သတင်းနှင့် လှုပ်ရှားမှုများ

          စားသုံးသူပြည်သူများအား ထုတ်ကုန်လုံခြုံစိတ်ချရမှုရှိစေရေး၊ ဘေးအန္တရာယ်ရှိသော ကုန်စည်များ ဈေးကွက်အတွင်းမှ ပပျောက်စေရေးနှင့် စားသုံးသူကာကွယ်ရေးဥပဒေပြဌာန်းချက်ပါ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖေါ်ပြထားမှုအခြေအနေတို့နှင့်စပ်လျဉ်း၍ သက်ဆိုင်ရာမိတ်ဖက်ဌာနများနှင့်ပူးပေါင်း၍ ဈေးကွက်စောင့်ကြည့်စစ်ဆေးခြင်း လုပ်ငန်းများ ဆောင်ရွက်လျက်ရှိရာ ၂၀၂၄ ခုနှစ်၊ ဇွန်လ (၁)ရက်နေ့မှ (၁၅)ရက်နေ့အတွင်းတွင် ပြည်ခရိုင်၊ ပြည်မြို့၊ မြို့မဈေးကုန်စုံဆိုင်များနှင့် မြို့သစ်ဈေးရှိကုန်စုံဆိုင်များသို့ စားသုံးဆီအမျိုးမျိုး ကိုလည်းကောင်း၊ ရွှေတောင်မြို့တွင် မြို့မဈေးရှိကုန်စုံဆိုင်များသို့ စားသုံးဆီအမျိုးမျိုးကို လည်းကောင်း၊ ပန်းတောင်းမြို့ နတ်မောက်ကျေးရွာရှိကုန်စုံဆိုင်များ၊ မြို့ပေါ်ကုန်စုံဆိုင်များ၊ ဆင်တဲရွာကုန်စုံဆိုင်များ၊ ပန်းတောင်းမြို့မဈေးကုန်စုံဆိုင်များသို့ စားသုံးဆီအမျိုးမျိုးကို လည်းကောင်း၊  ပေါက်ခေါင်းမြို့တွင် အမှတ်(၁/၂)ရပ်ကွက်ရှိ ကုန်စုံဆိုင်များသို့ ကလေးအသုံး အဆောင် အမျိုးမျိုးကိုလည်းကောင်း ဈေးကွက်စောင့်ကြည့်စစ်ဆေးခြင်းများကို သက်ဆိုင်ရာ မြို့နယ်တာဝန်ခံနှင့်ဝန်ထမ်းများသည် သွားရောက်၍ ကုန်အညွှန်းအမှတ်အသားပါ သတ်မှတ်ချက်များနှင့် ကိုက်ညီမှုရှိသော ကုန်စည်များကို တင်သွင်းရောင်းချခြင်း ရှိ/မရှိ ၊ သက်ဆိုင်ရာဌာန၏ ထောက်ခံမှုရှိ/မရှိ ဈေးကွက်စောင့်ကြည့်စစ်ဆေးခဲ့ပါကြောင်းနှင့် စောင့်ကြည့်စစ်ဆေးခဲ့သည့် ကုန်စည်များတွင် ကုန်အညွှန်းအမှတ်အသားဖေါ်ပြချက်များနှင့် ကိုက်ညီမှုရှိပါကြောင်း သတင်းရရှိပါသည်။

DOCA(ပဲခူး)

           ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်ရှိ အ.မ.က ကူကြီးကျောင်းတွင် (၁၇.၆.၂၀၂၄)ရက်နေ့ နံနက် (၉:၀၀) မှ (၁၁:၃၀)အထိ စားသုံးသူရေးရာဦးစီးဌာန၊ မြို့နယ်တာဝန်ခံ နှင့် ဝန်ထမ်းများအဖွဲ့သည် မိတ်ဖတ်ဌာနဆိုင်ရာများဖြစ်သော ပြန်ကြားရေးနှင့် ပြည်သူ့ဆက်ဆံရေး ဦးစီးဌာနမှ ဝန်ထမ်းများ၊ တိုင်းရင်းဆေးပညာဦးစီးဌာနမှ ဝန်ထမ်းများနှင့် ပူးပေါင်း၍ စားသုံးသူ အသိပညာပေးဟောပြောပွဲကျင်းပပြုလုပ်ခဲ့ပါသည်။

          အဆိုပါ စားသုံးသူအသိပညာပေးဟောပြောပွဲတွင် ကျောင်းသား/ကျောင်းသူနှင့် ဆရာ/ ဆရာမ စုစုပေါင်း (၃၀)ဦးအား စားသုံးသူရေးရာဦးစီးဌာန၊ ရွှေတောင်မြို့နယ်တာဝန်ခံရုံးမှ ဒေါ်ဇင်မာချောစုကြည် (ဒု- ဦးစီးမှူး) မှ ကုန်အညွှန်းအမှတ်အသား(၈)ချက်တွင် ကုန်စည် အမျိုး အမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှု၊ အညွှန်း၊ သုံးစွဲပုံ နည်းလမ်းများအကြောင်းကိုဟောပြောခဲ့သလို ကျန်းမာရေးဆိုင်ရာ ဘေးထွက်ဆိုးကျိုး (သို့မဟုတ်) ဓါတ်မတည့်ကြောင်းဖော်ပြချက်နှင့် ကြိုတင်အသိပေးချက်အကြောင်းကို ဟောပြောခဲ့ပါသည်။ ထိုနောက် စားသုံးသူအခွင့်အရေး(၈)ချက် နှင့် လိုက်နာရမည့် တာဝန်(၄)ရပ် အားလည်း ဟောပြော ခဲ့ပါသည်။

DOCA(ပဲခူး)

              ပဲခူးတိုင်းဒေသကြီးအစိုးရအဖွဲ့ဝန်ကြီးချုပ်၏ လမ်းညွှန်ချက်အရ တောင်ငူခရိုင် ဆီကုန်သည်နှင့် ဆီလုပ်ငန်းရှင်များအသင်းသည် ဇွန်လ ၁၄ ရက်နေ့တွင် တောင်ငူမြို့ရှိ တက္ကသိုလ်၊ ကောလိပ်နှင့် သက်မွေးပညာကျောင်း ၆ ကျောင်းသို့  စားသုံးဆီများကို သက်သာသောဈေးနှုန်းဖြင့် သက်ဆိုင်ရာကျောင်းများသို့ အရောက် သွားရောက်ရောင်းချပေးပါသည်။

              တောင်ငူတက္ကသိုလ်၊ နည်းပညာတက္ကသိုလ်(တောင်ငူ)၊ ကွန်ပျူတာတက္ကသိုလ်(တောင်ငူ)၊ ပညာရေးဒီဂရီကောလိပ်(တောင်ငူ)၊ စက်မှုလက်မှုသိပ္ပံ(တောင်ငူ)နှင့် နည်းပညာအထက်တန်း ကျောင်း (တောင်ငူ) များရှိ ဝန်ထမ်းမိသားစုများအား  စားအုန်းဆီပိဿာ ၉၈၀ ကို လူတစ်ဦးလျှင် တစ်ပိဿာနှုန်း၊ တစ်ပိဿာလျှင် ၅၈၀၀ နှုန်းဖြင့် ရောင်းချပေးပါသည်။       

              တက္ကသိုလ်၊ ကောလိပ်နှင့် သက်မွေးပညာသင်ကျောင်းများသို့ စားသုံးဆီများကို အပတ်စဉ် ရောင်းချပေးလျက်ရှိကြောင်းနှင့် စားသုံးဆီများရောင်းချရာသို့ စားသုံးသူရေးရာဦးစီးဌာန၊ ခရိုင်ဦးစီးမှူး ဦးမျိုးအောင်နှင့် ဝန်ထမ်းများက ကြီးကြပ်ပြီး လိုအပ်သည်များကို ကူညီဆောင်ရွက် ပေးကြောင်း သိရပါသည်။

DOCA(ပဲခူး)

         ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူး၏ လမ်းညွှန်ချက်အရ စားသုံးသူများအားလုံးသည် ကုန်စည်နှင့်ဝန်ဆောင်မှုများ အသုံးပြုရာတွင် ဘေးအန္တရာယ် ကင်းရှင်းစွာသုံးစွဲနိုင်ရေးအတွက် ခရိုင်အတွင်းရှိ  ထုတ်လုပ်လျက်ရှိသော ကုန်စည်များနှင့်စပ်လျဉ်း၍ အာမခံချက်ပေးခြင်းနှင့် ကုန်အညွှန်းအမှတ်အသားများ ပြည့်စုံမှန်ကန်စွာဖေါ်ပြမှုရှိစေရေး ရည်ရွယ်၍ ဆောင်ရွက်လျက်ရှိရာ ပြည်ခရိုင်အတွင်း ၂၀၂၄ ခုနှစ်၊ ဇွန်လ (၁)ရက်နေ့မှ (၁၅)ရက်နေ့ အတွင်းပြည်မြို့၊ မြို့သစ်(၂)လမ်း(၃)ကွက်နေ ဒေါ်သင်းသင်းစိမ်း၏ ရွှေဖလား ဆန်ရောင်းဝယ်ရေး လုပ်ငန်းသို့လည်းကောင်း၊ မြောင်းဆုံအုပ်စု၊ စပါးထောင်းရွာနေ ဦးအောင်ဇော်မိုး၏ ဇမ္ဗူဇော် ဆန်စက်သို့လည်းကောင်း၊ ကသည်းဈေး၊ ဆံတော်ရပ်ကွက်နေ ဦးဖိုးထူး၏ရွှေဥဒေါင်း ဆန်ရောင်း ဝယ်ရေးသို့လည်းကောင်း၊ အောင်မင်္ဂလာဈေးအနီး ဦးဇော်လင်းအောင်၏ ရတနာပုံ ဆန်ရောင်း ဝယ်ရေးသို့လည်းကောင်း၊ ရွှေတောင်မြို့ ယွန်းတန်းရပ်ကွက် ပရိက္ခရာတန်းလမ်းနေ ဦးဝင်းလွင်၏ ရွှေတောင်ဆီစက်သို့လည်းကောင်း၊ ယွန်းတန်းရပ်ကွက် ကျောင်းကြီးလမ်းရှိ ဒေါ်သိင်္ဂီထွန်း၏ လပြည့် သောက်ရေသန့်လုပ်ငန်းသို့လည်းကောင်း၊ ပန်းတောင်းမြို့တွင် ဥသျှစ်ပင်ဒေသရှိ ဦးဘိုစံ၏ ဇူဇင်တိုးဆန်ရောင်းဝယ်ရေးနှင့် ဦးဝင်းဌေး၏ ပေါပြည့်ဝဆန်ရောင်းဝယ်ရေး လုပ်ငန်းသို့ လည်းကောင်း၊ ဆင်တဲရွာရှိ ဦးမျိုးခိုင်ဝင်း၏ မုဒိတာ အိမ်သုံးဆေးဆိုင်သို့လည်းကောင်း၊ ပေါက်ခေါင်းမြို့ ဘန့်ပြင်ကျေးရွာရှိ ဦးနေလင်းထွန်း၏ TOP ONE မြေပဲယို၊ နှမ်းယို၊ ကြံသကာယို လုပ်ငန်းသို့လည်းကောင်း၊ အမှတ်(၅)ရပ်ကွက်ရှိ ဦးချမ်းငြိမ်းအောင်၏ ရွှေစင်ကုန်စုံဆိုင်သို့ လည်းကောင်း သက်ဆိုင်ရာ မြို့နယ်တာဝန်ခံနှင့် ဝန်ထမ်းများသည် သွားရောက်၍ လုပ်ငန်းရှင်များ ဖြန့်ဖြူးရောင်းချလျက်ရှိသော ကုန်စည်များတွင် အရည်အသွေး၊ အလေးချိန်၊ အချိန်အတွယ်၊ ပမာဏနှင့် အမျိုးအစားများ မှန်ကန်စွာ ဖြန့်ဖြူးရောင်းချမှုရှိစေရေး၊ စီးပွားရေးကျင့်ဝတ်၊ စည်းကမ်း နှင့်အညီ ထုတ်လုပ်ရောင်းချမှုရှိစေရေး၊ ကုန်စည်အလိုက် ဖေါ်ပြရမည့် ကုန်အညွှန်းအမှတ်အသား များ ပြည့်စုံမှန်ကန်စွာဖေါ်ပြမှုရှိစေရေး လိုက်နာဆောင်ရွက်ကြရန်နှင့် နောက်ပိုင်းကာလများတွင် ကွင်းဆင်းစစ်ဆေးမှုများနှင့်အတူ အရေးယူဆောင်ရွက်မှုများ ပြုလုပ်ဆောင်ရွက်သွားမှာဖြစ်သည့်အတွက် စီးပွားရေးလုပ်ငန်းရှင်များအနေဖြင့် အထူးအလေးထား လိုက်နာဆောင်ရွက်ကြရန် ရှင်းလင်းဆွေးနွေးပြောကြားခဲ့ကြောင်း သတင်းရရှိပါသည်။

DOCA(ပဲခူး)

       စားသုံးသူရေးရာဦးစီးဌာန၊ တောင်ငူခရိုင်၊ ထန်းတပင်မြို့နယ်တာဝန်ခံ ဦးမြတ်သူသည် မြို့နယ်စည်ပင်သာယာရေးအဖွဲ့အမှုဆောင်အရာရှိ ဦးလှမြင့်၊ အထွေထွေအုပ်ချုပ်ရေးဦးစီးဌာနမှ ဒုတိယဦးစီးမှူး ဒေါ်နှင်းအေးဖြူ၊ မြို့နယ်ရဲတပ်ဖွဲ့မှူးရုံးမှ ဒုတိယရဲအုပ်သက်နောင်စိုးတို့နှင့်အတူ ဇွန်လ ၁၅ရက်နေ့ နံနက်ပိုင်းတွင် ထန်းတပင်မြို့ရှိ စားသုံးဆီရောင်းချသည့်ဆိုင်များသို့ ကွင်းဆင်းသွားရောက်ပြီး အမှတ်တံဆိပ်ပါစားသုံးဆီများရောင်းချရာတွင် ဥပဒေပါပြဋ္ဌာန်းချက်များ၊ အမိန့်၊ ညွှန်ကြားချက်များနှင့်အညီ ဆောင်ရွက်ရန် အသိပညာပေးခဲ့ပါသည်။

       စားသုံးသူရေးရာဦးစီးဌာန၊ မြို့နယ်တာဝန်ခံသည် ကုန်အညွှန်းအမှတ်အသားများကို ညွှန်ကြားချက်များနှင့်အညီဖော်ပြသော စားသုံးဆီများကိုသာရောင်းချရန်၊ ဟင်းသီးဟင်းရွက်ဆီများကို ရောနှောဆီအဖြစ် ရောစပ်ရာတွင် အမျိုးအစားနှစ်မျိုးသာရောစပ်ရန်၊ ရောစပ်ရာတွင် ဟင်းသီးဟင်းရွက်ဆီတစ်မျိုးသည် အနည်းဆုံး ၄၀ရာခိုင်နှုန်းဖြစ်ရန်၊ မည်သည့်အနံ့မျှ ထည့်သွင်းခြင်းမပြုရန်၊ တိရစ္ဆာန်အဆီနှင့် ဝါစေ့ဆီကြမ်းတို့ကို ရောနှောဆီအဖြစ်အသုံးမပြုရန်နှင့် ညွှန်ကြားချက်များကို တိကျစွာလိုက်နာဆောင်ရွက်ကြရန် အသိပညာပေးဆွေးနွေးခဲ့ပါသည်။

         စားသုံးဆီအမျိုးမျိုးသည် နေ့စဉ်စားသောက်မှုတွင် မပါမဖြစ် ထည့်သွင်းအသုံးပြုရသည့် အဓိကကုန်စည်ဖြစ်ခြင်းကြောင့်လည်းကောင်း၊ သတ်မှတ်ထားသည့် စံချိန်စံညွှန်းများနှင့်ကိုက်ညီမှုမရှိသော ဆီများကိုစားသုံးမိပါက စားသုံးသူကို ဘေးအန္တရာယ်ဖြစ်စေနိုင်ခြင်းကြောင့်လည်းကောင်း၊ စီးပွားရေးလုပ်ငန်းရှင်များအနေဖြင့် မဖြစ်မနေဖော်ပြရန်လိုအပ်သည့် ကုန်အညွှန်းအမှတ်အသားဆိုင်ရာအချက်များကို ဖော်ပြခြင်းမပြုပါက စားသုံးသူများအတွက် ယင်းတို့၏လိုအပ်ချက်နှင့်ကိုက်ညီသည့် စားသုံးဆီများကိုရွေးချယ်ဝယ်ယူရန် အခက်အခဲဖြစ်နိုင်ခြင်းကြောင့်လည်းကောင်း စားသုံးဆီများကို အထူးဦးစားပေးစစ်ဆေးဆောင်ရွက်ရန်လိုအပ်လျက်ရှိကြောင်း ပြောကြားခဲ့မှုကိုသိရှိရပါသည်။

DOCA(ပဲခူး)