သတင်းနှင့် လှုပ်ရှားမှုများ

  မွန်ပြည်နယ်၊ မော်လမြိုင်ခရိုင်၊ မုဒုံမြို့ရှိ သမိုင်းဝင်ဆံတော်ရှင် ကန်ကြီးစေတီတော် မြတ်ကြီး၏ (၁၅၁) ကြိမ်မြောက် သီတင်းကျွတ်ဗုဒ္ဓပူဇနိယပွဲတော် မြန်မာ့ရိုးရာ လှေလှော်ပြိုင်ပွဲ ဗိုလ်လုပွဲနှင့် ဆုချီးမြှင့်ပွဲကို ၆.၁၀.၂၀၂၅ ရက်နေ့ မွန်းလွဲ ၂ နာရီက ကန်ကြီးမင်္ဂလာ ကန်တော်၌ ကျင်းပသည်။

   မျိုးဆက်သစ်လူငယ်များ အားကစားစိတ်ဓာတ် ရှင်သန်ထက်မြက်စေရန်နှင့် ပြည်နယ် အတွင်း လှေလှော်အားကစားသမားကောင်းများ ပေါ်ထွက်လာရန်အတွက် လှေလှော်ပြိုင်ပွဲကို နှစ်စဉ်ကျင်းပလျက်ရှိရာ မြို့ပေါ်ရပ်ကွက်များမှ လှေလှော်အသင်း (၁၀) သင်းက ပါဝင် ယှဥ်ပြိုင်လှော်ခတ်ခဲ့ကြပြီး ဗိုလ်လုပွဲစဥ်တွင် မာရဇိန်လှေလှော်အသင်းနှင့် မျိုးဆက်သစ် လှေလှော်အသင်းတို့က အကြိတ်အနယ်ယှဥ်ပြိုင်လှော်ခတ်ကြ၍ မာရဇိန်လှေလှော်အသင်းက အနိုင်ရဗိုလ်ဆွဲခဲ့သည်။

   ဆက်လက်၍ ဆုပေးပွဲကိုကျင်းပရာ ကန်ကြီးစေတီတော် သြဝါဒါစရိယ ဆရာတော် ဘဒ္ဒန္တ ကေတုဝါရ၊ မြို့နယ်စီမံခန့်ခွဲရေးနှင့်အုပ်ချုပ်ရေးကောင်စီ ဥက္ကဋ္ဌ ဦးပြည်သိမ်း နှင့် အဖွဲ့ဝင်များ၊ ကန်ကြီးစေတီတော်ဂေါပကအဖွဲ့ဥက္ကဋ္ဌနှင့် တာဝန်ရှိသူများက ပထမဆု (တံခွန်စိုက်ဒိုင်း)၊ ဒုတိယဆု၊ တတိယဆု၊ စတုတ္ထဆုနှင့် တစ်ဦးချင်းဆုများ၊ ငွေသားဆုများကို အသီးသီးပေးအပ်ချီးမြှင့်ခဲ့ကြောင်း သိရသည်။

DOCA (မွန်)

   မွန်ပြည်နယ်၊ ပေါင်မြို့နယ်၌ မိုးစပါးဆစ်ပိုးကာကွယ်နှိမ်နင်းခြင်း ကွင်းသရုပ်ပြပွဲကို ၂.၁၀.၂၀၂၅ ရက်နေ့ နံနက်ပိုင်းက ကျေးရွာများ၌ ပြုလုပ်ခဲ့ရာ စိုက်ပျိုးရေးဦးစီးဌာနမှ ဦးစီးအရာရှိ ဦးကျော်စွာလှိုင်နှင့် ဝန်ထမ်းများနှင့်အတူ တောင်သူများ ဆောင်ရွက်ခဲ့ကြသည်။

   ထိုသို့ဆောင်ရွက်ရာတွင် စိုက်ပျိုးရေးဦးစီးဌာနမှ ဦးစီးအရာရှိ ဦးကျော်စွာလှိုင်က မိုးစပါးများတွင်ကျရောက်တတ်သော စပါးဆစ်ပိုးများမှ ကာကွယ်နှိမ်နင်းရန်အတွက် တောင်သူ များပိုးသတ်ဆေးနည်းစနစ်မှန်ကန်စွာ သုံးစွဲတတ်‌စေရေးနှင့် မိုးစပါးတွင် ဆစ်ပိုးကျရောက်မှု မရှိစေရေးအတွက် ပိုးသတ်ဆေးကြိုတင်ပက်ဖျန်းခြင်း တောင်သူပညာပေး ကွင်းသရုပ်ပြခြင်း ကို ရွာတန်းရှည်ကျေးရွာရှိ တောင်သူဦးဟန်ဝင်းအောင်၏လယ်မြေ ကွင်းအမှတ် (၇၆၂)၊ ဦးပိုင်အမှတ် ၃၀/၂ နှင့် ဖြူဘကျေးရွာရှိ တောင်သူ ဦးသန်းထွန်း၏လယ်မြေ ကွင်းအမှတ် (၇၇၂)၊ ဦးပိုင်အမှတ် ၃၀/၃ တို့တွင်ဆောင်ရွက်ခဲ့ရာ ကျေးရွာတစ်ရွာလျှင် တောင်သူ (၄၀) ဦးခန့် တက်ရောက်ခဲ့ကြောင်းသိရသည်။

ဆက်လက်၍ ကတွန်ကျေးရွာ၊ ပန်းကုန်းကျေးရွာ၊ သဲဖြူကုန်းကျေးရွာတို့တွင်လည်း ဆက်လက်ဆောင်ရွက်သွားမည်ဖြစ်ကြောင်းသိရသည်။

DOCA (မွန်)

   မွန်ပြည်နယ်၊ ပေါင်မြို့နယ်၌ ကုန်စျေးနှုန်းများတည်ငြိမ်ကျဆင်းစေရေး အခြေခံ စားသောက်ကုန်စည်များရောင်းချပေးခြင်းကို ၁.၁၀.၂၀၂၅ ရက်နေ့ နံနက်(၀၉း၀၀)နာရီက ကဒါရပ်ကွက် မင်္ဂလာဈေးတွင် ရောင်းချပေးလျက်ရှိကြောင်း သိရသည်။

   ထိုသို့ ရောင်းချရာတွင် မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ၏ ဦးဆောင်မှုဖြင့် အခြေခံစားသောက်ကုန်စည်များဖြစ်သည့် စားအုန်းဆီ တစ်ပိဿာ ရည်ညွှန်းစျေး (၇၂၃၆) ကျပ်၊ ကြက်ဥ (၄) လုံး (၁၅၀၀) ကျပ် စသည်တို့ကို စျေးနှုန်းချိုသာစွာဖြင့် ရောင်းချပေးခဲ့ရာ အများပြည်သူများ ဝယ်ယူအားပေးခဲ့ကြောင်း သိရသည်။

  အဆိုပါ စျေးရောင်းချခြင်းအား မြို့နယ်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဌ ဦးထင်လင်းအောင် မြို့နယ်ရဲတပ်ဖွဲ့မှူး ရဲမှူးမြင့်ဇော်ဦး၊ အဖွဲ့ဝင် ဦးကျော်လင်းဦး၊ မြို့နယ် စည်ပင်သာယာရေးအဖွဲ့ လက်ထောက်ညွှန်ကြားရေးမှူး ဦးထွန်းထွန်းဦးနှင့် စျေးကော်မတီဝင် များ၊ ရပ်ကွက်အုပ်ချုပ်ရေးမှူးများက သက်သာချောင်ချိရေးဆိုင်တွင် ရောင်းချပေးလျက် ရှိကြောင်း သိရသည်။

DOCA (မွန်)

   မွန်ပြည်နယ်၊ မုဒုံမြို့နယ်တွင် မိုးစပါးများဆစ်ပိုးကာကွယ်နှိမ်နင်းရေးအတွက် ဥကပ်ပါး နဂျီ (Trichogramma) လွှတ်ပေးခြင်း ကွင်းသရုပ်ပြပွဲကို ၄.၁၀.၂၀၂၅ ရက်နေ့ နံနက် (၀၉း၀၀) နာရီက ကျောက်တလုံးကျေးရွာရှိ တောင်သူ ဦးရာဂျူး၏ လယ်ကွင်းအမှတ် (၈၂၈) တွင် ပြုလုပ်ခဲ့သည်။

   ကွင်းသရုပ်ပြပွဲတွင် မုဒုံမြို့နယ် စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးငြိမ်းချမ်း ကျော်က ဥကပ်မှပေါက်လာသော ထရိုင်ဂိုဂရားမား ဥကပ်ပါးနဂျီများသည် စပါးသီးနှံနှင့် စားသုံး သီးနှံတို့၏ အဓိက ဖျက်ပိုးဖြစ်သည့် ဆစ်ပိုး၊ ရွက်လိပ်ပိုး၊ ရွက်လိပ် အိမ်ပိုး၊ ငမြှောင်တောင် ပိုးများ၏ ဥများကို ကပ်ပါးပြု၍ ဇီဝနည်းဖြင့် နှိမ်နင်းပေးနိုင်ပုံ၊ ဥကပ်ပါးနဂျီအသုံးပြုနည်း၊ ရည်ရွယ်ချက်နှင့် ဥကပ်ပါးနဂျီမှ ဖျက်ပိုးဥအတွင်း ဖွံ့ဖြိုးကြီးထွားမှု အဆင့်ဆင့်တို့ကို ရှင်းလင်းပြောကြားပြီး လယ်ဧကအတွင်း လက်တွေ့သရုပ်ပြသ၍ မြို့နယ်စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဋ္ဌ ဦးပြည်သိမ်းနှင့်အဖွဲ့ဝင်များ၊ ဌာနဆိုင်ရာများနှင့် တောင်သူများ က ကြည့်ရှုအားပေးခဲ့သည်။

   အဆိုပါ ထရိုင်ဂိုဂရားမား ဥကပ်ပါးနဂျီကို အသုံးပြုခြင်းဖြင့် လိပ်ပြာဖလံမျိုးဝင် ဖျက်ပိုးများကို ဥအဆင့်မှစ၍ နှိမ်နင်းနိုင်ကြောင်း၊ ပိုးသတ်ဆေးသုံးစွဲမှုကို လျှော့ချနိုင်ကြောင်း၊ တောင်သူများ၏ ကျန်းမာရေးကို ထိခိုက်မှု မရှိစေဘဲ သီးနှံများတွင် ပိုးသတ်ဆေး ဓာတ်ကြွင်းများ ကင်းဝေးစေနိုင်ကြောင်း၊ သီးနှံစိုက်ခင်းရှိ အခြားသက်ရှိများ မြေ၊ ရေနှင့် လေထုတို့ကို အန္တရာယ် မဖြစ်စေနိုင်ကြောင်း၊ လိပ်ပြာမျိုးရင်းဝင် ဖျက်ပိုးများနှိမ်နင်းရာတွင် ရေရှည်အသုံးပြုနိုင်ကာ ကုန်ကျစရိတ်သက်သာ၍ လုံခြုံစိတ်ချရသော စားသုံးသီးနှံများကို ထုတ်လုပ်ပေးနိုင်မည့် နည်းလမ်းဖြစ်ကြောင်း သိရသည်။

DOCA (မွန်)

                 စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအနေဖြင့် ၂၀၂၅ - ၂၀၂၆ ဘဏ္ဍာနှစ်တွင် ဦးစားပေးဈေးကွက်စောင့်ကြည့်စစ်ဆေးရမည့် ဝန်ဆောင်မှုကဏ္ဍ(၃)ရပ်ဖြစ်သည့် အစားအသောက် ရောင်းချသည့်ဝန်ဆောင်မှု၊ ဆက်သွယ်ရေးဝန်ဆောင်မှု ( အင်တာနက်ဝန်ဆောင်မှု )နှင့်သယ်ယူ  ပို့ဆောင်ရေးဝန်‌ဆောင်မှုတို့အား မြန်မာနိုင်ငံစားသုံးသူကာကွယ်ရေးကော်မရှင်၏ လုပ်ငန်းညှိနှိုင်း အစည်းအဝေး (၁/၂၀၂၅) တွင် သတ်မှတ်အချိန်ကာလအတွင်း ဦးစားပေးဈေးကွက်စောင့်ကြည့် စစ်ဆေးရန် ဆုံးဖြတ်ချက်အရ ဆက်သွယ်ရေးဝန်ဆောင်မှုကဏ္ဍအား ဩဂုတ်လမှ နိုဝင်ဘာလ အထိ တိုင်းဒေသကြီးအတွင်းရှိ ခရိုင်၊ မြို့နယ်များတွင် ဈေးကွက်စောင့်ကြည့် စစ်ဆေးလျက်ရှိကြောင်း သိရှိရ ပါသည်။

          ထိုသို့ ကွင်းဆင်းစစ်ဆေးရာတွင် စားသုံးသူများဘေးအန္တရာယ်ကင်းရှင်းရေး၊ ထုတ်ကုန်များလုံခြုံ စိတ်ချရမှုရှိစေရေး၊ ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းစွာ အသုံးပြုခွင့်ရရှိစေရေး၊ ဘေးအန္တရာယ်ရှိသော ကုန်စည်များဈေးကွက်အတွင်းမှ ပပျောက်သွားစေရေးတို့အတွက် ၂၀၂၅ ခုနှစ်၊ စက်တင်ဘာလအတွင်း ဆက်သွယ်ရေးဝန်ဆောင်မှု ( အင်တာနက်ဝန်ဆောင်မှု ) ( ၅ ) ခု အား စစ်ဆေး ဆောင်ရွက်ခဲ့ရာ ဝန်ဆောင်မှု (၅)ခုတို့သည် စားသုံးသူရေးရာဦးစီးဌာန၊ ရုံးချုပ်မှ ဆက်သွယ်ရေး ဝန်ဆောင်မှု (အင်တာနက်ဝန်ဆောင်)နှင့်စပ်လျဉ်း၍ ဦးစားပေးစစ်ဆေးရန် လမ်းညွှန်ထားသည့် အချက် အလက်များ၊ ဆက်သွယ်ရေးညွှန်ကြားမှုဦးစီးဌာနမှ လိုင်စင်ရရှိသည့် လုပ်ငန်းရှင်များနှင့် မိုဘိုင်း အော်ပရေတာများသို့ ညွှန်ကြားထားသည့် အချက်အလက်များနှင့် လိုက်နာဆောင်ရွက်မှုရှိကြောင်း၊ ဆက်သွယ်ရေးဝန်ဆောင်မှု (အင်တာနက်ဝန်ဆောင်မှု)များအား မိတ်ဖက်ဌာနများနှင့် သွားရောက် စစ်ဆေးပြီး ဝန်ဆောင်မှုကဏ္ဍနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာဆောင်ရွက်ရမည့် တာဝန်များကိုလည်း ရှင်းလင်းဆွေးနွေးခဲ့ပါကြောင်း၊ စားသုံးသူရေးရာဦးစီးဌာနမှ ထုတ်ပြန်ထားသည့် ဥပဒေ၊ နည်းဥပဒေ၊ အမိန့်၊ ညွှန်ကြားချက်၊ ဆက်သွယ်ရေးညွှန်ကြားမှုဦးစီးဌာနမှ လိုင်စင်ရရှိသည့် လုပ်ငန်းရှင်များနှင့် မိုဘိုင်းအော်ပရေတာများသို့ ညွှန်ကြားထားသည့် သိသင့်သိထိုက်သည့်အချက် အလက်များအား   အသိပညာပေးဆွေးနွေးခဲ့ကြောင်းသိရှိရပါသည်။

DOCA(စစ်ကိုင်း)