြေဩဇာအဖြစ် အသုံးပြုနိုင်ကြောင်း သိရသည်။
၂၀၂၅ ခုနှစ်၊ ဒီဇင်ဘာလ၊ ဒုတိယပတ်တွင် ရောင်းချသော ငုံးဥဈေးနှုန်းများမှာ (၁)လုံးလျှင် (၁၀၀)ကျပ်၊ (၁၀)လုံးယူလျှင် (၉၀၀)ကျပ်နှင့်ရောင်းချပြီး ငုံးသားများမှာ တစ်ကောင်လျှင် (၂၀၀၀)ကျပ်ဖြင့်ရောင်းချကြောင်း သိရသည်။
DOCA(ပဲခူး)