သတင်းနှင့် လှုပ်ရှားမှုများ

    ၁၅.၉.၂၀၂၅ ရက်နေ့တွင် မွန်ပြည်နယ်၊ ဘီးလင်းမြို့နယ်တွင် ရန်ကုန်မြို့၊ Kaung Hlyan New Asia ကုမ္ပဏီနှင့် Myat Ah Kan ကုမ္ပဏီတို့မှ မြို့နယ်အတွက် ခွဲတမ်းရရှိသော စားအုန်းဆီများအား ဘီးလင်းမြို့နယ် လက်လီကိုယ်စားလှယ်များထံသို့ (၁၂.၉.၂၀၂၅) ရက် နေ့တွင် ခွဲတမ်းရစားအုန်းဆီ (၄၄)ပေပါအား မော်တော်ယာဥ်များဖြင့် သယ်ဆောင်ရောက်ရှိခဲ့ပြီး (၁၃.၉.၂၀၂၅) ရက်နေ့မှ လက်လီကိုယ်စားလှယ်များမှ ဘီးလင်းမြို့နယ်အတွင်းရှိ ရပ်ကွက်နှင့် ကျေးရွာများတွင် ပြည်သူများသို့ စတင်ဖြန့်ဖြူးရောင်းချခဲ့သည်။

          ထိုသို့ စားအုန်းဆီများ ပြည်သူများထံသို့ ဖြန့်ဖြူးရောင်းချရာတွင် (၁၄.၉.၂၀၂၅) ရက်နေ့၊ ဘီးလင်းမြို့၊ ဘိုးရာဇာရပ်ကွက်၊ အခွန်လွတ်စျေး၌ စားသုံးသူပြည်သူများသို့ ရောင်းချနေရာသို့ ဘီးလင်းမြို့နယ် စားသုံးသူရေးရာဦးစီးဌာန၊ မြို့နယ်တာဝန်ခံနှင့်မြို့နယ်ရဲတပ်ဖွဲ့မှူး ခေါင်းဆောင်သော စားအုန်းဆီများအား သတ်မှတ်ရည်ညွှန်းစျေးအတိုင်း ရောင်းချခြင်း ရှိ/မရှိ ကွင်းဆင်းစစ်ဆေးရေးအဖွဲတို့သည်  လက်လီကိုယ်စားလှယ်တို့မှ သတ်မှတ်ရည်ညွှန်းစျေး အတိုင်း ရောင်းချခြင်း ရှိ/မရှိ၊ အလေးချိန် ပြည့်/မပြည့်၊ ဝယ်ယူစားသုံးသူပြည်သူများ ပွင့်လင်း မြင်သာမှုရှိစေရေးအတွက်  ရောင်းချသည့်ရက်စွဲ၊ ပိဿာချိန်၊ ရောင်းချသည့် စျေးနှုန်းနှင့် ရောင်းချသူ အမည်တို့ ပါဝင်သော ဗီနိုင်းချိတ်ဆွဲရောင်းချခြင်း ရှိ/မရှိတို့ကို ကြီးကြပ်စစ်ဆေးခဲ့ပြီး စားသုံးသူ ပြည်သူများမှ သက်သာသော စျေးနှုန်းဖြင့် စားအုန်းဆီများ ဝယ်ယူစားသုံးခွင့်ရသဖြင့် များစွာ အဆင်ပြေနေကြောင်းတို့ကို သိရှိရပါသည်။

DOCA (မွန်)

    ၁၂.၉.၂၀၂၅ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ မော်လမြိုင်ခရိုင် ဦးစီးမှူး၊ သတင်းအချက်အလက်နည်းပညာနှင့် အရည်အသွေးစီမံခန့်ခွဲမှုဌာနခွဲတာဝန်ခံနှင့် ‌မော်လမြိုင်မြို့နယ်တာဝန်ခံတို့သည် မော်လမြိုင်မြို့ရှိ နေသူရိန် တံဆိပ်ရိုက်လုပ်ငန်းအား မှတ်ပုံတင်ခြင်းနှင့်စပ်လျဉ်း၍ မြေပြင်ကွင်းဆင်းစစ်ဆေးခဲ့ကြောင်း သိရှိရသည်။

    ထို့သို့ ကွင်းဆင်းစစ်ဆေးခဲ့ရာ   အွန်လိုင်းစနစ်ဖြင့် ရောင်းချနေသော လုပ်ငန်းရှင်များသို့ မှတ်ပုံတင်လက်မှတ်လျှောက်ထားမှုနှင့် စပ်လျဉ်း၍ မြေပြင်ကွင်းဆင်း ဆောင်ရွက်ရာတွင် လျှောက်လွှာပုံစံတွင် ဖြည့်သွင်းထားသည့် လိပ်စာအတိုင်း လုပ်ငန်းအမှန်တကယ် တည်ရှိခြင်း ရှိ/ မရှိ၊ မှတ်ပုံတင်လက်မှတ်လျှောက်ထားစဉ်က ရောင်းချရန်တင်ပြထားသော ကုန်စည် (သို့)ဝန်ဆောင်မှု အမျိုးအစား စာရင်းအတိုင်း မြေပြင်တွင် အမှန်တကယ် ရောင်းချနေသော စာရင်းကိုက်ညီမှု ရှိ/ မရှိတို့ကို စစ်ဆေးခဲ့ကြောင်း သိရှိရပါသည်။

DOCA (မွန်)

     ၁၅.၉.၂၀၂၅ ရက်နေ့တွင် မွန်ပြည်နယ်၊ စားသုံးသူရေးရာဦးစီးဌာန၊ သထုံခရိုင်၊ ဘီးလင်းမြို့နယ်တာဝန်ခံ ဒေါ်ဇင်ဖြူဝင်းသည် မြို့နယ်စည်ပင်သာယာရေးအဖွဲ့နှင့် ပူးပေါင်း၍ ဘီးလင်းမြို့၊ ကန်သာယာရပ်ကွက်၊ နီလာဈေးအတွင်းရှိ ကုန်စုံဆိုင်များတွင် ရောင်းချနေသော အသင့်သောက်အချိုရည်အမျိုးမျိုးအား သွားရောက်၍ ဈေးကွက်စောင့်ကြည့်စစ်ဆေးခဲ့ကြောင်း သိရသည်။

       ထိုသို့ စစ်ဆေးမှုပြုလုပ်ခဲ့ရာတွင် စားသုံးသူများ ဘေးအန္တရာယ်ကင်းစေရေးအတွက် အသင့်သောက်အချိုရည်အမျိုးမျိုးတို့တွင် မြန်မာနိုင်ငံ စားသုံးသူကာကွယ်ရေးဥပဒေ ၂၀၁၉ အခန်း (၁၈) တွင် ပြဋ္ဌာန်းထားသည့်အတိုင်း ကုန်အညွှန်းအမှတ်အသားပြည့်စုံစွာ ဖော်ပြထားခြင်း ရှိ/မရှိ၊ သက်ဆိုင်ရာဌာနများ၏ ထောက်ခံချက် ပါ/မပါနှင့် တင်သွင်းသည့် ကုမ္ပဏီလိပ်စာများကို စစ်ဆေးပြီး ရောင်းချသူလုပ်ငန်းရှင်များအား ကုန်အညွှန်းအမှတ်အသား ပြည့်စုံသော ကုန်စည်များကိုသာလျှင် ရောင်းချရန်နှင့် ကုန်စည်များဝယ်ယူရောင်းချရာတွင် စားသုံးသူဘေးအန္တရာယ်ကင်းသည့် ကုန်စည်များကိုသာ ရောင်းချရန်အသိပညာပေးဆွေးနွေး ခဲ့ကြောင်း သိရှိရပါသည်။

DOCA (မွန်)

     မွန်ပြည်နယ်၊ မုဒုံမြို့နယ်တွင် ၂၀၂၅ ခုနှစ် တက္ကသိုလ်ဝင်စာမေးပွဲတွင် ထူးချွန်စွာအောင် မြင်သော ကျောင်းသား/သူများအား ပညာရည်ချွန်ဆုပေးပွဲ အခမ်းအနားကို ၁၄.၉.၂၀၂၅ ရက်နေ့၊နံနက် (၀၉း၀၀) နာရီက ရွှေဟင်္သာခန်းမ၌ ကျင်းပရာ မွန်ပြည်နယ်ဝန်ကြီးချုပ် ဦးအောင်ကြည် သိန်း၊ ပြည်နယ်အစိုးရအဖွဲ့ဝင် ဝန်ကြီးများ၊ ပြည်နယ်ဌာနဆိုင်ရာများနှင့် တာဝန်ရှိသူများ တက်ရောက်ခဲ့သည်။

     အခမ်းအနားကို ကျောင်းသား/ သူများက ပညာရည်ချွန် လူရည်မွန် တေးသီချင်းဖြင့် စတင်ဖွင့်လှစ်ခဲ့ပြီး ပြည်နယ်ဝန်ကြီးချုပ်က နိုင်ငံတော်အတွက် လိုအပ်နေသည့် အရည်အသွေး မြင့်မားသော အသိပညာရှင်၊ အတတ်ပညာရှင်များ၊ လူရည်ချွန်၊ လူရည်မွန်များ မွေးထုတ်ပေး နိုင်သည့် ဘက်စုံပညာရေးစနစ်ကို နိုင်ငံတော်က ထူထောင်ပေးထားပြီးဖြစ်တာနှင့်အညီ ဤပညာရေးစနစ် သက်ဝင်ရှင်သန်ဖွံ့ဖြိုးတိုးတက်လာစေရန် မိဘပြည်သူများ၊ ဆရာ/ဆရာမ များ၊ ကျောင်းသား/သူများ၊ ဒေသဆိုင်ရာအုပ်ချုပ်ရေး အဖွဲ့အစည်းများ၊ စေတနာရှင်ပြည်သူများ အားလုံး ဝိုင်းဝန်းပူးပေါင်းဆောင်ရွက်ပေးကြရန် အမှာစကားပြောကြားသည်။ ဆက်လက်၍ ၂၀၂၅ ခုနှစ် တက္ကသိုလ်ဝင်တန်းတွင် ထူးချွန်စွာအောင်မြင်ခဲ့သော ၆ ဘာသာဂုဏ်ထူးရှင် ၃ ဦး၊ ၅ ဘာသာဂုဏ်ထူးရှင် ၉ ဦး၊ ၄ ဘာသာဂုဏ်ထူးရှင် ၁၁ ဦး၊ ၃ ဘာသာဂုဏ်ထူးရှင် ၁၉ ဦး၊ ၂ ဘာသာ ဂုဏ်ထူးရှင် ၄၄ ဦး ၊ ၁ ဘာသာဂုဏ်ထူးရှင် ၇၀ ဦး၊ မြို့နယ်အတွင်း အောင်ချက် အကောင်းဆုံးကျောင်း (၁၁)ကျောင်းနှင့် အလှူရှင်များအား ပြည်နယ်ဝန်ကြီးချုပ်၊ ပြည်နယ် အစိုးရအဖွဲ့ဝင် ဝန်ကြီးများနှင့် တာဝန်ရှိသူများက ပညာရည်ချွန်ဆုနှင့် ဂုဏ်ပြုဆုများကို အသီးသီးချီးမြှင့်ပေးအပ်ခဲ့ပြီး ကျောင်းသား/ သူများက ဂီတဘာသာရပ်မှ ဆန်းနွေဦး သီချင်းဖြင့် ကပြခြင်းနှင့် ဘက်စုံ ပညာရည် ဒို့လှမ်းချီ သီချင်းဖြင့် သီဆိုဖျော်ဖြေပေးခဲ့ကြောင်း သိရသည်။

DOCA (မွန်)

        စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူးရုံးမှဦးစီးအရာရှိ၊ မြန်အောင်မြို့နယ်တာဝန်ခံ နှင့်ဝန်ထမ်းများသည် (၁၂.၉.၂၀၂၅)ရက်နေ့၊ နေ့လည်(၁၃:၀၀)အချိန်တွင် မြန်အောင်မြို့ သပြေကုန်း အုပ်စုရှိ အမှတ်(၂)၊ အမှတ်(၃)၊ အမှတ်(၄)နှင့် အမှတ်(၅)ရပ်ကွက်ရှိ ရပ်ကွက်နေ ပြည်သူများအား စားအုန်းဆီဝယ်ယူခွင့် စာအုပ်များဖြင့် ခွဲတမ်းရ စားအုန်းဆီကိုယ်စားလှယ်များမှတစ်ဆင့် ဆီဖြန့်ဖြူး ရောင်းချနေမှုများအား မြေပြင် ကွင်းဆင်း စစ်ဆေးခြင်းကို ဆောင်ရွက်ခဲ့ပါသည်။

          ထိုသို့ကွင်းဆင်းစစ်ဆေးခဲ့ရာ ဆီထုတ်လက်ကား ကိုယ်စားလှယ်များမှ တစ်ဆင့် ခွဲတမ်းရရှိသော ဆီများအား သပြေကုန်းအုပ်စုအတွင်းရှိ ရပ်ကွက်နေပြည်သူများအား ဆီထုတ်ကိုယ်စားလှယ်မှ တစ်ဆင့် စားသုံးသူများထံသို့ ဖြန့်ဖြူးရောင်းချလျက်ရှိပြီး ၊ ထိုသို့ရောင်းချ ရာတွင်လည်း စားအုန်းဆီ သတ်မှတ် ရည်ညွှန်းဈေး ထက် ကျော်လွန်၍ ရောင်းချမှုမရှိကြောင်း၊ ရောင်းချမှုလက်ခံ စာအုပ်များ ထားရှိခြင်း၊ သတ်မှတ်ရည် ညွှန်းဈေးဖြင့်သာ ရောင်းချခြင်း၊ အခြားမသမာသော နည်းလမ်းများသုံး၍ ရောင်းချမှု မရှိခြင်းနှင့် ဈေးကစားရန် ရည်ရွယ်ပြီး သိုလှောင်ထားခြင်းများမရှိကြောင်း သိရှိရပါသည်။ စာအုန်းဆီ ဝယ်ယူခွင့် စာအုပ်များဖြင့် တစ်ကြိမ်လျှင် တစ်အိမ်ထောင် (၅၀ ကျပ်သား) ရောင်းချပြီး တစ်လလျှင် ၂ ကြိမ်ရရှိကြောင်း၊ သတ်မှတ်ရည်ညွှန်းဈေး ဖြင့်သာ ရောင်းချလျက်ရှိကြောင်း သတင်းရရှိပါသည်။

 (DOCA ဧရာဝတီ)