သတင်းနှင့် လှုပ်ရှားမှုများ

   ရှမ်းပြည်နယ်(မြောက်ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဝန်ထမ်းများသည် ၂၀၂၄ ခုနှစ်၊ ဇွန်လ(၂၀)ရက်နေ့ နံနက်(၁၀:၀၀)နာရီအချိန်တွင် လားရှိုးမြို့၊ အမှတ်(၃)အခြေခံပညာအထက်တန်းကျောင်း၌ ဆရာ/ ဆရာမများ၊ ကျောင်းသား/ ကျောင်းသူများနှင့် မုန့်ဈေးတန်းရောင်းချနေသည့် ဆိုင်ပိုင်ရှင်များအား ပြည်သူ့ကျန်းမာရေးဦးစီးဌာန၊ ကျောင်းကျန်းမာရေးနှင့်ပူးပေါင်း၍ စားသုံးသူကာကွယ်ရေးဥပဒေအကြောင်း သိကောင်းစရာများနှင့် ပတ်သက်၍ အသိပညာပေးဟောပြောဆွေးနွေးပွဲ ကျင်းပပြုလုပ်ခဲ့ကြောင်းသိရှိရပါသည်။

    ဟောပြောပွဲ၌ စားသုံးသူရေးရာဦးစီးဌာန၊ ဒုတိယပြည်နယ်ဦးစီမှူးရုံး၊ လားရှိုးမြို့မှဒေါ်ခင်မာကြည်(ဦးစီးအရာရှိ)က ဆရာ/ ဆရာမနှင့်ကျောင်းသား/ ကျောင်းသူစုစုပေါင်း(၄၉၁)ဦးအား စားသုံးသူကာကွယ်ရေးဥပဒေပါ စားသုံးသူအခွင့်အရေးများနှင့် တာဝန်များ၊ ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍  ကုန်ပစ္စည်းများဝယ်ယူရာတွင်  ရွေးချယ်ဝယ်ယူရန်နှင့် ကုန်စည် (သို့မဟုတ်) ဝန်ဆောင်မှုကိုအသုံးပြုခြင်းကြောင့်ဖြစ်ပေါ်လာသည့် နစ်နာဆုံးရှုံးမှုများရှိပါကတိုင်ကြားနိုင်ခွင့်၊ တရားစွဲဆိုပိုင်ခွင့်များအကြောင်းကို ဟောပြောဆွေးနွေးခဲ့ပြီး၊ ပြည်သူ့ကျန်းမာရေးဦးစီးဌာန၊ ကျောင်းကျန်းမာရေးဌာနမှ  သွေးလွန်တုပ်ကွေးအကြောင်းသိကောင်းစရာများကို အသိပညာပေးဆွေးနွေးခဲ့ကြောင်း သိရှိရပါသည်။

     ဆက်လက်၍ အမှတ်(၃) အခြေခံပညာအထက်တန်းကျောင်းရှိ  ကျောင်းမုန့်ဈေးတန်းအား ကွင်းဆင်းစစ်ဆေးရာတွင် မုန့်ဈေးတန်းအတွင်းရောင်းချနေသောအချိုရည်များ၊ မုန့်များ၌ ကုန်ညွှန်းအမှတ်အသားများ ပြည့်စုံမှန်ကန်စွာဖော်ပြပါဝင်မှု ရှိ/ မရှိ၊ တာရှည်ခံဆေးဝါးများနှင့် ခွင့်မပြုဆိုးဆေးများပါရှိမှုများ ရှိ/ မရှိ စစ်ဆေးခဲ့ကြောင်း  သိရှိရပါသည်။

DOCA(ရှမ်း)

          စားသုံးသူရေးရာဦးစီးဌာန၊ ရန်ကုန်မြောက်ပိုင်းခရိုင်ဦးစီးမှူးရုံးမှ ဦးအောင်တင်စိုး၊ လက်ထောက်ညွှန်ကြားရေးမှူး၊ ဦးရဲထွန်းအောင် (မြို့နယ်အုပ်ချုပ်ရေးမှူး)၊ ဗိုလ်မှူးစိုးစိုးနိုင် (အဖွဲ့ဝင်-၁)၊ ဦးဇော်မင်းထွန်း(အမှုဆောင်အရာရှိ)၊ ဦးမျိုးကျော်ဆန်း(တွဲဖက်အတွင်းရေးမှူး)၊ ဦးမင်းဇော်ထွန်း(ဒုဦးစီးမှူး)၊ ဦးဝေဖြိုးကျော်(ဈေးတာဝန်ခံ)၊ ဦးထိန်ဝင်း မြို့မဈေးသာယာရေး အကျိုးဆောင်(ဥက္ကဌ)နှင့် ဦးပြည့်ဖြိုးနိုင်(ဆီဖြန့်ဖြူးရေးကိုယ်စားလှယ်)တို့ ပူးပေါင်းအဖွဲ့သည် ၁၆.၆.၂၀၂၄ ရက်နေ့တွင် လှည်းကူးခရိုင်၊ လှည်းကူးမြို့မဈေးအတွင်းရှိ စားသုံးဆီဆိုင်များသို့ သွားရောက်၍ ကွင်းဆင်းစစ်ဆေးခြင်းနှင့် လက်လီ ရောင်းချနေသော ဆီဆိုင်များအား ဈေးတာဝန်ခံရုံးသို့ ဖိတ်ကြား၍ အသိပညာပေးဆွေးနွေးခြင်းများဆောင်ရွက်ခဲ့ပါသည်။

          ထိုသို့ဟောပြောဆွေးနွေးရာတွင် လှည်းကူးမြို့မဈေးသို့ ဆီလုံလုံလောက်လောက်ဖြန့်ဖြူးထားကြောင်း၊ မိမိတို့ရရှိသည့်အရေအတွက်အား လူတစ်ဦးအနည်းဆုံး(၅၀)ကျပ်သား ရောင်းချပေးရန် လိုအပ်ကြောင်း၊ ဆီကိုချန်မထားဘဲ ရောင်းချပေးရမှာဖြစ်ကြောင်း၊ ဈေးနှုန်းမြှင့်တင် ရောင်းချခြင်း မပြုရန် လိုအပ်ကြောင်း၊ ယခင်ကဈေးမြှင့်ရောင်းချ၍ အရေးကြီးကုန်စည်နှင့် ဝန်ဆောင်ဥပဒေအရ အရေးယူခဲ့ရသည့်ဖြစ်စဉ်ရှိခဲ့ကြောင်း၊ ဈေးအတွင်းအုပ်စုလိုက် လှည့်၍ အပြန်အပြန်အလှန်လှန် ဝယ်ယူနေမှုများအား ဈေးတာဝန်ခံ၊ ဈေးသာယာလှပရေး အကျိုးဆောင် အဖွဲ့နှင့် ဆိုင်ရှင်များ ပူးပေါင်း၍ လိုအပ်သလောက်သာ ရောင်းချပေးနိုင်ရေး ကြီးကြပ်ဆောင်ရွက် သွားရန် ဦးအောင်တင်စိုး လက်ထောက်ညွှန်ကြားရေးမှူးနှင့် မြို့နယ်အုပ်ချုပ်ရေးမှူးတို့မှ အသိပညာပေးဆွေးနွေးခဲ့ပါသည်။ ဆက်လက်၍ လှည်းကူးမြို့နယ်သို့ ဆီဖြန့်ဖြူးရောင်းချပေးသည့်ကုမ္ပဏီ (၂)ခုမှ ဖြန့်ဖြူးသည့်ဆီကို ဦးပြည့်ဖြိုးနိုင်(ဆီကိုယ်စားလှယ်)မှ တာဝန်ယူဖြန့်ဖြူးပေးပါကြောင်း၊ မြို့မဈေးအတွင်းနှင့်ဈေးအပြင်တန်းဆိုင်အရေအတွက် စုစုပေါင်း (၇၀)ရှိ၍ ဈေးတွင်း/ဈေးပြင် ဆိုင်များကို ဦးသော်ဇင်စိုး(စိမ်းလန်း)မှတာဝန်ခံ၍ နေ့စဉ် တစ်ဆိုင်လျှင် (၂၀)ပိဿာဖြင့် နေ့စဉ် ဖြန့်ဖြူးပေးနေကြောင်း တွေ့ရှိရပါသည်။ ဆိုင်များမှလည်း လူတစ်ဦးအနည်းဆုံး (၅၀)ကျပ်သား ရောင်းချပေးပါကြောင်း၊ Venyl ချိတ်၍ ရောင်းချပေးပါကြောင်း ဆီချန်ထားခြင်းမရှိကြောင်း ကွင်းဆင်းစစ်ဆေး၍ တွေ့ရှိခဲ့ကြောင်းသိရှိရပါသည်။

DOCA(ရန်ကုန်)

          စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ မြောက်ပိုင်းခရိုင်ဦးစီးမှူးရုံးမှ ဦးဇော်မျိုးထွန်း၊ ဦးစီးမှူးပါ (၄)ဦး တို့သည် မင်္ဂလာဒုံမြို့နယ်ပြည်သူ့ကျန်းမာရေးဦးစီးဌာန၊ ဦးအောင်နိုင်မိုး၊ ဦးစီးအရာရှိ၊ ဝါယာလက် ဈေးမှ ဦးစိုးညွန့်၊ စည်းကမ်းထိန်းတို့နှင့်ပူးပေါင်း၍ ၁၇.၆.၂၀၂၄ ရက်နေ့ နံနက် (၁၁:၃၀)အချိန်တွင် မင်္ဂလာဒုံမြို့နယ်၊ ဝါယာလက်ဈေးအတွင်း စားသုံးဆီအမျိုးမျိုးတို့အား ဈေးကွက်စောင့်ကြည့် ကွင်းဆင်းစစ်ဆေးခြင်း ဆောင်ရွက်ခဲ့ပါသည်။

      ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူများဘေးအန္တရာယ်ကင်းရှင်းစေရေး အတွက် ကုန်အညွှန်းအမှတ်အသားပြည့်စုံစွာပါဝင်သည့် ကုန်ပစ္စည်းများကို ရောင်းချရန်နှင့် ကုန် အညွှန်းအမှတ်အသားများ ပြည့်စုံစွာမပါဝင်သော ကုန်ပစ္စည်းများ ရောင်းချခြင်းမရှိစေရေး၊ သက်တမ်းလွန်နေသော စားသောက်ကုန်များ၊ တရားမဝင်တင်သွင်းထားသော ကုန်စည်များ ဈေးကွက်အတွင်းရောင်းချမှုမရှိစေရေးတို့အတွက် စားသုံးသူကာကွယ်ရေးဥပဒေ (၂/၂၀၁၉)၊ အခန်း (၁၈)ပါ ကုန်အညွှန်းအမှတ်အသားဆိုင်ရာ ပြဌာန်းချက်များနှင့် လုပ်ငန်းရှင်များ လိုက်နာရမည့်တာဝန်များကို ရှင်းလင်းဆွေးနွေးကွင်းဆင်းစစ်ဆေးခဲ့ကြောင်းသိရှိရပါသည်။

DOCA(ရန်ကုန်)

     ဧရာဝတီတိုင်းဒေသကြီး၊စားသုံးသူရေးရာဦးစီးဌာန၊   အိမ်မဲမြို့နယ်တာဝန်ခံဒေါ်ဇင်မာသန်းသည်   (၁၇-၆-၂၀၂၄)ရက်နေ့(၁၅:၀၀)နာရီအချိန်တွင် ပြန်ကြားရေးနှင့်ပြည်သူ့ ဆက်ဆံရေးဦးစီးဌာနတို့နှင့်ပူးပေါင်းကာ စားသုံးသူပြည်သူများအား အိမ်မဲမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Centre ခန်းမတွင် စားသုံးသူအသိပညာပေး Talk  Show  ပြုလုပ်ခဲ့ပါသည်။

    ထိုသို့ပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ်ဦးစီးမှူးမှ  စားသုံးသူအသိပညာပေး Talk Show ပြုလုပ်ရခြင်း၏ရည်ရွယ်ချက်အားရှင်းလင်းပြောကြားပြီး၊ စားသုံးသူရေးရာဦးစီးဌာန မြို့နယ်တာဝန်ခံမှ ဌာန၏ မျှော်မှန်းချက်၊ ရည်မှန်းချက်များအား ရှင်းလင်းပြောကြားခဲ့ပြီး၊ စားသုံးသူကာကွယ်ရေးဥပဒေ အခန်း(၁၃)ပါဝန်ဆောင်နှင့် စပ်လျဉ်း၍ အာမခံချက်ပေးခြင်း၊ အချက်(၅)ချက် အခန်း(၁၄)ဝန်ဆောင်မှုလုပ်ငန်းများ၏ အာမခံချက်နှင့်စပ်လျဉ်း၍ စားသုံးသူက တောင်းဆိုနိုင်သည့် အခွင့်အရေး(၂)ချက်တို့အား အသေးစိတ်ရှင်းလင်းဆွေးနွေးဟောပြောခဲ့ပါသည်။ စီးပွားရေးလုပ်ငန်းရှင်များ အနေဖြင့် ဥပဒေတားမြစ်ချက်များအား လိုက်နာဆောင်ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များသိရှိလိုပါက မြို့နယ်စားသုံးသူတာဝန်ခံရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca.gov.mm website တွင် ဝင်ရောက်လေ့လာနိုင်ပါကြောင်း၊ စားသုံးသူများ နစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံ ဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေး ဆွေးနွေးခဲ့ကြောင်း သိရှိရပါသည်။

     DOCA(ဧရာဝတီ)

   ဖျာပုံခရိုင် ဒေးဒရဲမြို့နယ်၊ စားသုံးသူရေးရာဦးစီးဌာနရုံးတွင် ဆေးဝါးပစ္စည်းရောင်းချသည့်လုပ်ငန်းရှင် (၈) ဦးအား ၂၀၂၄ ခုနှစ်၊ ဇွန်လ (၁၉) ရက်နေ့၊ နေ့လည် (၁၃:၀၀)နာရီအချိန်တွင် အသိပညာပေး ဟောပြောခဲ့ပါသည်။

     အဆိုပါ အသိပညာပေးရာတွင် ဒု-ခရိုင်ဦးစီးမှူးဦးစိုးမင်းထိုက်မှ  ဆေးဝါးများအားသင့်တင့်မျှတသောဈေးနှုန်းဖြင့်ရောင်းချရန်နှင့် ကျန်းမာရေးဦးစီးဌာန(FDA) မှ ထုတ်ပြန်ထားသော သောက်သုံးရန်နှင့် သုံးစွဲရန်မသင့်သောဆေးဝါးများ ၊ သက်တမ်းလွန်ဆေးဝါးများရောင်းချခြင်းမပြုရန်၊ ကျန်းမာရေးဦးစီးဌာနတွင် မှတ်ပုံတင်ထားသောဆေးဝါးများကိုသာရောင်းချရန်အမိန့်နှင့်ညွှန်ကြားချက်များကို လိုက်နာဆောင်ရွက်ရန်  အသိပညာပေးဟောပြောခဲ့ကြောင်းသတင်းရရှိပါသည်။

DOCA(ဧရာဝတီ)