သတင်းနှင့် လှုပ်ရှားမှုများ

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ပြည်တွင်းကုန်သွယ်မှုလုပ်ငန်းများဖွံ့ဖြိုးတိုးတက်ရေးနှင့် စားသုံးသူကာကွယ်ရေးဥပဒေပါ ပြဋ္ဌာန်းချက်များအား လုပ်ငန်းရှင်များအပါအဝင် စားသုံးသူပြည်သူများသိရှိနားလည်လိုက်နာစေရန်နှင့် နစ်နာဆုံးရှုံးမှုများကို အရေးဆိုတိုင်ကြားနိုင်ရန်အတွက် ကွင်းဆင်းတွေ့ဆုံမှုများ၊ အသိပညာပေးဟောပြောဆွေးနွေးမှုများကို စဉ်ဆက်မပြတ်ဆောင်ရွက်လျက်ရှိရာ (၆-၉-၂၀၂၄)ရက်နေ့၊ နေ့လယ် (၁၆:၃၀) နာရီအချိန်တွင် စားသုံးသူရေးရာဦးစီးဌာန၊ ညောင်ဦးခရိုင်ဦးစီးမှူးရုံးမှ ဦးသန်းစိုး(လက်ထောက်ညွှန်ကြားရေးမှူး) သည် စားသောက်ကုန်လုပ်ငန်းရှင်များအား ခရိုင်ဦးစီးမှူးရုံးအစည်းအဝေးခန်းမ၌တွေ့ဆုံ၍ အသိပညာပေးဟောပြောပွဲဆောင်ရွက်ခဲ့ပါသည်။

         အဆိုပါဟောပြောဆွေးနွေးမှုတွင် ဦးသန်းစိုး(လက်ထောက်ညွှန်ကြားရေးမှူး)က စားသုံးသူကာကွယ်ရေးဆိုသည်မှာ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ စားသုံးသူ၏အခွင့် အရေးနှင့် အကျိုးစီးပွားကိုကာကွယ်ပေးခြင်းနှင့် စားသုံးသူနှင့် စီးပွားရေးလုပ်ငန်းရှင်တို့ကြား ကော်မရှင်နှင့် ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှုရှိသော လုပ်ငန်း စဉ်ကိုဆိုလိုသည့်အတွက် စားသုံးသူများကိုကာကွယ်ပေးပြီး စီးပွားရေးလုပ်ငန်းရှင်များကို ဖိနှိပ်ခြင်းမျိုးမဟုတ်ဘဲ စားသုံးသူများကို အပြည့်အဝကာကွယ်ပေးပြီး တဖက်မှလည်း စီးပွားရေးလုပ်ငန်းရှင်များ၏ ထုတ်လုပ်သည့်ကုန်ပစ္စည်းများ အရည်အသွေးပြည့်ဝကောင်းမွန်၍ ပြည်တွင်းဈေးကွက်တွင်သာမက ပြည်ပဈေးကွက်ထိ ထိုးဖောက်ရောင်းချနိုင်စေရန် တွန်းအားတစ်ခုဖြစ်ပြီး လုပ်ငန်းများဖွံ့ဖြိုးတိုးတက်ကာ လုပ်ငန်းရှင်များလည်း အကျိုးစီးပွားဖြစ်ထွန်းလာစေနိုင်ကြောင်းနှင့် စားသုံးသူပြည်သူများမှာလည်း လုံခြုံစိတ်ချရမှုနှင့်အာမခံချက်ပေးနိုင်သော ကုန်စည်များကို စားသောက်သုံးစွဲလာရသဖြင့် ထိခိုက်နစ်နာဆုံးရှုံးမှုများနည်းပါးလာကာ လူမှုဘဝများသာယာလာမည်ဖြစ်ပါကြောင်း၊ သို့ဖြစ်၍ စားသုံးသူကာကွယ်ရေးဥပဒေပါ ပြဋ္ဌာန်းချက် များကို လုပ်ငန်းရှင်များအနေဖြင့် နားလည်သဘောပေါက်ပြီး လိုက်နာဆောင်ရွက်ကြရန်နှင့် စားသုံးသူအား စိတ်စေတနာအပြည့်အဝထားရန်လိုအပ်ကြောင်း၊ ကုန်စည်နှင့်ဝန်ဆောင်မှုများနှင့်ပတ်သက်၍ စီးပွားရေးလုပ်ငန်းရှင်များ သိသင့်သိထိုက်သည့်အကြောင်းအရာများ၊ ကုန်အညွှန်းအမှတ်အသားဖော်ပြပါရှိရမည့် အချက်များအား ရှင်းလင်းဆွေးနွေးဟောပြောခဲ့ကြောင်းနှင့် ဟောပြောဆွေးနွေးပွဲသို့ ညောင်ဦးမြို့နယ်အတွင်းရှိ စားသောက်ဆိုင်လုပ်ငန်းရှင်များ၊ လက်ဖက်ရည်ဆိုင်လုပ်ငန်းရှင်များ၊ ပဲကြော်လုပ်ငန်းရှင်များ၊ အာလူးကြော်လုပ်ငန်းရှင်များ၊ ကိတ်မုန့်ပေါင်မုန့်လုပ်ငန်းရှင်များ၊ လက်ဖက်ပဲကြမ်းလုပ်ငန်းရှင်များ၊ စုစုပေါင်း( ၇၀ )ဦးတက်ရောက်ခဲ့ကြောင်းသိရှိရပါသည်။

DOCA(မန္တလေး)

         စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးအစည်းအဝေးခန်းမ၌  ၁၂-၉-၂၀၂၄ ရက်နေ့၊ နေ့လယ် (၁၄း၀၀) နာရီအချိန်တွင် ခေတ္တတိုင်းဒေသကြီးဦးစီးမှူးသည်   Monkeypox မျောက်ကျောက်ရောဂါသိကောင်းစရာနှင့် ရောဂါကာကွယ်ထိန်းချုပ်ရေး၊ ကုသရေးလုပ်ငန်းစဉ်များနှင့် ဆောင်ရွက်ထားရှိမှုများအကြောင်းကို ရှင်းလင်းဆွေးနွေးခဲ့ရာ အရာထမ်းများ၊ အမှုထမ်းများ၊ စုစုပေါင်း ( ၄၀ ) ဦးတက်ရောက်ခဲ့ကြောင်းသိရပါသည်။

          အဆိုပါအခမ်းအနားတွင် ခေတ္တတိုင်းဒေသကြီးဦးစီးမှူး ဒေါ်ရီလင်းထွဋ်က ဝန်ထမ်းများအား  မျောက်ကျောက်ရောဂါနှင့်ပတ်သက်၍ ရှင်းလင်းဆွေးနွေးခဲ့ရာ မျောက်ကျောက်ရောဂါသည် ဗိုင်းရပ်စ်ပိုးကြောင့်ဖြစ်ပွားသည့် ကူးစက်ရောဂါတစ်မျိုးဖြစ်ကြောင်း၊ မျောက်မှလူသို့ ကူးစက်မှုကို စတင်တွေ့ ရှိခဲ့ကြောင်းနှင့် မျောက်ကျောက်ရောဂါဖြစ်ပွားမှုရောဂါကူးစက်နည်းလမ်းများ၊ ရောဂါကူးစက်ခံရနိုင် ဘွယ်အခွင့်အလမ်းများသူများ၊ မျောက်ကျောက်ရောဂါဖြစ်ပွားခြင်းမှ ကာကွယ်နိုင်သောနည်းလမ်းများ၊ မျောက်ကျောက်ရောဂါလက္ခဏာများ၊ မျောက်ကျောက်ရောဂါကြောင့် သေဆုံးနိုင်မှုနှင့် ရောဂါကုသခြင်းအကြောင်းများ၊ ရောဂါကာကွယ်ထိန်းချုပ်ရေးနှင့် ကုသရေးလုပ်ငန်းစဉ်များအကြောင်းကို ရှင်းလင်းဆွေးနွေးခဲ့ပါသည်။

         ဆက်လက်၍ စစ်ကိုင်းတိုင်းဒေသကြီးမှ မျောက်ကျောက်ရောဂါကာကွယ်ထိန်းချုပ်ရေးနှင့် ကုသရေးဆောင်ရွက်ထားရှိမှုမှာ   ဒေသအာဏာပိုင်များနှင့် ဌာနဆိုင်ရာများအား အသိပေးဆွေးနွေးခြင်း၊  ပြည်သူလူထုအတွင်း ရောဂါကာကွယ်ရေးနည်းလမ်းများအး ကျန်းမာရေးအသိပညာပေးခြင်း၊ ရောဂါစောင့်ကြပ်ကြည့်ရှု့ခြင်း (အပြည်ပြည်ဆိုင်ရာလေဆိပ်၊ ဆိပ်ကမ်းနှင့်နယ်စပ်ဝင်/ ထွက်ပေါက်များ)နှင့် တုံ့ပြန်ဆောင်ရွက်ခြင်းတို့ကိုမြှင့်တင်လုပ်ဆောင်ခြင်း၊ ဝန်ကြီးဌာနများနှင့်ပူးပေါင်းဆောင်ရွက်ခြင်း၊ ဆေးရုံဆေးခန်းများတွင် သီးခြားလူနာဆောင်များ ပြင်ဆင်ထားရှိခြင်းနှင့် ရောဂါပိုးထိန်းချုပ်ရေးလုပ်ငန်းရပ်များကို စနစ်တကျလိုက်နာဆောင်ရွက်ခြင်း၊ လိုအပ်သောဆေးနှင့် ရောဂါကာကွယ်ရေးပစ္စည်းများစုဆောင်းပြင်ဆင်ထားရှိခြင်း၊ မိတ်ဖက်အဖွဲ့အစည်း/ လူမူရေးအသင်းများနှင် စည်းရုံးပူးပေါင်းဆောင်ရွက်ခြင်း၊ အချိန်နှင့်တပြေးညီ သတင်းပေးပို့ခြင်း၊ ရောဂါကာကွယ်ရေးနှင့် ကုသရေးလုပ်ငန်းများကို အဆင့်ဆင့်ကြီးကြပ်ခြင်းဆောင်ရွက်ထားလျက်ရှိကြောင်းသိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးမှမုံရွာမြို့နယ်တာဝန်ခံ ဒေါ်စန်းစန်းဝေသည် (၁၁-၉-၂၀၂၄) ရက်နေ့၊ နံနက် (၁၀:၀၀) နာရီအချိန်တွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြု (Community Center) ခန်းမ၌ အွန်လိုင်းစနစ်ဖြင့်ရောင်းချခြင်း (Online Sale) လုပ်ငန်းများ မှတ်ပုံတင်လက်မှတ်လျှောက်ထားခြင်းနှင့်ပတ်သက်၍ သိကောင်းစရာများကို အသိပညာပေး Talk Show ကျင်းပပြုလုပ်ခဲ့ကြပါသည်။

        စားသုံးသူရေးရာဦးစီးဌာန၊ မုံရွာမြို့နယ်တာဝန်ခံ ဒေါ်စန်းစန်းဝေက အွန်လိုင်းစနစ်ဖြင့် ရောင်းချခြင်းလုပ်ငန်းကို အရေးကြီးဝန်ဆောင်မှုလုပ်ငန်းအဖြစ် သတ်မှတ်သည့်အမိန့်အကြောင်း၊ ကုန်စည်/ဝန်ဆောင်မှုကို Online ဖြင့် အရောင်းအဝယ်လုပ်ငန်းလုပ်ကိုင်နေကြသူမည်သူမဆို အွန်လိုင်းစနစ်ဖြင့်ရောင်းချခြင်းလုပ်ငန်းကို မှတ်ပုံတင်လက်မှတ်လျှောက်ထားရရှိပြီးမှသာ လုပ်ကိုင်ရမည်ဖြစ်ကြောင်း၊ အွန်လိုင်းစနစ်ဖြင့်ရောင်းချခြင်းလုပ်ငန်းကို ဆောင်ရွက်လိုသူများအနေဖြင့် စီးပွားရေးနှင့်ကူးသန်းရောင်းဝယ်ရေးဦးစီးဌာန၊ ကုန်သွယ်ရေးဦးစီးဌာနက သတ်မှတ်ထားသော လျှောက်လွှာပုံစံများတွင်ဖြည့်သွင်းပြီး အွန်လိုင်းစနစ်နှင့် ဦးစီးဌာနသို့ လျှောက်ထားရမည်ဖြစ်ကြောင်း၊  Online မှတ်ပုံတင်လျှောက်ထားရာတွင် အမျိုးအစား (၂) မျိုးရှိပြီး မှတ်ပုံတင်လျှောက်ထားလျှင် ပေးသွင်းရမည့်မှတ်ပုံတင်ကြေးများ၊ သက်တမ်းတိုးကြေးများ၊ ပြင်ဆင်ချက်တစ်ချက်ပြင်ဆင်လိုလျှင် သတ်မှတ်ထားသည့်ပြင်ဆင်ကြေးများအကြောင်း၊ မှတ်ပုံတင်လက်မှတ်ရရှိပြီး ရောင်းချသူများအနေဖြင့် ရရှိနိုင်သည့်အခွင့်အရေးများအကြောင်းကို    ဆွေးနွေးပြောကြားခဲ့ကြောင်းသိရှိရပါသည်။

DOCA(စစ်ကိုင်း)

       စားသုံးသူရေးရာဦးစီးဌာန၊ ပဲခူးတိုင်းဒေသကြီး၊ သာယာဝတီခရိုင်ဦးစီးမှူးရုံးရှိ ခရိုင်ဦးစီးမှူး၊ ထုတ်ကုန်လုံခြုံစိတ်ချရမှုဌာနခွဲတာဝန်ခံ၊ စားသုံးသူရေးရာဌာနခွဲတာဝန်ခံနှင့် ဝန်ထမ်းများသည် (၉-၉-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် မင်းလှမြို့အတွင်းရှိ အခြေခံလူသုံးကုန်ပစ္စည်းများနှင့် အိမ်သုံးဆေးဝါးများပြတ်လပ်မှုရှိ/မရှိ ကွင်းဆင်းစစ်ဆေးခြင်းပြုလုပ်ဆောင်ရွက်ခဲ့ကြောင်းသိရှိရသည်။

     ထိုသို့ကွင်းဆင်းဆောင်ရွက်ရာတွင် လူသုံးကုန်ပစ္စည်းများဖြစ်သော သွားတိုက်ဆေး၊ ကိုယ်တိုက်ဆပ်ပြာ၊ ဆပ်ပြာအမျိုးမျိုး၊ တစ်ကိုယ်ရည်သုံးသန့်ရှင်းရေးပစ္စည်းများ၊ အခြေခံစားသောက်ကုန် (၁၄)မျိုးဖြစ်သော ဆန်၊ ဆီ၊ ငရုတ်၊ ကြက်သွန်၊ အသားငါး၊ ကြက်ဥ၊ ဘဲဥ၊ ကုလားပဲ၊ အာလူး၊ အိမ်သုံးဆေးဝါးများဖြစ်သော အဖျားပျောက်ဆေး၊ နှာစေးပျောက်ဆေး၊ ပိုးသတ်ဆေး၊ အစာအိမ်ဆေး၊ ဓာတ်ဆား၊ လိမ်းဆေးအမျိုးမျိုးရောင်းချသော စတိုးဆိုင်များနှင့် အိမ်သုံးဆေးဝါးဆိုင်များသို့ သွားရောက်ကွင်းဆင်းကာ ပစ္စည်းများပြတ်လပ်မှုရှိ/ မရှိစစ်ဆေးရာ ပြတ်လပ်မှုမရှိကြောင်းနှင့် ပုံမှန်အတိုင်း အ‌ရောင်းအဝယ်ဖြစ်နေကြောင်းသိရှိရပါသည်။

DOCA(ပဲခူး)

    မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူးနှင့်ဝန်ထမ်းများသည် ဦးစားပေးကုန်စည်(၁၀)မျိုးမှ အမှတ်စဉ်(၅)ဖြစ်သည့် (၁၀)ဂရမ်အထက်ရှိ အလှကုန်ပစ္စည်းအမျိုးမျိုးအား ကုန်အညွှန်းအမှတ်အသား ပြီးပြည့်စုံပြီး ဘေးန္တရာယ်ကင်းရှင်းစေရန် ရည်ရွယ်၍ (၁၁.၉.၂၀၂၄) ရက်နေ့၊ နံနက် (၁၁:၃၀)အချိန်တွင်ပခုက္ကူမြို့၊အမှတ်(၁၂)ရပ်ကွက်၊ မြို့မလမ်းပေါ် အလှကုန်ဆိုင်(၂)ဆိုင်သို့ စားသုံးသူရေးရာဦးစီးဌာန၊ အစားအသောက်နှင့်ဆေးဝါးကွပ်ကဲရေးဦးစီးဌာန၊ ကျန်းမာရေးဦးစီး ဌာန၊ စည်ပင်သာယာရေးအဖွဲ့တို့နှင့် ပူးပေါင်း၍ ဈေးကွက်စောင့်ကြည့်စစ်ဆေး ခဲ့ကြောင်း သိရသည်။

    အလှကုန်စတိုးဆိုင်မှ လုပ်ငန်းရှင်များအား ကုန်အညွှန်းအမှတ်အသားများ ပြည့်စုံစွာပါရှိသည့် ကုန်စည်များကိုသာရောင်းချရန်၊ (၁၀)ဂရမ်အထက်ရှိ အလှကုန်ပစ္စည်းအမျိုးမျိုး၌ မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့်ညွှန်ကြားချက်အမှတ်(၂/၂၀၁၉)နှင့်အညီ ပြည့်စုံစွာ ဖော်ထားရှိသော ကုန်စည်များကိုသာရောင်းချရန်နှင့် သက်တမ်းလွန်ပစ္စည်းများကို ရောင်းချခြင်းမပြုရန် အသိပညာပေးဆွေးနွေးခဲ့ကြောင်း သိရှိရသည်။

DOCA(မကွေး)